Pe E Mafai Ona E Pulea Mea e Tutupu i Lou Olaga?

PO UA uma ona filifilia lo tatou iʻuga? Po o aafia lo tatou lumanaʻi i filifiliga tatou te faia i le olaga?

Seʻi faapea e pulea e le tagata lava ia mea e tutupu i lona olaga. Pe mafai la ona e muaʻi tofia se tagata e faia se galuega patino pe umia se tulaga aloaʻia? E faapefea ona faataunuuina e le Atua lona finagalo mo le lalolagi, pe afai ua avatu i tagata le faitalia e pulea ai o latou lava olaga? Ua aumaia i le Tusi Paia ni tali faamalieloto i nei fesili.

O le ā le Mea Saʻo, o le Iʻuga Tuupōina po o le Filifiliga Saʻoloto?

Seʻi manatu i le auala na faia ai i tatou e Ieova le Atua. Ua faapea mai le Tusi Paia: “O le faatusa o le Atua na ia faia ai [le tagata]; na faia e ia o i laʻua o le tane ma le fafine.” (Kenese 1:27) O le faia i foliga o le Atua, ua mafai ai ona tatou faaatagia atu ona uiga, e pei o le alofa, faamasinotonu, atamai, ma le malosi. Ua tuuina mai foʻi e le Atua iā i tatou le meaalofa o le filifiliga saʻoloto. O lenei uiga, ua tutasi ai i tatou mai ana foafoaga faalelalolagi. E mafai ona tatou filifili pe tatou te mulimuli i taʻiala tau amio a le Atua pe leai. O le pogai lenā na faapea mai ai Mose: “Ou te valaau i le lagi ma le lalolagi i le aso nei e fai ma molimau iā te outou, ua ou tuuina atu i ou luma o le ola ma le oti, o le manuia ma le malaia; o lenei, ia e  filifili i le ola, ina ia ola ai oe atoa ma lau fanau; ina ia e alofa atu iā Ieova lou Atua, ma e faalogo i lona siʻufofoga, ma ia e pipii atu iā te ia.”—Teuteronome 30:19, 20.

O le meaalofa la o le filifiliga saʻoloto, e lē faapea ai ua tatou saʻoloto atoatoa. E lē tuusaʻolotoina ai i tatou mai tulafono na faia e le Atua mo le faatumauina ma le filemu o le lalolagi. O nei tulafono na faavaeina mo lo tatou lelei, ma o sē na te solia, e ono oo i ni iʻuga matuiā. Seʻi manatu i le mea e tupu pe afai tatou te filifili e lē amanaʻia le tulafono o le kalave ma e oso ifo ai mai i le tumutumu o se fale maualuga!—Kalatia 6:7.

O le filifiliga saʻoloto foʻi, ua faatapulaa ai i tatou mai i isi mea e lē o maua e meaola. Ua fesili mai le tusitala o Corliss Lamont: “Aiseā tatou te tuu atu ai ni tiute tauave i tagata ma toe faasala i latou pe a latou faia mea sesē, pe afai e tatou te talitonu . . . ua uma ona tuupōina iʻuga o a latou filifiliga ma gaoioiga?” E lē talafeagai lenā mea. E lē o faasalaina manu ona o mea latou te faia, e lē tuuaʻia foʻi komepiuta mo gaoioiga ua uma ona faapolokalameina e faia. Ae o le filifiliga saʻoloto, ua tuuina mai ai iā i tatou se tiute tauave mamafa ma o a tatou gaoioiga e fai, e faamasinoina ai i tatou.

Pagā se lē alofa ma se lē fai mea tonu o Ieova le Atua pe afai e na te muaʻi filifilia ae tatou te leʻi fananau mai se auala tatou te uia, ae toe faamasinoina ai i tatou i mea tatou faia! E lē faia e Ieova lenā mea auā “o le Atua, o le alofa lava ia,” ma “e tonu ona ala uma lava.” (1 Ioane 4:8; Teuteronome 32:4) O le tuuina mai iā i tatou o le saʻolotoga e faia ai filifiliga, e na te leʻi filifilia ai foʻi ‘mai le vavau po o ai o le a ia faasaoina ma o ai o le a faaumatia,’ e pei ona manatu ai i latou e talitonu i iʻuga tuupōina. O le filifiliga saʻoloto, e lē aofia ai le muaʻi tuupōina o le iʻuga o se tagata.

