Ia e Mitamita Ona o Oe o se Kerisiano
Ia e Mitamita Ona o Oe o se Kerisiano
“O lē mitamita, ia mitamita o ia i le Alii.”—1 KORINITO 1:31.
1. O le ā le uiga taatele o tagata i lotu?
NA TAʻUA e se fai tofā i mataupu tau lotu e faapea, o le toʻatele o tagata i aso nei, ua lē ano i a latou tapuaʻiga. Na ia faapea mai: “O le mea mataʻina ua tupu nei, o le lē toe naunau lea o tagata i a latou lotu.” Na ia faamatala atili mai, “e foliga mai e leai ma se tasi e manatu mamafa i lana tapuaʻiga.” Na ia mātauina, o le toʻatele o tagata e “talitonu i le Atua . . . ; ae latou te lē ano atu iā te ia.”
2. (a) Aiseā e lē faateʻia ai i le leai o se naunau o tagata i mea faaleagaga? (e) O le ā le lamatiaga mo Kerisiano moni ona o le lē ano i mataupu faaleagaga?
2 E lē faateʻia ai tagata suʻesuʻe o le Tusi Paia ona o le lē ano o tagata i lotu. (Luka 18:8) O se mea e faatalitalia, o le leai lea o se naunau i lotu. Ua loa ona taʻitaʻi sesē ma faaita e tapuaʻiga pepelo tagata. (Faaaliga 17:15, 16) Ae peitaʻi, o le agaga faalotolotolua ma le leai o se maelega, e mataʻutia mo se Kerisiano moni. E mataʻutia iā i tatou pe a lē ano i mataupu faaleagaga, ma mou atu ai le maelega e auauna i le Atua ma le upu moni. Na lapataʻi Iesu e uiga i na tagata faaleogalua ina ua ia fautuaina Kerisiano i le uluaʻi senituri i Laotikaia: “E te lē maalili, e te lē vevela foʻi. Ou te loto ina ia e maalili, pe vevela. O lenei ua e faaleogalua.”—Faaaliga 3:15-18.
Iloaina o lo Tatou Tulaga
3. O ā vala o lo latou tulaga e ao i Kerisiano ona mitamita ai?
3 Ina ia tau faasaga i le lē ano i mea faaleagaga, e ao i Kerisiano ona iai se malamalamaaga manino e uiga iā i latou, ma e tatau ona latou mitamita e faatatau i lo latou tulaga. I le avea o ni auauna a Ieova ma soo o Iesu, e mafai ona tatou maua i le Tusi Paia faamatalaga e uiga iā i tatou. O i tatou o “molimau” a Ieova, o le ʻʻau faigaluega faatasi ma le Atua,’ ma o ē e maelega e talaʻi le “tala lelei” i isi. (Isaia 43:10; 1 Korinito 3:9; Mataio 24:14) O i tatou o ni tagata e “fealofani.” (Ioane 13:34) O Kerisiano moni, o i latou ua “masani ona lagona ina ua aʻoaʻosooina e iloa ai le lelei ma le leaga.” (Eperu 5:14) Ua fai i tatou ma mea e “faamalamalama aʻi le lalolagi.” (Filipi 2:15) E tatou te taumafai ia “lelei a [tatou] amio i luma o nuu ese.”—1 Peteru 2:12; 2 Peteru 3:11, 14.
4. O ā tulaga e lē talafeagai ma se tagata tapuaʻi o Ieova?
4 E iloa foʻi e tagata tapuaʻi o Ieova mea e lē talafeagai i lo latou tulaga. “E lē ni o le lalolagi i latou” faapei o lo latou taʻitaʻi o Iesu Keriso, e lē so o le lalolagi ia. (Ioane 17:16) E latou te vavaeese mai “nuu faapaupau” o ē “o loo faapouliuligia o latou mafaufau, o liliueseina i latou i le ola o i le Atua.” (Efeso 4:17, 18) O le iʻuga, o soo o Iesu ua “teteʻa ese ma le faalēmataʻu atoa ma tuʻinanau faalelalolagi, a [ua] . . . nonofo ma le faautauta ma le amiotonu atoa ma le amio Atua i lenei olaga.”—Tito 2:12.
