O Loo Ola le Afioga a Ieova

Manatu Tāua Mai le Tusi o Ruta

O LE tala o loo i le tusi o Ruta, e faamāfanafanaloto ona o le faamaoni i le va o nei fafine e toʻalua, ae lē gata i lea, o le talisapaia o Ieova le Atua ma le faatuatua i lana faatulagaga. Ua taʻu mai ai foʻi le matuā naunau o Ieova i le gafa o le Mesia. O se tala e uiga i tulaga fiafia ma le faanoanoa na oo i se aiga.

Ua aofia i le tusi o Ruta se vaitaimi pe tusa ma le 11 tausaga, o “aso na faamasino ai faamasino” i Isaraelu. (Ruta 1:1) O mea na tutupu, na faamauina atonu i le amataga o vaitaimi o faamasino, talu ai o Poasa o lē e ana fanua, o se tasi o tagata o lenei tala, o le tama a Raava. (Iosua 2:1, 2; Ruta 2:1; Mataio 1:5) Atonu na tusia e le perofeta o Samuelu le tala i le 1090 T.L.M. E na o le pau lea o le tusi o le Tusi Paia o loo taʻua ai le igoa o se fafine e lē o se Isaraelu. O le feʻau o loo iai e ‘ola ma o loo matuā galue foʻi.’—Eperu 4:12.

“O LE MEA E TE ALU I AI, OU TE ALU AI FOʻI”

(Ruta 1:1–2:23)

Ina ua taunuu Naomi ma Ruta i Peteleema, na avea i laʻua ma taulaʻiga o talanoaga a fafine. Na fesili fafine o le aai e faatatau i le tasi o i laʻua e matua: “O Naomi ea lenei?” I le tali atu i ai, ua faapea atu Naomi: “Aua tou te taʻua aʻu o Naomi, a ia taʻua aʻu o Mara; auā ua matuā oona mea ua faia iā te aʻu e Lē ona le malosi uma lava. Na ou alu atu ua tamaoaiga, ua faafoʻiina mai aʻu e Ieova ua mativa.”—Ruta 1:19-21.

Ina ua siitia atu o ia mai Peteleema i Moapi ona o se oge i Isaraelu, na “tamaoaiga” Naomi auā sa iai lana tane ma le fanau e toʻalua. A o aumau i latou i Moapi mo se taimi, na maliu ai lana tane o Elimeleka. Mulimuli ane, na faaipoipo ana tama e toʻalua i fafine Moapi o Orepa ma Ruta. Ina ua mavae tausaga e 10, na maliliu nei tama e aunoa ma ni fanau, ae ua tuua ai na o fafine e toʻatolu. Ina ua filifili Naomi e toe foʻi i Iuta, na ō faatasi ma avā a ana fanau tama. A o latou ō, na tauanau ai e Naomi i laʻua ina ia toe foʻi i Moapi ma faaipoipo i ni tane mai i lo la nuu. Na toe foʻi Orepa. Ae peitaʻi, sa mulimuli pea Ruta iā Naomi ma faapea atu: “O le mea e te alu i ai, ou te alu ai foʻi; o le mea e te nofo ai, ou te nofo ai, e fai lou nuu moʻu nuu; e fai lou Atua moʻu Atua.”—Ruta 1:16.

Na taunuu Naomi ma Ruta i Peteleema i le amataga o le seleselega o karite. Ina ia maua aogā mai le faatulagaga o le tulafono a le Atua, na amata ai ona aoaoina e Ruta mea mai le fanua o se tasi e aiga iā Elimeleka, o se Iutaia matua e suafa iā Poasa. Na fiafia Poasa iā Ruta ma faaauau ai ona ia aoina mea mai i lona fanua seʻia oo “ina ua uma o le seleselegākarite ma le seleselegāsaito.”—Ruta 2:23.

Taliina Fesili Faale-Tusi Paia:

1:8—Aiseā na fai atu ai Naomi i avā a ana tama e toe “foʻi atu taʻitasi i le aiga o  lona tinā” na i lo le aiga o lona tamā? E lē o taʻua pe na soifua pea le tamā o Orepa i lenā taimi. Ae o loo soifua pea le tamā o Ruta. (Ruta 2:11) O lea la, na tautala Naomi i le aiga o le tinā, atonu na ia mafaufau i le alofa o o la tinā, ina ia faalaeiauina ai i laʻua e tuua Naomi. Atonu e faaalia mai i lenei faamatalaga, e lelei aiga o o la tinā ae lē pei o Naomi.

