Po ua E Tofo i le Fiafia e Maua Mai i le Foaʻi Atu?

E TOETOE lava 50 tausaga o galue maelega se tuafafine i le auaunaga faa-Kerisiano. E ui lava ua oo ai ina vaivai o ia ona o aafiaga o le soifuaga matua, ae sa ia maumauaʻi pea ina ia asiasi atu i le Maota fou o le Malo faatoʻā uma ona fausia. I le pipii atu i le tauʻau o se uso Kerisiano loto fesoasoani, na ulufale atu ai o ia i le maota ma savali saʻo atu lava i le mea sa taulaʻi atu i ai o ia; o le pusa o meaalofa tauofo. Sa ia tuuina i le pusa se tupe e fai lava si telē lea na ia faaputuina mo lea fuafuaga. E ui sa lē mafai ona auai o ia i le fausiaina o le maota, ae sa manaʻo e avatu sana fesoasoani.

Atonu ua faamanatu atu e lenei fafine Kerisiano iā te oe se isi foʻi fafine faamaoni; le “fafine mativa ua oti lana tane” lea sa mātauina e Iesu o lafo ana tupe iti e lua i le pusa e teu ai tupe o le malumalu. E lē o faailoaina mai iā i tatou e uiga i lona tulaga, ae sa ono faigatā le tulaga tautupe mo se fafine sa leai se tane i tuā i inā. Ae e mautinoa lava, sa lagona e Iesu le tigāalofa mo lenei fafine, auā sa malamalama lelei o ia i lona tulaga faigatā. I le faasino atu o ia e fai ma faaaʻoaʻoga i ona soo, na ia fetalai atu ai, o le meaalofa itiiti a lenei fafine, ua faailoa atu ai, “ua ia lafo ana mea uma sa iā te ia, o ana mea uma e ola ai.”—Mareko 12:41-44.

Aiseā na faia ai e lenei fafine mativa ua oti lana tane lenei meaalofa? E manino lava, talu ai sa tuutoina atoatoa atu o ia iā Ieova le Atua, lea sa faaautū atu le tapuaʻiga iā te ia i le malumalu i Ierusalema. E ui sa faatapulaa mea na mafai ona ia faia, ae sa manaʻo o ia e faaauiluma le tulaga o le auaunaga paia. E lē taumatea lona matuā olioli i le foaʻiina atu o se meaalofa i le tele na ia mafai ai.

Foaʻi e Lagolago ai le Galuega a Ieova

O le foaʻiina atu o mea faitino ma tupe, ua avea pea ma vala tāua o le tapuaʻiga mamā, ma o se mea foʻi lea e matuā olioli ai. (1 Nofoaiga a Tupu 29:9) I Isaraelu anamua, e lē gata o meaalofa sa faamatagofie ai le malumalu, ae sa faagaoioia ai foʻi vala uma o le tapuaʻiga iā Ieova i aso fai soo. Sa faamaʻoti atu e le Tulafono i le fanauga a Isaraelu ina ia foaʻi mea uma e sefuluaʻi a latou mea e tausia ai sa Levī, o ē sa auauna i le malumalu. Ae sa foaʻi atu foʻi e sa Levī iā Ieova le sefuluaʻi o mea na latou maua.—Numera 18:21-29.

