Ia Faaeteete i Tū e Lē Fiafia i ai le Atua

I SE lotoā laʻitiiti, o loo taatia ai i le mu tinitini o le lā i Aferika, se pusa maliu o loo matala. A o faasolo atu tagata faavauvau i le pusa e faaalia lo latou tigāalofa, na tū ai se tamāloa matua ma faatali. Sa iloa atu i ona mata le matuā faanoanoa, ma punou faalatalata atu i foliga o lē ua maliu ma tautala atu: “Aiseā na e lē taʻu mai ai iā te aʻu o le a e alu? Aiseā ua e tuua ai aʻu faapea? Ae o lea ua e toe foʻi mai, po o le a faaauau pea ona e fesoasoani mai iā te aʻu?”

I isi vaega o Aferika, ua fanau ai se pepe. E faasā se tasi ona vaai i le tamaitiiti, seʻiloga ua mavae sina taimi, ona faatoʻā aumai lea o le pepe i fafo ma faaali atu i le lautele, ma faia se sauniga e faaigoaina ai o ia.

I nisi, o se mea ese le talanoa atu i se tagata ua maliu po o le nanāina o se tamaitiiti faatoʻā fanau mai mai le vaaiga a isi. Ae peitaʻi, i nisi aganuu ma nuu, o uiga ma manatu o tagata i ē ua maliliu ma le fanau mai o se pepe, e taaʻina e se talitonuga malosi e faapea, o ē ua maliliu, e lē o maliliu moni, ae o loo ola pea ma o loo iloa mai mea uma.

E matuā malosi lenei talitonuga, ua masani ai ona faafefiloi faatasi ma tū ma faiga na e aafia ai e toetoe lava o vala uma o le olaga. O se faataʻitaʻiga, ua talitonu le faitau miliona, o laasaga tāua o le olaga o se tagata, e pei o le fanau mai, avea ma tagata matua,  faaipoipo, faia ni fanau, ma oo ina oti; o vala na o suiga o le olaga, e oo atu ai i le nofoaga o agaga o o latou tuaa. E tusa ma lenei talitonuga e faaauau ai pea ona faaaafia e se tagata ua maliu olaga o ē na ia tuua. E mafai ai ona ia faaauau le faagasologa o le olaga e ala i le toe fanau mai.

Ina ia faamautinoa ua sologa lelei suiga i le va o laasaga uma i lenei faagasologa, e faia ai le tele o tū ma faiga faalotu. O nei tū e taaʻina i le talitonuga e faapea, e iai se mea i totonu o i tatou e ola pea pe a oti. E ʻalofia e Kerisiano moni so o se tū e fesootaʻi atu ma lenei talitonuga. Aiseā?

O le ā le Tulaga o Ē ua Maliliu?

E manino lava le faamatalaga a le Tusi Paia e uiga i le tulaga o ē ua maliliu. Ua faapea mai: “O ē ua ola, ua latou iloa e oti i latou; a o ē ua oti, latou te lē iloa se mea; . . . O lo latou alofa foʻi, ma lo latou ita, ma lo latou matauʻa, ua mavae lava ia; . . . aua e leai se galuega, po o se mafaufau, po o se iloa, po o se poto i le tuugamau, o loo e alu atu i ai.” (Failauga 9:5, 6, 10) Ua loa ona talitonuina e tagata tapuaʻi o le Atua lenei upu moni faavae o le Tusi Paia. Ua latou malamalama e faapea, e leai se vaega o le tagata e ola pea pe a oti se tasi. Ua latou iloa foʻi, e leai ni agaga o ē ua oti. (Salamo 146:4) I aso anamua, na poloaʻiina e Ieova ona tagata ina ia matuā vavaeese mai tū po o faiga faalotu e fesootaʻi atu ma le talitonuga e faapea, o ē ua oti ua iloa mea ma e mafai ona latou faaaafia tagata o loo ola.—Teuteronome 14:1; 18:9-13; Isaia 8:19, 20.

Na faapena foʻi ona ʻalofia e Kerisiano o le uluaʻi senituri tū faauputuu po o ni faiga faalotu sa fesootaʻi atu ma aʻoaʻoga a lotu sesē. (2 Korinito 6:15-17) I Molimau a Ieova i aso nei, e tusa lava po o le ā le lanu, ituaiga, po o le talaaga, e latou te teena uputuu ma tū e fesootaʻi atu ma aʻoaʻoga a lotu sesē e faapea, e iai se mea i totonu o le tagata o loo ola pea pe a oti.

