Po o Fua Mai ni Fua Lelei iā i Latou o E Aʻoaʻoina?

INA ua taʻu atu e Eric i ona mātua e lē toe fia avea ma se Molimau a Ieova, na matuā mafatia i laʻua. E la te leʻi faatalitalia lea mea e tupu. A o laʻitiiti Eric, na auai o ia i le suʻesuʻega a le aiga, sauniga, ma le galuega talaʻi faatasi ma le faapotopotoga. Na foliga mai na savali o ia i le upu moni. Ae ui i lea, ua ia tuua lona aiga, ma ua iloa ai e ona mātua e leʻi pāʻia e le upu moni le loto o Eric. Na faateʻia i laʻua i lenā mea ma na matuā faanoanoa ai.

Ua oo i nisi faalogona faapena pe a lē toe fia suʻesuʻe se tagata aʻoga o le Tusi Paia. I taimi faapena, e fesili ai tagata iā i latou lava, ‘Aiseā na ou lē iloa ai lenei mea?’ Pe e mafai ona iloa po o fua mai le upu moni iā i latou o tatou aʻoaʻoina, a o leʻi oo i ni tulaga leaga? Ae, e faapefea ona tatou mautinoa o loo galue le upu moni i totonu o i tatou faapena foʻi ma i latou o tatou aʻoaʻoina? I lana faataoto i le tagata lūlū saito, na saunia ai e Iesu se fesoasoani i le tali i nei fesili.

Ia Pāʻia Loto i le Upu Moni

Na fetalai Iesu: “O le saito, o le afioga lea a le Atua. Peitaʻi o le mea na [lūlū] i le eleele lelei, o i latou ia ē ua faalogo i le upu, ma tausi i ai i le loto ua faamaoni ma le lelei, ona fua mai ai lea ma le onosai.” (Luka 8:11, 15) E ao ona mauaa i loto o tagata suʻesuʻe le upu moni o le Malo, a o leʻi fua mai ni fua lelei. Ua faamautinoa mai e Iesu iā i tatou, pe a pāʻia se loto lelei i upu moni a le Atua, e pei o le fatu e paʻū i le eleele lelei, e vave lava ona gaoioi ma fua mai fua lelei. O le ā e ao ona tatou vaai i ai?

E ao ona tatou mātauina mea o i le loto ae lē o foliga vaaia i fafo. O le tausia pea o se faasologa tau tapuaʻiga, e lē faaalia ai le mea o i le loto o se tasi. (Ieremia 17:9, 10; Mataio 15:7-9) E ao ona ati la tatou vaai. E ao ona iai ni suiga mataʻina i manaʻoga, faanaunauga ma mea e faamuamua e se tasi. E tatau ona atiina aʻe le tagata fou, ia faaōgatusa ma le finagalo o le Atua. (Efeso 4:20-24) Seʻi faataʻitaʻi: Na faapea mai Paulo, ina ua faalogo tagata Tesalonia i le tala lelei, na latou taliaina o le afioga lea a le Atua. Ae ona o lo latou gauaʻi ma le onosai, faamaoni ma le alofa, na ia mautinoa ai, na “matuā galue” le upu moni iā i latou.—1 Tesalonia 2:13, 14; 3:6.

Ioe, po o le ā lava le mea o i le loto o le tagata aʻoga, ae e alu aso sau aso e faaalia ai i lana amio, e pei o le faaaʻoaʻoga iā Eric. (Mareko 7:21, 22; Iakopo 1:14, 15) Peitaʻi, e oo lava ina iloa uiga leaga o se tasi ona o ana gaoioiga, ae ua fai si tuai. O le luʻi la, o le mātaulia o vaivaiga patino, a o leʻi avea ma mea e tautevateva faaleagaga ai lea tagata. E tatou te manaʻomia se auala tatou te vaai ai i le loto. E faapefea ona tatou faia lenā mea?

Aʻoaʻo Mai iā Iesu

Sa silafia e Iesu loto o tagata. (Mataio 12:25) E leai se isi o i tatou e mafai ona faia faapena. Peitaʻi, na ia faaalia mai iā i tatou e mafai ona tatou iloa manaʻoga, faanaunauga ma mea e faamuamua e se tasi. E pei ona faaaogā  e se fomaʻi agavaa ituaiga o suʻesuʻega eseese ina ia iloa ai po o le ā o faalētonu i le fatu o se tagata maʻi, e faapena foʻi ona faaaogā e Iesu le Afioga a le Atua, e “utufia” mai ai ma faaalia ai “manatu ma filifiliga o le loto,” e tusa lava po o natia mai le vaaiga a isi.—Faataoto 20:5; Eperu 4:12.

