Pe E te Fia Ola e Faavavau?

NA FAAPEA mai se fafine matua i Iapani: “Ou te lē fefe i le oti. Ae e mafatia ai loʻu mafaufau, ona o le a matou teteʻa ese ai ma nei fugālaau.” Sa malamalama se faifeʻau Kerisiano lea sa asiasi atu i lona fale i le uiga o lenei faamatalaga, auā sa iai se togālaau matagofie o le fafine. O le toʻatele o i latou e faapea mai e lē fefefe i le oti, e latou te matuā talisapaia le ofoofogia o foafoaga a Ieova ma atonu o loo moomoo ai e fia ola e faavavau.

Ola e faavavau? E toʻatele tagata e latou te lē amanaʻia lea manatu. A o nisi ua oo ina faapea mai, e latou te lē fiafia i le ola e faavavau. Aiseā e oo ai i se tagata sea lagona?

Pe e Fiu i le Ola e Faavavau?

Ua manatu nisi, o le a fiu foʻi i le ola e faavavau.  Atonu e latou te faasino atu i le olaga lē aogā o le toʻatele o tagata ua litaea mai i galuega ma ua tau leai ni a latou mea e fai, ae ua na o le nofonofo ma matamata i le televise. Afai o lou lagona lenā, seʻi manatu la i le mea na fai mai ai le tagata suʻesuʻe i le vateatea o Robert Jastrow, ina ua fesiligia po o se faamanuiaga po o se mala le ola e faavavau. Na tali mai Jastrow: “O le a avea o se faamanuiaga mo i latou e iai le mafaufau e fia iloa se mea ma e lē o muta le fia aʻoaʻoina atili o mea. O le a avea o se faamāfanafanaga mo i latou le manatu, o le a latou aʻoaʻoina ni mea e oo lava i le faavavau. Ae o le a avea o se mala mo i latou e iai le lagona e lē fia iloa ni mea fou ma e lē o faagaoioia o latou mafaufau. E leai ni mea e faaaogā tatau i ai o latou taimi.”

O le pasiā o le ola e faavavau po o le leai foʻi, e faalagolago tele i ou uiga. Afai e iai sou ‘mafaufau e fia iloa ni mea ma e lē muta le naunau e aʻoaʻoina mea fou,’ seʻi manatu la i mea e mafai ona e faataunuuina i le faia o mea taulima, musika, tusia o ata, faia o togālaau, ma po o ā lava galuega aogā e te fiafia i ai. O le a saunia e le ola e faavavau i le lalolagi se faamoemoe ofoofogia i le lumanaʻi i le atiina aʻe o ou tomai i vala eseese o au taumafaiga.

O le mafai ona faailoa atu ma tofo i le alofa e oo i le faavavau, o le a faamalieina atoatoa ai oe i le ola e faavavau. Ua foafoaina i tatou ma le tomai e faaalia ai le alofa, ma e tatou te matuā fiafia pe a alofagia i tatou. O le faaalia o le alofa moni, e matuā faamalieina ai, ma e lē mafai ona mavae a o faagasolo atu taimi. O le ola e faavavau, o le a maua ai avanoa e lē muta e atiina aʻe ai le alofa e lē gata i o tatou uso talitonu, aemaise lava le Atua. Na faapea mai le aposetolo o Paulo: “Afai e alofa atu se tasi i le Atua, ua silafia lenā tagata e ia.” (1 Korinito 8:3) Maʻeu se faamoemoe matagofie; o le iloa o le Atua, ma ua silafia mai foʻi e le Pule Silisili ese o le vateatea i tatou! E lē gata i lea, e leai se iʻuga o lo tatou aʻoaʻoina e uiga i Lē alofa na Foafoaina i tatou. E faapefea la ona pasiā ma lē tauia le ola e faavavau?