1:13, 21—Pe na faapogaia e Ieova se olaga tigā mo Naomi ma oo iā te ia ni mala? E leai ma e leʻi tuuaʻia e Naomi le Atua i so o se mea sesē. Ae ona o mea ua tutupu iā te ia, na ia manatu ai ua lē fiafia le finagalo o Ieova iā te ia. Na tigā o ia ma loto vaivai. E lē gata i lea, i na aso, o le fanau mai o se pepe, na manatu i ai o se faamanuiaga mai le Atua, a o le lē fanau, o se mala. Atonu na manatu Naomi e saʻo ona mafaufauga, ua faalumaina o ia e Ieova, ona o le leai o se fanau a lana fanau ua maliliu.

2:12—O le ā le “taui tele” na maua e Ruta mai iā Ieova? Na fanaua e Ruta se tama ma maua le faaeaga o le avea ma fesootaʻiga o le gafa aupito i tāua i le talafaasolopito, o le gafa lea o Iesu Keriso.—Ruta 4:13-17; Mataio 1:5, 16.

Lesona mo i Tatou:

1:8; 2:20. E ui i faigatā na oo iā te ia, ae na mautinoa e Naomi le agalelei o Ieova. E ao foʻi ona tatou faia faapena, aemaise lava pe a fesagaʻi ma tulaga faigatā.

1:9. E lē tatau ona avea le aiga e na o se nofoaga e aai ma momoe ai. E ao ona avea o se nofoaga toʻafilemu e mālōlō ma faamāfanafanaina ai.

1:14-16. Na manaʻo Orepa e toe foʻi “i lona nuu ma ona atua.” Ae e leʻi toe foʻi Ruta. Na ia tuua le olaga sologa lelei ma saogalemu i lona nuu, ae tumau i le faamaoni iā Ieova. O le atiina aʻe o le alofa mo le Atua ma faaalia le agaga lē manatu faapito, o le a puipuia i tatou mai le lolo atu i faanaunauga manatu faapito ma ‘tuumuli ai i le malaia.’—Eperu 10:39.

2:2. Na manaʻo Ruta e na te mauaina aogā o le faatulagaga o le aoaoina lea o mea mai i le fanua, lea na faia mo tagata ese ma ē matitiva. O ia o se tasi e loto maulalo. E lē tatau i se Kerisiano mativa ona manatu faamaualuga e taliaina le fesoasoani alofa a uso talitonu, po o le fesoasoani a le malo e ono talafeagai mo ia.

2:7. E ui sa iai le aiā e aoaoina ai mea, ae na fesili atu Ruta mo se faatagaga e faia ai. (Levitiko 19:9, 10) O se faailoga lenei o lona agamalu. E atamai mo i tatou ona saʻilia le “agamalu” auā, “o ē agamalu, e fai mo latou le nuu; e faafiafia foʻi i latou iā te i latou ona o le manuia e tele.”—Sefanaia 2:3; Salamo 37:11.

2:11. O Ruta, sa lē na o se tauaiga iā Naomi, ae o sana uō moni foʻi. (Faataoto 17:17) Na mausalī la laʻua faauōga talu ai, sa faavae i uiga e pei o le alofa, faamaoni, tigā  alofa, agalelei ma le agaga lē manatu faapito. Ae e sili atu ona tāua, sa faavae i o la tulaga faaleagaga, le faanaunauga e auauna iā Ieova faatasi ma ona tagata tapuaʻi. Ua tatou maua ni avanoa sili ona lelei, e atiina aʻe ai se faauōga ma tagata tapuaʻi moni.

2:15-17. E ui lava na faamāmā e Poasa le galuega a Ruta, ae sa “ao e ia i le fanua ua oo i le afiafi.” O Ruta o ia o se tasi e galue mamafa. E ao i se Kerisiano ona iai se talaaga lelei i le filigā e galue mamafa.

