Fesili Mai le ʻAufaitau

O fea o le a iai temoni i le taimi o le Pulega a Keriso i le Afe Tausaga?

E lē o maʻoti mai le tali a le Tusi Paia i lenei fesili. Ae peitaʻi, e mafai lava ona tatou maua se faaiʻuga saʻo i le mea o le a iai temoni i le taimi o le Pulega o le Meleniuma a Keriso.

I le saunia o se faataʻimuaga o le mea o le a tupu i le amataga ma le faaiʻuga o lenei Meleniuma, ua faapea mai le aposetolo o Ioane: “Na aʻu iloa foʻi le agelu ua alu ifo i le lagi, ua iā te ia le ki o le to e lē gata, ua i lona lima foʻi le maea uʻamea tele. Ua puʻe foʻi e ia le tarako, o le gata tuai, o le tiapolo lea ma Satani, ua ia fusifusi foʻi iā te ia i tausaga e afe. Ua ia lafo foʻi iā te ia i le to e lē gata, ua pupuni foʻi iā te ia, ma tuuina atu le faamaufaailoga i ona luga, ina ia lē toe faasesēina e ia o nuu, seʻia atoa ia tausaga e afe; a mavae foʻi ia, e tatau ona tatalaina o ia i nai aso.” (Faaaliga 20:1-3) E na o le tuuina o Satani i le to e lē gata ma lona toe tatalaina mai mo se taimi puupuu o loo talanoaina i fuaiupu nei. E ui lava e lē o taʻua ai temoni, ae e talafeagai foʻi ona faapea, pe a puʻeina e le agelu o iai le ki o le to e lē gata; o Iesu Keriso faamamaluina lea, le Tiapolo ma lafo i le to e lē gata, o le mea foʻi lenā o le a ia faia i temoni.—Faaaliga 9:11.

I le avea ma tupu i le lagi i le 1914, na faia ai e Iesu Keriso se gaoioiga mataʻina lea na aafia ai Satani faapea ma temoni. Ua faapea mai le Faaaliga 12:7-9: “Ua tau foʻi le taua i le lagi; o Mikaele ma ana agelu ua latou tau ma le tarako, ua ʻau foʻi le tarako ma ana agelu [temoni] e tau ai le taua, a ua latou lē manumalo, e lē toe maua foʻi i le lagi se mea latou te nonofo ai. Ua lafo foʻi le tarako tele, o le gata tuai lea, ua igoa i le tiapolo, i le ma Satani, o lē faasesē i le lalolagi uma; ua lafo ifo i le lalolagi, ua lafo foʻi ana agelu faatasi ma ia.” Talu mai lenā taimi, ua taofiofia ai pea Satani ma ana temoni i le nofoaga i le lalolagi. E mafai ona manatu e faapea, afai ua faasā e Iesu Keriso gaoioiga a Satani ina ia aveesea ai ana taaʻiga leaga i le lalolagi, o le a faapena foʻi ona ia faia i temoni.

Seʻi iloilo foʻi le uluaʻi valoaga o le Tusi Paia. Ua faapea ona faitauina: “Ou te [Atua] faatupuina le feitagaʻi iā te oulua [Satani] ma le fafine [faalapotopotoga faalelagi a Ieova], o lau fanau [fanau a Satani] foʻi ma lana fanau [Iesu Keriso]; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) O le tuʻimomomoina o le ulu o le gata, e aofia ai le tuuina o Satani i le to e lē gata i le taimi o le Pulega a Keriso i le Afe Tausaga. Ua taʻua atili i le valoaga e faapea, o le a iai le feitagaʻi i le va o Lē o le a faia le tuʻimomomoina ma le fanau a Satani. O lenei fanau, po o le faalapotopotoga, e aofia ai se vaega e lē vaaia o loo faia aʻe i agelu leaga, po o temoni. O lea, ua tatau ai ona manatu e faapea, pe a tuuina e Iesu Satani i le to e lē gata, e na te fusifusia foʻi temoni ma tuu i le to e lē gata. O le mea moni, e matuā fefefe nei agaga leaga i le tuuina o i latou i le to e lē gata, ua faaalia ai, o loo latou iloa lelei e uiga i lenei taofiofia o i latou.—Luka 8:31.

Pe e mafai la ona faapea, ua lē taʻua temoni i le Faaaliga 20:1-3 talu ai o le a faaumatia  i latou iā Amaketo faatasi ma se vaega vaaia o le fanau a Satani? Ua faaalia i le Tusi Paia, atonu e lē o le tulaga lenā. Ua faapea mai e faatatau i le iʻuga o Satani: “O le tiapolo foʻi o lē na faasesē iā te i latou, ua lafoina o ia i le lepa afi ma le teio, o i ai le manu feʻai ma le perofeta pepelo; e puapuagaina ai i latou i le ao ma le pō e faavavau, faavavau lava.” (Faaaliga 20:10) O le manufeʻai ma le perofeta pepelo, o ni vaega moni faapolotiki, ma o se vaega o le faalapotopotoga vaaia a Satani. (Faaaliga 13:1, 2, 11-14; 16:13, 14) O le a faaumatia latou iā Amaketo, pe a tuʻimomomoina ma faaumatia e le Malo o le Atua malo uma o le lalolagi. (Tanielu 2:44) Ua faasino atu le Tusi Paia “i le afi e faavavau, ua saunia mo le tiapolo ma ana agelu.” (Mataio 25:41) O le a lafoina Satani ma ana temoni i lea lava “lepa afi ma le teio,” lea foʻi o le a faaumatiaina ai e faavavau le manufeʻai ma le perofeta pepelo. Pe na faaumatia iā Amaketo le vaega sili ona malosi o le fanau a Satani po o agaga lē vaaia, e mautinoa lava, ua uma ona taʻua temoni e faapea ua iai i lenā lepa afi faafaatusa faatasi ma le manufeʻai ma le perofeta pepelo. O le lē taʻua o i latou i le Faaaliga 20:10, ua faaalia ai e lē o faaumatia temoni iā Amaketo.

Talu ai e lē o taʻu patino maia temoni e faapea ua lafo i le to e lē gata, e lē o taʻu patino maia foʻi i latou e faapea ua tatalaina mai i le to e lē gata. Ae peitaʻi, e tutusa lava lo latou iʻuga ma le Tiapolo. Pe a uma ona tatalaina mai faatasi ma le Tiapolo ma galulue faatasi ma Satani i le taimi o le tofotofoga mulimuli o le fanau a tagata, i le iʻuga o le afe tausaga, ona lafoina ai foʻi lea o temoni i le lepa afi ma i lea o le a faaumatia ai i latou e faavavau lava.—Faaaliga 20:7-9.

I lea, e ui lava o loo taʻua na o Satani i le Faaaliga 20:1-3 e faapea, ua puʻeina ma lafo i le to e lē gata, e lē toe mafai ai ona gaoioi, ae e mafai ona tatou faia se faaiʻuga saʻo e faapea, o le a fusifusia foʻi ana agelu ma lafo i le to e lē gata. O le a lē toe faatagaina Satani po o ana ʻau a temoni e faalavelave i le faataunuuga o fuafuaga a le Atua i le faafoʻisia o le lalolagi e avea ma parataiso ma toe faafoʻisia tagata i le lelei atoatoa a o faagasolo le Pulega o le Afe Tausaga a Keriso.