O le ā e mafai ona taʻitaʻia ai i tatou o ni Kerisiano i le filifilia pe faia nisi o tū pe leai? E tatau ona tatou mafaufau lelei e uiga i fesootaʻiga o lenā talitonuga ma aʻoaʻoga e lē faale-Tusi Paia, e pei o le talitonuga, e mafai e agaga o ē ua oti ona faaaafia olaga o ē o loo ola. E lē gata i lea, e manaʻomia ona tatou manatunatu pe faamata e lē faatausuaiina isi o ē ua iloa talitonuga ma aʻoaʻoga a Molimau a Ieova pe a tatou auai i na tū ma sauniga. E tusa ma na manatu, seʻi o tatou iloiloina ni vala tāua se lua: le fanau mai ma le oti.

Le Fanau Mai ma le Faaigoaina o se Tamaitiiti

E tele lava tū talafeagai e fesootaʻi ma le fanau mai o se tamaitiiti. Ae peitaʻi, i atunuu ia e manatu i le fanau mai o se pepe e faapea o se suiga e ui atu ai mai le nofoaga o agaga o tuaa i le nuu o tagata ola, e tatau i Kerisiano moni ona matuā faaeteete ai i lenā talitonuga. O se faaaʻoaʻoga, i nisi vaega o Aferika, e taofia ai se pepe fou faatoʻā fanau mai i totonu o le fale, ma e lē faaigoaina foʻi seʻia mavae se vaitaimi patino. Talu ai e eseese vaitaimi ia e faatali ai e tusa ai ma tulaga i le atunuu, i le faaiʻuga o le taimi na faatali ai, e faia ai se sauniga e faaigoa ai le tamaitiiti, e aumai ai i fafo le tamaitiiti ma faailoa aloaʻia atu i aiga ma uō. O le taimi lenā e faailoa aloaʻia mai ai le igoa o le tamaitiiti iā i latou o loo auai.

I le faamatalaina o le uiga o lenei tū, ua taʻua ai i le tusi, Ghana—Understanding the People and Their Culture: “I aso muamua e fitu o lona olaga, ua manatu ai i se pepe e faapea, o loo alu sana ‘asiasiga’ ma o loo uia se suiga mai le lalolagi o agaga i se olaga faalelalolagi. . . . E masani lava ona taofia le pepe i totonu o le fale ma e lē faatagaina tagata e lē o ni aiga e vaai i le pepe.”

Aiseā e faatali ai mo se vaitaimi a o leʻi faaigoaina aloaʻia le tamaitiiti? Ua faamatala mai le tusi, Ghana in Retrospect: “A o leʻi oo i  le aso lona valu, e leʻi avea le tamaitiiti ma tagata. O loo fesootaʻi pea o ia i le isi nofoaga o agaga lea na sau ai. . . . Talu ai o le igoa lea ua mafai ai ona avea le tamaitiiti ma tagata, pe afai la e fefefe le ulugalii ina neʻi oti la laʻua tama, e la te faatuai ona faaigoa le tamaitiiti seʻi o la mautinoa o le a ola o ia. . . . O lea la, o lenei aganuu, e taʻua i nisi taimi, o le faailoa atu o le tamaitiiti i le lautele, ma ua manatu i ai, e tāua tele lenei faiga mo le tamaitiiti ma ona mātua. O se sauniga e faailoa atu ai le tamaitiiti i le lalolagi o tagata ola.”

E masani lava o se tagata matua o le aiga na te faailoa aloaʻia mai le igoa o le tamaitiiti i le taimi e faia ai lea sauniga. E eseese lava taualumaga o lea sauniga i vaipanoa eseese, ae e masani lava ona aofia ai i lea sauniga le liligiina atu o uaina, ofoina atu o tatalo i agaga o tuaa e faaalia ai le talisapaia o le taunuu saogalemu mai o le tamaitiiti, ma isi faiga masani faalotu.