Ua faaalia manino i le Tusi Paia, o filifiliga e tatou te faia o le a suia ai lo tatou iʻuga. O se faaaʻoaʻoga, ua talosaga atu le Atua i ē fai mea sesē i le faapea atu: “Ia outou taʻitasi ma liliu mai i lona ala leaga, ma le leaga o a outou amioga, . . . ona ou lē faatigāina lea o outou.” (Ieremia 25:5, 6) E matuā leai se aogā o lenei talosaga pe afai ua uma ona filifilia e le Atua iʻuga o tagata taʻitoʻatasi. E lē gata i lea, ua taʻua i le Afioga a le Atua e faapea: “Inā salamo ia ma liliu, ina ia soloiesea a outou agasala, ina ia oo mai ai o tausaga e filemu ai mai luma o [Ieova].” (Galuega 3:19) E lē taitai ona talosaga mai Ieova i tagata ina ia salamō ma liliu pe afai ua ia muaʻi silafia e matuā leai lava se mea  latou te mafai ona faia e suia ai lo latou iʻuga.

O loo taʻua i le Tusi Paia nisi o ē ua valaaulia e le Atua e fai ma tupu faatasi ma Iesu Keriso i le lagi. (Mataio 22:14; Luka 12:32) Ae peitaʻi, ua faapea mai le Tusi Paia, o le a lē toe maua lenā faaeaga pe afai e latou te lē tumau seʻia oo i le iʻuga. (Faaaliga 2:10) Aiseā ua valaaulia ai i latou e le Atua pe afai na ia muaʻi filifili o le a lē filifilia i latou? Seʻi manatu foʻi i upu a Paulo i ona uso talitonu: “Afai tatou te agasala ma le loto i ai pe a uma ona talia o le malamalama o le upu moni, ua lē toe lava se taulaga mo agasala.” (Eperu 10:26) E matuā lē aogā sea lapataʻiga pe afai na muaʻi tuupōina e le Atua iʻuga o na tagata. Ae pe e leʻi muaʻi tofia ea e le Atua nisi e avea ma pule faatasi ma Iesu Keriso?

Pe na Muaʻi Tofia ni Tagata Taʻitoʻatasi po o se Vaega?

Na tusia e Paulo: “[O le Atua] ua faamanuia mai iā i tatou i mea uma lava e manuia ai i la le Agaga, i mea o i le lagi, ona o Keriso; faapei ona ia filifili mai iā i tatou ona o ia, a o leʻi faavaeina le lalolagi, . . . ua na tofia i tatou anamua, ina ia avea ma tamafai māna, ona o Iesu Keriso.” (Efeso 1:3-5) O le ā le mea na tofia anamua e le Atua, ma o le ā le uiga o le tofia “a o leʻi faavaeina le lalolagi”?

Ua taʻua i le fuaitau lenei e faapea, ua filifilia e le Atua nisi, o ē na tupuga mai i le uluaʻi tagata o Atamu, e pule faatasi ma Keriso i le lagi. (Roma 8:14-17, 28-30; Faaaliga 5:9, 10) Ae peitaʻi, o le manatu e faapea na muaʻi filifilia e Ieova le Atua ni tagata mai le faitau afe o tausaga a o leʻi fananau mai ina ia maua lenei faaeaga, e feteenaʻi ma lona tuuina atu i tagata o le saʻolotoga e faia ai filifiliga. O le mea na muaʻi tofia e le Atua, o se vaega o tagata, ae lē o ni tagata taʻitoʻatasi.

O se faataʻitaʻiga: Seʻi faapea ua filifili se malo e faatūina se faalapotopotoga faapitoa. Ua muaʻi filifilia e le malo gaoioiga, le malosi, ma le telē o le faalapotopotoga. Ina ua faagaoioia, ua faamatala atu e ona sui e faapea: “Ua uma ona filifilia e le malo i tausaga ua mavae a tatou galuega e fai. O lea la ua tatou amataina le galuega ua uma ona tofia mai iā i tatou.” Po o le a e faapea mai na muaʻi filifilia e le malo po o ai tagata o le a avea ma sui o le faalapotopotoga? E matuā leai lava. E faapena foʻi, ua uma ona filifili Ieova o le a ia faavaeina se faalapotopotoga faapitoa ina ia faaleleia āuga leaga o le agasala a Atamu. Sa ia muaʻi tofia se vaega o tagata o le a auauna i lenā faalapotopotoga; ae e lē o tagata taʻitoʻatasi. O le a filifilia i latou mulimuli ane, ma o filifiliga latou te faia i le olaga, o le a fua i ai po o le a taliaina i latou pe leai.

O le ā le lalolagi lea sa mafaufau i ai Paulo ina ua ia faapea mai: “[O le Atua ua] filifili mai iā i tatou ona o ia, a o leʻi faavaeina le lalolagi”? O le lalolagi lea e taʻua e Paulo, e lē o le lalolagi na amataina e le Atua ina ua foafoaina Atamu ma Eva. Sa “matuā lelei lava” lenā lalolagi; sa aunoa ma se agasala ma le iʻuvale. (Kenese 1:31) E leʻi manaʻomia se “togiola” mo agasala.—Efeso 1:7.

