O Ai le Taʻitaʻi Agavaa mo Aso Nei?

I le 1940, sa iai se tulaga pagatia i le taʻitaʻiga a le Palemene o Peretania. Talu ai na faalogologo ia David Lloyd George o lē ua 77 ona tausaga, i le finauga a taʻitaʻi o le malo, o ia na taʻitaʻia le manumalo o Peretania i le Taua Muamua a le Lalolagi, ma ua loa tausaga o auai i faiga faapolotiki, o lea na mafai ai ona ia fuafua lelei galuega a tagata maualuluga. I se lauga na ia faia i le Palemene a Peretania iā Me 8, na ia taʻua ai e faapea: “Ua nofo sauni le atunuu e fesagaʻia so o se mea faigatā tau lava ina ia iai ni taʻitaʻi lelei, ma ia faailoa manino mai e le Malo po o ā mea o latou sini i ai, ma ia mautinoa e le atunuu o loo faia e ona taʻitaʻi le mea aupito sili latou te mafaia.”

UA manino mai i upu a Lloyd George e faapea, ua mananaʻo tagata ina ia iai i o latou taʻitaʻi le tomai, ma ia faia ni taumafaiga faamaoni e faaleleia mea. Ua faapea mai sē na galue i le faia o faatosinaga o le palota: “Pe a palota tagata mo le tofi peresitene, e palota mo se tasi e latou te faatuatuaina e tuuina atu i ai o latou ola, lo latou lumanaʻi, ma a latou fanau.” O le leoleoina o sea maufaatuatuaina, o se galuega e sili ona telē. Aiseā?

Ua faatumulia lo tatou lalolagi i faafitauli e lē o mafai ona foʻia. O se faaaʻoaʻoga, o ai se taʻitaʻi ua faamaonia lona tofā mamao ma malosi e mafai ona ia aveesea solitulafono ma taua? O ai se taʻitaʻi i aso nei e iai ni alāmanuia ma le tigāalofa e na te saunia mo tagata uma ia meaʻai, vai mamā, ma le tausiga o le soifua mālōlōina? O ai e iai le poto ma le maumauaʻi e puipuia ma toe faafoʻisia ai le siʻosiʻomaga? O ai e lava lona agavaa ma le malosi e faamautinoa ai o le a olioli le fanau uma a tagata i se soifuaga faafualoa ma le fiafia?

E Lē Mafai e Tagata Ona Faia le Galuega

E moni ua mafai ona taulau nisi taʻitaʻi. Ae peitaʻi, a tele lava, e mafai ona latou taʻitaʻia mo na o ni nai sefulu ni tausaga; ma o ai la o le a sosoo mai? Sa fefulifulisaʻi i le mafaufau o se tasi o taʻitaʻi agavaa o Isaraelu anamua, le tupu o Solomona lenei fesili. Na ia faaiʻu mai e faapea: “Na ou ʻinoʻino foʻi i aʻu galuega uma ua ou tigā ai i lalo o le lā; auā ou te tuuina ia mo le tagata e nofo mai pe a mavae atu aʻu; o ai foʻi sē na te iloa po o se tagata poto, po o se vale ia? a e pule o ia i aʻu galuega uma ua ou tigā ai, ma  ou faia i loʻu poto i lalo o le lā. O le mea faatauvaa foʻi lea.”—Failauga 2:18, 19.

E leʻi iloa e Solomona po o le a taulau manuia pea ana galuega lelei po o le a lepetia uma e lē o le a suitulaga iā te ia. Sa o se “mea faatauvaa” iā Solomona le faagasologa o le suia o taʻitaʻi tuai i ni taʻitaʻi fou. Ua taʻua e isi faaliliuga o le Tusi Paia lenei faagasologa e faapea, e “lē aogā,” pe e “leai se uiga.”

I nisi taimi, e suia faamalosi ai taʻitaʻi ona o faiga sauā. Ua fasiotia nisi taʻitaʻi agavaa a o faia o latou tiute. Na taʻu atu ai e Abraham Lincoln, le peresitene matuā taualoa o Amerika i se aofia e faapea: “Ua filifilia aʻu ina ia tauaveina se tofiga mo se taimi puupuu, ma o aʻu lea ua outou vāai mai i ai i le taimi nei, ua ou faia se tofiga ua toe o se aga ona mavae atu lea.” Sa puupuu moni lava le taimi o lana taʻitaʻiga. E ui lava i mea uma na faia ma lona faanaunauga ina ia faia ni mea se tele mo tagata, ae e na o le fā tausaga na taʻitaʻia ai e peresitene Abraham Lincoln lona atunuu. I le amataga o le taimi lona lua o lana pulega, na fasiotia ai o ia e se tagata na manaʻo i se isi taʻitaʻi.

