Puipuimalu lo Tatou Tulaga o ni Kerisiano

“Ua fetalai mai Ieova, O outou o aʻu molimau.”—ISAIA 43:10.

1. O ā ituaiga o tagata e tosina atu e Ieova iā te ia?

PE A e alu i le Maota o le Malo, ia tagatagaʻi solo i ou autafa. O ai o e tagaʻi atu i ai i lenei nofoaga o tapuaʻiga? E te ono iloa ai ē laiti o loo naunau e faalogologo i le poto mai le Tusi Paia. (Salamo 148:12, 13) E lē gata i lea, o le a e vaaia ai foʻi ulu o aiga, o loo tauivi e faafiafia le finagalo o le Atua, a o soifua i se lalolagi ua lē faatāuaina ai olaga faaleaiga. Atonu e tau lau vaai i ē pele ua matutua, o loo soifua pea ma le faamaoni i lo latou tuuina atu iā Ieova e ui i gasegase ona o le soifuaga matua. (Faataoto 16:31) E matuā alolofa i latou uma lava iā Ieova. Ua fiafia foʻi lona finagalo e atiina aʻe se faiā ma i latou. Na fetalai le Alo o le Atua: “E lē mafai se tasi ona sau iā te aʻu, pe a lē tosina mai e le Tamā ua auina mai aʻu.”—Ioane 6:37, 44, 65.

2, 3. Aiseā ua avea ai o se luʻi le tausisia o lo tatou tulaga o ni Kerisiano?

² Pe tatou te lē fiafia ea e avea ma ni tagata ua faamaonia ma faamanuiaina e Ieova? Peitaʻi, o se luʻi le tausisia pea o lo tatou tulaga o ni Kerisiano i nei “aso faigatā.” (2 Timoteo 3:1) Ua moni lenei tulaga i talavou o ē ua ola aʻe i aiga Kerisiano. Na faapea mai se tasi o na  talavou: “E ui lava sa ou auai i sauniga faa-Kerisiano, ae e leʻi iai ni ou sini faaleagaga ma e leʻi iai foʻi soʻu faanaunauga e auauna iā Ieova.”

³ A o faanaunau ma le faamaoni nisi e auauna iā Ieova, atonu ua tosina ese atu i latou ona o omiga mai aumea, aafiaga faalelalolagi, ma faanaunauga agasala. Pe a oo omiga iā i tatou, e ono faasolosolo malie lava ona mou atu lo tatou tulaga o ni Kerisiano. O se faaaʻoaʻoga, i aso nei, e manatu le toʻatele o le lalolagi i tapulaa tau amio a le Tusi Paia, e lē talafeagai pe lē mafai foʻi ona tausia. (1 Peteru 4:4) Ua manatu nisi e lē tāua le tapuaʻi i le Atua i le auala ua ia finagalo i ai. (Ioane 4:24) I lana tusi i Efeso, o loo talanoa atu ai Paulo i le mauaina o le “agaga” o le lalolagi po o le uiga taatele o iai. (Efeso 2:2) O loo uunaʻia e lenā agaga tagata, ina ia mulimuli atu i manatu o ē e lē iloa Ieova.

