E Faapefea Ona Manatua Iesu Keriso?

E mautinoa o Iesu Keriso, “o se tasi o ē uma na soifua, na malolosi ana taaʻiga i tagata.”—“The World Book Encyclopedia.”

E MASANI ona manatua tagata taʻutaʻua i mea na latou faia. Aiseā la ua manatua ai e le toʻatele Iesu i lona fanau mai na i lo o mea na ia faia? I atunuu Kerisiano, e toʻatele latou te manatua mea na tutupu i lona fanau mai. Ae e toʻafia o manatua ma taumafai e faatatauina ana aʻoaʻoga sili ona tāua i lana Lauga i le Mauga?

E moni, e matuā mataʻina le fanau mai o Iesu, ae sa sili atu ona faatāuaina e ona uluaʻi soo mea na ia faia ma ana aʻoaʻoga. O le mea moni, e leʻi finagalo le Atua ina ia faatāuaina le fanau mai o Keriso nai lo o lona soifuaga o se tagata matua. Ae peitaʻi, ona o le tele o talatuu po o tala faaleatunuu, ua taʻufaatauvaaina ai i tū o le Kirisimasi le Keriso.

 Ua tulaʻi mai ai se isi fesili e uiga i le auala o loo faamanatu ai e tagata le Kirisimasi. Afai e toe foʻi mai Iesu i le lalolagi i aso nei, o le ā sona finagalo e uiga i le tamaoaiga ua maua ona o le aso Kirisimasi? I le 2,000 tausaga ua mavae, na asiasi atu ai Iesu i le malumalu i Ierusalema. Na matuā tigā lona finagalo ona o ē faatau tupe ma tagata faatauʻoa na faaaogā le tausamiga faalotu a Iutaia e faateleina ai a latou tupe. Na ia fetalai atu: “Ave ese ia nei mea; aua le faia le fale o loʻu Tamā ma fale faatau ʻoa!” (Ioane 2:13-16) E manino lava, e leʻi fiafia Iesu i le palu faatasi o faiga pisinisi ma lotu.

Ua lē fiafia le toʻatele o tagata Katoliko faamaoni i Sepania e uiga i le faateleina o le tamaoaiga ona o le Kirisimasi. Ae peitaʻi, atonu ua lē mafai ona taofia na faiga faapisinisi, ona o le vaai atu i le pogai o le tele o faiga ua faia i le Kirisimasi. Ua faapea mai le tusitala o Juan Arias: “Ua faitioina e Kerisiano le auala ua avea ai le Kirisimasi ma ‘aganuu faapaupau’ ma ua tele ina avea o se aso o faafiafiaga ma faiga pisinisi, na i lo o se aso faalelotu. Ae e tele lava ina latou lē iloa e faapea, e mai lava i lona amataga, ua leva ona faafefiloi le fanau mai o Iesu . . . ma le tele o tausamiga faapaupau na faia e tagata Roma [i le lā].”—El País, Tesema 24, 2001.

I tausaga talu ai nei, na faamatalaina ai e le toʻatele o le ʻautusitala ma lomifefiloi a Sepania ni tala e uiga i le amataga faapaupau o tausamiga o le Kirisimasi, faapea ma ona aafiaga faapisinisi. Ua taʻua e le Enciclopedia de la Religión Católica e faatatau i le aso e faamanatu ai le Kirisimasi: “O le māfuaaga na filifili ai le Lotu Roma e avea lenei aso ma faamanatuga o le Kirisimasi, ona o lona manaʻo ia suia tausamiga faapaupau i tausamiga faa-Kerisiano. . . . E matou te iloa e faapea, i na aso i Roma, sa faamanatu ai e tagata faapaupau le aso 25 o Tesema e faailoga ai natalis invicti, le aso na fanau mai ai ‘le lā e lē mafaatoʻilaloina.’”

Ua faapea mai foʻi le Enciclopedia Hispánica: “O le aso 25 o Tesema lea e faamanatu ai le Kirisimasi, e lē o faavaeina i le faitauga saʻo o aso, le aso na fanau ai Iesu, ae e faavae aʻe i le avea ma se tausamiga faa-Kerisiano o le tausamiga i le lā, lea na faia i le tau mālūlū e tagata Roma.” Na faapefea ona faamanatuina e tagata Roma le oso aʻe o le lā i le lagi i le tau mālūlū? E ala i faigaʻai, poula, ma le feaveaʻi o meaalofa. Talu ai le mumusu o taʻitaʻi lotu e soloia sea tausamiga lauiloa, na latou taʻua lea aso o le aso na fanau ai Iesu, na i lo o le aso fanau o le lā.