5. O le ā le uiga o le apoapoaʻiga ia ‘mitamita i le Alii?
5 O la tatou vaaiga manino i lo tatou tulaga, ma la tatou faiā ma le Pule Silisili Ese o le aoao o mea, ua uunaʻia ai i tatou e ‘mitamita i le Alii.’ (1 Korinito 1:31) O le ā lenā mitamita? O le avea ma Kerisiano moni, tatou te mitamita e avea Ieova ma o tatou Atua. Tatou te mulimuli i le apoapoaʻiga: “O lē mitamita, inā mitamita ia o ia i lenei mea, ina ua mafaufau o ia, ma ua iloa aʻu, o aʻu lava o Ieova, o lē faia le alofa, ma le faamasinoga, ma le amiotonu i le lalolagi.” (Ieremia 9:24) Tatou te “mitamita” i le faaeaga o le iloaina o le Atua, ma lona faaaogāina o i tatou e fesoasoani atu i isi.
O le Luʻi
6. Aiseā o se luʻi ai i isi le tausisia o se vaaiga manino e faatatau i o latou tulaga o ni Kerisiano?
6 O le mea moni, e lē faigofie i taimi uma ona manino la tatou vaai i lo tatou tulaga o ni Kerisiano. Na manatua e se tama talavou o lē na tausia aʻe o se Kerisiano, na iai se taimi na vaivai faaleagaga ai: “I nisi taimi, na ou lagona ai ua ou leiloa ai le māfuaaga ua avea ai aʻu o se Molimau a Ieova. Na aʻoaʻoina aʻu i upu moni o le Tusi Paia talu ona ou laʻitiiti. Na ou lagona i nisi taimi, o oʻu talitonuga ua pei o se isi foʻi lotu.” O isi atonu ua aafia o latou tulaga i faafiafiaga o le lalolagi, faasalalauga, ma manatu o le toʻatele e lē tusa ma le finagalo o le Atua. (Efeso 2:2, 3) E iai taimi e lē mautonu ai Kerisiano ma latou toe mafaufau ai i sini ma mea ua tāua iā i latou.
7. (a) O le ā le suʻesuʻega e talafeagai i auauna a le Atua ona fai iā i latou lava? (e) O le fea itu e ono mapuna aʻe ai lamatiaga?
7 Pe sesē le suʻesuʻeina o i tatou lava? E leai. Atonu e te manatua, na faalaeiauina e Paulo Kerisiano ina ia suʻesuʻe iā i latou lava: “Inā tofotofo ia outou iā te outou, po ua outou i le faatuatua; inā suʻesuʻe ifo ia iā te outou.” (2 Korinito 13:5) O loo faalaeiauina i inei e le aposetolo Kerisiano ina ia iloa so o se vaivaiga faaleagaga e ono mapuna aʻe, ma ia faia ni gaoioiga e faaleleia ai. O le tofotofoina e se Kerisiano o ia lava po o i le faatuatua, o le a ia iloa ai, po o talafeagai ana upu ma gaoioiga ma lona talitonuga. Ae peitaʻi, afai e sesē le suʻesuʻeina o i tatou lava ina ia iloa lo tatou tulaga, e ala i le saʻili i tali e ese mai i la tatou faiā ma Ieova po o le faapotopotoga Kerisiano, o le a lē aogā ma e ono oti ai faaleagaga. Tatou te lē mananaʻo e “faavaatuʻia i [tatou] i la le faatuatua.”—1 Timoteo 1:19.
Tatou te Fesagaʻi ma Luʻi
8, 9. (a) Na faaalia faapefea e Mose ona lagona o le lē mautonu? (e) Na faapefea ona tali atu i ai Ieova? (i) Ua aafia faapefea oe i faamautinoaga a Ieova?