4. Na faapefea ona faamamafa e Iesu e ao ona puipuia lo tatou tulaga o ni Kerisiano?

⁴ Ae peitaʻi, o le avea ma auauna tuuina atu a Ieova, ua tatou iloa ai, e mataʻutia le iʻuga pe a lē toe avea se tasi ma Kerisiano, tusa lava pe talavou pe matutua. O le iloaina o lo tatou tulaga o ni Kerisiano, e faavae i tapulaa a Ieova ma le mea o loo ia faafinagaloina mai iā i tatou. E matuā talafeagai lenei tulaga, talu ai na faia i tatou i lona faatusa. (Kenese 1:26; Mika 6:8) Ua faatusaina e le Tusi Paia le mātauliaina o lo tatou tulaga o ni Kerisiano, i le laʻeiina o ni laʻei. Na lapataʻi Iesu e faatatau i o tatou taimi: “Faauta, ou te alu atu pei o se gaoi! Amuia lē mataala, ma tausi i ona ofu, ina neʻi savali o ia e lē lavalavā, neʻi latou iloa atu foʻi lona mā.” * (Faaaliga 16:15) E tatou te lē mananaʻo e aveesea o tatou uiga faa-Kerisiano ma tapulaa tau amio, ma faaleagaina ai i tatou e le lalolagi a Satani. Pe afai e tupu lenā mea, o le a leiloa ai o tatou “ofu.” O se tulaga e faanoanoa ma māsiasi ai.

5, 6. Aiseā e tāua ai le iai o se tulaga mautū faaleagaga?

⁵ E matuā aafia le auala e soifua ai se tasi, i lona iloaina o lona tulaga o se Kerisiano. E faapefea? Pe afai e lē mautonu se tagata tapuaʻi iā Ieova i lona tulaga o se Kerisiano, atonu e iʻu ina faaleogalua o ia, e aunoa ma se taʻitaʻiga po o ni sini. Ua lapataʻi soo mai le Tusi Paia faasaga i lenā tulaga faalotolotolua. Na lapataʻi mai Iakopo: “O lē masalosalo e tusa ia ma le peau o le sami ua sousou i le matagi ma felafolafoaʻiina. Aua lava neʻi manatu lea tagata na te maua se mea e tasi mai le Alii; o le tagata faalotolotolua e faalētumau ia i ona ala uma.”—Iakopo 1:6-8; Efeso 4:14; Eperu 13:9.

⁶ E faapefea ona tatou puipuimalu lo tatou tulaga o ni Kerisiano? O ā mea e mafai ona fesoasoani iā i tatou, e atili mataala ai i le faaeaga sili o ni tagata tapuaʻi o Lē Silisili Ese? Faamolemole ia iloilo auala o loo mulimuli mai.

 Ia Faamausalī Lou Tulaga o se Kerisiano

7. Aiseā e talafeagai ai le ʻaiʻoi atu iā Ieova ina ia suʻesuʻeina i tatou?

⁷ Ia faamalosia pea lau faiā ma Ieova. O le mea aupito i tāua i se Kerisiano, o lana faiā lea ma le Atua. (Salamo 25:14; Faataoto 3:32) Afai e amata ona tatou masalosalo e faatatau i lo tatou tulaga o ni Kerisiano, o le taimi la lenei e ao ai ona tatou suʻesuʻe lelei le aogā ma le loloto o lenei faiā. Na talafeagai le ʻaiʻoi a le faisalamo: “Ieova e, ia e suʻesuʻe iā te aʻu, ma tofotofo iā te aʻu; ia e faamamā i oʻu manatu ma loʻu loto.” (Salamo 26:2) Aiseā e tāua ai lenā suʻesuʻega? Talu ai, e lē mafai ona tatou faamasino ma le tonu o tatou faanaunauga, ma uunaʻiga o o tatou loto. Ua na o Ieova e malamalama i o tatou tagata i totonu, o lona uiga o o tatou faanaunauga, mafaufauga ma faalogona.—Ieremia 17:9, 10.

8. (a) E faapefea ona aogā le tofotofoina o i tatou e Ieova? (e) Ua faapefea ona e maua le fesoasoani e agaʻigaʻi ai i luma o se Kerisiano?