Ae o le lalolagi lea na taʻua e Paulo, na amata ina ua uma ona fouvale Atamu ma Eva i Etena; o se lalolagi e matuā ese mai i lea na fuafuaina e le Atua i le amataga. O le lalolagi lea, sa amataina i fanau a Atamu ma Eva. O le lalolagi lenā, o loo faia aʻe i tagata ua liliu ese mai le Atua ma ua faapologaina i le agasala ma le iʻu vale. O se lalolagi o tagata o ē e mafai ona togiolaina, ae lē pei o Atamu ma Eva na agasala ma le loto i ai.—Roma 5:12; 8:18-21.

Sa vave lava ona tauaaoina e Ieova le tulaga na iʻu i ai ona o le fouvalega i Etena. Na ia tofia ai loa se faalapotopotoga faapitoa; le Malo Faa-Mesia o Iesu Keriso; lea o le a ia faaaogā e togiola ai tagata mai le agasala a Atamu. (Mataio 6:10) O le mea lenei na faia e le Atua “a o leʻi faavaeina le lalolagi” o tagata ua togiolaina, a o leʻi fanaua mai e Atamu ma Eva ni a la fanau.

E masani lava ona manaʻomia e tagata se fuafuaga ina ia faataunuuina mea o loo latou mananaʻo e fai. Ua fesootaʻi le aʻoaʻoga i iʻuga tuupōina ma le manatu e faapea, e tatau lava ona iai se fuafuaga auʻiliʻili a le Atua mo le vateatea,  lea ua tuupōina ai le iʻuga o mea uma. Ua tusia e Roy Weatherford e faapea: “I le toʻatele o le ʻaufaitofā, e so o se mea lava e lē o faamaʻoti atoatoa maia i mea uma e tutupu, e lē ōgatusa lea ma le tulaga o le Pule Silisili Ese a le Atua.” Pe e manaʻomia ona muaʻi faamaʻoti mai e le Atua mea uma e tutupu?

Ona e lē gata mai lona mana ma e lē mafaatusalia lona atamai, e mafai lava e Ieova ona tauaaoina so o se mea e tupu faafuaseʻi mai ona o le faatinoina e ana foafoaga faiola o a latou filifiliga saʻoloto. (Isaia 40:25, 26; Roma 11:33) E mafai lava ona ia tauaaoina loa ia faafitauli e aunoa ma le muaʻi faia o se fuafuaga. E lē pei o tagata e gata mai lo latou iloa, e lē manaʻomia e le Atua e Ona le Malosi Uma Lava se fuafuaga maʻoti, e muaʻi faamatala mai ai le iʻuga o tagata uma i le lalolagi. (Faataoto 19:21) I le tele o faaliliuga o le Tusi Paia, o loo taʻua ai i le Efeso 3:11, e iai se fuafuaga “talu mai anamua lava” a le Atua na i lo o iʻuga tuupōina.

Le Auala e Mafai Ona E Faaaafia ai Lou Olaga

E iai le fuafuaga a le Atua mo le lalolagi, ma ua uma ona saunia lea fuafuaga. Ua taʻua i le Faaaliga 21:3, 4: “Faauta, ua i ai le afioaga o le Atua faatasi ma tagata, e mau foʻi o ia ma i latou; e fai foʻi i latou mona nuu, e iā te i latou le Atua lava. E soloiesea foʻi e le Atua loimata uma i o latou mata; e leai foʻi se toe oti, po o se faanoanoa, po o se auē, e leai foʻi se toe puapuaga; auā ua mavae atu mea muamua.” Ioe, o le a avea lenei lalolagi ma parataiso, e pei lava ona muaʻi fuafuaina e Ieova. (Kenese 1:27, 28) O le fesili la, Po o le a e iai i inā? E faalagolago lenā mea i filifiliga e te faia nei. E leʻi tuupōina e Ieova lou iʻuga.

O le taulaga togiola a Iesu Keriso, le Alo o le Atua, ua mafai ai e so o se tasi e faatuatua iā te ia ona maua le ola e faavavau. (Ioane 3:16, 17; Galuega 10:34, 35) Ua faapea mai le Tusi Paia: “O lē faatuatua i le Alo, ua iā te ia le ola faavavau; a o lē lē faatuatua i le Alo e lē iloa e ia le ola.” (Ioane 3:36) E mafai ona e filifilia le ola e ala i lou aʻoaʻoina mai i le Tusi Paia e uiga i le Atua, lona Alo, ma Lona finagalo, atoa ma le faatatauina o mea ua e aʻoaʻoina. O lē e gaoioi e ōgatusa ma le poto moni lea o loo faamauina i le Afioga a le Atua, ua faamautinoaina lona ‘nofo ma le fifilemu; e filemu o ia, e lē fefe i se mea leaga.’—Faataoto 1:20, 33.

[Ata i le itulau 5]

I le lē pei o manu, e tauia tagata e tusa ma a latou lava gaoioiga

[Faamatalaga i Ata]

Aeto: Foto: Cortesía de GREFA