Se Uiga Tutasi Faaletagata

O Jodie, e iai sana pisinisi o le fuafuaina o le tāua o meatotino a tagata. O loo fesoasoani atu o ia i se fafine e tuufaavasega ma faatau atu meatotino a lona uso ua maliu. I le autilo atu i le mea sa iai se taʻinafi, na ia maua ai ni pusa tuai se lua sa tuu ai ni mea faigaluega. Ina ua ia tilotilo i totonu o se tasi o nei pusa, sa faateʻia o ia. Sa ia vaaia ai ni taaʻiga tupe pepa e taʻi $100, sa afīfī i se pepa iila; o le aofaʻiga atoa e US$82,000! E na o Jodie sa iai i le potu. O le ā e tatau ona ia faia? O le ave lemū o le pusa pe e fai i le fafine o lea ua ia maua le tupe?

O LE tulaga o Jodie, ua faamatilatila mai ai se tasi o uiga lea e faaesea ai i tatou mai manu. Ua taʻua i le World Book Encyclopedia e faapea: “O se tasi o uiga faapitoa faaletagata, o le faia lea o ni fesili faatupu manatu e uiga i mea e tatau ma mea e lē tatau ona tatou faia.” Pe a maua e se taʻifau fiaʻai se fasi povi i luga o se laulau, e lē tau mafaufau o ia pe na te ʻaina le fasi povi. A o Jodie la, e iai le tomai e fuafua ai le iʻuga o lana filifiliga. Afai na te taofia le tupe, ua gaoi o ia, ae e foliga mai o le a lē maua o ia. O le tupe, e lē o sana tupe; ae e lē o iloa foʻi e le fafine lea e fesoasoani i ai, o loo iai sea tupe. E lē gata i lea, o le a manatu le toʻatele o tagata i le nuu o Jodie, e valea o ia pe a ia ave le tupe i le fafine lea.

O le ā se mea e te faia pe ana o oe lea ua i le tulaga o Jodie? E faalagolago lau tali i le fesili lenei i tapulaa tau amio ua e filifilia e te ola ai.

Tapulaa Tau Amio

Ua loa tausaga o faailoa mai e lotu tapulaa tau amio e ao ona ola ai tagata.  Ua leva ona avea le Afioga a le Atua ma taaʻiga malosi i le toʻatele o tagata. Ae peitaʻi, ua faateleina le aofaʻi o tagata i le lalolagi ua teena le tele o tapulaa eseese faalotu faapea e lē aogā, ma tapulaa tau amio a le Tusi Paia e faapea, ua tuai. Aiseā ua sui ai? Ua taʻua i le tusi, Ethics in Business Life e faapea, “ua faatoʻilaloina . . . e le ʻauatamamai le pule lea sa iai muamua i lotu.” Na i lo o le saʻili atu i le taʻiala faalelotu, e toʻatele ua saʻili atu i taʻitaʻiga a tagata atamamai i suʻesuʻega tau i amioga. Ua faapea mai se polofesa i mea tau amio o Paul McNeill: “Ou te manatu, ua faataatitia e tagata atamamai tapulaa ia na faia muamua e faifeʻau . . . I le taimi nei, ua taʻitaʻia tagata e a latou lava tapulaa tau amio na i lo o tapulaa faalelotu e pei ona iai i aso ua mavae.”

Pe a e fesagaʻi ma ni filifiliga faigatā, e faapefea ona e iloa le saʻo ma le sesē? Pe e filifilia e le Atua au tapulaa tau amio po o oe lava?