8 Pe tatau i Kerisiano e lē mautonu i nisi taimi, ona lagona e faapea ua latou lē taulau? E leai! O le mea moni, e mafai ona latou maua le faamāfanafanaga i le iloaina e lē fou na faalogona. Na oo foʻi na lagona i molimau faamaoni a le Atua i aso ua mavae. Ia manatunatu iā Mose, o lē na mataʻina lona faatuatua, faamaoni ma lana auaunaga i le Atua. Ina ua tofia o ia i se galuega e foliga mai e faigatā tele, na fesili atu ma le lotovaivai Mose: “O ai ea aʻu nei?” (Esoto 3:11) E foliga mai na manatu Mose, ‘O aʻu o se tagata faatauvaa!’ po o ‘Ou te lē agavaa!’ O nisi o vala o le talaaga o Mose, atonu ua manatu ai e lē agavaa o ia: O ia o se tasi mai le nuu e nofo pologa. Na teena o ia e tagata Isaraelu. E lē o ia o se tagata e iloa fai lauga. (Esoto 1:13, 14; 2:11-14; 4:10) O ia o se leoleo mamoe, o se galuega e inosia e tagata Aikupito. (Kenese 46:34) E lētioa la ona manatu o ia, e lē agavaa ona avea ma lē e faasaʻolotoina tagata nofo pologa o le Atua!
9 Na faamautinoa atu e Ieova iā Mose e ala i le tuuina atu o ni folafolaga malolosi se lua: “Ou te iā te oe lava; o lenei foʻi le faailoga iā te oe ua ou auina atu oe, pe a e au mai le nuu mai Aikupito, tou te auauna ai i le Atua i lenei mauga.” (Esoto 3:12) Na fetalai atu le Atua i lana auauna lotovaivai, o le a Ia faatasi ma ia. E lē gata i lea, na faailoa atu e Ieova o le a ia laveaʻiina ona tagata. I le faagasologa o senituri, na folafola atu ai foʻi e le Atua lona lagolagoina o ona tagata. O se faaaʻoaʻoga, e ala iā Mose, na ia fetalai atu ai i le nuu o Isaraelu a o toetoe ulu atu i le Nuu Folafolaina: “Ia outou faamalolosi, ma outou loto tetele. . . . Auā o Ieova lou Atua, lua te ō faatasi ma ia; na te lē tuuna oe, na te lē lafoaʻi iā te oe.” (Teuteronome 31:6) Na faamautinoa foʻi e Ieova iā Iosua: “E le tū mai se tagata e tetee iā te oe i aso uma o lou ola. . . . E faapea ona ou i ai iā te oe; ou te lē tuua lava oe, ou te lē tuulafoaʻi lava iā te oe.” (Iosua 1:5) Na ia folafola foʻi i Kerisiano: “Ou te lē tuua lava oe, ou te lē tuulafoaʻi lava iā te oe.” (Eperu 13:5) O le iai o lenā lagolagosua malosi, e ao ona tatou mitamita ai i le avea o ni Kerisiano!
10, 11. O le ā na fesoasoani iā Asafo ia saʻo lona manatu e uiga i le tāua o lana auaunaga iā Ieova?
10 Pe tusa ma le lima senituri ina ua mavae atu Mose, na tusi saʻo mai ai se sa Levī faamaoni e suafa iā Asafo, e uiga i ona masalosaloga i le tāua o le saʻilia o se ala saʻo. A o tauivi o ia e auauna i le Atua e ui i faigatā ma faaosoosoga, na iloa ai e Asafo ni tagata mautofi na aamu i le Atua, ma e tele le tamaoaiga. Na faapefea ona aafia ai Asafo? Na ia faapea mai: “A o aʻu nei, e toe ina papeva oʻu vae; e toetoe lava ina see oʻu vae; auā na ou matauʻa i ē vālea; na ou vaai i le manuia o ē ua amio leaga.” Na amata ona ia masalosalo i le tāua o le avea ma se tagata tapuaʻi o Ieova. Na manatu Asafo: “E moni lava, ua ou faamamāfuaina loʻu loto, ma aʻu fafano oʻu lima ina ua ou lē sala, a e fai fua lava. Ua taia lava aʻu i aso fai soo.”—Salamo 73:2, 3, 13, 14.
