E Faapefea Ona E Filifilia le Saʻo ma le Sesē?

O AI e iai le pule e faataatitia ai tapulaa o le saʻo ma le sesē? O le fesili lenā na lāgā i le amataga lava o le talafaasolopito o le tagata. E tusa ai ma le faamatalaga i le Tusi Paia, na filifilia e le Atua se laau na ola i totonu o le faatoʻaga o Etena e faapea, o “le laau e iloa ai le lelei ma le leaga.” (Kenese 2:9) Na faatonuina e le Atua le uluaʻi ulugalii ina ia aua neʻi o la aai i le fua o le laau lenā. Ae peitaʻi, na fautua atu le fili o le Atua, o Satani le Tiapolo e faapea, afai e la te aai i le laau lenā, o le a “pupula ai” o la mata, ma avea ai i laʻua “e pei ni atua, o loo iloa le lelei ma le leaga.”—Kenese 2:16, 17; 3:1, 5; Faaaliga 12:9.

Na fesagaʻi Atamu ma Eva ma se filifiliga; po o le a la usitaia tapulaa a le Atua o le lelei ma le leaga, pe mulimuli i a laʻua lava tapulaa? (Kenese 3:6) Na la filifili e lē usiusitai i le Atua ma aai i le laau. O le ā  na faaalia ai i lenei gaoioiga faigofie? E ala i le lē usitaia o tapulaa a le Atua, na la manatu ai e faapea, o le a sili atu ona lelei mo i laʻua ma a la fanau pe a faataatitia ni a latou lava tapulaa o le saʻo ma le sesē. Po o taulau manuia le fanau a tagata i le taumafai e faataatitia a latou lava tapulaa e pei o le Atua?

Manatu Eseese

Ina ua uma ona toe autaluina aʻoaʻoga a tagata faitofā lauiloa i le faagasologa o senituri, ua faapea mai le Encyclopædia Britannica, e mai lava i taimi o le faifilosofia Eleni o Socrates e oo mai i lona 20 o senituri, sa “faia pea lava ni felafolafoaʻiga e uiga i le po o le ā le mea e lelei, ma po o ā tapulaa o loo iai o le saʻo ma le sesē.”

O se faaaʻoaʻoga, o Sophists, o se vaega lauiloa o faiaʻoga Eleni i le lona lima o senituri T.L.M. Na latou aʻoaʻoina e faapea, o tapulaa o amioga saʻo ma le sesē sa faavae mai i manatu taatele. Na faapea mai se tasi o na faiaʻoga: “So o se mea lava e tonu ma lelei i aai taʻitasi, e tonu foʻi ma lelei i lenā aai, tau lava ina ia faapena manatu o tagata o le aai.” E tusa ai ma nei tapulaa, sa tatau la iā Jodie lea na taʻua i le mataupu muamua, ona taofia le tupe, talu ai o le mea lenā semanū e fai e le toʻatele o tagata o lona nuu po o lana aai.

Ae e ese le manatu na faaalia e Immanuel Kant, o se faifilosofia lauiloa o lona 18 o senituri. Ua faapea mai se mekasini, Issues in Ethics: “Sa taulaʻi atu ia Immanuel Kant ma isi e pei o ia . . . i aiā a tagata taʻitoʻatasi e faia ai e ia lava ana filifiliga.” E tusa ai ma le filosofia a Kant, pe afai e lē o solia ai e Jodie aiā tatau a isi, o le mea na te faia, o lana lava lenā filifiliga. E lē tatau ona taaʻina ai manatu o le toʻatele i lana filifiliga.

O lea, na faapefea la ona foʻia e Jodie lona faafitauli? Sa ia filifilia se isi auala. Sa ia faatatauina aʻoaʻoga a Iesu Keriso, o lē o ana tapulaa tau amio, sa viiviia e tagata Kerisiano ma ē e lē ni Kerisiano. Na aʻoaʻo e Iesu e faapea: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.” (Mataio 7:12) Na faateʻia le fafine lea na fesoasoani i ai Jodie ina ua tuuina atu iā te ia le tupe e US$82,000. Ina ua fesiligia Jodie pe aiseā na ia lē aveina ai le tupe, na faamatala atu e Jodie, o ia o se Molimau a Ieova ma faapea atu: “E lē o saʻu tupe ou te taofia ai fua.” Sa tāua iā Jodie fetalaiga a Iesu ia e faamauina i le Mataio 19:18: “Aua e te gaoi.”

