Ia Sa‘ili iā Ieova o Lē e Su‘esu‘e i Loto
Ia Saʻili iā Ieova o Lē e Suʻesuʻe i Loto
“Ia outou saʻili mai iā te aʻu, tou te ola ai.”—AMOSA 5:4.
1, 2. O le ā le uiga pe a faapea mai le Tusi Paia e “vaai Ieova i le loto”?
NA FETALAI Ieova i le perofeta o Samuelu: “E vaai tagata i le tino, a e vaai Ieova i le loto.” (1 Samuelu 16:7) E faapefea ona silasila pe “vaai Ieova i le loto”?
2 I le Tusi Paia, e faaatagia e le loto o se tasi lona tagata i totonu—o ona faanaunauga, manatunatuga, faalogona ma mea e fiafia i ai. O lona uiga la a faapea mai le Tusi Paia e silasila Ieova i le loto, e lē faapea e tagaʻi Ieova i foliga vaaia o le tagata, peitaʻi e uaʻi atu o ia i le tagata i totonu.
Suʻesuʻe e Ieova Isaraelu
3, 4. E tusa ai ma le Amosa 6:4-6, o ā tulaga na iai i le malo o ituaiga e sefulu o Isaraelu?
3 A o silasila Lē e Suʻesuʻeina loto, i le malo o ituaiga e sefulu o Isaraelu i aso o Amosa, o le ā na ia silafia? O loo taʻua i le Amosa 6:4-6 tamāloloa o “ē taooto i moega nifo elefane, ma latou taooto i o latou moega.” O loo latou “aai i tamaʻi mamoe o le lafu, ma tamaʻi povi ai le fale povi.” Ua latou “sauni mo i latou laaupese” ma ua “inu uaina i ipu tetele.”
4 Muamua lava, e ono foliga mai o se tala manaia. I totonu o o latou fale matagofie, na olioli ai tagata maumea i taumafataga e sili ona susua ma faalogologo i meafaifaaili aupito i lelei. Na iai a latou “moega nifo elefane.” Na maua e tagata eli palapala le anoanoaʻi o nifo elefane matagofie i Samaria, le laumua o le malo o Isaraelu. (1 Tupu 10:22) E foliga mai atonu na faapipii nei mea i meafale pe na teuteu ai puipui i totonu o fale.
5. Aiseā na lē fiafia ai le finagalo o le Atua i tagata Isaraelu i aso o Amosa?
5 Pe na lē fiafia ea Ieova ona o le sologa lelei o olaga o tagata Isaraelu i le taumamafa i taumafataga susua, inu i uaina lelei, ma faalogologo i pese mālie? E mautinoa lava e leai! Talu ai, e saunia e Ieova le anoanoaʻi o mea ina ia fiafia ai le tagata. (1 Timoteo 6:17) Peitaʻi, na lē fiafia lona finagalo ona o loto o tagata, o faanaunauga leaga na iā i latou, ma o latou manatu agaʻi i le Atua ma le leai o se alofa i o latou lava tagata Isaraelu.
6. O le ā le tulaga faaleagaga o Isaraelu i aso o Amosa?
6 E faateʻia i latou o ē ‘taooto i o latou moega, ma aai i tamaʻi mamoe o le lafu, ma latou sauni mo i latou o laaupese.’ Na fesiligia nei tane: ‘Ua outou manatu ua mamao le aso vale?’ E ao ona matuā faanoanoa i latou i tulaga o Isaraelu peitaʻi, “ua lē tigā i latou ona o le malaia o Iosefa.” (Amosa 6:3-6) E ui i le lelei o le tamaoaiga o Isaraelu, ae na silasila mai Ieova i le matuā faaleagaina faaleagaga o Iosefa po o Isaraelu. Ae na faaauau pea olaga o tagata i aso faisoo e pei lava e leai se mea o leaga. E faapena foʻi le toʻatele o tagata i aso nei. Atonu latou te ioe ua tatou ola i taimi faigatā, peitaʻi latou te lē o popole i mafatiaga o isi auā e lē o aafia ai i latou, latou te lē o manatu mamafa i le pagatia o isi ma e leai se fiafia i mea faaleagaga.
