Pe a ‘Faatauanau’ Oe e Faia se Galuega

“SOLE! Tuu mea na ae sau i inei e fai le mea lea.” O le ā sou manatu, o le a faapefea ona tali atu se Iutaia o loo pisi pe a fai atu faapena se fitafita Roma iā te ia? Na taʻua e Iesu i lana Lauga i le Mauga: “Ai sē na te tauanau mai lua te ō ma ia i le maila e tasi, inā ō ia oulua ma ia i maila e lua.” (Mataio 5:41) Na faapefea ona malamalama le ʻaufaalogologo a Iesu i lenā fautuaga? O le ā foʻi lona uiga mo i tatou i aso nei?

Ina ia maua tali, e ao ona tatou malamalama e uiga i le togia o tagata i aso anamua. Sa masani lelei foʻi tagata Isaraelu i aso o Iesu i lenei faatulagaga.

Na Togia Tagata

O faamaoniga o le togia o tagata i le Itu i Sasaʻe na faamauina i tuā i le senituri lona 18 T.L.M. O faamaumauga mai Suria anamua, na faasino atu i se vaega o tagata na faamalosia e le malo e tautua i ona tagata. I Iukariti, i le talafatai o Suria, na faatonuina tagata faifaatoʻaga na nonofo i se fanua o se alii ina ia faia galuega faapena, seʻi vaganā ua faalēaogāina e le tupu lea fuafuaga.

O le mea moni, o tagata na faatoʻilaloina i taua pe na nonofo i lalo o se isi pulega, e masani ona faamalosia i latou e faia ia ituaiga o galuega. Na faapologaina e pule o Aikupito Isaraelu e faia piliki mo i latou. Mulimuli ane, na faafaigaluegaina e Isaraelu tagata Kanana o ē na aināina le Nuu Folafolaina i galuega mamafa, ma na faaauau lenā faiga e Tavita ma Solomona.—Esoto 1:13, 14; 2 Samuelu 12:31; 1 Tupu 9:20, 21.

Ina ua mananaʻo Isaraelu i so latou tupu, na faamatala atu e Samuelu amioga a le tupu o le a pule iā i latou. E na te aveina ona tagatānuu e fai ma ē ave kariota ma ʻau e tiʻetiʻe i solofanua, e suatia ma selesele fanua, gaosia auupega ma isi mea. (1 Samuelu 8:4-17) Ae peitaʻi, i le taimi na fausia ai le malumalu o Ieova, na fai ai tagata ese ma pologa, “a ua lē faia e Solomona ni ō le fanauga a Isaraelu ma pologa; a o tagata tau i latou, ma ana auauna, ma ona alii, ma alii ave ʻau, ma alii e pule i ana kariota, ma ana ʻau e tiʻetiʻe i solofanua.”—1 Tupu 9:22.

Ua faapea mai le 1 Tupu 5:13,14, sa galulue tagata Isaraelu i le fausia o fale: “Ua togia tagata e le tupu o Solomona mai iā Isaraelu uma; o ē na togia foʻi e tolu sefulu o afe o tagata. Ua ia aauina atu i latou i Lepanona e auauaʻi, o le masina ma le sefulu o afe; o le masina e tasi sa i ai i latou i Lepanona, a o masina e lua sa i ai i o latou aiga.” Ua faapea mai se tasi tagata atamai, “e lē mafesiligia, na faaaogā e tupu o Isaraelu ma Iuta lenei faatulagaga, ina ia maua ai ni tagata faigaluega e  galulue i le fausia o o latou fale ma galulue i fanua o le tupu e aunoa ma ni totogi.”

