Autasi Ona o le Alofa i le Atua

INA ua faavaeina le faapotopotoga Kerisiano i le uluaʻi senituri T.A., na avea le autasi, o se tasi o ona uiga mataʻina, e ui lava i feeseeseaʻiga a ona sui. Na ō mai na tagata tapuaʻi o le Atua moni mai atunuu o Asia, Europa, ma Aferika. E eseese lava talaaga o o latou soifuaga; o nisi o ni patele, fitafita, o ni pologa, o ni tagata sulufaʻi, o ni faatauʻoa, o ni tagata atamamai, ma tagata fai pisinisi. O nisi o ni Iutaia a o isi, o tagata o Nuu Ese. O le toʻatele sa avea muamua ma ē mulilulua, tauatane, o ē onā, gaoi, ma ni tagata fao mea. Ae peitaʻi, ina ua avea i latou ma Kerisiano, sa lafoaʻia a latou faiga amioleaga ae autasi vavalalata i le faatuatua.

O le ā na mafai ai e Kerisiano o le uluaʻi senituri ona aufaatasia nei tagata uma i le autasi? Aiseā ua latou maua ai le filemu i le va o le tasi ma le isi, faapea tagata lautele? Aiseā na latou lē auai ai i fouvalega ma feteenaʻiga? Aiseā na matuā ese ai le Faa-Kerisiano i na ona pō mai lotu autū o le lalolagi i aso nei?

O le ā na Aufaatasia Vavalalata ai Tagata o le Faapotopotoga?

O le vala aupito sili na autasia ai uso talitonu i le uluaʻi senituri, o le alofa i le Atua. Sa iloa e na Kerisiano, e ao ona latou alolofa muamua i le Atua moni, o Ieova ma o latou loto atoa, agaga atoa, ma le mafaufau atoa. O se faataʻitaʻiga, na faatonuina le aposetolo o Peteru, o ia o se Iutaia, ina ia asiasi atu i le fale  o se tagata o nuu ese, o se tasi e lē masani ona latou faifaimea faatasi. O le mea muamua lava na uunaʻia ai o ia e usiusitai, o le alofa iā Ieova. Sa olioli Peteru ma isi uluaʻi Kerisiano i se faiā vavalalata ma le Atua lea sa faavae i le poto saʻo e faatatau i Ona uiga, o mea e fiafia i ai ma lē fiafia i ai. I le faagasologa o taimi, sa malamalama tagata tapuaʻi, o le finagalo o Ieova mo i latou, ina ia autasi lava “i le loto e tasi ma le manatu e tasi.”—1 Korinito 1:10; Mataio 22:37; Galuega 10:1-35.

Na atili mafuta vavalalata tagata talitonu ona o lo latou faatuatua iā Iesu Keriso. Sa latou mananaʻo e mulimulituʻi i ona tulagāaao. Na ia poloaʻiina i latou e faapea: “Ia outou fealofani; faapei ona ou alofa atu iā te outou, . . . O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:34, 35) O lenei alofa e lē o se faalogona ootia e mavae, ae o le nofo sauni e faia so o se mea lelei mo o tatou uso. O le ā le iʻuga? Na tatalo Iesu e faatatau iā i latou o ē e faatuatua iā te ia: O “laʻu tatalo . . . ina ia tasi i latou uma, faapei o oe le Tamā o i totonu iā te aʻu, o aʻu foʻi o i totonu iā te oe, ia tasi i latou i totonu iā te i taʻua.”—Ioane 17:20, 21; 1 Peteru 2:21.