O le vaega tāua o le sauniga, le faalauiloa atu o le igoa o le tamaitiiti. E ui lava o le tiute tauave o mātua le faaigoa o la laʻua lava tama, ae e masani lava ona iai taaʻiga malolosi a isi sui o le aiga i le filifilia o le igoa. O nisi igoa, e ono avea o se uiga faafaatusa e tusa ai ma le gagana, e pei o le “alu ma le toe foʻi mai,” “Ua toe sau faalua Tinā,” po ua “toe sau Tamā.” O isi igoa e iai uiga ua fuafuaina ina ia taofia ai tuaa mai le toe aveina o le tamaitiiti faatoʻā fanau mai i le lalolagi o tagata oti.

O le mea moni, e leai se mea e leaga ai le fiafia pe a fanau mai se pepe fou. O le faaigoaina o se tamaitiiti i se igoa o se isi po o tuuina atu o se igoa e atagia ai tulaga o ni mea na tutupu i le taimi na fanau ai, e leai se mea e afāina ai, ma o le faaigoaina o le tamaitiiti o se filifiliga patino lenā. Ae peitaʻi, o Kerisiano e mananaʻo e faafiafia le Atua, e faaeteete ina ia ʻalofia tū po o sauniga e faaalia ai e latou te talitonu foʻi i le manatu lea e faapea, o le pepe faatoʻā fanau mai, o se “tagata asiasi” mai le fafa o agaga o tuaa i le lalolagi o tagata ola.

E lē gata i lea, ona e toʻatele e manatu i le faaigoaina o le pepe o se suiga tāua o le olaga, e ao i Kerisiano ona magafagafa i lotofuatiaifo o isi ma manatunatu i le aafiaga o lea faiga i tagata lē talitonu. O se faaaʻoaʻoga, o le ā se faaiʻuga e ono faia e nisi, pe afai e taofia e se aiga Kerisiano sa latou pepe fou mai le vaaiga a isi tagata seʻiloga ua uma ona faaigoa aloaʻia? O le ā le manatu o isi pe a latou faaigoa le pepe i se igoa e feteenaʻi ma aʻoaʻoga a le Tusi Paia?

I lea, pe a filifilia le igoa ma le taimi e faaigoa ai tamaiti, o loo taumafai Kerisiano ina ia “faia mea uma lava ia viia ai le Atua” ina ia lē tausuai ai nisi. (1 Korinito 10:31-33) E latou te lē ‘faalēaogāina le poloaʻiga a le Atua ina ia taofi i a latou uputuu’ ia e viia ai tagata oti. Ae latou te vivii ma faamamaluina Ieova, le Atua soifua.—Mareko 7:9, 13.

Sao Mai le Oti i le Ola

O le oti, e pei o le fanau mai, ua manatu i ai le toʻatele o se suiga; o le tagata ua oti, e alu atu mai i le lalolagi vaaia i le nofoaga lē vaaia o agaga o ē ua maliliu. E talitonu le toʻatele a lē faia nisi o tū ma faiga faalotu i le maliu o se tasi, ona matuā feita ai lea o agaga o tuaa, o ē ua talitonu e iai le mana e faasala pe tauia ai tagata ola. O lenei talitonuga, ua taaʻina tele ai le auala e faia ai falelauasiga o tagata oti.

O falelauasiga ua faia ina ia faamalie ai ē ua maliliu, e masani lava ona aafia ai le tele o faalogona ootia; mai le fetagisi ma feʻei i luma o le tagata oti, e oo i faigaʻai fiafia pe a uma ona tanu le maliu. E masani ona soona aai, onanā, ma sisiva i musika leo tetele e faamanatu ai le tanuga o le oti. E matuā faatāuaina falelauasiga o lea, e oo lava i aiga e matuā matitiva, e faia taumafaiga ina ia saʻili ia lava tupe ina “ia faia ai se falelauasiga talafeagai,” e ui lava e oo ai i le tele o faigatā ma le tele o aitalafu.

 I le faagasologa o tausaga, sa matuā faaalialia ai i lumāmea e Molimau a Ieova tū e lē faale-Tusi Paia o falelauasiga. * E aofia ai i na tū leoleoga, le liligiina o le uaina, talanoa atu ma talosaga atu i lē ua maliu, le faamanatuina o le aso na maliu ai, ma isi lava tū e faavae i le talitonuga e faapea, e iai se mea o loo i totonu o le tagata e ola pea pe a mavae le oti. O na tū e lē viia ai le Atua, e lē mamā, ma o ni aʻoaʻoga “lē aogā e faasesē ai” e faavae i “le uputuu a tagata” ae lē o upu moni o le Afioga a le Atua.—Isaia 52:11; Kolose 2:8.

