Fesili Mai le ʻAufaitau

Aiseā na valaaulia ai e Iesu o lē na toe faatūina Toma e paʻi atu iā te ia ae na ia taofia Maria le Makatala mai le faia faapea?

Ua taʻua i nisi faaliliuga tuai o le Tusi Paia se faamatalaga a Iesu iā Maria e aua neʻi paʻi atu iā te ia. O se faaaʻoaʻoga, ua faaliliuina e le King James Version fetalaiga a Iesu: “Aua e te paʻi mai iā te aʻu, auā ou te leʻi alu aʻe lava i loʻu Tamā.” (Ioane 20:17) Peitaʻi, o le uluaʻi veape Eleni lea e masani ona faaliliuina i le “paʻi,” o le isi uiga o le “tago, pipii, tautau, ma le uu.” O se mea talafeagai le teena e Iesu o Maria le Makatala mai le tago atu iā te ia, ma na ia faatagaina isi fafine sa i le tuugamau e “fetagofi i ona vae.”—Mataio 28:9.

Ua fesoasoani le tele o isi faaliliuga i aso nei e pei o le New World Translation of the Holy Scriptures, The New Jerusalem Bible, ma le Tusi Paia Samoa, iā i tatou e malamalama i le uiga moni o fetalaiga a Iesu: “Aua e te tago mai iā te aʻu.” Aiseā na fetalai atu ai faapena Iesu iā Maria o se tasi o aumea vavalalata?—Luka 8:1-3.

O le mea moni, na mataʻu Maria le Makatala ua toeitiiti ona maliu ese lea o Iesu ma afio atu i le lagi. O ona faalogona malolosi ina ia faatasi ma lona Alii, na uunaʻia ai o ia e tago atu iā Iesu ina ia aua neʻi alu. Ina ia faamautinoa iā te ia e leʻi oo i le taimi e afio ai, na faatonuina e Iesu Maria ina ia aua neʻi tago atu iā te ia peitaʻi, ia faalauiloa atu i ona soo le tala ua toetū ma o ia.—Ioane 20:17.

Sa ese la le talanoaga a Iesu ma Toma. E leʻi iai Toma i le taimi na faailoa atu ai Iesu i isi ona soo. Mulimuli ane, sa masalosalo Toma i le toetū mai o Iesu ma faapea mai, e lē talitonu i ai seʻi vaganā ua ia vaai i manuʻa o Iesu ma tuu lona lima i lona itu. E valu aso mulimuli ane ai, na toe faailoa atu ai Iesu i ona soo. O le taimi lea ua iai Toma ma na valaaulia o ia e Iesu e paʻi i ona manuʻa.—Ioane 20:24-27.

E tusa ai ma le tulaga o Maria, na feutagaʻi ai Iesu ma se faanaunauga lē talafeagai e taofia o ia mai le afio atu i le lagi, ae i le tulaga o Toma, ua fesoasoani Iesu i se tasi sa iai ni masalosaloga. I faataʻitaʻiga uma ia e lua, na iai ni māfuaaga lelei na gaoioi ai Iesu faapea.