Le Uiga o le Agamalu o Ieova mo i Tatou

O TAVITA, o se tagata na oo i mafatiaga. Sa mafatia o ia i mea leaga na fai i ai e le tupu o Saulo, le tamā loto leaga o lana avā. E faatolu ona taumafai Saulo e fasiotia Tavita i se tao, ma e tele tausaga sa tulituliloa ai iā te ia ma avea ai o ia ma maumausolo. (1 Samuelu 18:11; 19:10; 26:20) Ae, sa faatasi pea Ieova ma Tavita. Sa laveaʻiina o ia e Ieova e lē gata mai iā Saulo, a o isi foʻi fili. O le mea lea e ao ai ona tatou talisapaia ia saafiafiga a Tavita ia e faaalia i le pese: “O Ieova, o loʻu papa lea, ma loʻu ʻolo, ma loʻu faaola. Ua e foaʻiina mai foʻi iā te aʻu le talita o le olataga mai iā te oe, o lou agamalu ua faasilisiliina ai aʻu.” (2 Samuelu 22:2, 36) Na faasilisiliina Tavita i Isaraelu. Ae na faapefea la ona aafia ai le agamalu o Ieova?

O loo taʻua i le Tusi Paia e faapea o Ieova e agamalu, ae e lē uiga faapea e tapulaa mea e silafia e Ieova pe faapea e lolo atu o ia i isi. Ae o le mea moni, o lenei uiga matagofie ua faaalia ai, e matuā tigāalofa o ia i tagata o ē e tauivi faamaoni ina ia maua lona finagalo malie ma faasalafa atu ai lona alofa mutimutivale iā i latou. I le Salamo 113:6, 7, ua tatou faitau ai: o Ieova, “o lē faamaulaloina e ia iā ia e silasila mai i le lagi atoa ma le lalolagi. Na te faatulaʻiina mai le tagatālautele nai le efuefu.” O Lona “faamaulalo” e uiga faapea, “e faanoʻunoʻu ifo o ia ina ia silafia ai” pe “ua faamaulaloina e ia o Ia lava ina ia silafia ai.” (Today’s English Version; Young’s Literal Translation of the Holy Bible) O lea la, e ‘faanoʻunoʻu ifo Ieova lava ia’ mai le lagi, po ua ‘faamaulalo e ia o Ia lava,’ ina ia silafia lelei mai Tavita, o se tagata lē lelei atoatoa ae lotomaulalo o lē e naunau e auauna i le Atua. O le la, ua faamautinoa mai ai foʻi iā i tatou e Tavita e faapea: E “maualuga Ieova, a e silasila mai o ia i lē ua faamaulalo.” (Salamo 138:6) O le auala alofa mutimutivale, onosai, ma le tigāalofa lea na feutagaʻi ai Ieova ma Tavita, e ao foʻi ona faamalosia ai i tatou uma o ē naunau e fai le finagalo o le Atua.

E ui lava o loo aaoina e Ieova le Pule Silisili ese se tulaga e aupito sili ona maualuga i le vateatea, ae e naunau o ia e feutagaʻi ma i tatou taʻitoʻatasi. O lenei mea, ua faamautinoa mai ai iā i tatou, e mafai ona tatou faalagolago atu i lana fesoasoani faaauau pea e oo lava i tulaga e aupito sili ona faigatā. E leai se māfuaaga tatou  te fefefe ai fua neʻi ona faagaloina i tatou. E faatatau i lona nuu o Isaraelu anamua, o loo taʻua saʻo ai Ieova e faapea, ‘o lē na manatua i latou, ina ua faamaulaloina i tatou; auā e faavavau lava lona alofa.’—Salamo 136:23.

Ona o auauna a Ieova i aso nei, e tatou te ono pagatia ai i faafitauli e pei ona oo iā Tavita. Atonu tatou te fesagaʻi ma tauemuga mai iā i latou e lē iloa le Atua, pe atonu foʻi o loo tatou tauivi ma le lē lelei o le soifua mālōlōina, po ua faavauvau foʻi ona o le maliu o se tasi. E tusa lava po o le ā le tulaga, ae a faamaoni o tatou loto, e mafai ona tatou faalatalata atu iā Ieova i le tatalo, ma ole atu i ai mo lona alofa mutimutivale. O le a ‘faanoʻunoʻu ifo’ Ieova ina ia silafia mai i tatou ma faafofoga mai i a tatou tatalo. Na tusi le faisalamo: “O fofoga o Ieova o loo faasaga i ē amiotonu, e liliu mai foʻi ona taliga i a latou alaga.” (Salamo 34:15) Pe e lē ootia ea lou loto pe a manatunatu i le uiga matagofie o Ieova, o le agamalu?

[Ata i le itulau 30]

E pei lava ona ia faafofoga i tatalo a Tavita, e naunau foʻi Ieova e faafofoga mai i a tatou tatalo i aso nei