Omiga Ina ia Gauaʻi

E ese le faigatā i nisi le taumafai e ʻalofia tū ma uputuu, aemaise lava i atunuu e matuā faatāuaina ai le faamamaluina o ē ua oti. Ona o le lē mulimuli i ia tū, ua masalomia ai e nisi Molimau a Ieova, po ua faitioina foʻi e faapea, e lē fiafia e faifaimea faatasi ma tagata ma e lē faaaloalo i ē ua maliliu. Ona o faitioga ma omiga malolosi, ua fefefe ai nisi e faaalia mai e ese i latou e ui lava i lo latou malamalamaga saʻo i upu moni o le Tusi Paia. (1 Peteru 3:14) Ua manatu isi tagata, o nei tū o se vaega o a latou aganuu, ma e lē mafai ona lafoaʻia atoatoa. Ae ua manatu isi e faapea, o le lē mulimuli i nei tū, e ono faailogatagata ai le atunuu i tagata o le Atua.

Tatou te lē mananaʻo e faatigā fua isi tagata. Ae o loo lapataʻia i tatou e le Tusi Paia e faapea, o le tutū mausalī mo le upu moni, o le a iʻu ai ina lē fiafia mai le lalolagi lea ua faaesea mai le Atua. (Ioane 15:18, 19; 2 Timoteo 3:12; 1 Ioane 5:19) O lo tatou tutumau ma le iloa e tatau ona ese i tatou mai i ē o loo pogisa faaleagaga. (Malaki 3:18; Kalatia 6:12) E pei lava ona teena e Iesu faaosoosoga a Satani ina ia faia se mea e lē fiafia ai le Atua, e ao foʻi ona tatou tetee atu i omiga ina ia faia se mea e lē fiafia ai le Atua. (Mataio 4:3-7) O Kerisiano moni, e lē taaʻina i le fefe i tagata, ae latou te manatu mamafa i le faafiafiaina ma le faamamaluina o Ieova o le Atua o le upu moni. E latou te faia faapea e ala i le lē faagutugutulua i tapulaa a le Tusi Paia e faatatau i le tapuaʻiga mamā ona o omiga mai isi.—Faataoto 29:25; Galuega 5:29.

Ia Faamamaluina Ieova i le Auala Tatou te Vaai ai i Ē ua Maliliu

E masani ona matuā tigā faalogona ma e faavauvau pe a maliu se tasi e pele iā i tatou. (Ioane 11:33, 35) O manatunatuga alofa i sē pele ma faia lona falelauasiga i se auala talafeagai, o le auala fetaui lea e faailoa atu ai lo tatou alofa. Ae peitaʻi, e ui ina matuā faanoanoa Molimau a Ieova ona o le maliu o sē pele iā i latou, ae latou te lē faia ni faiga faauputuu e lē fiafia i ai le Atua. E lē faigofie lenei mea mo i latou na ola aʻe i aganuu e matuā malosi ai le fefe i tagata oti. Ua avea o se mea faigatā iā i tatou le tausia o se vaaiga saʻo pe a tigā o tatou faalogona ona o le maliu o sē e vavalalata mai iā i tatou. Ae peitaʻi, ua faamalosia Kerisiano moni e Ieova, ‘le Atua e ana le faamāfanafanaga uma,’ ma ia maua aogā mai le lagolagosua alofa a uso talitonu. (2 Korinito 1:3, 4) O lo latou faatuatua malosi o le a toe tutū mai ē ua maliliu, o ē o loo manatua pea e le Atua, ua māfua ai ona lē auai Kerisiano i falelauasiga e lē faa-Kerisiano, lea ua teena ai le moni o le toe tū.

Pe tatou te lē fiafia ea ona ua valaauina i tatou e Ieova “nai le pōuliuli e oo i lona lava malamalama e matuā ofo ai”? (1 Peteru 2:9) A o tatou tofo i le fiafia o le fanau mai ma onosaia le faanoanoa o le oti, seʻi avea lo tatou faanaunauga malosi e faia le mea saʻo ma le alofa loloto mo Ieova le Atua e uunaʻia ai pea i tatou ina ia “savavali ia pei o ē ua malamalama.” Seʻi aua lava neʻi faaleagaina i tatou i tū e lē faa-Kerisiano na e lē fiafia i ai le Atua.—Efeso 5:8.

[Faamatalaga pito i lalo]