Na matua mamafa galuega na faia e tagata i le pulega a Solomona. Ina ua taʻu atu e Ierepoamo o le a faateleina ia avega, na fouvale Isaraelu uma ma fetogia i maa le pule, lea na tofia e vaavaaia ē na togia e faafaigaluegaina. (1 Tupu 12:12-18) Ae peitaʻi, e leʻi aveesea ai lenei faatulagaga. Na talaʻi atu e Asa, le atalii o le atalii o Reopoamo i tagata Iuta, e fausia aai o Kipea ma Mesepa, ma “ua lē tuu saʻoloto se toʻatasi.”—1 Tupu 15:22.

I Lalo o le Pulega a Roma

Ua faaalia i le Lauga i le Mauga, na masani lelei Iutaia i le uluaʻi senituri ma le vala o le ‘tauanau e faia se galuega.’ O le faaupuga lenei ua faaliliuina ai le upu Eleni ag·ga·reuʹo, lea na faasino atu muamua i gaoioiga a avefeʻau Peresia. Sa iā i latou le pule e faaaogā ai tagata, solofanua, vaa po o so o se isi mea e manaʻomia ina ia vave faataunuu ai fuafuaga a le malo.

I aso o Iesu, na pulea ai e Roma Isaraelu, ma na iai foʻi sa latou faiga faapena o le togia po o le faatauanauina o tagata. I itumalo i le itu sasaʻe, e lē gata i le totogia o lafoga masani, ae sa poloaʻia tagata ina ia faigaluega a lē o taimi uma, ia pe a tulaʻi mai se manaʻoga faapitoa. O na tiute e lē o ni galuega e fiafia i ai tagata. E lē gata i lea, e masani ona ave faamalosi manu, tagata, po o taavale toso ina ia laʻu ai uta a le Malo. E tusa ai ma le tusitala o Michael Rostovtzeff, “na taumafai tagata e pulea lea faiga, ae e leʻi manuia auā ua leva ona faia ma na oo i ni iʻuga leaga. Na faia pea e tagata aloaʻia, o ē na taumafai ma le faamaoni e taofi le soona faaaogāina o lenei faatulagaga, lea faasilasilaga ma lea faasilasilaga . . . ae na tumau pea ona sauā ia faiga.”

Na faapea mai se tagata Eleni atamai: “Sa faatauanau so o se tasi lava na e laʻu pusa a ʻautau mo se mamao faatulagaina, ma na faamalosia foʻi so o se tagata e faia se galuega e mananaʻo i ai tagata Roma.” O le mea lenā na tupu iā Simona le Kurene, na ‘faatauanauina’  o ia e fitafita Roma e amo le laau na maliu ai Iesu.—Mataio 27:32.

I tusi a le ʻau Rapi, tatou te maua ai se faamatalaga i lea faiga e lē fiafia i ai le toʻatele. O se faaaʻoaʻoga, na faamalosia se tagata Rapi e ave le laau o le atasi i le maota o le tupu. E mafai ona aveesea tagata mai le mea ua latou faigaluega ai, ma tofia i se isi galuega ae maua pea o latou totogi. Sa ave manu po o povi ina ia laʻu ai mea. Pe afai e toe aumai ia manu, atonu e lē toe aogā mo se isi galuega. E tutusa lelei le ave faamalosi ma le lē toe maua mai. Ua faapea mai se faaupuga Iutaia, “o le angareia e pei o le oti.” Ua faapea mai se tasi tusitala: “E ono faaleagaina se nuu pe a ave povi e suatia ai le fanua, i lo le ave o manu malolosi mo lea galuega.”

E mafai ona tatou iloa, e lē fiafia tagata i nei faatulagaga, aemaise pe a faatonu atu ma le faamaualuga ma le amiolētonu. Talu ai sa ʻinoʻino tagata Iutaia i pulega a nuu ese ia na pulea i latou, na matuā feita ai ona o le māsiasi i le faamalosia o i latou e faia ia galuega faatigā loto. E lē o toe iai se tulafono e faatatau i le mamao e ao ona amo ai e se tasi se avega. E foliga mai, e toʻatele e lē o lotomalilie e ō pea, pe afai e lē manaʻomia e le tulafono.