E lē mafai e taʻitaʻi faaletagata e sili ona lelei ona faamauina lo latou lumanaʻi. Pe e ao ona e faatuatuaina i latou e faamauina lou lumanaʻi? Ua faapea mai le Tusi Paia: “Aua tou te faatuatua i alii, po o le fanau a tagata, e lē o i ai se olataga. E alu ese lona agaga, e foʻi atu i le eleele na i ai o ia; e faaumatia i lea lava aso ona manatunatu.” Ua faaliliuina e le Tusi Paia a Byington le vaega mulimuli o le fuaiupu e 4 e faapea: “E faaumatia i lea lava aso lona agalelei.”—Salamo 146:3, 4.

Atonu e faigatā ona talia le fautuaga, e aua le faatuatua i taʻitaʻi faaletagata. Ae peitaʻi, e lē o faapea mai le Tusi Paia, o le a lē mafai lava ona maua e tagata se taʻitaʻi lelei ma toʻa. Ua faapea mai le Isaia e 32:1: “Faauta, e pule le tupu ma le amiotonu, e pule foʻi alii ma le tonu.” Ua saunia e Lē na Foafoaina le fanau a tagata, o Ieova le Atua “le tupu,” se Taʻitaʻi, o le a lē pine ona ia pulea atoatoa lea o mataupu fai a le lalolagi. O ai o ia? Ua faailoa mai o ia e valoaga o le Tusi Paia.

 O Lē e Agavaa Moni e Avea ma Taʻitaʻi

I le lua afe tausaga ua mavae, na taʻu atu ai e se agelu i se tamaʻitaʻi Iutaia o lona igoa o Maria: “O le a tō oe, ma e fanauina se tama tane, e te faaigoa iā te ia o Iesu. E sili o ia, e taʻua foʻi o le Alo o le Silisili ese; e foaʻi atu e [Ieova] le Atua iā te ia le nofoaiga a Tavita lona tamā; e fai o ia ma tupu i le aiga o Iakopo e faavavau; o lona malo foʻi e leai sona gataaga.” (Luka 1:31-33) Ioe, ua avea Iesu le Nasareta ma Tupu, e tusa ai ma le valoaga a le Tusi Paia.

E masani lava ona faaataina i galuega taulima faalelotu Iesu o se pepe, po o sē e tino vale ma ʻauvaivai, ma o sē e lolo gofie atu i so o se mea e oo iā te ia. O nei faatusa, e lē o faagaee ai le mautinoa o tagata iā te ia e avea o se Taʻitaʻi. Ae peitaʻi, o le Iesu Keriso moni e pei ona faamatalaina i le Tusi Paia, na soifua aʻe o se tagata tiotio, malosi, e maelega ma taulāgalaga. Sa iai a foʻi isi ona uiga ua agavaa ai o ia e avea ma taʻitaʻi. (Luka 2:52) O nisi nei o vala o ona uiga mataʻina.

Sa tausisia pea e Iesu le faamaoni atoatoa. Ona o ona uiga faamaoni ma le amio saʻo, na ia luʻia ai i luma o le lautele ona fili ina ia tuuina mai ni faitioga faasaga iā te ia. Ae latou te leʻi mafaia. (Ioane 8:46) O ana aʻoaʻoga lē faagutugutulua na faatosina ai le toʻatele o tagata loto faamaoni e avea ma ona soo.—Ioane 7:46; 8:28-30; 12:19.

Sa tuutoina atoatoa Iesu i le Atua. Sa maumauaʻi o ia ina ia faaiʻuina lana galuega na tofia mai e le Atua, lea e lē mafai e se tagata tetee po o se temoni ona taofia ai o ia. E leʻi faamataʻuina o ia i faiga sauā. (Luka 4:28-30) E leʻi taofia o ia e le lē lavā po o le fia taumafa. (Ioane 4:5-16, 31-34) E ui lava na tuulafoaʻia o ia e ana uō, ae e leʻi ʻalo ese o ia mai lona sini.—Mataio 26:55, 56; Ioane 18:3-9.