E ui ua tuusaunoa ia Kerisiano mai mea sa manaʻomia e le feagaiga o le Tulafono, ae e leʻi  suia ai le mataupu silisili e faapea, e manaʻomia e auauna a le Atua ona faia ni foaʻi faaletino e lagolago ai le tapuaʻiga moni. (Kalatia 5:1) E lē gata i lea, sa manatu i ai Kerisiano o le uluaʻi senituri o se mea e olioli ai le faia o ni meaalofa e fesoasoani ai i manaʻoga o o latou uso. (Galuega 2:45, 46) Ua faamanatu mai e le aposetolo o Paulo i Kerisiano e faapea, e pei ona foaʻi mai pea ma le aaofoaʻi e le Atua mea lelei mo i latou, e ao foʻi la ona latou faaalia le limamafola i isi. Na ia tusi mai: “Ia e matuā fai atu i ē mauʻoa i lenei olaga, aua neʻi faamaualuluga i latou, aua foʻi le faatuatua i le oloa e faalētumau, a o le Atua soifua, o loo foaʻi tele mai iā i tatou mea uma lava e faafiafia ai; ina ia latou agalelei atu, ia tamaoaiga i galuega lelei, ia mataalofa, ia latou avatu fua a latou mea, ia latou teua oloa mo i latou lava, o le faavae lelei mo aso atalī, ina ia latou fetagofi atu i le ola e faavavau.” (1 Timoteo 6:17-19, LT; 2 Korinito 9:11) O le mea moni, e mai mea na oo iā Paulo, na mafai ai ona ia ioeina fetalaiga a Iesu: “E sili le manuia o lē na te foaʻi atu, i lo lē na te talia mai.”—Galuega 20:35.

Foaʻi a Kerisiano i Aso Nei

I aso nei, o loo faaaogā pea e auauna a Ieova a latou alāmanuia e fesoasoani ai i isi ma lagolago ai i le galuega a le Atua. E oo lava iā i latou e itiiti le tamaoaiga, e faia ni foaʻi e tusa ma le mea latou te mafaia. Ua lagona e “le auauna faamaoni ma le mafaufau” o lona tiute tauave iā Ieova o le faaaogā tatau o nei meaalofa uma ua foaʻi atu. (Mataio 24:45) Ua faaaogāina ia meaalofa e faagaoioia ai ofisa o lālā, e faaliliu ma saunia ai Tusi Paia ma lomiga faale-Tusi Paia, ma fuafuaina ai faatasitasiga tetele faa-Kerisiano, e toleni ma aauina atu ai ovasia femalagaaʻi ma misionare, saunia ai fesoasoani mo mala faalenatura, faapea ma le tele o isi fuafuaga manaʻomia. Seʻi tatou taulaʻi atu i se tasi o fuafuaga faapena; o le fesoasoani lea i le saunia o nofoaga mo le tapuaʻiga.

E tele taimi e feiloaʻi ai Molimau a Ieova i o latou Maota o le Malo i vaiaso taʻitasi ina ia maua mai aogā i aʻoaʻoga faaleagaga ma aufaatasiga mamā. Ae peitaʻi, ona o le tulaga tau tamaoaiga i le tele o atunuu, e lē mafai ai e Molimau a Ieova ona faatupeina le fausiaina o ō latou Maota o le Malo e aunoa ma le fesoasoani mai o isi. O lea la, i le 1999, na amata ai ona faia e Molimau a Ieova se polokalame e faaaogā ai tupe mai atunuu tamaoaiga e fesoasoani ai i le fausiaina o Maota o le Malo i atunuu matitiva. E lē gata i lea, e faitau afe le ʻaufaigaluega  tauofo ua faaaogā o latou taimi ma tomai, e masani lava ona galulue i vaipanoa maotua o nei atunuu. A o faagasolo faugāfale, ua aʻoaʻo ai e Molimau o na atunuu ia tomai e fausia ai fale ma le auala e faaleleia ai, ma mafai ai foʻi ona faatau meafaigaluega ma mea faufale e manaʻomia ona o Faaputuga Tupe mo Maota o le Malo. Ua matuā lotofaafetai lava Molimau o loo latou faaaogāina nei maota fou ona o le tuuina atu e o latou uso talitonu le taimi faapea ma tupe. E foaʻi foʻi e Molimau i lea atunuu ia meaalofa i masina taʻitasi ina ia tausia ai le lelei o le Maota o le Malo fou, fesoasoani foʻi i le totogiina o tupe na faaalu i le fausiaina o le maota, ma le fausiaina o nisi Maota o le Malo.

