O le Talaʻiga a Saulo na Faapogai ai Teteega

SA LĒ malamalama tagata Iutaia i Tamaseko i lenei mea. Po ua faapefea i se tagata sa matuā maelega i le lotu Iutaia ona liliu ese? O Saulo lenei, sa faasoesa i tagata na valaau i le suafa o Iesu i Ierusalema. Na alu atu o ia i Tamaseko e faasala i soo sa iai i inā. Ae o lea ua ia talaʻia e faapea, o le tagata inosia lava lenei na faasatauroina ona o le upu leaga i le Atua, o ia lava o le Mesia! Po ua faalētonu le mafaufau o Saulo?—Galuega 9:1, 2, 20-22.

Atonu sa iai se māfuaaga mo lenei suiga. Sa ono talatalanoa i latou sa malaga faatasi mai ma Saulo mai Ierusalema, i le mea na tupu i le auala. A o latou latalata atu i Tamaseko, sa faafuaseʻi lava ona pupula malosi mai se malamalama iā i latou, ma paʻūʻū uma ai i le eleele. Na latou faalogoina foʻi se leo. E leai se tasi o i latou na afāina, e na o Saulo. Sa taatia o ia i le auala. Ae ina ua tū o ia i luga, sa taʻitaʻi atu o ia e isi o le ʻaumalaga i Tamaseko, auā ua tauaso o ia.—Galuega 9:3-8; 26:13, 14.

O se Fili o Iesu a ua Avea ma Uō

O le ā le mea na tupu iā Saulo i le ala i Tamaseko? Po ona o le umi o le malaga, po o le vevela o le lā i le aoauli na vaivai ai o ia? Ua taumafai isi tagata lē talitonu e maua se faamatalaga talafeagai, o lea la ua latou tuuina mai ni māfuaaga o le mea lea na tupu iā Saulo e faapea, ona o le tigā o lona loto fuatiaifo, po o le popole, pe atonu na manatu foʻi, ʻai Saulo na maua i le maʻimāliu.

Ae o le mea moni, ona sa faaali atu le Alii o Iesu Keriso iā Saulo i lenā malamalama malosi, na talitonu ai Saulo, o Ia o le Mesia. I nisi o ata na tusia e le ʻautusiata, na faaatagia ai i lenei vaaiga le paʻū ifo o Saulo mai se solofanua. Atonu o le mea lenā na tupu, ae ua na ona taʻua e le Tusi Paia, na ‘paʻū o ia i lalo i le eleele.’ (Galuega 22:6-11) Po o le ā lava le auala na paʻū ai Saulo, ae lē taitai ona tutusa ma lona paʻū mai lona tulaga faamaualuga. O lea ua ia iloa nei le moni o le mea lea e talaʻia e soo o Iesu. E na o le pau lava le mea e mafai ona faia e Saulo, o lona auai faatasi ma i latou. Na suia ai Saulo mai lē sa avea muamua ma fili o Iesu, ma sē e maelega e folafola lana feʻau. Ina ua toe lelei lana vaai ma papatisoina o ia, “ua atili ai le faamalosi o Saulo, ua fememeaʻi ai Iutaia sa nonofo i Tamaseko ina ua faaalitino atu e ia, o Iesu o le Keriso lava lenei.”—Galuega 9:22.

Lē Taulau Taupulepulega Ina ia Fasiotia o Ia

O fea na alu i ai mulimuli ane ia Saulo lea na faaigoa iā Paulo ina ua mavae lona faaliliuina? I lana tusi atu i Kerisiano i Kalatia, na ia faapea atu ai: “Na ou alu i Arapi, ona ou toe foʻi lea i Tamaseko.” (Kalatia 1:17) O le upu “Arapi,” e ono faasino atu i se faigāmalaga i so o se vaipanoa o le Penisula o Arapi. Sa manatu nisi tagata atamamai e faapea, atonu na malaga atu Paulo i le Toafa o  Suria po o se isi vaipanoa o le malo o Nabataea lea na pulea e Areta IV. Atonu na alu atu Saulo i se nofoaga toʻafilemu e mafaufau ai ina ua mavae lona papatisoga, e pei ona maliu atu o Iesu i le vao ina ua mavae lona papatisoga.—Luka 4:1.

Ina ua toe foʻi atu Saulo i Tamaseko, “ona taupulepule lea o Iutaia e fasioti iā te ia.” (Galuega 9:23) O le kovana lea na avea ma sui o le tupu o Areta i Tamaseko, sa leoleoina le aai ina ia puʻeina Saulo. (2 Korinito 11:32) Ae peitaʻi, a o taupulepule fili ia fasiotia Saulo, ae sa taupulepule soo o Iesu i se auala e faasola ai o ia.

Iā i latou na fesoasoani i le faasolaina o Saulo, o Anania ma isi soo sa olioli faatasi ma Saulo ina ua mavae lona faaliliuina. * (Galuega 9:17-19) Atonu sa fesoasoani foʻi nisi na talitonu ona o le talaʻiga a Saulo i Tamaseko, auā ua faapea mai le Galuega 9:25: “A ua ave e le ʻau soo iā te ia i le pō, ma tuu ifo i le pa o le aai, ua tuutuu ifo i le ato.” E ono faasino atu le faaupuga o “le ʻau soo” iā i latou na aʻoaʻoina e Saulo. Ae e mautinoa o le taulau o lana faiva, na pogai ai le loto leaga o tagata iā te ia.

Se Lesona ia Aʻoaʻoina

Pe a tatou iloiloina mea na tutupu i le taimi o le faaliliuina o Saulo ma lona papatisoina, ua tatou iloa lelei ai, e leʻi soona popole o ia i le auala sa manatu ai tagata iā te ia; ae e leʻi faavaivai ai foʻi ona o teteega matuiā. O le mea sa sili ona tāua iā Saulo, o lona tofiga ina ia alu e talaʻi.—Galuega 22:14, 15.

Pe na seʻi faatoʻā e talitonu nei i le tāua o le talaʻiina o le tala lelei? Afai o lea, ia e iloa e tatau i Kerisiano moni uma ona avea o ni tagata talaʻi o le Malo. Aua e te teʻi pe a tetee mai nisi i lau talaʻiga. (Mataio 24:9; Luka 21:12; 1 Peteru 2:20) E ese le lelei o le auala na tali atu ai Saulo i teteega. O le a maua ai e Kerisiano le finagalo malie o le Atua o ē e tumau i tofotofoga ma lē faavaivai. Na taʻu atu e Iesu i ona soo: “E inosia foʻi outou e tagata uma ona o loʻu igoa.” Ae, na ia faamautinoa atu iā i latou: “O lo outou onosai tou te maua ai lo outou ola.”—Luka 21:17-19.

[Faamatalaga pito i lalo]

[Ata i le itulau 28]

Na ‘paʻū i le eleele’ Saulo ina ua faaali atu Iesu iā te ia

[Ata i le itulau 29]

Na sao Saulo mai se taupulepulega e fasiotia o ia i Tamaseko