Sa manatu mamafa Iesu i tagata. Sa ia saunia meaʻai mo ē na matelāina. (Ioane 6:10, 11) Sa ia faamāfanafana atu i ē mafatia. (Luka 7:11-15) Sa ia toe faapupula ia tauaso, faalogoa tutuli ma toe faafoʻisia le soifua lelei o i latou sa manaʻomia ona faamālōlōina. (Mataio 12:22; Luka 8:43-48; Ioane 9:1-6) Sa ia faalaeiau atu i ona aposetolo galulue mamafa. (Ioane, mataupu e 13-17) Sa avea o ia o “le leoleo mamoe lelei” o lē na te tausia ana mamoe.—Ioane 10:11-14.

Sa naunau Iesu e galue. Sa ia mulumuluina vae o ona aposetolo ina ia aʻoaʻo ai iā i latou se lesona tāua. (Ioane 13:4-15) Sa pefua ona vae a o ia talaʻi atu le tala lelei i auala pefua o Isaraelu. (Luka 8:1) E oo lava ina ua ia fuafua e mālōlō i “se mea tuufua,” ae na ia tali atu ina ua saʻili le motu o tagata mo ia e avatu nisi faatonuga atili. (Mareko 6:30-34) I lea, ua ia faataatia ai se faaaʻoaʻoga lelei o le filigā mo Kerisiano uma.—1 Ioane 2:6.

Na faaiʻuina le tofiga o Iesu ma tuua loa le lalolagi. Ona o lona faamaoni, na tauia ai o ia e Ieova le Atua i le avea ma tupu ma soifua ai i le lagi e lē toe mafai ona maliu. Ua faapea mai le Tusi Paia e uiga iā Iesu ua toe faatūina: “Ua toe tū mai Keriso nai ē ua oti, e lē toe maliu lava o ia, e lē toe pule le oti iā te ia.” (Roma 6:9) Ia e mautinoa, o ia o se Taʻitaʻi aupito sili ona lelei o le fanau a tagata. Pe a pulea atoatoa e Iesu Keriso le lalolagi, e lē toe manaʻomia ai ona tuuina atu le pule i se isi tagata, pe suia foʻi le taʻitaʻi. E lē mafai lava ona aveesea o ia mai lona tulaga, ma e lē mafai e se tagata lē taualoa ona faaleagaina pe faatamaʻia ana galuega. Ae o le ā tonu lava le mea o le a ia faia e aogā mo le fanau a tagata?

Le Mea o le a Faia e Lenei Taʻitaʻi Fou

Ua faamatala mai le Salamo 72, se auʻiliʻiliga faavaloaga o le auala o le a pule ai lenei Tupu lelei atoatoa e lē toe maliu lava. I le fuaiupu e 7 ma le 8, ua tatou faitau ai: “O lana nofoaiga e tupu olaola mai ai lē ua amiotonu; e manuia tele ai, seʻia leai se masina. E pule foʻi o ia e pau mai i le tasi sami e oo atu i le tasi sami; e pau mai le vaitafe e oo atu i tuluʻiga o le lalolagi.” I lalo o lana pulega alofa, o le a olioli ai ē e aināina le lalolagi i le saogalemu e lē toe faalavelavea lava e faavavau. O le a ia faaumatia auupega uma o loo i ai ma aveesea mai loto  o tagata le faanaunauga o le fia tau. O le a suia atoatoa manatu o na tagata e pei o ni leona feʻai i aso nei, po o i latou e pei o ni urosa fia taui ma sui agaʻi i o latou tuaoi. (Isaia 11:1-9) O le a tupu olaola le filemu.

Ua faapea atili mai le Salamo 72 fuaiupu e 12 e oo i le 14: “E laveaʻi e ia o lē mativa i lona alaga mai; atoa ma lē ua puapuagatia, ma lē ua leai sona fesoasoani. E alofa atu ia i lē ua vaivai ma lē ua mativa; e faaola lava e ia ē ua matitiva. E laveaʻi o ia iā i latou ai le sauā ma le faamalo; e silisili foʻi o latou toto i lona manatu.” O le a avea ē faatauvaa, matitiva, ma ē mafatia, ma vaega o se aiga fiafia faaletagata, ua autasia i lalo o le taʻitaʻiga a le tupu o Iesu Keriso. O le a avea le olioli ma vala autū o ō latou olaga, ae lē o tigā ma mafatiaga.—Isaia 35:10.