11 Na faapefea ona taulimaina e Asafo nei faalogona lē lelei? Pe na ia lē amanaʻia na mafaufauga? E leai. Na ia faailoa atu i le Atua e ala i le tatalo, e pei ona tusia i le Salamo 73. Na faia e Asafo se suiga mataʻina i lona olaga, ina ua asiasi atu i le malumalu o le Atua. A o iai o ia i inā, na ia iloa ai, o le auauna i le Atua o le ala sili lea ona lelei. Ina ua toe faafouina lona talisapaia faaleagaga, na ia iloa ai e ʻinoʻino Ieova i le amioleaga, ma i lana taimi atofaina o le a faaumatia ai ē amioleaga. (Salamo 73:17-19) O lenā tulaga, na faamalosia ai Asafo i lona manatu iā te ia lava, o ia o se auauna a Ieova ma e tāua tele. Na ia faapea atu i le Atua: “O aʻu, e lē aunoa ona ta faatasi ma oe; na e taofiina loʻu lima taumatau. E te taʻitaʻi iā te aʻu i lau pule, a e mulimuli ane e te talia mai aʻu i le manuia.” (Salamo 73:23, 24) Na toe mitamita Asafo i lona Atua.—Salamo 34:2.
Na Latou Malamalama Lelei i lo Latou Tulaga
12, 13. Ia aumai ni faaaʻoaʻoga o tagata o le Tusi Paia na mitamita i la latou faiā ma le Atua.
12 O se tasi o auala e faamalosia ai lo tatou manatu i lo tatou tulaga o ni Kerisiano, o le suʻesuʻe lea ma mafaufau loloto i le faatuatua o tagata tapuaʻi faamaoni, o ē e ui i faigatā ae sa mitamita i la latou faiā ma le Atua. Seʻi manatu foʻi iā Iosefa, le atalii o Iakopo. A o laʻitiiti, na faatau atu o ia ma le lē alofa i Aikupito, i se nofoaga e mamao lava mai i lona tamā e mataʻu i le Atua ma se siʻomaga māfana ma lelei i lona aiga. Sa leai se isi e avatua ni fautuaga mai le Atua iā te ia a o iai i Aikupito, ma sa fesagaʻi ai o ia ma luʻi e tofotofoina ai lona tulaga tau amio ma lona faalagolago i le Atua. Ae peitaʻi, na manino lona faia o se taumafaiga e tausia ai lona tulaga o se auauna a le Atua, ma sa tumau ona faamaoni i le faia o le mea saʻo. Na mitamita o ia e avea o se tagata tapuaʻi o Ieova e ui lava sa nofo i se siʻomaga lē lelei, ma e leʻi mā o ia e taʻu atu ona talitonuga.—Kenese 39:7-10.
13 I le valu senituri mulimuli ane, e leʻi faagaloina ai e se teine pologa Isaraelu o lē na auauna i le taʻitaʻiʻau Suria o Naamanu, lona tulaga o se tagata tapuaʻi iā Ieova. Ina ua maua le avanoa, na ia avatu se molimau loto tele mo Ieova, ma ia faailoa atu Elisaia o se perofeta a le Atua moni. (2 Tupu 5:1-19) Mulimuli ane, e ui sa iai le tupu talavou o Iosia i se siʻomaga leaga, ae na ia faia tulafono na suia ai faiga a lotu, toe fausia le malumalu o le Atua, ma toe taʻitaʻiina le nuu iā Ieova. Na ia mitamita i lona faatuatua ma lana tapuaʻiga. (2 Nofoaiga a Tupu, mataupu 34, 35) E leʻi galo foʻi iā Tanielu ma ana aumea Eperu e toʻatolu i Papelonia lo latou tulaga o ni auauna a Ieova, e ui i omiga ma faaosoosoga, ae na latou faamaoni pea i le Atua. E manino, na latou mitamita e avea o ni auauna a Ieova.—Tanielu 1:8-20.
Ia Mitamita i Lou Tulaga o se Kerisiano
14, 15. O le ā e aofia ai i le mitamita i lo tatou tulaga o ni Kerisiano?
14 Na taulau manuia nei auauna a le Atua, talu ai na latou tausia se tulaga mitamita i luma o le Atua. Ae faapefea i tatou i aso nei? O le ā e aofia ai i le mitamita i lo tatou tulaga o ni Kerisiano?
15 O le itu tāua, ia aofia ai se talisapaia loloto i le avea ma tagata e tauaveina le suafa o Ieova, ma mauaina le faamanuiaga ma le finagalo malie o le Atua. E lē masalosalo Ieova i ona tagata. Na tusi Paulo, o lē na soifua i se vaitaimi na lē mautonu ai le toʻatele i mataupu tau lotu: “Ua silafia e le Alii ona lava tagata.” (2 Timoteo 2:19; Numera 16:5) E mitamita Ieova i “ona tagata.” Na ia faalauiloa: “O lē paʻi atu iā te outou, ua pāʻia e ia le tamatamaʻi mata o lona fofoga.” (Sakaria 2:8) E manino, e alofa Ieova iā i tatou. O la tatou faiā ma ia e ao ona faavae i le alofa loloto mo ia. Na taʻua e Paulo: “Afai e alofa atu se tasi i le Atua, ua silafia lenā tagata e ia.”—1 Korinito 8:3.