Na liligi mai e Ieova lona agaga paia, po o le mana galue i ana auauna faamaoni. O le agaga lenei na māfua ai ona autasi, ma faamalamalamaina ai i latou e uiga i aʻoaʻoga a le Tusi Paia lea na talia e faapotopotoga uma lava. O le feʻau lava lea e tasi na talaʻia e tagata tapuaʻi uma lava o Ieova; le faapaiaina o le suafa o Ieova e ala i le Malo Faa-Mesia, o se pulega faalelagi o le a pule mai i tagata uma. Sa malamalama uluaʻi Kerisiano i la latou tiute tauave ina ia ‘lē ni ō le lalolagi’ i latou. I lea, pe a tutupu mai ni fevesiaʻiga po o ni fetauaʻiga, e solitū pea Kerisiano. E latou te tausia le filemu ma tagata uma lava.—Ioane 14:26; 18:36; Mataio 6:9, 10; Galuega 2:1-4; Roma 12:17-21.

E manatu tagata talitonu uma, o la latou tiute tauave, o le siitia o le autasi. E faapefea? E ala i le faamautinoa ua ōgatasi a latou amio ma le Tusi Paia. O lea na tusi atu ai le aposetolo o Paulo i Kerisiano: “Ia outou to ese le tagata tuai o loo ua leaga, e tusa ma le amioga faaanamua,” a ia “oofu outou i le tagata fou.”—Efeso 4:22-32.

Faatumauina le Autasi

E moni, o tagata talitonu i le uluaʻi senituri, sa lē lelei atoatoa, ma na lamatia ai lo latou autasi. O se faaaʻoaʻoga, ua faamatala mai i le Galuega 6:1-6 e faapea, na tupu se finauga i le va o Kerisiano Iutaia o ē na tāutala i le gagana Eleni, ma i latou na tāutala i le gagana Eperu. Na lagona e tagata na tāutala i le gagana Eleni, ua faaesea i latou. Ae peitaʻi, ina ua logo tala le ʻauaposetolo i lenei mataupu, sa vave lava ona faasaʻoina. Mulimuli ane, na fefinauaʻi ai ona o se fesili na lāgā e faatatau i tiute tauave o tagata e lē o ni Iutaia i le faapotopotoga Kerisiano. Sa faia ai se faaiʻuga e faavae i mataupu silisili o le Tusi Paia, ma na talia lelei uma e faapotopotoga lenei faaiʻuga.—Galuega 15:1-29.

O nei faaaʻoaʻoga, ua faaalia ai e leʻi avea nei feeseeseaʻiga ma mea na fevaevaeaʻi pe na lē autasi ai tau aʻoaʻoga le faapotopotoga Kerisiano i le uluaʻi senituri. Aiseā? Talu ai, sa lava le malosi o vala moni o le autasi, e pei o le alofa iā Ieova, faatuatua iā Iesu Keriso,  alofa lē manatu faapito, taliaina o le taʻitaʻiga a le agaga paia, malamalama o tagata uma i aʻoaʻoga a le Tusi Paia, ma le nofo sauni e suia amioga; na mafai ai ona faatumauina le autasi ma le filemu o le uluaʻi faapotopotoga.

Autasi i le Tapuaʻiga i Aso Nei

Pe e mafai ona maua le autasi i le auala lava lenā i aso nei? Pe e mafai e vala lava na ona aufaatasia sui o le faatuatuaga ma mafai ai ona latou maua le filemu ma tagata o so o se lanu i atunuu uma lava o le lalolagi? Ioe, e mafai! Ua autasia Molimau a Ieova i se ʻauuso i le lalolagi aoao i atunuu, i motu, ma oganuu e sili atu i le 230. O vala lava ia o loo autasia ai i latou, na autasia ai foʻi Kerisiano o le uluaʻi senituri.

O le vala aupito sili e saosaolaumea ai i le autasi o loo olioli ai Molimau a Ieova, o lo latou tuutoina atu iā Ieova le Atua. O le uiga o lenei mea, o loo latou tauivi ina ia faamaoni atu iā te ia i so o se tulaga lava. E faaalia foʻi e Molimau a Ieova le faatuatua iā Iesu Keriso ma ana aʻoaʻoga. E faaalia e nei Kerisiano lo latou alofa lē manatu faapito i uso talitonu ma talaʻia foʻi le tala lelei lava lea o le Malo o le Atua i atunuu uma i le tele e mafai ai. E latou te naunau e talanoa atu i tagata i so o se faatuatuaga, lanu, ma vaega eseese o atunuu e uiga i lenei Malo. E tumau pea le solitū o Molimau a Ieova i mataupufai a le lalolagi, lea e fesoasoani iā i latou e tetee atu ai i omiga mai malo, aganuu, le vafealoaʻi, ma tulaga tau tamaoaiga, ia ua matuā fevaevaeaʻi ai tagata. E talisapaia e Molimau a Ieova uma lo latou tiute tauave ina ia faatupuina le filemu e ala i le ōgatasi o a latou amio ma tapulaa a le Tusi Paia.

