O Amioga Lelei e ʻViia ai le Aʻoaʻoga a le Atua’

O LE talavou o Maria i le nuu o Kransnoyarsk, i Rusia, e ese le leo malie pe a pese, o lea na tofia ai o ia e lona faiaʻoga i le ʻaufaipese a le aʻoga. E leʻi pine lava, ae faamatala atu ma le faaaloalo e Maria i se tasi o ona faiaʻoga, e iai nisi o pese e lē mafai ona ia usuina. Aiseā? Talu ai, o le usuina o pese e fesootaʻi atu ma talitonuga faalotu, e feteenaʻi ma ona talitonuga e faavae i le Tusi Paia. Na teʻi le faiaʻoga ma tau mafaufau, ‘O le ā le mea e leaga ai le usuina o se pese e viiviia ai le Atua?’

I le faailoa atu o le māfuaaga e na te lē usuina ai se pese e faatatau i se Atua Tolutasi, na suʻe ai e Maria lana Tusi Paia ma faamatala atu e faapea, o le Atua ma Iesu Keriso, e lē o se Atua e tasi, ma o le agaga paia, o le mana galue o le Atua. (Mataio 26:39; Ioane 14:28; Galuega 4:31) Ua fai mai Maria: “E leʻi leaga ai lo ma va ma le faiaʻoga. I mea uma lava, e ese ma le lelei o faiaʻoga i la matou aʻoga. E latou te mananaʻo ina ia matou tautala saʻo atu.”

O le mea na faia e Maria, na faaaloalogia ai o ia e faiaʻoga faapea tamaiti aʻoga a o faagasolo le tausaga faaleaʻoaʻoga. Fai mai Maria: “E fesoasoani mataupu silisili o le Tusi Paia iā te aʻu i loʻu olaga. I le faaiʻuga o le tausaga faaleaʻoaʻoga, na ou maua ai se faailoga ona o le faamaoni ma le faamaopoopo, ae maua e oʻu mātua se tusi na faafetai aloaʻia mai ai le aʻoga, ona o le lelei o le tausiga o la laʻua tama.”

Na papatisoina Maria iā Aokuso 18, 2001. Fai mai o ia: “Ou te fiafia ona ua mafai ona ou auauna i se Atua e matuā ofoofogia, o Ieova!” O loo ola talavou Molimau a Ieova i le lalolagi aoao e tusa ma upu i le Tito 2:10, e faapea: ‘Ia viia i mea uma lava le aʻoaʻoga a le Atua lo tatou Faaola.’

[Ata i le itulau 32]

O Maria ma ona mātua ina ua uma lona papatisoga

[Ata i le itulau 32]

O se tusi o le talisapaia ma se tusi pasi o le taʻuleleia