Le Olaga Puupuu ae Tāua

Ua lagona e nisi e faapea, e ese le tāua o le olaga pe a puupuu. E latou te ono faatusaina le olaga i auro ia e maua, ae lē taatele. Ua latou faapea mai, ana faapea e maua lava auro i so o se mea, semanū o le a faaitiitia ai lona tāua. Ae peitaʻi, e matagofie pea le auro. E mautinoa foʻi e faapena le olaga.

E tatou te ono faatusaina le olioli i le ola e faavavau i le mauaina o le tele o le ea. O le a manatu le ʻauvaa o se vaamaulu ua  faalētonu i le matuā tāua o le ea. Pe a uma ona faasaoina i latou, pe e te manatu o le a latou faitio ma le leai o se lotofaafetai ona ua fiafia i le tele o le ea ua toe mauaina? O le mea moni, e leai!

I le pei o lenā ʻauvaa, e mafai ona faasaoina i tatou, faatasi ma se faamoemoe e sili atu i le ola e faavavau. Na tusi le aposetolo o Paulo e faapea: “O le oti, o le totogi lea o le agasala; a o le ola e faavavau, o le mea foaʻifuaina mai lea e le Atua, i lo tatou Alii o Keriso Iesu.” (Roma 6:23) E ala i le taulaga togiola a Iesu, o le a aveesea ai e le Atua le tulaga lē lelei atoatoa o tagata ma le oti, ma o le a tuuina atu i le fanau usiusitai a tagata le meaalofa o le ola e faavavau. Maʻeu so tatou loto faafetai ona o sea fuafuaga alofa!

Ae Faapefea Ē Pele iā te Oe?

Atonu e manatu nisi tagata e faapea: ‘Ae faapefea ē pele iā te aʻu? O le a lē aogā le ola e faavavau iā te aʻu pe afai matou te lē faatasi ma i latou.’ Atonu ua uma ona e aʻoaʻoina le poto o le Tusi Paia ma iloa ai e mafai ona e olioli i le ola e faavavau i se lalolagi parataiso. (Luka 23:43; Ioane 3:16; 17:3) O le faanaunauga masani lava, o lou manaʻo ina ia iai lou aiga i inā, ma isi o ē pele, ma uō mamae ina ia tofo i le fiafia lea e te faamoemoe e maua i le lalolagi fou amiotonu a le Atua ua folafolaina mai.—2 Peteru 3:13.

Ae faapefea pe afai e lē fiafia au uō ma ē pele iā te oe e ola e faavavau i le lalolagi parataiso? Aua neʻi faavaivaia oe e lenā mea. Ia faaauau pea ona ave i fale le poto saʻo mai le Tusi Paia ma gaoioi e tusa ai ma lenā poto. Na tusi le aposetolo o Paulo e faapea: “E lē ma iloa e oe le avā, pe faaolaina lau tane iā te oe? ma oe foʻi le tane, pe faaolaina lau avā iā te oe?” (1 Korinito 7:16) E mafai ona suia tagata. O se faaaʻoaʻoga, o se tamāloa na tetee muamua i le faa-Kerisiano, na suia lona olaga ma mulimuli ane avea ma toeaina o le faapotopotoga Kerisiano. Ua ia faapea mai: “Ou te matuā faafetai ona o le tumau pea o le faamaoni o si oʻu aiga pele i a latou mataupu silisili o le Tusi Paia i taimi uma na ou tetee ai.”

E matuā manatu mamafa mai lava le Atua i lou ola ma ola o ē pele iā te oe. O le mea moni, ‘ua lē finagalo Ieova ia fano se tasi, a ia oo uma lava i le salamo.’ (2 Peteru 3:9) E finagalo Ieova ina ia outou ola e faavavau faatasi ma ē pele iā te oe. E sili mamao atu lona alofa na i lo o le alofa o tagata lē lelei atoatoa. (Isaia 49:15) O lea, aiseā la e lē atiaʻe ai sa lua faiā lelei ma le Atua? Atonu e mafai ai ona e fesoasoani atu i ē pele iā te oe e faia foʻi faapea. E tusa lava pe e lē o iai i le taimi nei so latou faamoemoe mo le ola e faavavau, ae atonu e suia o latou uiga pe a vaai atu iā te oe o e gaoioi e ōgatusa ma le poto saʻo o le Tusi Paia.