Ua Tosina Mai Isi Ona o le Autasi

O lenei autasi, e masani lava ona faaoso ai le fiafia o tagata e lē o ni Molimau. O se faataʻitaʻiga, o Lisa, * sa avea ma taupousa Katoliko i se ʻaulotu i Siamani. O le ā na fiafia ai o ia i Molimau a Ieova? Na faapea mai Lisa: “O i latou o ni tagata e sili ona lelei ua ou feiloaʻi i ai. E latou te lē ō i taua; e latou te lē faia ni mea e afāina ai se tasi. E latou te fia fesoasoani i tagata ina ia ola fiafia i se lalolagi parataiso i le pulega a le Malo o le Atua.”

E iai foʻi Siaosi, sa avea ma se fitafita Siamani, o lē na auina atu i Falani i le taimi o le taua lona lua a le lalolagi. I se tasi aso, na faia ai e se taʻitaʻi lotu Porotesano se sauniga faalelotu mo fitafita i le vaega a Siaosi. Na tatalo le failotu i le Atua mo ni faamanuiaga, le puipuiga ma le manumalo. Ina ua uma le sauniga, na faia ai loa e Siaosi lona tofiga o se tagata vaai. Na ia iloa ai i lana faata e faalatalata mai ai mea ʻau a le fili i le isi itu o le tafā o taua, o faia foʻi sa latou sauniga faalelotu e se patele. Na faapea mai mulimuli ane ia Siaosi: “E foliga mai sa tatalo foʻi lenā failotu mo ni faamanuiaga, puipuiga ma le manumalo. Ou te leʻi iloa pe na faapefea ona fetauaʻi lotu Kerisiano i lenei taua e tasi.” Sa mau pea i le mafaufau o Siaosi nei manatunatuga. Ina ua ia feiloaʻi mulimuli ane i Molimau a Ieova, o ē e lē auai i taua, na avea ai Siaosi o se tasi o lo latou ʻauuso i le lalolagi aoao.

O Ashok ma Feema, sa auai i se lotu i Sasaʻe. I lo latou fale, sa iai se fata faitaulaga mo se atua. Ina ua aafia lo la aiga i se maʻi ogaoga, na la toe iloilo ai la laʻua lotu. I ni talanoaga ma Molimau a Ieova, na faafiafiaina ia Ashok ma Feema i aʻoaʻoga a le Tusi Paia, faapea le alofa na faaalia e Molimau. Ua avea nei i laʻua ma tagata talaʻi maelega o le tala lelei o le Malo o Ieova.

Ua autasi nei ia Lisa, Siaosi, Ashok, ma Feema ma le faitau miliona o Molimau a Ieova i se ʻauuso i le lalolagi aoao. Ua latou talitonu i le folafolaga a le Tusi Paia e faapea, o vala lava ia o loo autasia ai i latou i le tapuaʻiga i aso nei, o le a lē pine ona autasia ai lea o tagata usiusitai uma. Ona lē toe iai lea o ni feitagaʻiga, le lē autasi, ma ni fevaevaeaʻiga ona o lotu. O le a autasia le lalolagi atoa i le tapuaʻiga i le Atua moni, o Ieova.—Faaaliga 21:4, 5.

[Faamatalaga pito i lalo]

[Ata i le itulau 4, 5]

E ui e eseese talaaga e ō mai ai, ae sa autasi uluaʻi Kerisiano