Ua folafola mai i le fuaiupu e 16: O le a tele “taumafa o saito i le nuu i tumutumu lava o mauga” o le a fau ma soloi. I aso nei, ua avea ai pea le fia taumafa ma mafatiaga o le faitau miliona o tagata i le lalolagi. O faiga faapolotiki ma le matapeʻapeʻa ua masani ona taofia ai le tufatufaina tutusa o le anoanoaʻi o meaʻai, o lea ua maliliu ai le toʻatele o tagata aemaise lava tamaiti, ona o le matelāina. Ae i le pulega a Iesu Keriso, o le a mou atu ai lenei faafitauli. O le a manuia le laueleele i le tele o meaʻai susua. O le a taumamafa lelei le fanau uma a tagata.

Pe e te fia olioli i faamanuiaga o se taʻitaʻi lelei? Afai o lea, matou te fautuaina oe ina ia e aʻoaʻo atili e uiga i le Taʻitaʻi ua lē o toe umi se taimi ona faatinoina loa lea o lana pule atoatoa i le lalolagi aoao. O le a fiafia Molimau a Ieova e fesoasoani atu iā te oe e faia faapea. O le a lē avea o se mea e te faanoanoa ai ona ua fetalai atu Ieova le Atua lava ia i lona Alo: “A o aʻu, ua ou faauuina laʻu Tupu i luga o Siona loʻu mauga paia.”—Salamo 2:6.

[Pusa i le itulau 5]

AVEESEA FAAFUASEʻI MAI LE TULAGA PULE

E masani ona faalagolago se taʻitaʻi i le faaaloalo ma le lagolagosua a ona tagatānuu pe afai e na te saunia mo i latou se tulaga talafeagai o le filemu ma le saogalemu i o latou olaga. Ae peitaʻi, afai e iai se mea ua lē faatuatuaina ai o ia e tagata, e lē pine lava ae suitulaga ai se tasi iā te ia. O nisi nei o faaaʻoaʻoga o tulaga na faafuaseʻi ona aveesea faamalosi ai nisi o taʻitaʻi malolosi mai o latou tulaga.

Leaga mea e nonofo ai. I le faaiʻuga o lona 18 o senituri, na faamalosia ai le toʻatele o tagatānuu o Falani e ola i le totogiina o lāfoga tetele ae lē lava ni meaʻai. O nei tulaga na māfua ai ona faia se Fouvalega a Falani, o lea i le 1793, na iʻu ai ina fasiotia le tupu o Louis XVI, i le vavaeeseina o lona ao.

Taua. O le Taua Muamua a le Lalolagi, na faaiʻuina ai pulega a nisi o emeperoa e sili ona malolosi i le talafaasolopito. O se faaaʻoaʻoga, i le 1917, na faaitiitia ai meaʻai i St. Petersburg, i Rusia ona o le taua, ma na iʻu ai i se Fouvalega iā Fepuari. O le fouvalega lenei na aveesea ai ia Czar Nicholas II mai le nofoālii ma iʻu atu ai i pulega faa-Komunisi. Iā Novema 1918, na mananaʻo ai Siamani i se filemu, ae e leʻi taofia ia vaegaau soofaatasi mai le tau pea seʻia oo ina suia le taʻitaʻi. O le iʻuga, na faaaunuua faamalosi ai le tupu o Siamani, o Wilhelm II i Holani.

Faanaunau mo ni faiga malo eseese. I le 1989, na aveesea ai faiga malo faa-Komunisi. O pulega la sa foliga mai sa maaa e pei o se maa, na nutililii ina ua teena e o latou tagatānuu pulega faa-Komunisi ae faavaeina ituaiga pulega eseese.

[Ata i le itulau 7]

Sa fagaina e Iesu tagata na fia aai, faamālōlō maʻi, ma faataatia ni faaaʻoaʻoga lelei mo Kerisiano uma

[Faamatalaga i Ata i le itulau 4]

Lloyd George: Ata na puʻeina e Kurt Hutton/Picture Post/Getty Images