E fausia Maota o le Malo e faaaogā ai metotia ma mea faufale i le atunuu lava ia. E ui lava e lē lavelave le fausiaina o nei maota, ae e matagofie, e aogā, ma mālū. Ina ua amata le polokalame o faugāfale i le 1999, na aofia ai ni atunuu se 40 e lē tele ni a latou alāmanuia. Talu mai lenā taimi, na faalauteleina atu ai le polokalame o faugāfale ma faaaofia ai atunuu e 116, ua aofia ai e sili atu i le ʻafa o faapotopotoga a Molimau a Ieova i le lalolagi aoao. I le 5 tausaga ua mavae, e sili atu i le 9,000 Maota o le Malo na fausiaina i lalo o lenei fuafuaga, o se faatatauga e sili atu i le 5 maota fou e fausia i le aso e tasi. Ae i nei lava atunuu e 116 o loo iai pea se manaʻoga moni mo ni Maota fou o le Malo se 14,500. Ona o le faamanuia a Ieova faapea le loto naunau ma le aao mafola o Molimau i le lalolagi aoao, e iai le faamoemoe o le a lava pea ni tupe mo le faafetaiaʻia o lenei manaʻoga.—Salamo 127:1.

O Maota o le Malo ua Siitia ai le Faatuputeleina

O ā aafiaga ua faia e lenei taumafaiga tele i Molimau i o latou lava atunuu faapea le galuega talaʻi o le Malo? I le tele o atunuu, ua iai se faatelega mataʻina o i latou e auai i sauniga ina ua mavae le fausiaina o se Maota o le Malo fou. O se tala masani, o loo aumaia i le lipoti lenei mai Burundi: “I le taimi lava na māeʻa ai ona fausia le Maota o le Malo, na faatumulia ai. O se faaaʻoaʻoga, na fausia se tasi Maota o le Malo mo se faapotopotoga e tusa na o le toʻa 100 e auai i a latou sauniga. E 150 e ofi lelei ai lava i lo latou Maota o le Malo fou. Ae e oo ane i le taimi na uma ai ona fausiaina, ua 250 i latou na auai i sauniga.”

Aiseā ua tupu ai lenei faatelega? O se tasi o  māfuaaga, ona o vaega o le ʻautalaʻi o le Malo ia sa leai se maota na fai ai a latou sauniga ae na faapotopoto i lalo o se laau po o se laufanua, e masani ona masalomia e isi. I se tasi atunuu, o feteenaʻiga i le va o ituaiga, sa fesootaʻi ma vaega toʻaitiiti faalotu, ma sa faatonuina ai e le tulafono ina ia faia sauniga faalelotu uma i totonu o se fale tapuaʻi.

O le iai o ō latou lava maota, sa fesoasoani foʻi e faailoa atu ai i le nuu, o Molimau a Ieova e lē o ni soo o se faifeʻau se toʻatasi. Ua tusi mai le ofisa o le lālā o Molimau a Ieova i Zimbabwe e faapea: “I aso ua mavae, sa masani ona feiloaʻi uso i lenei vaipanoa i fale o aiga, ma sa faaigoa e tagata o le nuu le faapotopotoga lea sa faapotopoto i le fale o lea uso i lona igoa. E latou te faasino atu i uso e faapea o i latou o le ʻaulotu a ‘Tui ma Seve.’ Ae i le taimi nei, ua suia na mea uma ina ua vāai tagata i faailoilo o faailoaina manino ai maota taʻitasi o se ‘Maota o le Malo o Molimau a Ieova.’”

