O le ā le Umi e Mafai Ona Ola ai Tagata?

IĀ Mati 3, 1513, na alu ai se tagata suʻesuʻe Sepania e suafa iā Juan Ponce de León i se malaga. Na folau atu o ia mai Puerto Rico ma le faamoemoe e faataunuu i se motu e igoa iā Bimini. E tusa ai ma tala tuu anamua, na faimalaga o ia e saʻili se vaipuna faavavega, o se Vaipuna e Faatumauina ai le Talavou. Ae peitaʻi, na taunuu o ia i se nuu o Amerika, lea ua igoa nei iā Florida. O le mea moni, e leai se vaipuna faapena na ia mauaina.

I aso nei, e lē o mafai ona soifua tagatālautele i se umi e sili atu i le 70 po o le 80 tausaga. E ui o loo lisiina mai i le Tusi Paia tagata na soifua mo ni taimi e sili atu ona uumi, ae ua faapea mai le 2002 Guinness Book of World Records, e 122 tausaga ma le 164 aso o le tagata aupito matua na faapea ona soifua. (Kenese 5:3-32) Ae peitaʻi, na faapea mai le tagata atamai i mea faasaienisi, o John Harris: “O suʻesuʻega fou, ua mafai ona faataʻimua mai ai se vaaiga i se taimi o le a lē toe iai se tagata ua afu le soifua, pe lē oti foʻi.” Ua talanoa nisi o tagata suʻesuʻe o lona 21 o senituri e uiga i le “ola e lē mafai ona oti,” “e oo atu i le tausaga e 2099, ua lē toe faatapulaaina le olaga o tagata,” “o le a faateleina pea sela fou o le tino o le tagata” ma isi mea faapena.

I lana tusi, The Dream of Eternal Life, ua taʻua ai e Mark Benecke e faapea: “A o faagasolo le olaga, o le tele o taimi, e toetoe lava faafouina ai sela uma o le tino. . . . Pe a mavae le tusa ma le fitu tausaga, ae ua faafouina o tatou tino.” Ae peitaʻi, e lē faaauau e faavavau ona faia o lenei mea, talu ai e lē mafai ona toe faateleina sela pe a mavae sina taimi. Ae afai la e lē o le tulaga lenā, fai mai Benecke, “e mafai lava e le tino o le tagata ona toe faafouina ona sela mo se taimi umi, e oo lava i le faavavau.

Seʻi manatu foʻi i le maoaʻe o le tomai o le faiʻai o le tagata, lea e sili atu ona aogā mea e tatou te ono faaaogā a o faagasolo lo tatou olaga puupuu. Ua faapea mai se faamatalaga  i le Encyclopædia Britannica, o le faiʻai o le tagata “ua tuuina i ai le tomai e taofia ai le anoanoaʻi o mea e sili atu, na i lo o mea na mafai ona faaaogā a o faagasolo le olaga o se tagata.” (Toe teuteuina i le 1976, Tusi 12, itulau 998) Ua taʻua i le tusi a David A. Sousa, How the Brain Learns, e faapea: “E lē mafaatusalia le tomai o le faiʻai e taofi ai faamatalaga e faatatau i fuafuaga aogā uma.”—Itulau e 78, Tusi Lona Lua, copyright 2001.

Aiseā ua lē maua ai e le ʻausuʻesuʻe le māfuaaga ua tatou feoti ai? Aiseā ua matuā maoaʻe ai faapea le tomai o le faiʻai o le tagata? Po ua talafeagai le foafoaina o i tatou ina ia aʻoaʻoina pea le poto e oo i le faavavau? Aiseā ua mafai ai ona tatou mafaufau i le ola e faavavau?

Ua faapea mai le Tusi Paia: “Ua tuuina [e le Atua] le [“faavavau,” NW] i o latou loto, a e lē mailoa e le tagata le galuega ua faia e le Atua mai le amataga e oo i le gataaga.” (Failauga 3:11) Ua faaalia i nei upu e faapea, na tuu e le Atua iā i tatou le manatu e ola e faavavau. O le mea lea, e tatou te aʻoaʻoina ai pea se mea e uiga i le Atua ma ana galuega. Afai tatou te ola mo le faitau piliona o tausaga, pe e faavavau, o le a tatou aʻoaʻoina atili ai pea e uiga i galuega ofoofogia o le foafoaga a le Atua.

Ua faaalia foʻi i upu a Iesu Keriso e faapea, e mafai ona ola e faavavau le tagata. Na ia fetalai: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) Ae faapefea oe? Pe e te fia ola e faavavau?

[Ata i le itulau 3]

Na saʻilia e Juan Ponce de León se punāvai e faatumauina ai le talavou

[Faamatalaga i Ata]

Ponce de León: Harper’s Encyclopædia of United States History