Po o E Moomoo mo se Lalolagi e Aunoa ma le Fefe?

“Ua tatou ola ma soifua nei i se vaitaimi ‘ua faateleina ai le atuatuvale ma le . . . lagona ua lē mafesoasoania,’ ona o se ‘mala mataʻutia e lē o manino ona faamatalaina mai . . . lea e ono tupu i se taimi e aunoa ma se lapataʻiga’”

O UPU nei, na sii mai i le mekasini o le Newsweek i le tausaga ua mavae, ua atagia mai ai faalogona o tagata o loo soifua i se lalolagi fesouaʻiina i aso nei. Na faaalia e Iesu Keriso o le a faateteleina na lagona i le lumanaʻi lata mai. Sa ia valoia se taimi o le a atuatuvale ai tagata i le fememeaʻi ona ua leiloa se mea e sulu i ai; e oti foʻi tagata i le matataʻu ma le faatalitali i mea e oo mai i le lalolagi. E lē manaʻomia ai la ona tatou matataʻu ma manatu ai ua lē mafesoasoania, auā na faaopoopo mai Iesu e faapea: “A afua ona faia o ia mea, ia tepa aʻe outou, ma ia ea i luga o outou ulu; auā e latalata ina faaolaina outou.”—Luka 21:25-28.

I le faamatalaina o tulaga o le a iai ona tagata i le lalolagi pe a mavae lenā laveaʻiina, na faalauiloa mai ai e Ieova le Atua e faapea: “E nonofo foʻi loʻu nuu i le mea e manuia ai, ma fale e saogalemu ai, ma mapusaga e filemu ai.” (Isaia 32:18) Na fetalai mai Ieova e ala i lana perofeta o Mika: “E taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai.”—Mika 4:4.

Maʻeu se eseesega o na tulaga ma le olaga i aso nei! O le a leai ni lamatiaga e lē iloa atu o le a opea mai i le fanau a tagata. Na i lo o le tulaga matuā atuatuvale ma le lagona ua lē mafesoasoania, o le a leai se mutaaga o le filemu ma le fiafia.