Foaʻi ma le Fiafia

Na tusi le aposetolo o Paulo e faapea: “E alofa le Atua i lē ua foaʻi ma le loto malie.”  (2 Korinito 9:7) O le mea moni, e matuā fesoasoani ia foaʻi tetele. Ae o le tele o vaega o foaʻi i le galuega a Molimau a Ieova i le lalolagi aoao, e maua mai i pusa mo meaalofa o loo faatutūina i totonu o Maota o le Malo. Pe telē pe itiiti, e tāua lava ia meaalofa uma ma e lē faagaloina. Ia manatua le mea na nofo ai Iesu lea sa mafai ona ia silafia atu ai le fafine mativa ua oti lana tane o foaʻi atu tupe iti e lua. Sa silafia foʻi o ia e Ieova ma agelu. E tatou te lē o iloa le igoa o lenei fafine, ae na faamautinoa e Ieova ua faamauina i le Tusi Paia e tumau pea lana gaoioiga lē manatu faapito.

E lē gata i le fausiaina o Maota o le Malo, ae e lagolagoina foʻi e a tatou foaʻi tauofo isi vala uma o le galuega matuā tāua o le Malo. O le lagolagosua i lenei auala, ua pogai ai ona tatou olioli, “a e faatele ai le viiga i le Atua i le tele o le faafetai.” (2 Korinito 9:12) Ua lipotia mai e o tatou uso Kerisiano i Benin e faapea: “I aso taʻitasi, e ō aʻe ai iā Ieova ia tatalo o le lotofaafetai mo fesoasoani tautupe mai le ʻauuso faavaomalo.” I le taimi lava e tasi, ua tofo ai foʻi i tatou uma lava o loo lagolagoina le galuega o le Malo e ala i foaʻi tautupe i le fiafia e maua mai le foaʻi atu faa-Kerisiano!

[Pusa/Ata i le itulau 22]

Auala ua Filifilia e Nisi e Faia ai Foaʻi

MEAALOFA MO LE GALUEGA I LE LALOLAGI AOAO

E toʻatele tagata ua tuuesea se vaega tupe, po o se vaega faaagaga, e lafo i pusa o loo faailogaina o “Meaalofa mo le Galuega i le Lalolagi Aoao.—Mataio 24:14.”

I masina taʻitasi, e avatu ai e faapotopotoga nei tupe i le ofisa o le lālā o Molimau a Ieova o loo vaavaaia o latou atunuu. E mafai foʻi ona auina saʻo atu foaʻi tauofo o tupe i le Watch Tower Bible and Tract Society of Pennsylvania, c/o Office of the Secretary and Treasurer 25 Columbia Heights, Brooklyn, New York 11201-2483, po o le ofisa o le lālā o loo vaavaaia lou atunuu. E ao foʻi ona auina atu ia siaki tupe i le “Watch Tower.” E mafai foʻi ona foaʻi atu maatāua po o isi mea tāua. O na foaʻi e tatau ona auina atu faatasi ma se tusi puupuu e faamanino atu ai o lenā foaʻi e leai ni tuutuuga.

FUAFUAGA O FOAʻI E IAI TUUTUUGA

E mafai ona foaʻi atu se tupe e teuina i lalo o se āiāiga faapitoa mo le aogā o le Watch Tower. Ae e mafai ona toe faafoʻi atu lenā foaʻi i lē e ana le tupe pe a ia manaʻomia. Mo nisi faamatalaga, faamolemole faafesootaʻi le Office of the Secretary and Treasurer i le tuatusi o loo taʻua i luga.

FUAFUAGA O FOAʻI FAAMEAALOFA

E lē gata i foaʻi tuusaʻo tautupe, ae e iai isi auala e faia ai foaʻi ina ia fesoasoani mo le auaunaga o le Malo i le lalolagi aoao. E aofia ai mea nei:

Inisiua: E mafai ona avea le Watch Tower ma faalapotopotoga e uili atu i ai le taui po o le polisia o le inisiua o le ola o se tasi, po o taui e maua pe a litaea pe maua foʻi le penisione.