Isaraelu—O se Nuu ua Faaleagaina
7. O le ā o le a tupu pe a lē utagia e tagata Isaraelu lapataʻiga a le Atua?
7 Ua faamatala e Amosa se tala e faatatau i se nuu ua faaleagaina, e ui e foliga o loo taulau manuia. Talu ai le lē utagiaina e tagata o lapataʻiga a le Atua ma faasaʻo o latou manatu, o le a lē puipuia i latou e Ieova mai o latou fili. O le a ō mai tagata Asuria ma ave faamalosi i latou mai i o latou moega nifo elefane ma ave faatagataotaua. Ona mou atu ai lea o lo latou olaga sologa lelei!
8. Na faapefea ona iai Isaraelu i se tulaga leaga faaleagaga?
8 Na faapefea ona oo le nuu o Isaraelu i sea tulaga faanoanoa? Na amata lenei tulaga i le 997 T.L.M., ina ua mavae atu le tupu o Solomona ae sosoo ane lona atalii o Reopoamo ma ina ua vavae ese ituaiga e sefulu mai i ituaiga o Iuta ma Peniamina. O le tupu muamua o le malo o ituaiga e sefulu o Ierepoamo I, le “atalii o Nepata.” (1 Tupu 11:26) Na faatalitonu e Ierepoamo tagata o lona malo, e faigatā tele mo i latou ona malaga atu i Ierusalema e tapuaʻi iā Ieova. Ae peitaʻi, sa lē manatu mamafa moni o ia i se lelei o tagata. Na i lo lea, sa faanaunau o ia mo lona lava lelei. (1 Tupu 12:26) Na popole Ierepoamo neʻi mea ane ua toe foʻi tagata Isaraelu i le malo o Iuta, pe a faaauau pea ona malaga i le malumalu i Ierusalema mo tausamiga ma le tapuaʻiga iā Ieova. Ina ia ʻalofia lenā tulaga, na faatū ai e Ierepoamo ni tamaʻi povi auro o le tasi i Tanu ma le tasi i Peteli. Na avea ai loa le tapuaʻi i povi ma tapuaʻiga autū i Isaraelu.—2 Nofoaiga a Tupu 11:13-15.
9, 10. (a) O ā gaoioiga faalotu na faatulaga e le tupu o Ierepoamo I? (e) O le ā le silasila a le Atua i tausamiga na faia i Isaraelu i aso o le tupu o Ierepoamo II?
9 Na taumafai Ierepoamo ina ia aloaʻia le tapuaʻiga fou. Na faatulaga e Ierepoamo le faia o gaoioiga faalotu pei o tausamiga ia sa faia i Ierusalema. O loo faapea mai le 1 Tupu 12:32: “Ua faia foʻi e Ierepoamo le tausamiga i le masina e valu, i le aso e tasi le sefulu ma le lima o le masina, e pei o le tausamiga ua i ai i Iuta; ona alu aʻe lea o ia i le fata faitaulaga. Sa faapea ona faia e ia i Peteli.”
10 E leʻi taliaina e Ieova na tausamiga faalelotu. Na ia faamautinoa i le sili atu i le senituri mulimuli ane e ala iā Amosa, i le nofoaiga a Ierepoamo II, le tupu o le malo o ituaiga e sefulu o Isaraelu pe tusa o le 844 T.L.M. (Amosa 1:1) E tusa ai ma le Amosa 5:21-24, na fetalai le Atua: “Ua ou ʻinoʻino, ua leaga iā te aʻu o outou tausamiga; ou te lē fiafia i o outou faapotopotoga. E ui ina outou au mai iā te aʻu o taulaga mū, ma a outou taulaga i mea e ʻai, ou te lē talia; o le taulaga faafetai i a outou manu pepeti, ou te lē vaai atu i ai. Ia e ave ese iā te aʻu le taalili o ou pese; o le leo mālie foʻi o au napeli ou te lē faalogo ai. A ia tafe ifo le faamasinoga e pei o vai, ma le amiotonu e pei o le vai e tafe tetele lava.”
Tutusa ma Aso Nei
11, 12. O le ā le tulaga e tutusa ai tapuaʻiga a Isaraelu ma lotu Kerisiano faatagāfai?
11 E manino mai, na suʻesuʻeina e Ieova loto o ē na auai i tausamiga i Isaraelu, ma ia teena a latou aso faamanatu ma taulaga mū. Ua faapena foʻi i aso nei, ua teena e Ieova aso faapaupau e pei o le Kirisimasi ma le Eseta. E faatatau i tagata tapuaʻi o Ieova, e lē mafai ona faatasi le amiotonu ma le amioleaga, e lē mafai foʻi ona mafuta le malamalama ma le pōuliuli.—2 Korinito 6:14-16.
