‘O Loʻu Fesoasoani e Mai iā Ieova Lea’

E Mafai Ona Avea le Tulaga Matua ma “Pale Matagofie”

UA FAAPEA mai Muriel e 101 tausaga, “o le olaga lea e sili ona lelei.” Na taaofaʻi e Teofilo e 70 tausaga le auauna iā Ieova, “o se faaeaga moni lava.” Na taʻua e Maria e 73 tausaga, “e leai se isi mea e sili atu ona lelei e faaaogāina i ai loʻu olaga.” O i latou uma lava na, sa auauna iā Ieova le Atua i o latou olaga atoa.

Ua faapena foʻi le tulaga o le toʻatele o ē tapuaʻi ma le maelega iā Ieova i le lalolagi aoao. E ui i tulaga matua, faafitauli tau le soifua mālōlōina, ma isi tulaga faigatā, ae o loo latou auauna pea ma le loto atoa i le Atua. I le faapotopotoga Kerisiano, ua avea na tagata matutua faamaoni ma faaaʻoaʻoga lelei o le tuutoina atu i le Atua. E matuā faatāuaina e Ieova le auaunaga a tagata matutua, e ui lava e lē tele ni mea e mafai ona latou faia. *—2 Korinito 8:12.

Ua taʻua i le tusi o Salamo se manatu talafeagai e faatatau i le soifuaga o le a maua e tagata faamaoni ua matutua. Ua pei i latou o se laau ua loa ma matagofie i le vaai ae e tumau pea ona fua mai. Na pese le faisalamo e faatatau i tagata matutua faamaoni: “A oo ina ulusinā, latou te fua mai pea lava; e malolosi ma lauolaola i latou.”—Salamo 92:14.

Ua matataʻu nisi neʻi lafoaʻia ma lē amanaʻia i latou pe a mavae atu lo latou malosi. Na augani Tavita i le Atua: “Aua e te lafoaʻi iā te aʻu i ona pō ou te toeaina ai; aua e te tuulafoaʻi mai iā te aʻu pe a mavae atu loʻu malosi.” (Salamo 71:9) Aiseā e mafai ai ona tiotio pea se tasi i le taimi ua matua ai ae e lē vaivai? Talu ai ua aʻoaʻoina o ia e le Atua e fai le amiotonu. Na pese le faisalamo: “E tupu olaola le tagata amiotonu e pei o le pama.”—Salamo 92:12.

O i latou na taulaʻi atu o latou soifuaga i le auaunaga faamaoni i le Atua, ua fua mai i fua lelei ina ua matutua. O lona uiga la, o le tele o mea na latou faia i o latou soifuaga, ua fesoasoani iā i latou po o isi foʻi ina ia fua mai ai ni iʻuga lelei, e pei lava o ni fatu e tātupu aʻe ma oo ina matua ma maua ai se seleselega tele. (Kalatia 6:7-10; Kolose 1:10) O le mea moni, o tagata ua maumau o latou olaga ona o le saʻiliga o o latou lava tuʻinanauga, ma ua lē amanaʻia ai ala o le Atua, e itiiti ni iʻuga lelei latou te maua pe a matutua.

O le amiotonu o se mea matagofie lea i ē matutua e pei ona faamamafa e le tusi o Faataoto. E tatou te faitau ai e faapea: “O le pale matagofie le ulusinā, pe a ua i ai i le ala o le amiotonu.” (Faataoto 16:31) Ioe, o le amiotonu o se faailoga lea o le lalelei o le tagata i totonu. O le saʻilia o se ala amiotonu i le soifuaga, e faaaloalogia ai. (Levitiko 19:32) Pe a sinā le lauao o se tasi ona o le tulaga matua ae e atamai ma amio lelei, e faaaloalogia o ia.—Iopu 12:12.

