Faamuamua Pea Le “Penina Tau Tele” I Aso Nei
Faamuamua Pea Le “Penina Tau Tele” I Aso Nei
“E talaʻiina atu foʻi lenei tala lelei o le malo i le atu laulau uma, e fai ma molimau i nuu uma.”—MATAIO 24:14.
1, 2. (a) O le ā le manatu o tagata Iutaia e uiga i le Malo o le Atua i aso o Iesu? (e) O le ā na faia e Iesu ina ia avatu ai le malamalamaaga saʻo o le Malo, ma o ā iʻuga?
SA MATUĀ naunau tagata Iutaia i le Malo o le Atua a o iai Iesu i le lalolagi. (Mataio 3:1, 2; 4:23-25; Ioane 1:49) Ae peitaʻi, i le taimi muamua e leʻi matuā malamalama lelei le toʻatele o tagata i le telē ma le malosi o le Malo; latou te leʻi malamalama foʻi o le a avea o se pulega faalelagi. (Ioane 3:1-5) E oo lava i nisi na avea ma soo o Iesu, e leʻi malamalama atoatoa i le Malo o le Atua, ma le mea e ao ona latou faia ina ia maua ai le faamanuiaga o le pule faatasi ma Keriso.—Mataio 20:20-22; Luka 19:11; Galuega 1:6.
2 A o faagasolo taimi, na aʻoaʻoina ma le onosai e Iesu ona soo i le tele o lesona, e aofia ai le faataoto i le penina tau tele lea na talanoaina i le mataupu na muamua atu. Na ia faasino atu foʻi iā i latou le tāua o le finafinau i le saʻilia o le Malo faalelagi. (Mataio 6:33; 13:45, 46; Luka 13:23, 24) Na pāʻia o latou loto i na faamatalaga. E leʻi umi ae avea loa i latou ma ē e talaʻi ma le loto tele ma le lē mapu le tala lelei o le Malo i le lalolagi, e pei ona aumaia e le tusi o Galuega le tele o faamaoniga.—Galuega 1:8; Kolose 1:23.
3. E tusa ai ma o tatou taimi, o le ā na fetalai i ai Iesu e faatatau i le Malo?
3 Ae ā aso nei? Ua talaʻia atu i le anoanoaʻi o tagata faamanuiaga o le parataiso i le lalolagi i le pulega o le Malo. I lana valoaga autū e faatatau i le “gataaga o le lalolagi,” na taʻua faapitoa ai e Iesu e faapea: “E talaʻiina atu foʻi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:3, 14; Mareko 13:10) Na ia faamatalaina foʻi, e ao ona faia lenei galuega telē e ui i tulaga faigatā ma luʻi, e oo lava i sauāga. Peitaʻi, na ia avatu lenei faamautinoaga: “A o lē tumau seʻia oo i le gataaga, e faaolaina lea.” (Mataio 24:9-13) E manaʻomia ai le tuuina atu atoatoa ma le lē manatu faapito, e pei ona faaalia e le tagata faatauʻoa i le faataoto a Iesu. Pe iai ea nisi o faaalia lenā faatuatua ma le maelega i le faamuamuaina o le Malo i aso nei?
Olioli i le Mauaina o le Upu Moni
4. O le ā le aafiaga i tagata i aso nei ona o le upu moni?
4 Na matuā olioli le faatauʻoa i le faataoto a Iesu ina ua ia maua le “penina tau tele.” Na uunaʻia o ia e lenā olioli ia faia mea uma i lona malosi ina ia maua mai ai le penina. (Eperu 12:1) E faapena foʻi i aso nei, ua tosina atu tagata i le upu moni e uiga i le Atua ma lona Malo ma uunaʻia ai i latou e gaoioi. Ua faamanatu mai ai le faamatalaga a le uso o A. H. Macmillan, i lana tusi e faatatau i lana saʻiliga o le Atua ma Lona finagalo mo tagata. Na ia faapea mai: “O loo maua e le faitau afe o tagata i tausaga taʻitasi le mea lea ua ou mauaina. E pei i latou o oe ma aʻu, talu ai latou te ō mai mai atunuu, lanu ma tulaga eseese o tagata, e eseese foʻi o lo latou matutua. E mafai ona maua e tagata uma le upu moni. E tosina mai ai ituaiga uma o tagata.”—Faith on the March.
