Fesili Mai le ʻAufaitau

Na mafai faapefea ona tumau ona avea Samasoni ma Naseri ae sa paʻi atu o ia i tino o tagata na ia fasiotia?

I Isaraelu anamua, sa ono tauofo se tagata ina ia vavae ese o ia e ala i le faia o se tautoga e avea ai ma Naseri mo se taimi patino. * Ua faapea mai se tasi o faasāsāaga mo lē na faia lenei tautoga: “O ona pō uma foʻi e vavae mai ai o ia e ia mo Ieova, aua neʻi papaʻi atu o ia i se tagata oti. Aua neʻi leaga o ia ona o lona tamā, po o lona tinā, po o lona uso, po o lona tuafafine, pe a latou oti.” Ae faapefea pe afai “e oti faafuaseʻi se tasi i ona tafatafa”? O le paʻi faafuaseʻi i se tino oti o le a leaga ai lona tofiga faa-Naseri. I lea, na faapea mai ai le tulafono: “A o pō na muamua e lē taulia lava ia.” E manaʻomia ona faia se sauniga o lona faamamāina, ma toe amata le vaitaimi o lana tautoga faa-Naseri.—Numera 6:6-12.

Ae e ese le tulaga o le faa-Naseri a Samasoni. A o leʻi fanau mai Samasoni, na taʻu atu e le agelu a Ieova i lona tinā e faapea: “Faauta, o le a to oe, e te fanau foʻi se tama tane; e le oo se tafi i lona ulu, auā e faia le tama ma naseri i le Atua, e afua mai ina fanau; o ia foʻi e afua mai ona faaola iā Isaraelu ai lima o Filisitia.” (Faamasino 13:5) E leʻi faia e Samasoni se tautoga o le faa-Naseri. Na tofia o ia e le Atua e fai ma Naseri, ma sa avea o ia ma Naseri i lona olaga atoa. E lē faatatauina la i lona tulaga le faasāsāaga o le paʻi atu i tino oti. Afai na faatatauina i lona tofiga lea tulafono, ma faafuaseʻi ona paʻi atu i se tino oti, o le a faapefea la ona toe amata lona tofiga lea na amata mai i le taimi o lona fanau mai? E foliga mai la, e ese le manaʻoga mo le Naseri mo le olaga atoa mai iā i latou na tauofo e avea o ni Naseri.

Seʻi iloilo la le poloaʻiga a Ieova i ni tagata se toʻatolu na avea ma Naseri i o latou olaga atoa ia e taʻua i le Tusi Paia: o Samasoni, Samuelu, ma Ioane le Papatiso. E pei ona taʻua muamua, sa lē manaʻomia ona tafiina le lauulu o le ulu o Samasoni. Na faia e Hana se tautoga e faatatau i lana tama o Samuelu a o leʻi afuafuaina e faapea: “Ona ou foaʻi atu lea o ia iā Ieova i aso uma o lona ola; e lē oo foʻi se tafi i lona ulu.” (1 Samuelu 1:11) Na faapea atu le agelu a Ieova e faatatau iā Ioane le Papatiso: “E lē inu o ia i le uaina po o le ʻava  malosi.” (Luka 1:15) E lē gata i lea, “o Ioane ia, sa ofu i le fulufulu kamela, ma le fusi paʻu i lona sulugātiti; a o ana mea e ʻai, o se akerise ma le meli vao ia.” (Mataio 3:4) E leai se tasi o nei tagata e toʻatolu na poloaʻia e aua neʻi faalatalata i se tino oti.

E ui o se Naseri, ae na tofia Samasoni e Ieova e avea o se tasi o faamasino na te laveaʻiina tagata Isaraelu mai lima o ē na vetea a latou mea. (Faamasino 2:16) I le faataunuuina o lenei tofiga, na papaʻi atu ai o ia i tino oti. I se tasi taimi, na fasiotia ai e Samasoni ni Filisitia se 30 ma fao o latou ofu. Mulimuli ane, na alu atu o ia ma fasiotia le fili, “o vae ma ogāvae, o le fasi tele.” Na ia ave foʻi le ivi auvae o le asini ma fasiotia ai tane e afe. (Faamasino 14:19; 15:8, 15) Sa faia e Samasoni nei mea uma ona o le finagalo malie ma le lagolagosua a Ieova. Ua faamaonia e le Tusi Paia, o ia o se faaaʻoaʻoga o le faatuatua.—Eperu 11:32; 12:1.

Po o le faamatalaga e faapea, na saeia e Samasoni se leona “e pei ona saeia se tamaʻi ʻoti” ua faaalia ai sa fai ma masani i ona aso le saeia o ni tamaʻi ʻoti?

E leai se faamaoniga e faapea, sa masani ona saeia e tagata i taimi o faamasino o Isaraelu ia tamaʻi ʻoti. Ua faapea mai le Faamasino e 14:6: “Ona osofia lea o [Samasoni] e le Agaga o Ieova, ua na saeia le leona, e pei ona saeia se tamaʻi ʻoti, a e leai lava se mea i lona lima.” E foliga mai o lenei faamatalaga, o se talafaatusa.

O le faaupuga “ua na saeluaina” e ono iai ni uiga se lua. Atonu na saeia e Samasoni le gutu o le leona, mai luga i lalo, pe na matuā saeia le leona atoa. Afai na saeia le gutu o le leona, e faigofie la, ona faia faapena e le tagata i se tamaʻi oti. I lenei tulaga, ua faaalia i le talafaatusa e faapea, sa lē faigatā iā Samasoni ona fasi le leona i ona lima e aunoa ma se mea. Ae ā pe afai na fasimatea e Samasoni le leona i le saeia o le leona atoa? E ao ona malamalama i le faamatalaga e faapea e na o se faatusatusaga. O le manatu o le faatusatusaga e faapea, o le agaga o Ieova na faamalosia ai Samasoni e faia se gaoioiga sa manaʻomia ai se malosi e sili atu i le malosi o le tagata. Po o le ā lava le tulaga, o le faatusatusaga lea e i le Faamasino 14:6, ua faaalia ai e faapea, ona o le fesoasoani a Ieova, e leʻi taufeʻai ai le leona iā Samasoni e pei ona lē taufeʻai o se tamaʻi ʻoti i so o se tagata.

[Faamatalaga pito i lalo]