O se faaaʻoaʻoga, i se mea na tupu, na fesoasoani ai Iesu iā Peteru ina ia mataala i se vaivaiga lea na avea mulimuli ane ma mea e tausuai ai. Na silafia e Iesu e alofa Peteru iā te ia. Ioe, na avatu e Iesu iā Peteru “ki o le malo o le lagi.” (Mataio 16:13-19) Ae peitaʻi, na silafia foʻi e Iesu, ua taulaʻi atu Satani i aposetolo. I aso o i luma, o le a oo mai omiga e tofotofoina ai lo latou faamaoni. E mautinoa na silafia e Iesu, na iai vaivaiga o nisi o ona soo. E leʻi faatalatū o ia e taʻua ni mea patino e ao ona latou faaleleia. Seʻi mātau le auala na ia faailoa atu ai le mataupu.

Ua faapea mai le Mataio 16:21: ‘O ona pō ia na amata ai e Iesu ona faailoa atu i ona soo, e tatau ona faatigāina ma fasiotia o ia.’ Mātau, na faailoa atu e Iesu iā i latou, ae sa lē na ona taʻu atu o le mea o lea tupu iā te ia. E lē taumatea na ia faaaogāina fuaiupu o le Tusi Paia, e pei o le Salamo 22:14-18 po o le Isaia 53:10-12, lea ua faaalia ai e tatau ona faapuapuagatia ma fasiotia le Mesia. O lea la, pe e ala i le faitauina po o le sii mai o mau i le Tusi Paia, na avatu ai e Iesu iā Peteru ma isi le avanoa e tali mai i o latou loto. Na faapefea ona latou tali atu e tusa ma le manatu o le a oo mai sauāga?

O se mea e faateʻia ai, e ui ina sa faaalia muamua e Peteru le loto tele ma le maelega, ae o le auala osovale na ia tali atu ai iā Iesu, e faaalia ai se masei matuiā i ona mafaufauga. Na ia faapea atu: “Le Alii e, ia mamao iā te oe lea mea; e lē oo lenā mea iā te oe.” Na sesē le auala na mafaufau ai Peteru, auā na taʻu atu e Iesu iā te ia “e lē o mea a le Atua ua e loto i ai, a o mea a tagata.” Sa iai se vaivaiga o Peteru e ono iʻu i āuga mataʻutia. O lea, o le ā na faia e Iesu? Ina ua uma ona aʻoaʻia Peteru, na ia fetalai atu iā te ia ma isi o ona soo: “Ai se tasi e fia mulimuli mai iā te aʻu, ia faafiti o ia iā te ia, ma ave lona satauro, i le mulimuli mai iā te aʻu.” I le faauaʻi atu o manatu i mea o taʻua i le Salamo 49:8 ma le 62:12, na faamanatu atu ma le agalelei e Iesu iā i latou, e faalagolago lo latou faamoemoe e faavavau i le Atua ae lē o tagata.—Mataio 16:22-28.

E lē masalomia le avea o lenei talanoaga ma isi foʻi, e fesoasoani iā Peteru e toe faaleleia vave ai lona tulaga faaleagaga, e ui lava na faavaivai o ia i se taimi puupuu ona o le fefe ma faafitia faatolu ai Iesu. (Ioane 21:15-19) Ina ua mavae aso e 50, sa tū ai ma le loto tele Peteru i luma o tagata i Ierusalema e talaʻia le toetū mai o Iesu. I vaiaso, masina ma tausaga na mulimuli ane, na loto tele o ia ina ua puʻea, sasaina ma faafalepuipuiina, ma ua faataatia ai se faaaʻoaʻoga mataʻina o le faamaoni ma le lē fefe.—Galuega 2:14-36; 4:18-21; 5:29-32, 40-42; 12:3-5.