5. O ā iʻuga lelei ua vaaia i le lipoti o le tausaga faaleauaunaga e 2004?
5 Ua vaaia le moni o na upu i tausaga taʻitasi, ona ua uunaʻia e le tala lelei o le Malo o le Atua le toʻatele o tagata loto faamaoni, e tuuina atu o latou ola iā Ieova ma faia lona finagalo. E faapena foʻi le tausaga faaleauaunaga o le 2004, lea na amata mai iā Setema 2003 e oo iā Aokuso 2004. I na masina e 12, e 262,416 i latou na faailoa i le lautele lo latou tuuina atu iā Ieova e ala i le papatisoga i le vai. Na tupu lenā mea i atunuu e 235, ia o loo faia ai e Molimau a Ieova suʻesuʻega faale-Tusi Paia e 6,085,387 i aiga i vaiaso taʻitasi. Ua latou fesoasoani i tagata i tulaga eseese i le tele o atunuu, ituaiga ma gagana ina ia aʻoaʻoina le upu moni e maua ai le ola mai le Afioga a le Atua.—Faaaliga 7:9.
6. O le ā ua māfua ai faatelega o le galuega i le tele o tausaga?
6 Aiseā ua mafai ai lenei mea? E mautinoa ua tosina mai e Ieova nei tagata loto faamaoni iā te ia. (Ioane 6:65; Galuega 13:48) Peitaʻi, e lē faaitiitia ai le agaga lē manatu faapito ma taumafaiga filigā a i latou o ē o loo faamuamua pea le Malo. I le 79 o ona tausaga, na tusi ai le uso o Macmillan: “E leʻi mou atu loʻu faamoemoe i le feʻau a le Tusi Paia talu mai le taimi na ou faatoʻā faalogo ai i folafolaga mo tagata mamaʻi ma ē ua maliliu. I lenā taimi, na ou naunau ai e saʻiliʻili atili i aʻoaʻoga a le Tusi Paia, ina ia mafai ona ou fesoasoani ai i isi e pei o aʻu, o ē o loo fia iloa le Atua e Ona le Malosi Uma Lava o Ieova, ma lona finagalo mo tagata.”
7. O le ā se tala ua faamaonia ai le olioli ma le naunau o i latou ua maua le upu moni?
7 O loo vaaia foʻi lenā agaga naunau i auauna a Ieova i aso nei. O se faaaʻoaʻoga, o Taniela mai Viena, i Oseteria. Na ia faapea mai: “Na avea le Atua ma aʻu uō mamae talu mai lava ina o oʻu laʻitiiti. Sa masani ona ou fia iloa lona suafa, auā e lē lava le faaupuga ‘Atua.’ Ae ina ua 17 oʻu tausaga, na asiasi mai ai Molimau a Ieova i lo matou aiga. Na latou faamatalaina mea uma lava na ou fia iloa e faatatau i le Atua. Na ou maua le upu moni, ma e ese le matagofie! Na matuā faafiafiaina aʻu ma amata ai loa ona ou talaʻi atu i tagata uma.” O lona maelega, na māfua ai ona amusia o ia e tamaiti o lana vasega. Na faaauau mai faapea Taniela: “Talu ai na ou iloa le fetalaiga a Iesu, o le a inosia ma sauāina ona soo ona o lona suafa, na foliga mai ai iā te aʻu, ua taunuu valoaga a le Tusi Paia. Na matuā faafiafiaina ai aʻu ma le maofa.” E leʻi umi ae tuuina atu loa e Taniela lona ola iā Ieova, papatiso ma amata ona saʻilia sini o le auaunaga faamisionare. Ina ua uma ona faaipoipo o ia, na amata ai loa ona talaʻi atu Taniela ma lona toʻalua o Helmut i tagata Aferika, Saina, Filipino ma tagata Initia i Viena. O loo auauna nei Taniela ma Helmut o ni misionare i saute sisifo o Aferika.
Latou te Leʻi Faavaivai
8. O le ā se tasi o auala faamanuiaina ua faaalia ai e le toʻatele le alofa i le Atua ma le faamaoni i lona Malo?
8 O le mea moni, o le auaunaga faamisionare o se tasi lea o auala e faaalia ai e tagata o Ieova i aso nei, lo latou naunau ma le faamaoni i lona Malo. E pei o le faatauʻoa i le faataoto a Iesu, o ē e auai i lenei auaunaga, ua lotomalilie e malaga atu i nofoaga mamao ona o le Malo. E mautinoa, o nei misionare e lē o malaga atu e saʻilia le tala lelei o le Malo; o loo latou ō e talaʻi atu i tagata o nonofo i nuu maotua o le lalolagi, aʻoaʻo atu ma fesoasoani iā i latou ia avea ma soo o Iesu Keriso. (Mataio 28:19, 20) I le tele o atunuu, e ao ona latou onosaia tulaga tugā uiga ese. Ae ui i lea, ua matuā tauia lo latou onosai.
