Fesili Mai le ʻAufaitau

O le ā le vaaiga a le faapotopotoga Kerisiano i le ʻai tele?

Ua taʻusalaina e le Afioga a le Atua le inu tele po o le onā ma le ʻai tele, e faapea o ni amioga e lē talafeagai mo se tasi e auauna i le Atua. O lea la, e tatau ona manatu le faapotopotoga Kerisiano i le masaniga lea o le ʻai tele e pei lava o le inu tele po o le onā. E lē avea se tagata ʻai tele ma inu tele o se tasi o le faapotopotoga Kerisiano.

Ua faapea mai le Faataoto 23:20, 21: “Aua neʻi fai oe ma so latou o ē inu tele i uaina; ma ē ua aai tetele i manu; auā o lē inu tele ma ʻai tele e faamativaina o ia; ma lē fia moe pea e ofu o ia i ofu masaesae.” I le Teuteronome 21:20, ua tatou faitau ai e uiga i tagata “vaogatā ma le finauvale,” o ē sa tatau ona faaoo i ai le oti i lalo o le Tulafono a Mose. E tusa ai ma lenei fuaiupu, e lua uiga o lenā tagata, o ia o se tagata ʻai tele ma le inu ia onā.’ E manino mai, i Isaraelu anamua, sa manatu ai i le ʻai tele o se amioga e lē talia e i latou o ē naunau e auauna i le Atua.

O le ā la le ʻai tele, ma o le ā le faamatalaga a le Tusi Paia Eleni e uiga i lenei mataupu? O le ʻai tele, ua faamatalaina e faapea, “o se tasi ua fai ma ana masani le naunau ʻai po o le soona ʻai faaloloto ma le inu tele.” O le mea moni, o le soona ʻai po o le ʻai tele, o se ituaiga lea o matapeʻapeʻa, ma ua taʻu  mai e le Afioga a le Atua iā i tatou o “ē matapeʻapeʻa” e lē fai le Malo o le Atua ma o latou tofi. (1 Korinito 6:9, 10; Filipi 3:18, 19; 1 Peteru 4:3) E lē gata i lea, ina ua lapataʻia e le aposetolo o Paulo ia Kerisiano faasaga i le faia o “galuega a le tino,” na ia taʻua ai “onāga, o poula, ma mea faapena.” (Kalatia 5:19-21) O le ʻai tele e masani ona ō faatasi ma le onāga ma poula. E lē gata i lea, o le ʻai tele e mautinoa lava e aofia ai i le faaupuga a Paulo “ma mea faapena.” E tutusa lava ma isi “galuega a le tino,” o se Kerisiano e lauiloa i le ʻai tele ma lē ua teena ma le uamaaa e suia lona uiga tuʻinanau, e tatau ona tuueseina ma le faapotopotoga.—1 Korinito 5:11, 13. *

E ui lava ua faagatusa e le Afioga a le Atua le ʻai tele ma le onā e faapea o le matapeʻapeʻa, ae e sili atu ona iloagofie se tasi ua onā i lo lē ua ʻai tele. Ae peitaʻi, e iloagatā lava pe a solia le tulafono o le tagata ʻai tele, auā e lē mafai ona iloa i uiga vaaia. O lea, e manaʻomia ai ona matuā faaeteete ma le uta mamao o toeaina i le faapotopotoga pe a taulimaina nei tulaga.

O se faaaʻoaʻoga, o le tino puta, e ono avea o se faailoga o le ʻai tele, ae e lē o taimi uma e saʻo ai lenā tulaga. O le tino puta, e ono avea o se maʻi. O āuga tuufaasolo e ono saosaolaumea foʻi i le tino puta. E tatau foʻi ona tatou manatua e faapea, o le tino puta, o se tulaga faaletino, a o le ʻai tele, o se uiga faalemafaufau. O le tino puta, ua faamatalaina e faapea, “o se tulaga e māfua mai i le tele o gaʻo i le tino,” a o le ʻai tele o le “matapeʻapeʻa po o le faaloloto.” O lea, e lē fuaina le ʻai tele i le telē o le tino o se tagata, ae o lona uiga agaʻi i meaʻai. E mafai lava ona tino lelei se tagata pe paee foʻi, ae ʻai tele. Ae lē gata i lea, e matuā eseese lava manatu i atunuu uma i le tulaga talafeagai e tatau ona iai le tino o se tagata.

O ā faailoga e iloa ai le ʻai tele? O se tagata ua masani i le ʻai tele, e lē taofiofia lana ʻai, e ʻai lava o ia seʻia oo ina gula. O le lē pulea o ia lava e faaalia ai lona lē manatu mamafa moni e uiga i le faalumaina ua ia aumaia iā Ieova ma le talaaga lelei o Ona tagata. (1 Korinito 10:31) I le isi itu, o se tagata e soona ʻai i nisi taimi, e lē faapea o le a vaai loa i ai o se tagata matapeʻapeʻa. (Efeso 5:5) Ae peitaʻi, i le agaga lea i le Kalatia 6:1, e ono manaʻomia e sea Kerisiano se fesoasoani. Ua faapea mai Paulo: “Le au uso e, afai e maua se tagata i se tasi agasala, o outou o i la le Agaga ia outou faafoʻi mai lē ua faapeaina ma le loto o le agamalu.”

Aiseā ua tāua faapitoa ai i aso nei le fautuaga a le Tusi Paia ina ia ʻalofia le ʻai tele? Auā na lapataʻi patino mai lava Iesu e uiga i o tatou aso, e faapea: “Ia outou, neʻi mafatia o outou loto, i le [“ʻai tele,” NW], ma le onā, ma le popole i mea a le olaga nei, neʻi faafuaseʻi mai lea aso iā te outou e pei o se mailei.” (Luka 21:34, 35) O le ʻalofia o le soona faaloloto i meaʻai, o se tasi lea o auala tāua e ʻalofia ai se olaga e faaleagaina ai lou itu faaleagaga.

O le pulea o le tagata, o se uiga faa-Kerisiano. (1 Timoteo 3:2, 11) O lea la, o le a fesoasoani Ieova iā i latou uma o ē saʻili ma le faamaoni ia faatatauina fautuaga a le Tusi Paia e faatatau i le ʻai ma le inu fuafua.—Eperu 4:16.

[Faamatalaga pito i lalo]