Po o se Taʻiala Maufaatuatuaina Manatu Taatele o Tagata?

Atonu na faapea mai nisi tagata, e valea Jodie ona o le faamaoni naʻuā. Ae o manatu taatele, e lē o se taʻiala maufaatuatuaina. O se faaaʻoaʻoga, afai e te nofo i se vaipanoa e manatu ai le toʻatele o se mea tatau le faia o taulaga i tamaiti, e pei ona manatu ai i aso ua mavae, po o le a saʻo ai la lenā faiga? (2 Tupu 16:3) Ae faapefea pe afai na e fanau mai i se atunuu e manatu o se amioga lelei le ʻaina o tino o tagata? Po o lona uiga e lē leaga le ʻai o tino o tagata? O le taatele o ni faiga e lē faapea  ai ua saʻo lenā mea. Ua leva ona lapataʻi mai le Tusi Paia faasaga i lenā mailei, i le faapea mai: “Aua e te mulimuli atu i le toʻatele e fai le amio leaga.”—Esoto 23:2.

Na faailoa mai e Iesu Keriso le isi māfuaaga e tatau ona tatou faaeteete ai i le talia o manatu taatele e avea ma taʻiala i le faia o le saʻo ma le sesē. Sa ia faaalialia mai Satani e faapea, “o le alii o lenei lalolagi.” (Ioane 14:30; Luka 4:6) Ua faaaogā e Satani lona tulaga e faasesē ai “le lalolagi uma.” (Faaaliga 12:9) O lea la, afai e faia au lava tapulaa o le saʻo ma le sesē e faavae i manatu taatele, ua e puʻea la manatu o Satani e faatatau i amioga, ma e mautinoa lava o le a iʻu i mala.

Po o Lelei ea Au Filifiliga?

Pe e tatau la i le tagata ona filifili e ia lava le mea e saʻo ma le mea e sesē? Ua faapea mai le Tusi Paia: “Aua le faalagolago i lou lava atamai.” (Faataoto 3:5) Aiseā? Auā o tagata uma lava ua tuufaasolo mai i ai le ila mai le amataga, lea e mafai ona afāina ai le auala e te faia ai filifiliga. Ina ua fouvale Atamu ma Eva i le Atua, na la faia ai amioga a lē faalata, manatu faapito o Satani, ma avea ai o ia ma o la tamā faaleagaga. Ona la tuufaasolo atu ai lea i a la fanau se uiga tutusa; o se loto faaʻoleʻole ma le tomai e iloa ai le mea saʻo, ae ua naunau e faia le mea sesē.—Kenese 6:5; Roma 5:12; 7:21-24.

I le talanoaina o tapulaa tau amio, ua faapea mai le Encyclopædia Britannica: “E lē o se mea e ofo ai pe afai e iloa e tagata amioga tatau e faia, ae na i lo o lea, ua latou faia mea o loo fiafia lava i latou e fai. Ua avea ai o se faafitauli tele mo atunuu i Sasaʻe le taʻuina atu i tagata o māfuaaga e ao ai ona faia le mea saʻo.” Ua faapenei ona faamatalaina ma le saʻo e le Tusi Paia lenei mea: “E sili le faaʻoleʻole o le loto i mea uma, ma ua matuā leaga lava; po o ai na te mafaia ona iloa?” (Ieremia 17:9) Pe e te faatuatuaina se tagata ua lauiloa i le faaʻoleʻole ma le matuā leaga lava?

O le mea moni, e oo lava i tagata e lē talitonu i le Atua, e iai o latou loto fuatiaifo e faia ai amioga saʻo ma faia amioga e taʻuleleia ai. Ae o le tele o taimi, o a latou mataupu silisili tau amio, e tai tutusa ma tapulaa tau amio a le Tusi Paia. E ui lava e faapea mai na tagata e leai se Atua, ua faaalia i o latou manatu, o loo tuufaasolo atu iā i latou le tomai latou te faaatagia atu ai uiga o le Atua. Ua faamaonia i lea o mea o loo taʻua i le Tusi Paia, na faia tagata i le amataga “i foliga o le Atua.” (Kenese 1:27; Galuega 17:26-28) Ua faapea mai le aposetolo o Paulo: “O i latou ia ua iloa mai ai le galuega o le tulafono ua tusia i o latou loto.”—Roma 2:15.

