Mea e Faitau—Fautuaga Poto a Solomona

“E LEAI se iʻuga i tusi o tusi e tele; o le suʻesuʻe tele foʻi i upu e vaivai ai le tino.” (Failauga 12:12) Ina ua tusia e le tupu poto o Solomona o Isaraelu na upu i le tusa ma le 3,000 tausaga ua tuanaʻi, sa ia leʻi faalotovaivaia tagata e faitau. Na i lo lenā, sa ia fautuaina le filifilia lelei o mea e faitau. Maʻeu le talafeagai o lenā fautuaga i aso nei, ona o le anoanoaʻi o mataupu o loo lomia i le lalolagi i lea tausaga ma lea tausaga!

E manino mai la “o tusi e tele” lea na faasino atu i ai Solomona sa lē ati aʻe ma faafouina ai le mafaufau. O lea la, sa ia manatu faapea o le suʻesuʻe tele i le faitauina o na tusi, na i lo le mauaina ai o iʻuga lelei ma tumau, ae e “vaivai ai le tino.”

Ae peitaʻi, pe sa faapea ea le faamatalaga a Solomona e leai ni tusi e aumaia ai ni taʻiala lelei ma maufaatuatuaina e aogā i le tagata faitau? E leai, ona na ia tusi: “O upu a ē popoto e pei o tui ia, po o fao ua faamauina, o matai o faapotopotoga ua tofia ia e le leoleo e toʻatasi.” (Failauga 12:11) O le mea moni, o loo iai upu tusitusia e “pei o tui,” e maua ai uunaʻiga lelei. E uunaʻia le tagata i le ala saʻo. E lē gata i lea, e pei o “fao ua faamauina,” e fesoasoani e faamalosia ai se tasi ma iai ni ona āuga tumau.

O fea e tatou te maua ai na upu poto? E tusa ai ma le faamatalaga a Solomona, i latou o loo pogai mai le Leoleo Mamoe, e toʻatasi o Ieova. (Salamo 23:1) O lea la, o le tusi e sili atu e filifilia e se tasi e maua ai upu atamai, o le tusi na faagaeeina e le Atua, o le Tusi Paia. O le faitauina e lē aunoa o na upu faagaeeina e fesoasoani i se tasi e ‘atoatoa ona lelei ai, ia saunia lava ia i galuega lelei uma lava.’—2 Timoteo 3:16, 17.