“O le ā Lau Auala?”

O LE fesili lenei mai se tamā matua sa i se faleʻaiga, na faateʻia ai Muriel, o se tinā e toʻatolu lana fanau. Sa pisi lava Muriel i le aveina o lana fanau e vaai le fomaʻi, ma sa fai si ona tuai. Sa lē lava se taimi mo i latou e ō ai i le fale e fai sina faamalositino a o leʻi oo i le taimi o la latou sauniga faa-Kerisiano. O lea, na ia aveina ai tamaiti i se faleʻaiga e latalata ane, e aai ai.

Ina ua uma la latou taumafataga, na faapea atu se tamāloa iā Muriel: “Sa ou mātauina lava outou i le taimi na taunuu mai ai. Sa ou iloa ai se eseesega tele i le va o lau fanau ma i latou e masani ona ou feiloaʻi i ai. E ese le leaga o le auala e faia ai e tamaiti laulau ma nofoa. E tuu o latou vae i luga o laulau, ma fetosoaʻi solo nofoa. Ae e ese le filemu o lau fanau ma amio pulea. O le ā lau auala ua e taulau ai i le tausia o lau fanau?”

Na tali atu Muriel: “E matou te suʻesuʻe e lē aunoa le Tusi Paia ma laʻu tane ma la ma fanau, ma e matou te taumafai e faatatauina mea o loo matou aʻoaʻoina. O i matou o Molimau a Ieova.” I lea, na faapea atu ai le tamāloa: “O aʻu o se Iutaia ma na ou sao mai le fasiotiga o tagata na faia a le ʻau Nasi. Ou te manatua le sauāina o Molimau a Ieova i Siamani. E oo lava i lenā taimi, sa mātauina ai le ese o i latou. Ua matuā faafiafiaina lava aʻu i amioga a lau fanau. E tatau lava ona ou matuā iloiloina la outou lotu.”

O le Tusi Paia, o se tusi taʻiala e sili ona lelei i le tausia aʻe o fanau. E matuā fiafia lava Molimau a Ieova e fesoasoani i isi ina ia maua aogā mai taʻiala o le Tusi Paia. E matou te valaaulia ma le māfana oe ina ia e talia lenei valaau ua ofoina atu.