12 E iai foʻi isi vala e tutusa ai le tapuaʻiga a lotu Kerisiano faatagāfai, ma le tapuaʻiga ifo i povi a tagata Isaraelu. E ui e faapea mai nisi o i latou o Kerisiano ua taliaina le upu moni o le Afioga a le Atua, ae e lē o faaautū atu tapuaʻiga a lotu o loo taʻua o Kerisiano, i le alofa moni i le Atua. Ana faapea e alolofa moni i le Atua, semanū o le a tausinio e tapuaʻi iā Ieova i le “agaga ma le faamaoni” auā o le auala lenā e finagalo malie ai o ia. (Ioane 4:24) E lē gata i lea, o nei lotu Kerisiano faatagāfai latou te lē ‘faatafe ifo le faamasinoga e pei o vai, ma le amiotonu e pei o le vai e tafe tetele lava.’ Na i lo lea, latou te manatu māmā i amioga e finagalo malie i ai le Atua. Latou te taliaina le faitaaga atoa ma isi agasala matagā ma faaipoipoga faatauatane!
“Ia Loto Atu i le Lelei”
13. Aiseā e manaʻomia ai ona tatou usiusitai i upu a le Amosa 5:15?
13 Ua fetalai mai Ieova iā i latou uma o naunau e tapuaʻi i se auala e talileleia e Ia: “Ia outou ʻinoʻino i le leaga, a e loto atu i le lelei.” (Amosa 5:15) E tupuga mai lagona malolosi e pei o le ʻinoʻino ma le loto i se mea, mai i o tatou loto. Talu ai e faaʻoleʻole o tatou loto, e moomia ai la ona tatou tauivi malosi ina ia puipuia. (Faataoto 4:23; Ieremia 17:9) Afai tatou te teulotoina ni faanaunauga sesē, atonu e amata ai ona tatou fiafia i mea leaga ae ʻinoʻino i mea lelei. A faapea tatou te lolo atu i na faanaunauga ma faatino le agasala, e lē mafai la ona tatou maua le finagalo malie o le Atua po o le ā lava lo tatou maelega. O lea la, seʻi o tatou tatalo i le fesoasoani a le Atua ina ia “ʻinoʻino i le leaga, a e loto atu i le lelei.”
14, 15. (a) I Isaraelu, o ai i latou na faia mea lelei, peitaʻi o ā mea na fai iā i latou na? (e) E faapefea ona tatou faalaeiauina i latou o loo i le auaunaga faataimi atoa i aso nei?
14 Peitaʻi, e lē o tagata uma o Isaraelu na latou faia mea e inosia e Ieova. O se faaaʻoaʻoga, o Amosa ma Hosea na auauna faamaoni o ni perofeta ma na “loto atu i le lelei.” Na tautō isi tagata e ola e pei o Naseri. A o ola ai o ni Naseri, na latou taumamao mai mea e faia i le vine, aemaise le uaina. (Numera 6:1-4) O le ā le manatu o isi tagata Isaraelu e tusa ai ma le tuutoina atu i le Atua o nei tagata faatuatua? O le tali e faateʻia ai e faaalia ai le matuā paʻū maualalo o le tulaga o le nuu. Ua faapea mai le Amosa 2:12: “Ua outou avatua uaina i le ʻau naseri e inu ai, ma vavao atu i le ʻau perofeta, o loo faapea atu, Aua le vavalo mai.”
15 Na tatau ona māsiasi ma salamō tagata Isaraelu na pupū i faafiafiaga, ona o le vaavaai atu i olaga faamaoni o le ʻau Naseri ma le ʻauperofeta. Na i lo lea, na latou taumafai ma le lē alolofa e faaliliuese tagata faamaoni mai le avatu o le viiga i le Atua. E lē tatau ona tatou uunaʻia ē ua tuutoina atu i latou e auauna o ni paeonia, ovasia femalagaaʻi, o misionare, po o sui o le aiga Peteli, e lafoaʻia la latou auaunaga faataimi atoa ma toe foʻi atu i le olaga na latou masani ai. Na i lo lea, ia faalaeiau atu i ai ina ia faaauau pea i la latou auaunaga lelei!