Teugātupe i le Faletupe: O teugātupe i le faletupe, tusi o teugātupe, po o vaega tupe e maua e le tagata pe a faamālōlō litaea, e mafai ona tuu faamavaega mo le Watch Tower, e tusa ai ma faatulagaga manaʻomia a le faletupe o le atunuu.

Tupe Faafaigaluega (Stock) ma Pepa Faamaonia mo Tupe (Bond): O tupe faafaigaluega ma pepa faamaonia mo tupe, e mafai ona foaʻi faameaalofa tuusaʻo atu i le Watch Tower.

Fanua ma Fale: E mafai ona foaʻi atu au mea totino e pei fanua po o fale, e ala i le foaʻi saʻo atu, po o le tuu foʻi o le fale po o le fanua e nofo ai pea lē e ana, seʻia oo ina maliu. Ia faafesootaʻi le ofisa o le lālā i lou atunuu a o leʻi faapepaina faaletulafono so o se fanua totino o le a foaʻi atu.

Tupe Faameaalofa e Iai Tuutuuga Faaletausaga (Gift Annuity): O tupe faameaalofa e iai tuutuuga faaletausaga, ua fuafuaina e avatu e se tasi i le Watch Tower ni tupe po o tupe faafaigaluega ma pepa faamaonia. Ae i le faia o se faafesuiaʻiga, e maua ai e lē e ana le foaʻi faameaalofa, po o se tasi ua ia tofia, se aofaʻiga patino o se tupe e avatu i ai i tausaga taʻitasi a o soifua pea o ia. O le a faaitiitia le lāfoga e totogi e le tagata na faia le foaʻi, i le tausaga tonu na faamautū ai le foaʻiina atu o lana meaalofa.

Uili ma Mavaega: E mafai ona faaui atu meatotino po o se vaega tupe i le Watch Tower e ala i se uili ua faia e tusa ai ma le tulafono, pe avea foʻi le Watch Tower ma lē e mauaina le taui o se feagaiga o se teugātupe ua tuu faamavaega. O se teugātupe ua tuu faamavaega e faia mo le manuia o se faalapotopotoga faalelotu, e ono maua mai ai nisi fesoasoani tau lāfoga.

E pei ona faailoa mai i le faaupuga “fuafuaga o foaʻi faameaalofa,” o nei ituaiga o foaʻi e manaʻomia ai ona fuafua lelei e lē e ana le foaʻi. Ina ia fesoasoani i ē o loo fia fesoasoani atu i le galuega a Molimau a Ieova i le lalolagi aoao e ala i nisi o foaʻi faameaalofa ua fuafuaina lelei, ua saunia ai nei se polosiua i le faa-Peretania ma le faa-Sepania ua faaulutalaina Charitable Planning to Benefit Kingdom Service Worldwide. Na tusia le polosiua ina ia tali atu ai i le tele o fesili ua oo mai e tusa ai ma meaalofa, uili, ma mavaega. Ina ua uma ona faitauina le polosiua ma talanoa faatasi ma a latou lava loia po o tagata faufautua tau i lāfoga, ua mafai ai e le toʻatele ona fesoasoani e lagolagoina le galuega a Molimau a Ieova i le lalolagi aoao, ma faateleina ai faamanuiaga tau lāfoga ona o le faia faapea. E mafai ona maua lenei polosiua mai le Charitable Planning Office pe a talosaga mo se kopi.

Mo nisi faamatalaga atili, e mafai ona e faafesootaʻi atu le Charitable Planning Office, e ala i lou tusi atu pe telefoni atu foʻi i le tuatusi o loo taʻua i lalo, po o le ofisa o Molimau a Ieova i lou atunuu.

Charitable Planning Office

Watch Tower Bible and Tract Society of Pennsylvania

100 Watchtower Drive,

Patterson, New York 12563-9204

Telefoni: (845) 306-0707

[Ata i le itulau 20, 21]

O nofoaga tuai ma fou e fai ai sauniga a Molimau a Ieova

Zambia

Le Malo o Aferika Tutotonu