9, 10. O ā ni mea tutupu e faafiafiaina ai o loo olioli ai misionare i atunuu maotua, e pei o le Malo o Aferika Tutotonu?
9 O se faaaʻoaʻoga, i le tausaga na teʻa i le Malo o Aferika Tutotonu, na auai le 16,184 i le Faamanatuga o le maliu o Keriso, e faafitu ona toʻatele atu ai i le aofaʻi o le ʻautalaʻi o le Malo i lenā atunuu. Talu ai o le tele o vaega o lenā atunuu e leai se eletise, e masani lava la ona fai galuega a tagata i fafo i lalo o laau paolo. O lea, e masani foʻi ona fai le galuega talaʻi a misionare i le auala lenā, e faia suʻesuʻega faale-Tusi Paia i fafo i lalo o se laau paolo. E lē gata e malamalama ma mālū fafo, ae e iai foʻi se isi itu e lelei ai. E matuā talisapaia e tagata le Tusi Paia, ma o talanoaga faalelotu, o se mataupu masani e pei o talanoaga e faatatau i taaloga po o le tala i le tau i isi atunuu. E masani lava e mātau e tagata feoaʻi le mea lea e fai, ma latou auai i le suʻesuʻega.
10 A o faia se suʻesuʻega faale-Tusi Paia a se misionare i fafo, ae na sau ai se tama talavou e nofo i le isi itu o le auala. Na ia faapea atu, talu ai e leʻi asiasi atu se isi iā te ia, e ao ai ona la suʻesuʻe le Tusi Paia ma le misionare. Na fiafia le misionare e faia faapea, ma na vave ona agaʻigaʻi i luma le tama talavou lenei. I le atunuu lava lenā, e masani ona taofia ai e leoleo Molimau a Ieova i le auala, e lē ina ia avatu se sala, ae ina ia fesili atu mo ni lomiga fou o le Olomatamata ma le Ala Mai! pe faafetai atu foʻi iā i latou i se mataupu na latou fiafia i ai.
11. E ui i faigatā, ae o ā manatu o i latou ua loa o avea ma misionare e uiga i la latou auaunaga?
11 O loo auauna pea ma le faamaoni le toʻatele o i latou o ē na amata le auaunaga faamisionare i le 40 po o le 50 tausaga ua mavae. Maʻeu se faaaʻoaʻoga o le faatuatua ma le onosai mo i tatou! I le silia i le 42 tausaga, na auauna ai se ulugalii o ni misionare i atunuu eseese se tolu. Ua faapea mai le tane: “Sa iai faafitauli. O se faaaʻoaʻoga, na ma tauivi ma le malalia mo le 35 tausaga. Peitaʻi, e lē taitai o ma faanoanoa i la ma filifiliga o le avea o ni misionare.” Ua faaopoopo mai lana āva: “E tele mea ma te matuā lotofaafetai ai. O se fiafiaga mo i maʻua le talaʻiga, ma e faigofie ona amata suʻesuʻega faale-Tusi Paia. Pe a ō mai tagata aʻoga i sauniga ma faamasani i isi, e pei o se aiga ua faapotopoto faatasi i taimi uma.”
Ua Latou “Manatu ua Lē Aogā Mea Uma Lava”
12. E faapefea ona faaalia le talisapaia mo le tāua o le Malo?
12 Ina ua maua e le tagata faatauʻoa le penina tau tele, “ona alu ai lea o ia, ua faatau atu ana mea uma, i le faatau aʻi mai.” (Mataio 13:46) O se uiga masani o i latou e matuā talisapaia le tāua o le Malo, o le lotomalie lea e tuua mea uma ua manatu i ai e tāua. Na faapea mai Paulo, o lē o le a faatasi ma Keriso i le mamalu o le Malo: “O loʻu manatu ua lē aogā mea uma lava ona o le silisili ese o le poto i la Keriso Iesu loʻu Alii; ona o ia ua ou faalēaogāina mea uma, ma ou manatu o otaota lava ia mea, ina ia ou maua Keriso.”—Filipi 3:8.