Ae faapefea ē pele iā te oe ua maliliu? O loo i le Tusi Paia se faamoemoe ofoofogia o le toetū mo le faitau miliona o ē ua maliliu; e toe fafagu mai ai i latou mai le oti ma ola ai i le Parataiso i le lalolagi. Na folafola mai e Iesu Keriso e faapea: “E oo mai le aso e faalogo ai i lona leo o i latou uma ua i tuugamau, ma latou ō mai ai.” (Ioane 5:28, 29) E aofia ai foʻi i latou na maliliu ae leʻi iloa le Atua, o le a toe faatutūina mai i le ola, auā ua faapea mai le Tusi Paia: “O le a toe tutū mai ē ua amiotonu atoa ma ē ua amiolētonu.” (Galuega 24:15) Maʻeu se fiafiaga o le a iai, i le toe faafeiloaʻia o i latou na i le ola!

Ola e Faavavau —O se Faamoemoe Olioli

Afai e mafai ona e maua le fiafia ma le faamalieina i le taimi nei e ui lava i faafitauli uma o lenei lalolagi, e mautinoa o le a mafai ona e olioli i le ola e faavavau i le lalolagi parataiso. Ae peitaʻi, ina ua faailoa atu e se tasi o Molimau a Ieova ia faamanuiaga o le a aumaia e le ola e faavavau, na faapea mai se tasi fafine: “Ou te lē fia ola e faavavau. Ua lava a  mo aʻu le olaga lenei e 70 pe 80 tausaga.” Ona fesili atu lea o se toeaina Kerisiano na iai i le fafine: “Po o e manatunatu i faalogona o lau fanau pe afai e te maliu?” Na maligi loimata o le fafine pe a mafaufau i le faanoanoa o le a oo i lana fanau pe a maliu lo latou tinā. Na ia faapea mai: “O lea faatoʻā ou iloa nei le uiga manatu faapito sa iā te aʻu, ma ua mafai ona ou iloa, o le ola e faavavau e lē o se faamoemoe manatu faapito, ae o loo aofia ai foʻi ma ola o isi.”

E ono manatu nisi, atonu e lē afāina i so o se tasi pe latou te ola pe oti. Peitaʻi, e afāina i lo tatou Foaʻi Ola o lē na fetalai mai e faapea: “Ou te ola aʻu, ou te lē fiafia lava i le oti o lē amio leaga, a ia liliu mai lē amio leaga ai lona ala, ma ola ai.” (Esekielu 33:11) Talu ai e manatu mamafa le Atua i ola, e oo lava i tagata amio leaga, e mautinoa foʻi lona manatu mamafa iā i latou o ē alolofa iā te ia.

Sa mautinoa e Tavita le tupu o Isaraelu anamua e uiga i le tausiga alofa a Ieova. Na faapea mai ai Tavita i se tasi taimi: “E ui lava ina tuua aʻu e loʻu tamā ma loʻu tinā, a e talia aʻu e Ieova.” (Salamo 27:10) Sa faapena foʻi ona mautinoa e Tavita le tausiga alofa a ona mātua iā te ia. Ae e tusa lava pe tuua o ia e ona mātua, po o ona aiga faaletagata e sili ona vavalalata iā te ia, sa ia iloa e lē mafai ona tuua o ia e le Atua. Ona o le alofa ma le manatu mamafa mai o Ieova, ua ia ofo mai ai iā i tatou le ola e faavavau ma se faauōga tumau ma ia. (Iakopo 2:23) Pe e lē tatau ea ona tatou lotofaafetai ma talia nei meaalofa ofoofogia?

[Ata i le itulau 7]

O le alofa i le Atua ma tuaoi o le a aogā ai le ola e faavavau