E faafiafiaina le finagalo o Ieova pe a auauna se tagata amiotonu iā te ia i lona soifuaga atoa. Ua faapea mai le Tusi Paia: “E oo ina e toeaina, o aʻu lava o ia, e oo foʻi ina ulusinā, o aʻu lava ou te tauave iā te oe; o aʻu na ou faia, ou te siitia foʻi, ou te tauave, ma ou laveaʻiina oe.” (Isaia 46:4) Maʻeu le faamāfanafanaina i le iloa ua  folafola mai e lo tatou Tamā o i le lagi e na te tausia ma lagolagoina ana auauna faamaoni pe a matutua!—Salamo 48:14.

Talu ai e matagofie i le silafaga a Ieova le auauna faamaoni o se tasi iā te ia i lona olaga atoa, pe lē tatau ai ea la ona faaaloalo atu i ai isi? O le faaatagia atu o le silafaga a le Atua, tatou te faapelepele ai i o tatou uso talitonu matutua. (1 Timoteo 5:1, 2) O lea la, seʻi o tatou vaai i ni auala aogā e faaalia ai le alofa faa-Kerisiano e tausia ai o latou manaʻoga.

Mauaina o le Ala i le Ola i le Taimi ua Matua Ai

Ua faamautinoa mai iā i tatou e Solomona: “O le ala o le amiotonu, o i ai le ola.” (Faataoto 12:28) E lē taofia se tasi mai le mauaina o lenei ala ona ua afu lona soifua. O se faaaʻoaʻoga, i Moldova, na faaaogā ai e se tamāloa ua 99 tausaga, lona olaga talavou i le faaauilumaina o aʻoaʻoga faa-Komunisi. Na mitamita o ia ona sa talanoa ma taʻitaʻi taʻutaʻua faa-Komunisi, e pei o V. I. Lenin. Ae peitaʻi, na mou atu le faamoemoe o lenei tagata matua ma mea na tāua i lona soifuaga ina ua paʻū faiga faa-Komunisi. Ae ina ua taʻu atu e Molimau a Ieova iā te ia e na o le Malo o le Atua le vaifofō moni o faafitauli o tagata, na ia talia le upu moni o le Tusi Paia ma avea ma se tagata aʻoga filigā. E faanoanoa ona na maliu o ia a o leʻi papatisoina o se auauna a Ieova.

Ina ua aʻoaʻoina e faatatau i tapulaa tau amio a le Atua, na iloa ai e se fafine ua 81 tausaga, e ao ona ia faaipoipo i le tamāloa o loo la nonofo mo le tele o tausaga. Na lototele lenei fafine ma faamatala atu lona talitonuga faale-Tusi Paia i le tamāloa o loo la nonofo. Na matuā faateʻia o ia ma le olioli ina ua malie le tamāloa la te faaipoipo. Ina ua lesitala faaletulafono la laʻua faaipoipoga, na vave lava ona ia agaʻigaʻi i luma faaleagaga. I le valu masina talu ona fai lana suʻesuʻega faale-Tusi Paia, ae avea loa o ia ma tagata talaʻi lē papatisoina ma papatiso mulimuli ane ai. Maʻeu le moni, e matagofie le tagata matua pe a faapaleina i le amiotonu!

Ioe, e mautinoa e fiafia le Atua i Kerisiano matutua faamaoni. O le a lē lafoaʻia e Ieova i latou o ē tumau i le faamaoni iā te ia. Na i lo lea, ua ia folafola mai e na te taʻitaʻia i latou, lagolagoina ma tausia i taimi ua matutua ai. Ua latou faamaonia upu a le faisalamo: ‘O loʻu fesoasoani e mai iā Ieova lea.’—Salamo 121:2.

[Faamatalaga pito i lalo]

[Faamatalaga faaopoopo i le itulau 9]

“O le pale matagofie le ulusinā, pe a ua i ai i le ala o le amiotonu.”—FAATAOTO 16:31

[Pusa i le itulau 8]

E TAUSIA E IEOVA ANA AUAUNA MATUTUA

“Ia e tulaʻi atu i luma o lē ua ulu sinā, ia e ava foʻi i luma o le toeaina.” —Levitiko 19:32.

“E oo ina e toeaina, o aʻu lava o ia, e oo foʻi ina ulusinā, o aʻu lava ou te tauave iā te oe.” —Isaia 46:4.