13. Na faapefea i se tasi i le atunuu o Czech ona faaalia lona naunau i le Malo?
13 E faapena foʻi i aso nei, ua lotomalilie le toʻatele e faia ni suiga tetele i o latou olaga ina ia maua faamanuiaga o le Malo. O se faaaʻoaʻoga, iā Oketopa 2003, i le atunuu o Czech, na tau ai se uluaʻoga e 60 tausaga i se tusi e fai ai suʻesuʻega o le Tusi Paia, o Le Poto e Taʻitaʻia ai i le Ola e Faavavau. Ina ua uma ona ia faitau i le tusi, na ia faafesootaʻia vave Molimau a Ieova i lona vaipanoa ina ia fai se suʻesuʻega faale-Tusi Paia. Na lelei lona agaʻigaʻi i luma faaleagaga ma e leʻi umi ae amata ona auai i sauniga uma. Ae faapefea lana fuafuaga e fia avea ma pulenuu ma ulu atu i le tauvaga ina ia filifilia i le senate? Na ia filifili e ulu atu i se isi tauvaga ese—o le tausinioga i le ola, o sē e talaʻia le Malo. Na ia faapea mai, “na mafai ona ou tufaina atu le tele o lomiga faale-Tusi Paia i tamaiti o laʻu aʻoga.” Na faailogaina lona tuuina atu iā Ieova e ala i le papatisoga i le vai i se tauaofiaga iā Iulai 2004.
14. (a) O le ā ua uunaʻia ai e le tala lelei o le Malo le faitau miliona o tagata e fai? (e) O ā fesili faatupu manatu e ao ona tatou fesili ai?
14 E faitau miliona isi i le lalolagi na tali atu i le tala lelei o le Malo i se auala faapena. Ua latou ō mai nai le lalolagi amioleaga, tuu ese o latou uiga tuai, lafoaʻia a latou aumea sa iai muamua ma tuua le saʻilia o mea a le lalolagi. (Ioane 15:19; Efeso 4:22-24; Iakopo 4:4; 1 Ioane 2:15-17) Aiseā ua latou faia ai lenei mea? Talu ai latou te faatāuaina faamanuiaga o le Malo o le Atua e sili atu na i lo se isi mea e mafai ona ofo mai e lenei faiga o mea. Po o lou lagona lenā e faatatau i le tala lelei o le Malo? Po o uunaʻia ai oe e faia ni suiga ina ia ōgatusa lou olaga, amio ma ou sini ma le mea o faafinagaloina mai e Ieova? O le faia faapea, o le a iʻu ai i le sosia o faamanuiaga mo oe i le taimi nei, atoa foʻi ma le lumanaʻi.
Ua Oo i le Tumutumuga o le Seleselega
15. O le ā na valoia mai o le a faia e tagata o le Atua i aso e gata ai?
15 Na tusi le faisalamo: “E fai taulaga ma le loto ou tagata i le aso o lou malosi.” O ē ua ofoina atu i latou, e aofia ai ‘tauleleʻa’ ma le “ʻau” tele a fafine o loo talaʻi atu le tala lelei. (Salamo 68:11; 110:3) O le ā le iʻuga o le filigā ma le agaga lē manatu faapito o tagata o Ieova, o tane ma fafine, o ē talavou ma ē matutua i nei aso e gata ai?
16. Ia fai se faaaʻoaʻoga i le auala ua aapa atu ai auauna a le Atua e fesoasoani i isi ia malamalama i le Malo.
16 Na tomānatu se paeonia i Initia i le auala e fesoasoani ai i le silia ma le lua miliona tagata logonoa i lenā atunuu, ia aʻoaʻoina e uiga i le Malo. (Isaia 35:5) O lea, na ia auai ai loa i se aʻoga e aʻoaʻo ai le gagana e faaaogā ai taga. O i inā na mafai ai ona ia talaʻi atu i le toʻatele o tagata logonoa e uiga i le Malo, ma na faatulagaina ai ni vaega o suʻesuʻega tautusi. I ni nai vaiaso, pe a ma le toʻa 12 tagata na amata ona auai i sauniga i le Maota o le Malo. Mulimuli ane, i se ʻaiga o se faaipoipoga, na feiloaʻi atu ai le paeonia i se tama talavou logonoa, o lē na tele ni ana fesili ma faaalia le naunau e fia iloa atili Ieova. Ae peitaʻi, na iai se faafitauli. E tatau ona toe foʻi le tama talavou lenei i Calcutta, i le mamao e 1,000 maila (1,600 kilomita) e aʻoga ai, ma o i inā e leai ni Molimau e malamalama i le gagana e faaaogā ai taga. Na manuia ana taumafaiga i le faatauanauina o lona tamā e sui le aai e aʻoga ai, ma na mafai ai ona ia alu i le aʻoga i Bangalore ma faaauau lana suʻesuʻega faale-Tusi Paia. Na lelei lona agaʻigaʻi i luma faaleagaga, ma ina ua mavae pe tusa ma le tausaga, ona ia tuuina atu lea o lona ola iā Ieova. Na ia suʻesuʻe le Tusi Paia ma le toʻatele o tagata logonoa, e aofia ai ma se tasi na la uō mai lava a o laiti. Ua faatulaga nei e le ofisa o le lālā i Initia mo paeonia ina ia aʻoaʻo le gagana e faaaogā ai taga e fesoasoani ai i lenā galuega.