I le amataga lava, i le lona fā ma lona lima o senituri, sa faigatā ona taofia faiga masani e tapuaʻi atu ai i le lā. O le tagata Katoliko o “Sagato” Aokusitino (354-430 T.A.) sa ia apoapoaʻi atu pea i uso talitonu ina ia aua neʻi faamanatuina Tesema 25 e pei ona faia ai e tagata faapaupau, i le faamamaluina o le lā. E oo lava i aso nei, e foliga mai o loo taaʻina ai pea i tausamiga a Roma anamua.

Se Faigaʻai Talafeagai mo Poula ma Faiga Faapisinisi

I le faagasologa o senituri, e tele ni mea na faia ai ina ia avea le Kirisimasi o se aso faamanatu sili ona lauiloa faavaomalo e faia ai poula ma fefaatauaʻiga. E lē gata i lea, ae o isi tū o tausamiga o le tau mālūlū, aemaise lava  faamanatuga ia na faia i Europa i mātū, sa faasolosolo mālie ona faafesootaʻi atu ma tausamiga ia sa amataina i Roma. * I le lona 20 o senituri, na matuā faaauiluma ai ma le aasa e tagata faatauʻoa ma fefaatauaʻiga so o se tū sa mafai ona maua ai le tele o a latou tupe faasili.

O ā iʻuga na oo i ai? Ua matuā faatāuaina ai le aso na fanau ai Iesu na i lo o le faatāuaina o le uiga o lona fanau mai. I le tele o tulaga, ua mou atu ai le taʻua o le suafa o Keriso i tū masani o le Kirisimasi. Ua taʻua i se nusipepa Sepania o le El País: “O le [Kirisimasi], o se tausamiga faalelalolagi mo le aiga, ma e faamanatu ai e tagata uma mea ua latou talitonu i ai e tusa ai ma lea aso.”

Ua atagia mai i lenei faamatalaga le tupu tele o lenei tulaga masani i Sepania ma le tele o isi atunuu i le lalolagi atoa. A o matuā faamamafaina le faamanatuina o le Kirisimasi, ua agaʻi ina faaitiitia ai le iloa o Keriso. O le mea moni, ua tele lava ina toe foʻi tausamiga o le Kirisimasi i le mea na amata mai ai i aso o Roma; i le faia o poula, faigaʻai, ma le feaveaʻiina o meaalofa.

Ua Fanau Mai mo i Tatou le Tama

Afai e itiiti se fesootaʻiga o le Kirisimasi ma Keriso, e faapefea la ona manatua e Kerisiano moni le fanau mai ma le soifuaga o Keriso? I le tusa ma le 700 tausaga a o leʻi fanau mai Iesu, na vavalo ai Isaia e faatatau iā te ia: “Auā ua fanau mai mo i tatou le tama, ua foaʻiina mai mo i tatou le atalii, e i lona ua le malo.” (Isaia 9:6) Aiseā na faapea mai ai Isaia o le a matuā aogā le fanau mai o Iesu ma lana galuega o le a faia mulimuli ane? Auā o le a avea Iesu o se pule po o se taʻitaʻi malosi. O le a taʻua o ia o le “Alii o le filemu,” ma e leai se mea e gata mai ai le filemu po o lana pule  tautupu. E lē gata i lea, o le pule tautupu a Iesu, o le a faatumauina “i le faamasinoga ma le amiotonu.”—Isaia 9:7.

Na toe taʻu atu e le agelu o Kaperielu upu a Isaia ina ua ia faailoa atu iā Maria le fanau mai o Iesu. Na ia valoia e faapea: “E sili o ia, e taʻua foʻi o le Alo o le Silisili ese; e foaʻi atu e le Alii o le Atua iā te ia le nofoaiga a Tavita lona tamā; e fai o ia ma tupu i le aiga o Iakopo e faavavau; o lona malo foʻi e leai sona gataaga.” (Luka 1:32, 33) E manino lava la, o le mea sili ona tāua o le fanau mai o Iesu, e fesootaʻi atu ma le galuega o le a faataunuuina e Keriso i le avea ai ma tupu tofia o le Malo o le Atua. E maua e tagata uma aogā mai le pulega a Keriso, e aofia ai ma oe ma ē pele iā te oe. Na faailoa atu e agelu e faapea, o lona fanau mai o le a ‘manuia ai le lalolagi o tagata ua alofagia e le Atua.—Luka 2:14.