O le ā ua tatou aʻoaʻoina mai i lenei mea? Po ua e iloa le mea na faia e Iesu ina ia utufia ma faaalia ai le mea o i le loto o Peteru? Muamua, na ia filifilia lelei mau e faauaʻi atu ai le manatu o Peteru i le mataupu na ia vaivai ai. O le isi auala, na ia tuu le avanoa iā Peteru e  tali mai ai i lona loto. Mulimuli, na ia saunia isi fautuaga faale-Tusi Paia e fesoasoani iā Peteru e toe fetuunaʻi ona mafaufauga ma faalogona. E te ono manatu, o lenei tulaga tau aʻoaʻoga e lē oo i ai lou tomai. Peitaʻi seʻi o tatou iloiloina ni mea se lua na tutupu, o loo faaalia ai pe faapefea e tapenapenaga ma le faalagolago iā Ieova, ona fesoasoani iā i tatou e mulimuli ai i le faaaʻoaʻoga a Iesu.

Utufia Mai Mea o i le Loto

Ina ua iloa e se tamā Kerisiano na ave e ona atalii e toʻalua o le isi e i le vasega muamua, a o le isi i le vasega lua ni lole mai le kesi a le faiaʻoga, na ia fefulisaʻi ma i laʻua. Na i lo le faateʻa o lenei mea faapea o amio a tamaiti, ua faamatala mai le tamā, “na ou taumafai e utufia mai mea o i o la loto ma le uunaʻiga na la faia ai lenei mea leaga.”

Na fesili atu le tamā i lana fanau ina ia toe faamatala le mea na tupu iā Akana, e pei ona faamauina i le Iosua e 7. Na vave lava ona maua e tama le manatu tāua ma taʻutino lo la sesē. Na faalavelavea i laʻua e o la lotofuatiaifo. O lea, na fai atu le tamā ia i laʻua, ia faitau le Efeso 4:28: “O lē gaoi aua neʻi toe gaoi, a e lelei ina faamalosi o ia i galuega . . . ia maua e ia se mea e avatu i ē ua matitiva.” Na faamalosia lea fautuaga a le Tusi Paia e ala i le faasalaina o tamaiti e toe faatau mai ni lole ma avatu i le faiaʻoga.

Ua faapea mai le tamā: “Na ma taumafai e liaʻi ese uunaʻiga leaga ina ua iloa, ma toe suia i uunaʻiga lelei ma mamā e ala i le fefulisaʻi ma le fanau.” E ala i le faaaʻoaʻo iā Iesu pe a aʻoaʻoina la laʻua fanau, ua maua ai e nei mātua ni iʻuga lelei. Mulimuli ane sa valaaulia uma nei tama e toʻalua e avea o ni sui o le aiga Peteli i le ofisa ulu i Brooklyn, ma o loo galue pea i inā lē tasi e tusa ma le 25 tausaga.

Seʻi iloilo le auala na fesoasoani ai se isi Kerisiano i lana tagata aʻoga o le Tusi Paia. Na auai le tagata aʻoga i sauniga ma talaʻiga ma ua faaalia se faanaunauga e fia papatiso. Ae peitaʻi, na foliga mai e faalagolago tele o ia iā te ia lava na i lo le faalagolago iā Ieova. Ua faapea mai le Molimau: “Talu ai e nofo fua o ia, e na te lē o iloa, ua tele ina manaʻo e fai mea e ia lava. Na ou popole neʻi maua o ia i le maʻi tau le mafaufau po o le vaivai faaleagaga.”

O lea, na tausolomua le Molimau e fefulisaʻi ma le tagata aʻoga i le Mataio 6:33, faalaeiauina o ia e toe fetuunaʻi mea na te faamuamua, ia faamuamua le Malo ma faatuatua iā Ieova na te taulimaina mea i se auala e sili ona lelei. Na ia fesili saʻo atu: “Talu ai ona lou faalagolago iā te oe lava, pe e faigatā ai i nisi taimi ona e faalagolago ai i isi e aofia ai ma Ieova?” Na faapea mai le tagata aʻoga, ua toetoe lava a lē toe tatalo o ia. Na faalaeiau o ia e le tagata talaʻi ina ia mulimuli i le fautuaga o i le Salamo 55:22, ia tuu atu mea e popole ai iā Ieova auā, ua faamautinoa mai e le 1 Peteru 5:7, “o loo manatu mai o ia” iā te oe. Na pāʻia lona loto i na upu. Ua faapea mai le Molimau, “Na tutulu o ia ma e seāseā ona ou vaai o tagi.”

