“O le Fale ʻIe o Ē Amio Saʻo, e Uluola Ia”

PE A gāpā le taua o Amaketo ma aumaia le iʻuga i faiga amioleaga o mea a Satani, o le a “faaumatia le fale o ē amio leaga.” Ae faapefea le “fale ʻie o ē amio saʻo”? I le lalolagi fou a le Atua o le a “uluola” ai.—Faataoto 14:11.

O le a iai ē amio saʻo faatasi ma ē amioleaga seʻia oo i le taimi e “vavaeeseina o ē amio leaga ai le laueleele, e liaʻiina ai foʻi o ē amio pepelo.” (Faataoto 2:21, 22) Pe mafai ona uluola ē amio saʻo i lalo o nei tulaga? Ua faaalia i le Faataoto 14:1-11, e mafai ona tatou olioli i le manuia ma se tulaga mautū e ala i le taʻitaʻia e le poto o a tatou upu ma gaoioiga.

Pe a Atiina Aʻe e le Poto se Aiga

Ua faapea mai le tupu o Isaraelu anamua o Solomona e faatatau i aafiaga o le avā i le lelei o le aiga: “E taʻitasi uma fafine popoto ma atiina aʻe lona fale; a o le fafine valea na te lepetia ai i ona lima.” (Faataoto 14:1) E faapefea e se fafine ua maua le poto ona atiina aʻe lona aiga? O se fafine poto e faatāuaina faatulagaga a le Atua o le tulaga ulu. (1 Korinito 11:3) E lē aafia o ia i le agaga o le fia tū toʻatasi lea ua taatele i le lalolagi a Satani. (Efeso 2:2) E gauaʻi o ia i lana tane, faamālō iā te ia, ma faateleina ai le faaaloalo o isi i lana tane. O se fafine poto e faia ma le tiotio le aʻoaʻoina o lana fanau i le faaleagaga ma le faaletino. E galue mamafa o ia mo le lelei o lona aiga, i le tausia o le fale ia avea o se nofoaga e matagofie ma lelei mo le aiga. O lana auala e faia ai mea e iloa i lona faautauta ma le auala e faasoasoa ai tupe. O se fafine poto e saosaolaumea i le manuia ma le tulaga mautū o lona aiga.

E lē faatāuaina e le fafine valea faatulagaga a le Atua o le tulaga ulu. E tautala lē faaaloalo o ia i lana tane. E na te faaaluina ma le lē magafagafa tupe maua a le aiga ma faaalu sesē le taimi. O le iʻuga e lē mamā le fale ma ua pagatia tamaiti i le faaleagaga ma le faaletino. Ioe, o le fafine valea e na te lepetia lona aiga.

O le ā e iloa ai e valea pe poto se tasi? Ua taʻua i le Faataoto 14:2: “O loo savali i lana amiotonu lē ua mataʻu iā Ieova; a e faapiʻopiʻo ona ala lē ua ʻinoʻino iā te ia.” E matataʻu ē amio saʻo i le Atua, ma o le “mataʻu iā Ieova, o le amataga lea o le poto.” (Salamo 111:10) O se tagata poto e na te iloa lona tiute tauave o le “mataʻu i le Atua, ma e anaana i ana poloaʻiga.” (Failauga 12:13) Ae peitaʻi, o le tagata valea e mulimuli o ia i le ala e lē talafeagai ma tapulaa amiotonu a le Atua.  E faapiʻopiʻo ona ala. Ua ʻinoʻino lenā tagata i le Atua ma ua faapea i lona loto: “E leai se Atua.”—Salamo 14:1.

E Leoleoina Laugutu e le Poto

O le ā e mafai ona faapea atu ai i tala a se tasi e mataʻu iā Ieova ma lē e ʻinoʻino iā te Ia? “O loo i le gutu o le vale le sasa o le faamaualuga; a o laugutu o ē popoto e leoleoina ai i latou.” (Faataoto 14:3) O le tagata valea e lē filemu ma e lē agamalu ona o le leai o se poto mai i lugā. O le poto o loo taʻitaʻia ai ona ala e faalelalolagi, o mea faaletino ma faatemoni. Ua ia tautala atu i upu faatupu vevesi ma faasausili. O le mimita i lona gutu e māfua ai faafitauli iā te ia ma isi.—Iakopo 3:13-18.