O ai sē e lē fia soifua i se lalolagi filemu ma le faamasinoga tonu? Ae ina ia tatou olioli i le filemu o le a aumaia e le pulega a Keriso, e manaʻomia ona tatou faafiafia le finagalo o le Atua ma ia maua se faiā lelei ma ia. Na fetalai Iesu e faapea, o le laasaga muamua i le mauaina o sea faiā, o le maua lea o le poto e uiga i le Atua ma Keriso. Na fetalai Iesu: “O le ola e faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.”—Ioane 17:3.

Pe a tatou iloa lelei Iesu, tatou te ono tau manatu e faapea, po o le ā le auala e finagalo Iesu tatou te manatua ai o ia. Po o le aai, ma inu, ma feaveaʻi meaalofa i le aso lava lea e pei ona faia i tausamiga faapaupau? E foliga mai e lē talafeagai lenā mea. I le pō a o leʻi maliu, na taʻu atu ai e Iesu i ona soo le mea sa ia finagalo i ai. “O lē ua iā te ia aʻu poloaʻiga ma tausi i ai, o ia lea e alofa mai iā te aʻu; o lē alofa mai foʻi iā te aʻu, e alofaina o ia e loʻu Tamā; ou te alofa foʻi iā te ia.”—Ioane 14:21.

E matuā loloto se suʻesuʻega ua faia e Molimau a Ieova i le Tusi Paia, lea ua fesoasoani iā i latou e malamalama ai i poloaʻiga a le Atua ma Iesu. E fiafia foʻi i latou e fesoasoani atu iā te oe e malamalama atili i na poloaʻiga tāua, ina ia manatua ai Iesu e tusa ma le auala e ao ona manatua ai o ia.

[Faamatalaga pito i lalo]

[Pusa/Ata i le itulau 6, 7]

Po o Taʻufaatauvaaina e le Tusi Paia Tausamiga ma le Feaveaʻi o Meaalofa?

Le Foaʻiina Atu o Meaalofa

E ioe le Tusi Paia i le foaʻiina atu o meaalofa, ua taʻua Ieova lava ia o Lē Foaʻi mai “mea lelei uma . . . atoa ma mea alofa uma e atoatoa ona lelei.” (Iakopo 1:17) Na faalia e Iesu e faapea, o mātua lelei, e foaʻi atu meaalofa i a latou fanau. (Luka 11:11-13) Na avatu e le aiga o Iopu ma ana uō meaalofa iā Iopu ina ua toe malosi lona maʻi. (Iopu 42:11) Ae peitaʻi, e leai lava se mea o na meaalofa sa manaʻomia ai ni aso faapitoa e faia ai ni tausamiga. O na meaalofa, na faia mai i o latou loto.—2 Korinito 9:7.

Faatasiga Faaleaiga

E mafai e faatasiga faaleaiga ona aufaatasia ai tagata o le aiga, aemaise lava pe afai latou te lē o toe nonofo faatasi. Sa auai Iesu ma ona soo i se tausamiga o se faaipoipoga i Kana, e mautinoa lava o se faatasitasiga tele o aiga ma uō. (Ioane 2:1-10) I le tala faatusa a Iesu i le atalii faamaumauʻoa, na faia e le tamā ma le aiga se tausamiga, lea sa tā ai musika ma faia ai ni siva.—Luka 15:21-25.

Olioli i se Taumafataga Manaia

E masani ona taʻua i le Tusi Paia auauna a le Atua o loo olioli ma o latou aiga, uō, ma uso tapuaʻi i taumafataga mananaia. Ina ua asiasi atu agelu e toʻatolu iā Aperaamo, sa ia saunia se taumafataga ma i latou, sa aofia ai aano o manu, suāsusu, pata, ma potoi areto. (Kenese 18:6-8) Na faamatalaina e Solomona le ‘ʻai, inu, ma le fiafia’ e faapea o se meaalofa mai le Atua.—Failauga 3:13; 8:15.

E mautinoa lava, e finagalo le Atua ina ia tatou olioli faatasi ma a tatou uō ma aiga i meaʻai lelei, ma e fiafia foʻi o ia i le foaʻi atu o meaalofa. E matuā lava ma totoe le avanoa e tatou te faia ai faapea i so o se taimi lava o le tausaga.