Ae peitaʻi, o le faatulagaga lenei na faasino atu i ai e Iesu ina ua ia fetalai: “Ai sē na te tauanau mai lua te ō ma ia i le maila e tasi, inā ō ia oulua ma ia i maila e lua.” (Mataio 5:41) I le faalogo i lenā mea, e lē taumatea na manatu ai nisi e lē talafeagai. Ae o le ā le uiga o lana fetalaiga?

Le Auala e Ao Ona Tali Atu ai Kerisiano

I se faaupuga faigofie, na fetalai atu ai Iesu i lana ʻaufaalogologo, pe a faatonuina i latou e se pule e faia se galuega talafeagai, e ao ona latou faia ma le lotomalie e aunoa ma le ita. O lea e ao ona latou avatu “mea a Kaisara iā Kaisara” ae e ao foʻi ona latou amanaʻia le tiute tauave o le avatu o “mea a le Atua i le Atua.”—Mareko 12:17. *

E lē gata i lea, na apoapoaʻi mai Paulo i Kerisiano: “Ia usiusitai tagata uma i faipule silisili; auā e leai se pule pe a lē mai le Atua; o pule uma lava o loo fai nei, ua faatūina e le Atua. O lenei, o lē na te tetee i le pule, ua tetee e ia i le sauniga a le Atua . . . a e afai e te amio leaga, ia e fefe ai, auā e lē fai fua e ia lana pelu.”—Roma 13:1-4.

Na silafia e Iesu ma Paulo le aiā a se tupu po o se malo e tuu atu ai le faasalaga iā i latou o solia a latou tulafono. O le ā le faasalaga? Ua aumaia e le faifilosofia Eleni o Epictetus o le senituri muamua ma le lona lua T.A. le tali: “Afai e tulaʻi mai se manaʻoga faafuaseʻi ma ua ave ai e se fitafita sau tamaʻi asini, ia tuu ai  pea. Aua e te tetee atu, aua le muimui, ina neʻi fasia oe ma lē toe maua foʻi lau asini.”

Peitaʻi, i aso anamua ma aso nei, ua manatu ai Kerisiano, e lē lelei o latou lotofuatiaifo pe a usiusitai i fuafuaga a le malo. E mataʻutia āuga i nisi o taimi. Ua faasalaina nisi Kerisiano i le oti. Ua faafalepuipuiina nisi mo le tele o tausaga ona o le lē auai i gaoioiga e afāina ai lo latou solitū. (Isaia 2:4; Ioane 17:16; 18:36) I nisi tulaga, ua manatu Kerisiano e ao ona latou usiusitai i le mea o faatonuina ai i latou. O se faaaʻoaʻoga, ua manatu nisi Kerisiano, e mafai ona latou faia se galuega ma le lotofuatiaifo lelei i lalo o se pulega a se malo e aogā i tagata. Atonu o le fesoasoani i tagata matutua po o ē lē atoatoa le malosi, galulue i le tinei mū, faamamā matafaga, galulue i paka, vaomatua, po o faletusi ma isi mea.

O le mea masani lava, e eseese tulaga o atunuu. O lea la, ina ia filifili pe usiusitai i faatonuga pe leai, e ao i Kerisiano uma ona mulimuli i lona lotofuatiaifo ua aʻoaʻoina i le Tusi Paia.