16, 17. Aiseā e mafai ai e se Kerisiano, pe laʻitiiti pe matua ona mitamita i lona tofi faaleagaga?
16 E ao i talavou na tausia aʻe o ni Molimau a Ieova, ona iloilo po o atili malosi lo latou tulaga o ni Kerisiano ma ua faavae i se faiā ma le Atua. E lē faalagolago le lelei o i latou i le faatuatua o o latou mātua. Na tusi Paulo e uiga i auauna uma a le Atua: “E tumau ia pe paū i lona lava alii, . . . e taʻitasi i tatou ma tala i lana amio i le Atua.” (Roma 14:4, 12) E mautinoa, pe afai e na o le taliaina o le lotu a le aiga ae leai se agaga o iai, e lē mafai ona maua se faiā tumau māfana ma Ieova.
17 A o faagasolo tausaga, na iai se faasologa o molimau a Ieova. Na amata mai i le tagata faamaoni o Apelu, pe tusa ma le 6,000 tausaga ua mavae, seʻia oo atu i le “motu o tagata e toʻatele” o Molimau i aso nei, ma le anoanoaʻi o tagata tapuaʻi o Ieova o ē o le a olioli i le ola e faavavau. (Faaaliga 7:9; Eperu 11:4) O i tatou i aso nei, o le vaega fou o lenei faasologa umi o tagata tapuaʻi faamaoni. Maʻeu le tamaoaiga o le tofi faaleagaga ua tatou maua!
18. E faapefea i mea e faatāuaina ma tapulaa ona faaesea ai i tatou mai le lalolagi?
18 I lo tatou tulaga o ni Kerisiano e aofia ai foʻi mea e faatāuaina, uiga, tapulaa ma amioga e iloa ai i tatou o ni Kerisiano. Ua taʻua o le “Ala,” ma e na o le pau lea o le auala e taulau manuia ai i le olaga ma faafiafiaina le Atua. (Galuega 9:2; Efeso 4:22-24) E ao i Kerisiano ona “tofotofo i mea uma lava” ma ia “taofi mau i le mea lelei.” (1 Tesalonia 5:21) Ua tatou maua se malamalamaaga manino i le eseesega tele o Kerisiano ma le lalolagi ua vavaeese mai le Atua. Ua faaalia manino mai e Ieova le eseesega o le lotu moni ma lotu sesē. Na ia fetalai mai e ala i lana perofeta o Mika: “Ona outou toe iloa lea e eseese lē amiotonu ma lē amio leaga; e ese lē ua auauna i le Atua, ma lē ua lē auauna iā te ia.”—Malaki 3:18.
19. O ā mea e uaʻi atu i ai Kerisiano moni?
19 Talu ai e tāua tele le mitamita iā Ieova i lenei lalolagi fenuminumiaʻi, o le ā e fesoasoani iā i tatou e tumau ai i le mitamita i le Atua, ma manatua lo tatou tulaga o ni Kerisiano? O le a maua fesoasoani aogā i le mataupu o sosoo mai. A o talanoaina nei manatu, e mafai ona e mautinoa: O Kerisiano moni, latou te uaʻi atu iā Ieova ma lana tapuaʻiga.
Pe E te Manatua?
• E faapefea i Kerisiano ona “mitamita i le Alii”?
• O le ā ua e aʻoaʻoina mai le faaaʻoaʻoga a Mose ma Asafo?
• O ai tagata o le Tusi Paia na mitamita i la latou auaunaga i le Atua?
• O le ā e aofia ai i le mitamita i lo tatou tulaga o ni Kerisiano?
[Fesili mo le Suʻesuʻega]
[Ata i le itulau 14]
Na iai se taimi na lē mautonu ai Mose
[Ata i le itulau 15]
Na mitamita le toʻatele o auauna anamua o Ieova, i lo latou tulaga