O le mea moni, e faigofie ona iloa le mea saʻo; ae e faigatā ona iai le malosi e faia ai. E faapefea ona atiaʻe e se tasi le malosi tau i amioga tatau? Talu ai o le loto e uunaʻia ai gaoioiga, o le faatupuina la o le alofa mo Ieova le Atua, le Tusitala o le Tusi Paia, e fesoasoani ai i se tagata e atiina aʻe lenā malosi.—Salamo 25:4, 5.

Mauaina o le Malosi e Faia ai Mea Lelei

O le laasaga muamua lava e aʻoaʻoina ai le alofa i le Atua, o le iloa lea po o le ā le tāua ma le aogā o ana poloaʻiga. Ua faapea mai le aposetolo o Ioane: “O lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.” (1 Ioane 5:3) O se faaaʻoaʻoga, ua iai i le Tusi Paia fautuaga aogā e fesoasoani i talavou e iloa ai le mea saʻo mai le mea sesē, pe a filifili pe tagofia le ʻava malosi, fualaau faasāina, pe faia feusuaʻiga lē mamā a o leʻi faaipoipo. E mafai ona fesoasoani le Tusi Paia i ulugalii e iloa ai le auala e foʻia ai feeseeseaʻiga, ma taʻiala mo mātua i le tausia  o a latou fanau. * Pe a faatatauina, o le a maua ai e ē matutua faapea ma talavou aogā mai tapulaa tau amio a le Tusi Paia, e tusa lava po o ā tulaga i le va fealoaʻi ma talaaga faaleatunuu.

E pei lava ona e maua le malosi e galue ai mai le taumafaina o meaʻai lelei, o le faitauina o le Afioga a le Atua, e te maua ai foʻi le malosi e ola ai e tusa ma ana tapulaa. Ua faatusaina e Iesu afioga e tulei mai le fofoga o le Atua i se meaʻai e maua ai le ola. (Mataio 4:4) Na ia fetalai mai foʻi: “O laʻu mea e ʻai, ia ou faia le finagalo o lē na auina mai aʻu.” (Ioane 4:34) O le aveina i fale o le poto mai le Afioga a le Atua, na fesoasoani iā Iesu e faia filifiliga atamai ma tetee atu ai i faaosoosoga.—Luka 4:1-13.

I le taimi muamua, atonu sa ono faigatā ona e aveina i fale le poto mai le Afioga a le Atua ma ola e tusa ma ana tapulaa. Ae ia manatua, i aso a o e laʻitiiti, atonu sa e lē fiafia i le tofo o meaʻai sa lelei mo oe. Ae ina ia e tupu malosi, sa e iloa ai e tatau ona e fiafia i na meaʻai lelei. Atonu o le a faapena foʻi ona manaʻomia se taimi e faamasani ai i le uiga o tapulaa a le Atua. Afai e te maumauaʻi, o le a agaʻi ina e fiafia i na tapulaa ma oo ai ina e malosi faaleagaga. (Salamo 34:8; 2 Timoteo 3:15-17) O le a e faatuatua ai iā Ieova ma uunaʻia oe e “faia amio lelei.”—Salamo 37:3.

Atonu e te leʻi fesagaʻi ma se tulaga e pei o lea na feagai ma Jodie. Ae peitaʻi, i aso taʻitasi, e te faia ai ni nai filifiliga tāua laiti pe tetelē foʻi. O lea la, ua timaʻia oe e le Tusi Paia e faapea: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) O le faatuatua iā Ieova, o le a lē gata ina aogā mo oe i le taimi nei, ae o le a e maua ai foʻi se avanoa e te ola ai e faavavau, auā o le ala o ē usiusitai iā Ieova le Atua, e iʻu i le ola.—Mataio 7:13, 14.

[Faamatalaga pito i lalo]

[Faamatalaga faaopoopo i le itulau 6]

O manatu taatele, atonu e uunaʻia e agaga lē vaaia

[Ata i le itulau 5]

Ua tele tausaga o felafolafoaʻi pea le ʻaufaitofā i le mataupu e uiga i le saʻo ma le sesē

SOCRATES

KANT

CONFUCIUS

[Faamatalaga i Ata]

Kant: Mai le tusi, The Historian’s History of the World; Socrates: Mai le tusi, A General History for Colleges and High Schools; Confucius: Sung Kyun Kwan University, Seoul, Korea

[Ata i le itulau 7]

Ua lē gata ina fesoasoani le Tusi Paia iā i tatou e iloa ai le saʻo ma le sesē, ae ua uunaʻia ai foʻi i tatou e faia le mea saʻo