2:19-22. Sa faaalia le naunau māfana o Naomi iā Ruta, lea na olioli ai i laʻua i talanoaga manaia i afiafi, ma fefaaaliaʻi ai o la manatu ma lagona. E ao ona faapena aiga Kerisiano.

2:22, 23. Sa saʻili e Ruta ana aumea i tagata e tapuaʻi iā Ieova, e leʻi pei o le afafine o Iakopo o Tina. Maʻeu se faaaʻoaʻoga lelei mo i tatou!—Kenese 34:1, 2; 1 Korinito 15:33.

UA “TAMAOAIGA” NAOMI

(Ruta 3:1–4:22)

E lē toe mafai ona fanau Naomi ona ua matua tele. O lea na ia faatonuina ai Ruta ina ia faaipoipo i se tasi mai i lona aiga, e tusa ai ma le tulafono a Mose i na aso. O lona mulimuli i le faatonuga a Naomi, na fai atu ai Ruta iā Poasa e la te faaipoipo. Na fiafia i ai Poasa. Ae peitaʻi, o loo iai se isi tauaiga e latalata le faiā e tatau ona ave muamua i ai le avanoa lea.

Na faavave ona taulimaina e Poasa le mataupu. O le taeao na sosoo ai, na ia aoaoina mai ai tamāloloa e toʻa 10 o Peteleema i luma o lē la te aiga, ma fesili atu iā te ia pe manaʻo e toe faatau mai le fanua. Na musu lona tauaiga e faia faapea. O lea na gaoioi ai loa Poasa o toe faatau mai le fanua ma faaipoipo atu iā Ruta. Na maua la laʻua tama o Opeta, le tamā o le tamā o le tupu o Tavita. Ua faapea atu fafine o Peteleema iā Naomi: “Faafetai iā Ieova ina ua . . . faamalosi o lou ola, ma tausi i lou loomatua, auā o le avā a lau tama, o lē alofa iā te oe, ua fanau; ua lelei o ia iā te oe e sili i tama tane e toʻafitu.” (Ruta 4:14, 15) O le fafine na toe foʻi i Peteleema ua “mativa” ae ua toe “tamaoaiga.”—Ruta 1:21.

Taliina o Fesili Faale-Tusi Paia:

3:11—Aiseā na taʻuleleia ai Ruta o se “fafine amio lelei”? E leʻi faia i le tino ana teuga, o le “fili lea o le lauulu” po o le ‘teuteu i auro, ma le ofu i ofu,’ na māfua ai ona mātauina o ia e isi. Na i lo lea, o le “tagata lilo o le loto,” o lona faamaoni ma le alofa, lona loto maulalo, filigā ma le agaga lē manatu faapito. E so o se fafine lava e mataʻu i le Atua e faanaunau ia taʻuleleia e pei o Ruta, e ao ona taumafai malosi e atiina aʻe nei uiga.—1 Peteru 3:3, 4; Faataoto 31:28-31.

3:14—Aiseā na vave feala ai Ruta ma Poasa i le taeao pō lava? E lē o se mea lē mamā pe leaga na la faia ma la mananaʻo ai  e ufitia. O le gaoioiga a Ruta sa faia i le pō, sa talafeagai lea ma le tulafono e faia e se fafine e saʻili atu mo se faaipoipoga i se tasi o le aiga o lana tane ua maliu. Na ia gaoioi e talafeagai ma le faatonuga a Naomi. E lē gata i lea, ua faaalia manino i le tali a Poasa, le leai o se mea sesē na faia e Ruta. (Ruta 3:2-13) E foliga mai la, na vave ona feala Ruta ma Poasa ina ia aua ai neʻi faasalalauina atu ai ni tala faitatala.

3:15—Aiseā na avatu ai Poasa fua o karite e ono iā Ruta? E pei ona sa iai se aso mālōlō pe a uma aso e ono e galue ai, atonu ua faaataina e fua o karite e ono, le latalata ona mālōlō o Ruta pe a faaipoipo ma Poasa. Na faamautinoa e Poasa ua maua se “mapusaga” o Ruta i le aiga o lana tane. (Ruta 1:9; 3:1) Atonu foʻi ua pau lenā o le mea e mafai e Ruta ona ave i luga o lona ulu.