16. Aiseā na sili atu ai ona lelei tulaga o tagata Isaraelu i aso o Mose na i lo aso o Amosa?
16 E ui lava na faamalieina le toʻatele o tagata Isaraelu i meafaitino i aso o Amosa, peitaʻi e leʻi “mauʻoa i le Atua.” (Luka 12:13-21) Na aai o latou augātamā i le manai mo le 40 tausaga i le vaomatua. Latou te leʻi aai i povi poʻa lelei ma taooto i moega nifo elefane. Peitaʻi, na taʻu atu ma le saʻo e Mose iā i latou: “Ua faamanuia oe e Ieova lou Atua i galuega uma a ou lima. . . . Na iā te oe Ieova lou Atua i ona tausaga e fagafulu; e leai lava se mea na e mativa ai.” (Teuteronome 2:7) Ioe, na iai i tagata Isaraelu mea sa latou moomia moni. Ae o le mea e sili ona tāua, na latou mauaina le alofa o le Atua, lana puipuiga ma faamanuiaga!
17. Aiseā na taʻitaʻiina ai e Ieova Isaraelu anamua i le Nuu Folafolaina?
17 Na faamanatu e Ieova i tagata Isaraelu i aso o Amosa na ia aumaia o latou augātamā i le Nuu Folafolaina ma fesoasoani iā i latou e aveesea o latou fili. (Amosa 2:9, 10) Aiseā na taʻitaʻia ai e Ieova tagata Isaraelu nai Aikupito ma agaʻi atu i le nuu folafolaina? E lē faapea ina ia maua ai e i latou se olaga e pupū i meafaitino ma teena ai Lē na Foafoaina i latou. Na i lo lea, ina ia mafai ona latou tapuaʻi iā te Ia o ni tagata saʻoloto ma mamā faaleagaga. Peitaʻi, e leʻi ʻinoʻino tagata na aumau i malo o ituaiga e sefulu o Isaraelu i le leaga ae loto atu i le lelei. Na i lo lea, na latou avatua le viiga i tupua ua ta, ae lē o Ieova. Pagā se faalumaina!
O le Tali a Ieova
18. Aiseā ua tuusaʻoloto faaleagaga ai i tatou e Ieova?
18 E leʻi manatu le Atua e tuufau amioga leaga a Isaraelu. Na ia faaali manino mai lona finagalo: “Ou te faasalaina ai outou ona o a outou agasala uma.” (Amosa 3:2) Ua faamanatu mai e na upu le auala na laveaʻi ai i tatou mai le nofo pologa i lenei faiga o mea i aso nei, lea e faaatagia e Aikupito. E leʻi tuusaʻolotoina faaleagaga i tatou e Ieova ina ia tatou saʻilia sini manatu faapito. Ua māfua ona tuusaʻoloto i tatou e Ieova ina ia tatou avatu ai le viiga atoatoa iā te ia o ni tagata saʻoloto e faia le tapuaʻiga mamā. E tali lava le tagata ia i le auala e faaaogā ai lona saʻolotoga.—Roma 14:12.
19. E tusa ai ma le Amosa 4:4, 5, o le ā na loto i ai le tele o tagata Isaraelu?
19 O le mea e faanoanoa ai, e leʻi faalogo le toʻatele o tagata Isaraelu i le feʻau malosi a Amosa. Na faaalialia e le perofeta le vaivai faaleagaga o o latou loto i upu o loo faamauina i le Amosa 4:4, 5: “Ia outou ō mai i Peteli, ma fai ai amio leaga; inā faatele ia agasala i Kilikala . . . auā o lo outou loto lea, le fanauga a Isaraelu e.” E leʻi atiina aʻe e tagata Isaraelu ni faanaunauga lelei. E leʻi leoleomaluina o latou loto. O le iʻuga, o le toʻatele o i latou na loto atu i mea leaga ae ʻinoʻino i mea lelei. E leʻi suia ala o tagata uamaaa na tapuaʻi i povi. O le a tali atu Ieova ma o le a feoti i latou i a latou agasala.