Ō i Maila e Lua

O le mataupu silisili na aʻoaʻo e Iesu, o le lotomalie e faataunuu se talosaga talafeagai, e aogā e lē gata i le malo ae i feutagaʻiga ma tagata i aso fai soo. O se faaaʻoaʻoga, atonu e faatonu oe e se pule e faia se galuega e te lē fiafia e fai, ae peitaʻi e lē feteenaʻi ma tulafono a le Atua. O le a faapefea ona e tali atu? E te ono tali atu ma le lē fiafia, ona ua e manatu e lē magafagafa lea fuafuaga, talu ai e alu uma ai lou taimi ma lou malosi. Atonu o le a feita ai i latou. I se isi itu, afai e te faia ma le musuā o le a e lē maua ai sou filemu. O le ā le vaifofō? Ia fai le mea na taʻua e Iesu, ia ō i maila e lua. E lē gata i le faia o le mea na talosagaina, ae ia faia le mea e sili atu. Ia faia ma le lotomalie. Afai e te faia ma le loto fiafia, o le a e lē lagona ai ua faaaogā sesē oe, ae o le a e saʻoloto e fai le mea e te loto i ai.

Ua taʻua e se tasi tusitala: “O le toʻatele o tagata, latou te faia na o mea ua faamalosia ai i latou e faia. Ua oo ina latou fiu i le olaga ma ua lē lavā foʻi. Ua faia e nisi mea e sili atu na i lo mea e ao ona latou fai, ma ua lotomalilie e fesoasoani i isi.” O lona uiga, i le tele o tulaga e ao i se tasi ona filifili, e alu i le maila e tasi, pe alu i maila e lua. A faapea e alu i le maila e tasi, atonu e naunau se tasi e faatino ana aiā tatau. Ae a alu i maila e lua, atonu o le a sili ona tauia o ia. O le ā le ituaiga o tagata e iai oe? Atonu o le a sili atu ona e fiafia ma fua mai pe afai e te vaai i au gaoioiga, e lē na o se tiute po o mea e ao ona e faia, ae o ni mea e te manaʻo e fai.

O le ā o le a e faia pe afai e iā te oe le pule? E manino, e lē o se alofa po o se auala faa-Kerisiano, le faaaogā o le pule e faamalosia ai nisi e faia mea ua e faatonuina e fai, e aunoa ma so latou lotomalilie. Na fetalai Iesu: “Ua outou iloa o alii o nuu ese ua aliitaʻi i latou, o ē ua sili foʻi ua pule iā te i latou.” Peitaʻi, e lē o se auala faa-Kerisiano lenā. (Mataio 20:25, 26) Na i lo le faia i se auala pulepuletutū ina ia maua ai se iʻuga, maʻeu le sili ona lelei pe a faia le talosaga talafeagai i se auala agalelei, ma e tali mai isi i le faaaloalo ma le fiafia! Ioe, o le nofo sauni e alu i maila e lua na i lo le tasi, e mafai o na tauia moni ai lou olaga.

[Faamatalaga pito i lalo]

[Pusa i le itulau 25]

NA TOGIA TAGATA ANAMUA I SE AUALA SESĒ

Ua iloa mai i taumafaiga e taofia faiga leaga e faatatau i le togia o tagata, na masani ona soona faaaogā lenei faatulagaga. I le 118 T.L.M., na faatonu atu ai e Ptolemy Euergetes II o Aikupito ona alii ma faipule, “e sā ona latou faatauanauina tagatānuu e auauna iā i latou, pe faatonuina foʻi le aumaia o lafu povi mo a latou fuafuaga.” E lē gata i lea: “E lē tatau foʻi ona talosagaina e se tasi . . . ni vaa mo sana fuafuaga po o se isi lava mea.” I se tusitusiga o loo iai i se malumalu i Aikupito na faia i le 49 T.A., na faamaonia ai e se alii Roma o Vergilius Capito, sa faia e fitafita Roma ni talosaga lē tatau ma na ia faamautinoa e “sā ona ave pe talosagaina e se tasi se mea . . . seʻi vaganā ua maua se faatagaga tusitusia mai iā te aʻu.”

[Ata i le itulau 24]

Sa faatauanauina Simona le Kurene e faia se galuega

[Ata i le itulau 26]

E toʻatele Molimau ua faafalepuipuiina ona o le tausisia o lo latou tulaga o ni Kerisiano