⁸ O le talosaga atu iā Ieova ina ia suʻesuʻeina i tatou, ua tatou valaaulia ai o ia e tofotofo iā i tatou. E na te ono faatagaina tulaga e tutupu, lea e faaalia ai o tatou faanaunauga moni, ma le tulaga o o tatou loto. (Eperu 4:12, 13; Iakopo 1:22-25) E ao ona tatou taliaina na tofotofoga, auā e tatou te maua ai le avanoa e faaalia ai lo tatou matuā faamaoni iā Ieova. E faaalia ai i lenā mea po o ‘atoatoa ma sao ona lelei i tatou, ia leai se mea e tasi e mativa ai.’ (Iakopo 1:2-4) O le tofotofoina o i tatou, e malolosi faaleagaga ai.—Efeso 4:22-24.

9. Pe e tatau ona faamaonia e le tagata lava ia le upu moni o le Tusi Paia? Ia faamatala.

⁹ Ia e suʻesuʻe ina ia e mautinoa o le upu moni lenei. O le iloaina o lo tatou tulaga o ni auauna a Ieova, e mafai ona faavaivaia pe afai e lē faavaeina i le poto mai le Tusi Paia. (Filipi 1:9, 10) O Kerisiano uma lava, pe talavou pe matutua, e ao ona latou matuā mautinoa o le upu moni lenei o loo maua i le Tusi Paia. Na faalaeiau Paulo i uso talitonu: “Ia tofotofo i mea uma lava, ia taofi mau i le mea lelei.” (1 Tesalonia 5:21) E ao ona iloa e talavou Kerisiano i aiga e matataʻu i le Atua, e lē mafai ona avea i latou o ni Kerisiano moni ona o le faatuatua o o latou mātua. Na apoapoaʻi atu Tavita i lona atalii o Solomona, ia iloa “le Atua o lou tamā, ma auauna iā te ia ma le loto atoa.” (1 Nofoaiga a Tupu 28:9) E leʻi lava mo le talavou o Solomona, ona vaavaai atu a o atiina aʻe e lona tamā lona faatuatua iā Ieova. E ao foʻi ona ia iloa Ieova, ma sa ia faia faapea. Na ia augani atu i le Atua: “Ia e foaʻi mai iā te aʻu le poto ma le atamai, ina ia ou fealuaʻi i luma o le nuu nei.”—2 Nofoaiga a Tupu 1:10.

10. Aiseā e lē sesē ai le faia o fesili faamaoni ona o le fia malamalama?

¹⁰ O le faatuatua malosi e atiina aʻe e le poto. Na taʻua e Paulo: “E tupu le faatuatua i le taulogologo atu.” (Roma 10:17) O le ā le uiga o lana faamatalaga? O lona uiga, o le ave i fale o le poto mai le Afioga a le Atua, e faamalosia ai le faatuatua ma le mautinoa iā Ieova, o ana folafolaga ma lana faalapotopotoga. O le faia o ni fesili e uiga i le Tusi Paia, e mafai ona maua ai ni tali faamalieloto. E lē gata i lea, tatou te maua le fautuaga a Paulo i le Roma 12:2: “Ia outou suʻesuʻe pe se ā le finagalo o le Atua, o mea ua lelei, ma le mālie, ma le atoatoa.” E faapefea ona tatou ausia lenā mea? E ala i le “iloa lelei o le upu moni.” (Tito 1:1) E fesoasoani le agaga o Ieova iā i tatou ina ia malamalama i mataupu faigatā. (1 Korinito 2:11, 12) E ao ona tatou tatalo mo le fesoasoani a le Atua pe a faigatā ona tatou malamalama i se mataupu. (Salamo 119:10, 11, 27) E finagalo Ieova ia tatou malamalama i lana Afioga, talitonu ma usiusitai i ai. E na te taliaina fesili faamaoni e faia ona o le fia malamalama.

Ia Maumauaʻi e Faafiafia le Atua

11. (a) O le ā le faanaunauga masani e mafai ona maileia ai i tatou? (e) E faapefea ona tatou maua le loto tele e teena ai omiga mai aumea?