E leoleoina laugutu o le tagata poto pe puipuia ai o ia, ma maua ai le loto malie ma le fiafia. E faapefea? Ua taʻua i le Tusi Paia: “O i ai lē soona tautala, e pei o tutuʻi i le pelu; a o laulaufaiva o ē popoto e mālōlō ai.” (Faataoto 12:18) O le tagata poto e na te lē faia ni upu lē mafaufau po o ni faamatalaga tutui. E manatunatu le loto o le tagata poto ina ia fai se tali. (Faataoto 15:28) O le filifilia lelei o ana upu o se mea e mālōlō ai—e faalaeiauina ai ē loto iti ma faafouina ai ē loto mafatia. Na i lo le faaonoono i isi, e faaauiluma e ana faamatalaga le filemu ma le toʻafimālie.

Pe a Taʻitaʻia e le Poto Taumafaiga a Tagata

Na sosoo lea ma le faaalia e Solomona o se faataoto manaia e faaalia ai e manaʻomia ona iloiloina itu lelei ma itu lē lelei o se galuega. Ua ia faapea mai: “A leai ni povi, ua mamā le fale povi; a e tele mea e maua mai i le malosi o le povi.”—Faataoto 14:4.

Ua taʻua e se tasi tusi le uiga o lenei faataoto: “A gaogao le falepovi e faaalia ai ua leai ni povi e fafaga, ua saʻoloto se tasi i le faamamāina ma le tausia o manu ma ua itiiti ai mea e totogi. Ae peitaʻi i le fuaiupu e 4e ua lē taulau lenei ‘itu lelei’: a aunoa ma povi e lē mafai ona seleseleina le saito.” E tatau ona filifili ma le poto le faifaatoʻaga.

Pe e lē faatatauina foʻi le mataupu silisili o lenei faataoto pe a tatou iloiloina le suia o galuega, filifilia o se ituaiga o fale, faatauina o se taavale ma mea faapena? O le tagata poto e na te iloiloina itu lelei ma itu lē lelei ma tilofaʻia pe o aogā moni taumafaiga ma tupe faaalu.

Pe a Atamai se Molimau

Ua faaauau mai Solomona: “O le molimau faamaoni, e lē pepelo ia; a o le molimau pepelo, o le tala pepelo ia.” (Faataoto 14:5) O le tala pepelo o le molimau pepelo e telē sona lamatiaga. Na fetogia Napota le Isereelu i maa talu ai o tagata ulavavale e toʻalua na molimau pepelo iā te ia. (1 Tupu 21:7-13) Manatua foʻi molimau pepelo na latou faia faasaga iā Iesu, lea na oo atu ai i lona maliu. (Mataio 26:59-61) Na faamaonia foʻi molimau pepelo faasaga iā Setefano, o le  uluaʻi soo lea o Iesu na fasiotia ona o lona faatuatua.—Galuega 6:10, 11.

O se tagata e lē saʻo atonu e lē maua mo se taimi peitaʻi, ia mafaufau i lona lumanaʻi. Ua taʻua i le Tusi Paia, e ʻinoʻino Ieova i “le molimau pepelo, na te tautala i mea pepelo.” (Faataoto 6:16-19) O na tagata tala pepelo uma, faatasi ma isi e fai mea sesē e pei o le fasioti tagata, faitaaga ma ifo i tupua, o le a fai o latou tofi i le lepa e mū i le afi ma le teio—o le oti faalua lea.—Faaaliga 21:8.