3:16—Aiseā na fesili atu ai Naomi iā Ruta: “Laʻu tama e, o ai ea oe?” Pe na te leʻi iloaina le avā a lana tama? E foliga mai, e leʻi iloa e Naomi Ruta, auā atonu na ia toe foʻi atu iā Naomi o pogisa pea. O lea la, atonu e uiga foʻi le fesili a Naomi e faatatau i le avea o Ruta ma fafine fou ma pe fiafia Poasa e faaipoipo atu iā te ia.

4:6—Na faapefea e se tagata ona “faalēaogā” lona tofi e ala i le toe faatau mai o le fanua? Muamua lava, pe afai na faatau atu e se tasi ua mativa lona tofi o le fanua, e mafai e le isi tagata o le aiga ona faatau mai le fanua i se tau e tusa ma le aofaʻiga o tausaga o totoe seʻia oo i le isi iupeli. (Levitiko 25:25-27) O le faia faapea, o le a faaitiitia ai ana tupe ma meatotino. E lē gata i lea, afai e fanau se tama a Ruta, o le a maua e lenā tama le tofi o le laueleele na i lo se isi lava tagata o le aiga.

Lesona mo i Tatou:

3:12; 4:1-6. Na mulimuli ma le faamaoni Poasa i le faatulagaga a Ieova. Pe o tatou mulimuli ma le faamaoni i faatulagaga faaleagaga?—1 Korinito 14:40.

3:18. Na talitonuina e Naomi Poasa. Pe lē ao ea la ona tatou talitonuina o tatou uso faamaoni? Na lotomalie Ruta e faaipoipo i se isi tagata o le aiga o Poasa, o se tamāloa na te leʻi iloaina muamua, o se tasi e lē o taʻua lona igoa i le Tusi Paia. (Ruta 4:1) Aiseā? Talu ai, na ia talitonuina faatulagaga a le Atua. Pe e faapena foʻi i tatou? O se faaaʻoaʻoga, pe a saʻilia a tatou paaga faaipoipo, po o tatou utagia le fautuaga o le faaipoipo tau o “lē ua i le Alii”?—1 Korinito 7:39.

4:13-16. E ui o Ruta o se Moapi ma sa tapuaʻi muamua i le atua o Kimosa, ae na ia mauaina se taui mataʻina. Ua faaalia ai i inei le mataupu silisili, “e lē mai lē ua manaʻo, e lē mai lē ua tausinio, a e mai le Atua o lē alofa mai.”—Roma 9:16.

‘E Faamaualugaina Outou e le Atua i Ona Pō e Tatau Ai’

Ua faaalia i le tusi o Ruta, o Ieova o le Atua agalelei, ma e fesoasoani i ana auauna faamaoni. (2 Nofoaiga a Tupu 16:9) O le manatunatu i faamanuiaga a Ruta, tatou te iloa ai le tāua o le talitonuina o le Atua ma se faatuatua lē maluelue, talitonu atoatoa o “ia foʻi na te tauia mai o ē matuā saʻili iā te ia.”—Eperu 11:6.

Na matuā faatuatua Ruta, Naomi ma Poasa i faatulagaga a Ieova, ma na latou seleseleina ai iʻuga lelei. I se tulaga tutusa, “e galue le Atua i mea uma lava mo le lelei faatasi ma i latou o ē ua alolofa atu iā te ia, o ē ua valaauina i lona finagalo.” (Roma 8:28) Seʻi o tatou faatatauina le fautuaga a Peteru: “O le mea lea ia faamaulalo ai outou i lalo o le aao malosi o le Atua, ina ia faamaualugaina outou e ia i ona pō e tatau ai. Ia tuuina atu iā te ia mea uma tou te popole ai, auā o loo manatu mai o ia iā te outou.”—1 Peteru 5:6, 7.

[Ata i le itulau 26]

Pe e te silafia le māfuaaga e leʻi tuua ai e Ruta Naomi?

[Ata i le itulau 27]

Aiseā na taʻuleleia ai Ruta o se “fafine amio lelei”?

[Ata i le itulau 28]

O le ā le “taui tele” o Ruta mai iā Ieova?