¹¹ Ia saʻili e faafiafia le Atua ae lē o tagata. O se tulaga masani o o tatou olaga, o le fia  aumea atu lea i isi. E mananaʻo uma lava tagata i ni uō, ma e mafai ona tatou fiafia ai. I le taimi o le talavou ma mulimuli ane ai, e malolosi tele ai omiga mai aumea, ma e faagaee ai faanaunauga e fia faataʻitaʻi i isi pe faafiafiaina i latou. Peitaʻi, e lē masani ona manatu mamafa moni a tatou uō ma aumea mo lo tatou lelei. O nisi taimi, e pau le mea latou te mananaʻo ai, o le iai lea o se tasi e auai faatasi ma i latou i le faia o le mea sesē. (Faataoto 1:11-19) Pe a lolo atu se Kerisiano i omiga leaga mai aumea, e masani ona pepelo o ia e tusa ma lona tulaga. (Salamo 26:4) Na lapataʻi mai Paulo: “Aua foʻi tou te amio faatasi ma lenei lalolagi.” (Roma 12:2) Ua saunia e Ieova le malosi tatou te manaʻomia ina ia tau faasaga i so o se omiga mai lenei lalolagi.—Eperu 13:6.

12. O le ā le mataupu silisili ma le faaaʻoaʻoga tatou te ono tumau ai pe a luʻia lo tatou faatuatuaina o le Atua?

¹² Pe a faamataʻuina i tatou i omiga e faaleaga ai lo tatou tulaga o ni Kerisiano, e ao ona manatua, e sili ona tāua lo tatou faamaoni i le Atua, na i lo o manatu o tagata po o amioga a le toʻatele. O se mataupu silisili tāua o loo maua i le Esoto 23:2: “Aua e te mulimuli atu i le toʻatele ē fai le amio leaga.” Ina ua masalosalo le toʻatele o tagata Isaraelu i le faataunuuina e Ieova o ana folafolaga, na lē ioe Kalepo iā i latou. Na ia iloa e maufaatuatuaina folafolaga a le Atua, ma sa matuā faamanuiaina o ia ona o lona faamaoni. (Numera 13:30; Iosua 14:6-11) Po o faapena lou naunau e teena manatu ma amioga e fiafia i ai le toʻatele, ina ia puipuimalu ai la oulua faiā ma le Atua?

13. Aiseā e atamai ai le faailoa atu o tatou o ni Kerisiano?

¹³ Ia faailoa atu o oe o se Kerisiano. Pe a iloa e tagata o oe o se Kerisiano, o le a fesoasoani tele iā te oe pe a oo mai faigatā, ma o le a mafai ona puipuimalu ai lou tulaga. Ina ua fesagaʻi ma teteega i lo latou taumafai e faia le finagalo o Ieova i aso o Esera, na taʻua e tagata Isaraelu faamaoni: “O i matou o auauna a le Atua o le lagi ma le lalolagi.” (Esera 5:11) E tatou te fefefe pe a tatou afāina ona o gaoioiga ma faitioga a tagata feita. Pe afai tatou e taumafai e faafiafia tagata, o le a lē aogā lo tatou maumauaʻi mo le upu moni. Aua le fefefe ai. E sili ona lelei le faamanino atu i isi o oe o se Molimau a Ieova. I se auala faaaloalo ae ia maumauaʻi, e mafai ona e faamatala atu i isi mea e te faatāuaina, ou talitonuga ma lou tulaga o se Kerisiano. Ia iloa e isi e te maumauaʻi e tumau i tapulaa tau amio maualuluga a Ieova. Ia faamanino atu e lē mafai ona e faagutugutulua i lou tulaga o se Kerisiano. Ia atagia i au amioga ua e mitamita i au tapulaa tau amio. (Salamo 64:10) O lou tū matilatila o se Kerisiano maumauaʻi, e mafai ona faamalosia ai oe, puipuia ai, ma e oo lava ina uunaʻia ai nisi e fia iloa e uiga iā Ieova ma ona tagata.