17. Ia taʻu mai se mea ua faalaeiauina ai oe i le lipoti o le tausaga faaleauaunaga o le 2004 i le itulau 19 e oo i le 22.
17 I le itulau e 19 e oo i le 22 o lenei mekasini, o le a e maua ai le lipoti o le galuega talaʻi a Molimau a Ieova i le lalolagi aoao mo le tausaga faaleauaunaga e 2004. Ia iloilo ma e iloa ai faamaoniga o le matuā taulaʻi atu o tagata o Ieova i le lalolagi i le faamuamuaina pea o le “penina tau tele” i aso nei.
Ia ‘Muaʻi Saʻili le Malo’
18. O le ā le faamatalaga e leʻi faia e Iesu i le faataoto i le tagata faatauʻoa, ma aiseā?
18 Pe a tatou toe mafaufau i le faataoto a Iesu i le tagata faatauʻoa, tatou te mātauina ai, e leʻi fetalai Iesu e faatatau i le auala na tausia ai le olaga o le tagata faatauʻoa ina ua uma ona faatau atu mea uma na iā te ia. O le mea moni, atonu e fesili nisi: ‘Na faapefea la ona maua ni meaʻai, lavalava ma se fale o le tagata faatauʻoa, auā ua leai ni mea o totoe? O le ā le aogā o lenā penina matagofie iā te ia?’ O ni fesili talafeagai na, pe a mafaufau i le itu faaletino. Ae peitaʻi, pe leʻi faalaeiauina ea e Iesu ona soo: “Ia outou muaʻi saʻili lona malo ma lana amiotonu; ona faaopoopoina atu lea o ia mea uma ia te outou”? (Mataio 6:31-33) O le manatu autū o le faataoto, e ao ona auauna atu ma le loto atoa i le Atua ma ia maelega mo le Malo. Pe e iai ea se lesona o nei mea mo i tatou?
19. O le ā le lesona autū tatou te aʻoaʻoina mai le faataoto a Iesu i le penina tau tele?
19 Pe faatoʻā aʻoaʻoina le tala lelei matagofie po o ua leva ona tatou saʻilia le Malo, ma taʻu atu i isi ana faamanuiaga, e ao ona faaauau pea ona faamuamua le Malo ma taulaʻi atu i ai. Ua tatou ola nei i taimi faigatā, peitaʻi ua iā i tatou māfuaaga autū e talitonu ai, o mea o tatou faamuamuaina e moni ma e lē mafaatusalia, e pei o le penina na maua e le tagata faatauʻoa. Ua saunia e mea tutupu i le lalolagi ma le faataunuuga o valoaga o le Tusi Paia, ni faamaoniga e iloa ai, ua latalata mai le “gataaga o le lalolagi.” (Mataio 24:3) Seʻi o tatou pei o le tagata faatauʻoa, ia maelega ma le loto atoa mo le Malo o le Atua ma olioli i le faaeaga o le talaʻia o le tala lelei.—Salamo 9:1, 2.
Pe E te Manatua?
• I le tele o tausaga, o le ā na saosaolaumea i le faatelega o tagata tapuaʻi moni?
• O le ā le agaga ua vaaia iā i latou o auauna o ni misionare?
• O ā suiga ua faia e tagata ona o le tala lelei o le Malo?
• O le ā le lesona aogā ua tatou aʻoaʻoina mai le faataoto a Iesu i le penina tau tele?
[Fesili mo le Suʻesuʻega]
[Siata i le itulau 19-22]
LIPOTI O LE TAUSAGA FAALEAUAUNAGA 2004 A MOLIMAU A IEOVA I LE LALOLAGI AOAO
(Tagaʻi i le lomiga)
[Ata i le itulau 14]
‘E tosina mai e le upu moni ituaiga uma o tagata.’—A. H. Macmillan
[Ata i le itulau 15]
Na talaʻi Taniela ma Helmut i oganuu e tautatala i isi gagana i Viena
[Ata i le itulau 16, 17]
Ua faamanuiaina misionare i aso nei e pei o le tagata faatauʻoa
[Ata i le itulau 17]
“E fai taulaga ma le loto ou tagata”