20. E faapefea e se tasi ona saʻilia se ala e tusa ma le Amosa 5:4?
20 E lē taumatea na faigatā ona tumau ma le faamaoni se tasi na ola i na aso i Isaraelu iā Ieova. E lē faigofie le tetee atu i mea ua fiafia i ai le toʻatele o tagata, e pei ona malamalama i ai Kerisiano i aso nei, o ē talavou ma matutua. Ae peitaʻi, o le alofa mo le Atua ma le faanaunau e faafiafia o Ia, na gaoioi ai isi tagata Isaraelu e faatino le tapuaʻiga moni. Na faasalafa atu ma le māfana e Ieova le valaaulia iā i latou e pei ona tusia i le Amosa 5:4: “Ia outou saʻili mai iā te aʻu, tou te ola ai.” I aso nei, ua faapena ona faaalia e le Atua le alofa mutimutivale iā i latou e salamō ma saʻili iā te Ia e ala i le iloa lelei o lana Afioga ma faia lona finagalo. E lē faigofie ona saʻilia lenei auala peitaʻi o le faia faapea e maua ai le ola e faavavau.—Ioane 17:3.
E Ui i le Oge Faaleagaga ae ua Faamanuiaina i Tatou
21. O le ā le oge e oo iā i latou o ē e lē faatinoina le tapuaʻiga moni?
21 Ae o le ā o le a oo iā i latou e lē lagolagoina le tapuaʻiga mamā? O le oge e sili ona leaga—le oge faaleagaga! “O loo faapea mai le Alii o Ieova, Faauta, e oo mai aso ou te tuuina atu ai le oge i le nuu; e lē se oge i mea e ʻai, po o se galala i le fia inu vai, a o le oge i le faalogologo i afioga a Ieova.” (Amosa 8:11) O lotu Kerisiano faatagāfai, o loo mafatia i se oge faaleagaga faapena. Peitaʻi, ua iloa e tagata lotofaamaoni o loo i na lotu, le manuia faaleagaga o tagata o le Atua ma ua latou lolofi mai i le faalapotopotoga a Ieova. O le eseese o tulaga o lotu Kerisiano faatagāfai ma Kerisiano moni ua faaalia ma le saʻo i fetalaiga a Ieova: “Faauta mai, e aai aʻu auauna, a o outou tou te fia aai; faauta, e feinu aʻu auauna, a o outou tou te fia inu; faauta, e olioli aʻu auauna, a o outou tou te mamā.”—Isaia 65:13.
22. O le ā le māfuaaga tatou te olioli ai?
22 I le avea o ni auauna a Ieova, pe o tatou talisapaia ea sauniuniga faaleagaga ma aogā? A o tatou suʻesuʻeina le Tusi Paia, lomiga faa-Kerisiano ma auai i sauniga, fonotaga ma tauaofiaga tatou te lagona le fia alalaga ona o le fiafia o o tatou loto. Tatou te olioli ona o le malamalamaga saʻo ua iā i tatou e uiga i le Afioga a le Atua, e aofia ai ma le valoaga a Amosa.
23. O le ā ua olioli ai i latou o ē viiaina le Atua?
23 O ē uma e alolofa i le Atua ma naunau e avatu le viiga iā te ia, o loo iai feʻau o le faamoemoe i le valoaga a Amosa. Po o le ā lava lo tatou tulaga tau tamaoaiga po o tulaga faigatā tatou te fesagaʻi i lenei lalolagi fevaevaeaʻi, ae o i tatou o ē alolofa i le Atua o loo olioli i faamanuiaga ma taumafa faaleagaga e sili ona lelei. (Faataoto 10:22; Mataio 24:45-47) Ia tuuina atu uma le viiga i le Atua, o Lē ua saunia le anoanoaʻi o mea auā so tatou fiafia. Tau ina ia o tatou maumauaʻi e avatu le viiga atoatoa iā te ia e oo i le faavavau. O le a avea ma faaeaga tatou te olioli ai pe afai tatou te saʻili iā Ieova, o Lē e Suʻesuʻeina loto.
O le a Faapefea Ona E Tali?
• O ā tulaga na iai i Isaraelu i aso o Amosa?
• O le ā e tutusa ai tulaga o mea na tutupu i le malo o ituaiga e sefulu o Isaraelu ma aso nei?
• O le ā le oge na valoia mai lea ua iai i le taimi nei, ma o ai e lē o aafia ai?
[Fesili mo le Suʻesuʻega]
[Ata i le itulau 21]
E toʻatele tagata Isaraelu na ola i ni olaga tamaoaiga peitaʻi, e leʻi olioli i le manuia faaleagaga
[Ata i le itulau 23]
Ia faalaeiau auauna faataimi atoa e faaauau i a latou galuega lelei
[Ata i le itulau 25]
E leai se oge faaleagaga i tagata fiafia o Ieova