14. Pe e ao ona faavaivaia i tatou i tauemuga ma teteega? Ia faamatala.

¹⁴ Ioe, atonu e tauemu pe tetee atu nisi iā te  oe. (Iuta 18) Pe afai e lē tali lelei mai nisi i au taumafaiga e faamatala atu mea e te faatāuaina, aua le loto vaivai. (Esekielu 3:7, 8) Po o le ā lava lou maumauaʻi, e lē mafai ai ona e faatalitonuina tagata o ē e leai so latou faanaunauga e talitonu. Manatua Farao. E leʻi mafai e mala po o vavega, e oo lava i le maliu o lana ulumatua, ona faatalitonuina Farao e faapea, o Mose lea na fai ma sui o Ieova. O lea la, aua le faavaivai ona o le fefe i tagata. O le faatuatua i le Atua e fesoasoani e foʻia ai le fefe.—Faataoto 3:5, 6; 29:25.

Aʻoaʻo Mai Mea i Aso ua Mavae, ma Sauniuni mo le Lumanaʻi

15, 16. (a) O le ā lo tatou tofi faaleagaga? (e) E ala i le Tusi Paia e faapefea ona aogā le mafaufau loloto i lo tatou tofi faaleagaga?

¹⁵ Ia faapelepele i ou tofi faaleagaga. E ala i le Afioga a le Atua, o le a maua ai e Kerisiano aogā mai le manatunatu loloto i le tamaoaiga o lo latou tofi faaleagaga. O lenei tofiga e aofia ai le upu moni o le Afioga a Ieova, le faamoemoe i le ola e faavavau, ma le faaeaga e fai ma sui o le Atua, e ala i le folafola atu o le tala lelei. Po o e iloa lau matafaioi o se tasi o ana Molimau, o le vaega lea o tagata ua faamanuiaina ma faatonuina e faia le galuega faasaoola o le talaʻia o le Malo? Ia manatua, o Ieova ua fetalai mai: “O outou o aʻu molimau.”—Isaia 43:10.

¹⁶ E mafai ona e fesili ifo iā te oe: ‘O le ā le tāua o nei tofi faaleagaga iā te aʻu? Po o lava loʻu faatāuaina o le faia o le finagalo o le Atua o se mea e faamuamua i loʻu olaga? Po o le  talisapaia o loʻu tofi faaleagaga e faamalosia ai aʻu e teena so o se faaosoosoga o le a maumau atu ai?’ O lo tatou tofi faaleagaga, ua mafai ona faamausalī ai iā i tatou le lagona o le malupuipuia faaleagaga, lea e na o le faalapotopotoga a Ieova o loo maua ai. (Salamo 91:1, 2) O le toe autaluina o mea mataʻina na tutupu i le faalapotopotoga a Ieova i aso nei, ua tatou matuā mautinoa ai e leai se tasi po o se mea e mafai ona aveesea tagata o Ieova i le lalolagi.—Isaia 54:17; Ieremia 1:19.

17. O le ā le isi mea e manaʻomia na i lo le na o le faalagolago i lo tatou tofi faaleagaga?

¹⁷ O le mea moni, e lē na o lo tatou tofi faaleagaga tatou te faalagolago i ai. E ao iā i tatou uma ona atiina aʻe se faiā māfana ma le Atua. Ina ua māeʻa ona galue mamafa Paulo i le faamalosia o le faatuatua o Kerisiano i Filipi, na ia tusi atu iā i latou: “O lenei, aʻu pele e, faapei ona outou anaana mai e lē aunoa, ia outou galueaʻiina pea lo outou faaolataga i le mataʻu ma le gatete, e lē gata ina o tatou nonofo ma outou, a e atili ai pe a ou lē i ai.” (Filipi 2:12) E lē mafai ona tatou faalagolago i se isi mo le faaolataga.