O le molimau faamaoni e lē pepelo pe a faia tautoga i le faamasinoga. O lana faaaliga e lē aafia i le pepelo. Ae peitaʻi, e lē o le uiga o lenei mea e faapea, e tatau ona ia taʻu atu faamatalaga uma iā i latou atonu e mananaʻo e aumaia lamatiaga i tagata o Ieova i nisi o auala. Na lē taʻua e le augātamā o Aperaamo ma Isaako nisi o faamatalaga mai nisi o ē e lē tapuaʻi iā Ieova. (Kenese 12:10-19; 20:1-18; 26:1-10) Na faasesēina e Raava o Ieriko tamāloloa a le tupu. (Iosua 2:1-7) Na taumamao Iesu Keriso mai le faaalia atu o faamatalaga uma, auā o le a māfua ai lamatiaga. (Ioane 7:1-10) Na ia fetalai: “Aua tou te avatu le mea paia i ulī.” Aiseā? Talu ai neʻi o “latou soli . . . liliu mai, i le saeia ai outou.”—Mataio 7:6.

“E Faigofie le Poto”

Pe e maua e tagata uma le poto? Ua faapea mai le Faataoto 14:6: “E saʻili le poto e le tagata tauemu, a e lē maua; a e faigofie le poto i lē ua lagona.” Atonu e saʻili e le tagata tauemu le poto peitaʻi, e lē maua e ia le poto saʻo. Talu ai e amusia e le tagata tauemu mea a le Atua, e lē maua e ia le faavae o le poto—o le iloa lelei o le Atua moni. E taofia e lona faamaualuga ma lona faasausili o ia mai le aʻoaʻoina e faatatau i le Atua ma mauaina le poto. (Faataoto 11:2) Aiseā e faigatā ai iā te ia ona saʻili i le poto? E lē o taʻua i le faataoto le māfuaaga, peitaʻi e manatu o ia e faia faapea ina ia manatu ai isi o ia e poto.

O lē ua lagona e “faigofie le poto.” Ae o lē ua lagona o lona uiga o se tasi e malamalama. Ua faamatalaina le malamalama o le “malamalama o le mafaufau,” ma “e mafai ona iloa ai po o le ā le uiga o ni faamatalaga patino i se mataupu atoa.” O le tomai e faafesootaʻi ai vala eseese o se mataupu ma vaai ai i le mataupu atoa, ae lē na o ni vaega e eseese. Ua faapea mai lenei faataoto o le poto e mauagofie e le tagata e iai le tomai.

I lenei tulaga, ia iloilo oe lava pe o e mauaina le poto o le upu moni o le Tusi Paia. Ina ua amata ona e suʻesuʻeina le Tusi Paia, e mautinoa o aʻoaʻoga faavae e faatatau i le Atua, lana folafolaga ma lona Alo o uluaʻi upu moni na sa e aʻoaʻoina. Muamua lava, sa na ona e malamalama i na aʻoaʻoga o ni faamatalaga e lē fesootaʻi. Peitaʻi, a o faaauau ona e suʻesuʻe, ua amata ona fesootaʻi faamatalaga ia sa ese mai, ma ua e manino i le auala e fesootaʻi ai faamatalaga eseese i le  fuafuaga atoa a Ieova mo tagata ma le lalolagi. Ua talafeagai ma fesootaʻi upu moni mai le Tusi Paia. O le aʻoaʻoina ma le manatuaina o faamatalaga fou, ua faigofie talu ai ona ua e iloa po o fea e fesootaʻi atu ai i le mataupu atoa.

Ua lapataʻi mai le tupu poto i le mea e lē maua ai le poto. Ua ia fetalai: “Alu ia ai luma o le tagata valea, pe a e lē iloa iā te ia laugutu o le poto.” (Faataoto 14:7) O le tagata valea e lē iā te ia le poto. E lē i ona laugutu le poto. O le fautuaga ia ʻaloese mai i lenā tagata ma e atamai le alu ese mai ai. O le “uō a ē valelea, e leaga ai lava ia.”—Faataoto 13:20.

