‘Olioli i Toleniga sa Ou Maua’

SA MEIA le tamaʻitaʻi o Kazuna ina ua fautuaina o ia e lona faiaʻoga e ulu atu i se tauvaga lauga e faia i le faa-Peretania. Sa tatala atu lenei tauvaga i aʻoga maualuluga uma i le motu i mātū o Iapani o Hokkaido, ae peitaʻi, e leʻi faauluina muamua lava e lana aʻoga se tamaitiiti aʻoga mo lenei tauvaga. I le aso o le tauvaga, sa lagona e Kazuna lona lē toʻa ona sa tauvā ma isi tamaiti tusa e 50. Sa atili lē toʻa ina ua ia vaaia faamasino e toʻalua o a la gagana o le faa-Peretania.

Ina ua faasilasila mai tagata manumalo, na amata mai i le tagata e mauaina se meaalofa aupito i laʻitiiti. Ina ua mulimuli ane lau mai le igoa o Kazuna, na matuā faateʻia lava o ia. Sa lā taufai fetepaaʻi ma lona faiaʻoga lea sa nofo i ona autafa ma le ofo tele. Na alu atu Kazuna i le pulelaa e aumai lona faailoga a o lagona lava lona faateʻia—i le mauaina o le tulaga muamua!

Na faamatalaina ma le fiafia e Kazuna faapea: “Na mafai ona ia maua le manumalo ona o toleniga o loo saunia e le faalapotopotoga a Ieova e ala i le Aʻoga o le Faiva Faatiokarate. Ua ou olioli ona sa ou mauaina lenei toleniga.” O le aʻoga lea o loo auai Kazuna talu mai lava lona laʻitiiti, o se tasi lea o sauniga a le faapotopotoga a Molimau a Ieova. Ina ua sauniuni atu i le tauvaga, sa matuā uaʻi faapitoa atu Kazuna i le faaaogāina o le maikorofoni, ma tautala atu ma le māfana ma le naunau, faaaogā tāga, le fesootaʻi atu o le vaai i le aofia, ma isi mataupu o loo aʻoaʻoina i le Aʻoga o le Faiva Faatiokarate.

Faamolemole ia talia la matou valaau ina ia e faatasi mai e tagatagaʻi i lenei aʻoga, e faia i vaiaso taʻitasi i Maota o le Malo o Molimau a Ieova. O le a e tagaʻi lava oe i le auala o loo maua ai e ē laiti ma ē matutua aogā mai lenei aʻoga. E tatala sauniga mo so o se tagata e fia auai ai. Mo nisi faamatalaga e faatatau i le aʻoga e sili ona lata i le mea o loo e alaala ai, faamolemole faafesootaʻi Molimau a Ieova i lo outou vaipanoa.