18. E faapefea i gaoioiga faa-Kerisiano ona faamalosia ai lo tatou tulaga o ni Kerisiano?

¹⁸ Ia toaga e auai i galuega faa-Kerisiano. Na taʻua e faapea, “e telē se aafiaga o galuega i le atiina aʻe o le tagata.” Ua faatonuina Kerisiano i aso nei, ina ia faia se galuega tāua i le talaʻiina o le tala lelei o le Malo o le Atua ua faavaeina. Na faalauiloa e Paulo: “Auā o aʻu o le aposetolo o nuu ese, ou te vivii i loʻu faiva.” (Roma 11:13) Ua tuese i tatou mai le lalolagi ona o la tatou talaʻiga, ma o le auai i ai, e atili ai ona iloa lo tatou tulaga o ni Kerisiano. O lo tatou auai i mea fai a le faapotopotoga, e pei o sauniga faa-Kerisiano, fausia o maota o le malo, fesoasoani mo ē pagatia, ma isi mea, e faamalosia ai lo tatou tulaga o ni Kerisiano.—Kalatia 6:9, 10; Eperu 10:23, 24.

Maua Faamanuiaga pe a Manino le Tulaga o ni Kerisiano

19, 20. (a) O ā aogā ua e olioli ai i le avea o se Kerisiano? (e) E faapefea ona aumaia iā i tatou se faavae mo lo tatou tulaga moni?

¹⁹ Ia mafaufau i aogā ma itu lelei tatou te maua i le avea o ni Kerisiano moni. Ua tatou maua le faaeaga o le silafiaina o i tatou e Ieova. Na faapea mai Malaki: “Ona fetautalatalai lea ē na matataʻu iā Ieova; ua liliu mai foʻi e Ieova ona fofoga, ma ua faafofoga mai; ona tusia lea o le tusi e faamanatu i ona luma, mo ē matataʻu iā Ieova, ma mafaufau i lona suafa.” (Malaki 3:16) E silasila Ieova iā i tatou o ni ana uō. (Iakopo 2:23) Ua faamanuiaina o tatou olaga, ona ua iai ni fuafuaga, maua le malamalamaaga loloto, ma sini ua fua lelei mai. Ua tatou maua foʻi le faamoemoe o le ola e faavavau i le lumanaʻi.—Salamo 37:9.

²⁰ Ia manatua, e faalagolago lou tulaga moni ma lou tāua, i le auala o silasila mai ai le Atua iā te oe, ae lē o manatu o tagata. E ono faamasino e nisi i tatou e tusa ma tapulaa lē lelei atoatoa a tagata. Peitaʻi, o le alofa ma le naunau mai o le Atua, ua aumaia ai se faavae moni o le taʻuaogāina o i tatou o ni ona tagata. (Mataio 10:29-31) Talu ai tatou te alolofa i le Atua, ua mafai ai ona tatou maua le malamalamaga sili e uiga i o tatou tulaga o ni Kerisiano ma le taʻitaʻiga sili ona manino i o tatou olaga. “Afai e alofa atu se tasi i le Atua, ua silafia lenā tagata e ia.”—1 Korinito 8:3.

[Faamatalaga pito i lalo]

Pe E te Manatua?

• Aiseā e tāua ai i Kerisiano ona puipuimalu i lo latou tulaga faaleagaga?

• E faapefea ona faamausalīina le faavae o lo tatou tulaga o ni Kerisiano?

• Pe a fesagaʻi ma se fesili po o ai e ao ona faafiafia, o ā vala e fesoasoani iā i tatou ia faia le faaiʻuga saʻo?

• E faapefea i le iloa lelei o lo tatou tulaga o ni Kerisiano ona aafia ai lo tatou lumanaʻi?

[Fesili mo le Suʻesuʻega]

[Ata i le itulau 21]

O lo tatou toʻaʻaga e auai i gaoioiga faa-Kerisiano, e mafai ona faamalosia ai lo tatou tulaga o ni Kerisiano