Ua faaauau mai Solomona: “O le poto o le tagata mafaufau, o le faautauta lea i lona ala; a o le valea o ē valelea, e pepelo lea.” (Faataoto 14:8) O le tagata poto e manatunatu i ana gaoioiga. E na te iloiloina avanoa eseese e talafeagai ma ia ma manatunatu i iʻuga e ono maua mai i na avanoa. E na te filifilia ma le poto ona ala. Ae faapefea le tagata valea? E na te filifilia se auala valea, ma lona manatu ua ia iloa le mea o loo ia faia ma ua ia faia se filifiliga sili ona lelei. Ua faasesēina o ia e lona valea.

Pe a Atiina Aʻe Faiā i le Poto

O se tasi e taʻitaʻiina e le poto e filemu a latou faiā ma isi. Ua mātauina e le tupu o Isaraelu: “E tauemu o ē valelea i le agasala; a e fealofani ē ua amio saʻo.” (Faataoto 14:9) O faalogona nofosala po o le salamō i le agasala, o se mea e malie i le tagata valea. Ua faaleagaina ana faiā i le aiga ma so o se mea lava talu ai e “matuā faamaualuga o ia e foʻia le faafitauli” ma saʻili le filemu. (The New English Bible) E lotomalie le tagata amio saʻo e talia mea sesē a isi. E nofo sauni o ia e faatoese ma foʻia le faafitauli pe afai o ia e sesē. Talu ai e na te saʻilia le filemu, e olioli o ia i faiā fiafia ma lelei ma isi.—Eperu 12:14.

Na toe taʻua e Solomona le isi vala e lē o maua i faiā a tagata. Ua ia faapea mai: “Ua iloa e le loto lona lava tigā; e lē aiā foʻi le tagata ese i lona olioli.” (Faataoto 14:10) Pe e masani ona tatou faaalia o tatou faalogona o i totonu i isi ma taʻu atu iā i latou mea o loo iā i tatou, e tusa lava pe faanoanoa po o le olioli? Pe e masani ona malamalama atoatoa se tasi i le auala o manatu ai le isi tagata? O le tali i fesili uma na e leai.

O se faaaʻoaʻoga, seʻi manatu i faalogona o le pule i le ola. O se tasi e iai ia faalogona e masani lava e na te lē talanoaina nei faalogona i se tasi o le aiga po o se uō foʻi. Ma e lē masani ona iloa e isi ni faailoga o na faalogona iā i latou. E lē tatau ona iā i tatou lagona nofosala pe a afai tatou te lē iloa nei faailoga ma lē taulau ona faia ni gaoioiga fesoasoani. Ua aʻoaʻo mai foʻi e lenei faataoto, e ui e lelei le saʻili atu i se uō e malamalama mo se fesoasoani taufaalogona, ae e lē mafai e tagata ona aumaia le faamāfanafanaga. E tatou te faalagolago iā Ieova ina ia onosaia nisi faigatā.

“E i Lona Fale Oloa ma Mea Tetele”

Ua faapea mai le tupu o Isaraelu: “E faaumatia le fale o ē amio leaga; a o le fale ʻie o ē amio saʻo, e uluola ia.” (Faataoto 14:11) Atonu e uluola le tagata amioleaga i lenei taimi ma atonu e nofo i se fale matagofie peitaʻi, o le ā le aogā pe afai e lē toe iai o ia? (Salamo 37:10) Ae i le isi itu, atonu e faatauvaa le mea e nofo ai le tagata amio saʻo. Ae peitaʻi, ua faapea mai le Salamo 112:3: “E i lona fale oloa ma mea tetele.” O ā nei mea?

Pe a taʻitaʻia a tatou upu ma gaoioiga e le poto, tatou te maua le “oloa ma le mamalu” lea e ō faatasi ma le poto. (Faataoto 8:18) E aofia ai se faiā filemu ma le Atua ma tagata, soifua mālōlōina lelei ma le fiafia ma le tulaga mautū. Ioe, “o le fale ʻie o ē amio saʻo” e mafai ona uluola e oo lava i le taimi nei.

[Ata i le itulau 27]

O le fafine poto na te atiina aʻe lona fale

[Ata i le itulau 28]

“O laulaufaiva o ē popoto e mālōlō ai”