Ia Galueaʻiina le Upu Moni iā te Oe

E tatou te maua le fiafia pe a vaai atu iā i latou ua tatou aʻoaʻoina ua tali atu i upu moni o le Tusi Paia. Ina ia maua ni iʻuga lelei i a tatou taumafaiga e fesoasoani atu i isi, e ao ona tatou faataatia se faaaʻoaʻoga lelei.  (Iuta 22, 23) E manaʻomia e i tatou uma lava ona ‘galueaʻiina pea lo tatou faaolataga i le mataʻu ma le gatete.’ (Filipi 2:12) E aofia ai le faasusulu mai o le malamalama o le Tusi Paia i o tatou lava loto, ma le saʻilia o uiga, faanaunauga, ma faalogona e ono manaʻomia ai ni faasaʻoga.—2 Peteru 1:19.

O se faaaʻoaʻoga, po ua tau mou atu lou maelega? Afai o lea, aiseā? O se tasi o māfuaaga, atonu ua e faalagolago tele iā te oe lava. E faapefea ona e iloa o le tulaga lenā? Ia faitau le Hakai 1:2-11, ma mafaufau loloto i fefulifulisaʻiga na faia e Ieova ma tagata Iutaia na toe faafoʻisia mai le tafeaga. Ona fesili lea iā te oe lava: ‘Po ua ou popole tele i tulaga tau tupe ma le tulaga lelei i meafaitino? Po o oʻu matuā faatuatua iā Ieova na te tausia loʻu aiga pe a ou faamuamua mea faaleagaga? Po o oʻu lagona e tatau ona tausia muamua aʻu?’ Aua e te faatalatū e faia ni fetuutuunaʻiga i ou mafaufauga po o faalogona pe afai e manaʻomia. Ua saunia e fautuaga faale-Tusi Paia e pei o ia o loo maua i le Mataio 6:25-33, Luka 12:13-21, ma le 1 Timoteo 6:6-12, se faavae mo se vaaiga paleni i manaʻoga mo meafaitino, lea e maua ai faamanuiaga a Ieova.—Malaki 3:10.

E aogā tele lenei suʻesuʻega faamaoni o le tagata lava ia. Pe a faaalia mai e se isi so tatou vaivaiga patino, e faigatā tele iā i tatou ona ioe i ai. Peitaʻi, pe afai e te tausolomua ma le alofa ona fesoasoani i lau tamaitiiti, lau tagata aʻoga o le Tusi Paia po o oe lava, e tusa lava po o se mataupu e fitoitonu i le tagata lava ia po o se mataupu maʻaleʻale, ae ua e uia laasaga muamua e faasao ai lona ola po o oe foʻi.—Kalatia 6:1.

O lea, e faapefea pe afai e lē fua mai ni iʻuga lelei i au taumafaiga? Aua e te vave fiu. O le suia o se loto lē lelei atoatoa, o se taumafaiga maʻaleʻale, e alu ai le taimi ma i isi taimi e oo mai ai se tulaga lē fiafia. Ae peitaʻi, e tauia na gaoioiga.

O Eric lea na taʻua i le amataga, na oo ina toe saʻo lona mafaufau ma toe amata ona ‘savali i le upu moni.’ (2 Ioane 4) Ua ia faapea mai: “Ina ua ou iloa le mea lelei ua ou faamaumau, ona ou toe foʻi ai lea iā Ieova.” O loo auauna nei ma le faamaoni Eric i le Atua ona o le fesoasoani a ona mātua. Ua ia matuā talisapaia taumafaiga faifai pea a ona mātua ina ia toe maua mai o ia, e ui lava na ia teena i laʻua. Ua ia faapea mai: “E ese ma le lelei o oʻu mātua ma e lē uma lo la alofa iā te aʻu.”

O le faasusuluina atu o le malamalama o le Afioga a le Atua i loto o i latou o tatou aʻoaʻoina, o se faaaliga lea o le alofa. (Salamo 141:5) Ia faaauau ona suʻesuʻe faamaoniga i loto o lau fanau ma au tagata aʻoga po ua mauaa ai uiga fou faa-Kerisiano. Ia faaauau ona galueaʻiina le upu moni iā i latou ma oe foʻi, e ala i le ‘vaevaetonuina o le upu moni.’—2 Timoteo 2:15, LT.

[Ata i le itulau 29]

Na faaalia i fetalaiga a Iesu se vaivaiga iā Peteru

[Ata i le itulau 31]

Ia faaaogā le Tusi Paia e utufia mai ai mea o i le loto