Taugāupu—Aiseā e Matuā Tigā Ai?

“Maifea taua ma misa o iā te outou?”—IAKOPO 4:1.

E LEʻI fai atu e Iakopo lenei fesili i fitafita Roma, ia sa faia ni taua manumalo i lenā taimi; e na te leʻi suʻesuʻeina foʻi le pogai na fetauaʻi ai fitafita Iutaia, po o tagata sauā o le uluaʻi senituri T.A. Sa uiga le tala a Iakopo i fefinauaʻiga ua aafia ai ni tagata se toʻalua. Aiseā? Auā, o misa a ni tagata se toʻalua, e pei lava o taua a ni tagata se toʻatele, e afāina ai. Mātau faamatalaga nei a le Tusi Paia.

Na matuā feita le fanau a Iakopo i lo latou uso o Iosefa, o lea na latou faatau atu ai o ia e fai ma pologa i Aikupito. (Kenese 37:4-28) Mulimuli ane, sa taumafai le tupu Isaraelu o Saulo e fasiotia Tavita. Aiseā? Talu ai lona matauʻa iā Tavita. (1 Samuelu 18:7-11; 23:14, 15) I le uluaʻi senituri, na saveʻu ai e ni fafine Kerisiano se toʻalua, o Evotia ma Sunetui le filemu o le faapotopotoga atoa ona o lo la femisaʻi.—Filipi 4:2.

Talu ai nei lava, na foʻia ai e ni tagata se toʻalua o la feeseeseaʻiga i ni taugāpelu, po o taugāfana. E masani lava ona fasiotia ai se tasi o i laʻua, pe faamanuʻalia ai foʻi mo lona olaga atoa. Ae i taugāupu ma femisaʻiga i aso nei, e masani ona faaaogā e tagata upu tutui ma upu faatigā. E ui lava e lē o maligi ai se toto, ae o upu faatigā e manuʻa ai faalogona ma faaleagaina ai talaaga o tagata. E masani foʻi ona afāina ai tagata lē sala i nei taugāupu.

Seʻi manatu i se mea na tupu, na faitioina e se tasi patele Egelani le isi patele ona o le faaaogā sesē o tupe a le ʻaulotu. Na iloa e tagata uma la laʻua taugāupu, ma oo ai ina vaeluaina le ʻaulotu lea sa la galulue ai. Sa mumusu isi tagata e toe ō i le lotu, pe afai e taʻimua le patele lea latou te feita i ai. Ona o le matuā feitagaʻi o tagata o le ʻaulotu, e leʻi toe fetautalaaʻi ai le tasi i le isi pe a ō atu i le falesā mo le tapuaʻiga. Na atili ai ona vevela le tauaʻimisaga ina ua tuuaʻia le patele lea na faitioina i le faia o amioga leaga faaleituaiga.

Na talosaga atu le Akiepikopō o Canterbury i nei patele e toʻalua, ma taʻua ai la laʻua taugāupu e pei o se “maʻi papala,” ma “o se mea e faalumaina ai le suafa o lo Tatou Alii.” I le 1997,  na malie ai le tasi patele o le a mālōlō. A o le isi, sa faaauau pea i lana galuega seʻia oo i le taimi e litaea ai ina ua 70 ona tausaga, iā Aokuso 7, 2001. Na taʻua i le Nusipepa a le Lotu Egelani e faapea, o le aso na litaea ai o ia, na avea ma aso o faigaʻai mo “Sagato” Victricius. O ai “Sagato” Victricius? O se epikopō o lona fā o senituri lea na lipotia mai e faapea, na sasaina ona sa musu o ia e tau i se vaegaau. I le mātauina o le eseesega o uiga, na taʻua ai i le pepa e faapea: “O le musu e tau i se taua faalelotu, e lē o le uiga lea o [le patele lea ua litaea].”

Sa ono mafai e na patele ona ʻalofia le faatigā o i laʻua lava ma isi, pe ana la faatatauina le fautuaga i le Roma 12:17, 18: “Aua le taui atu le leaga i le leaga i se tasi; ia sauniuni mea e tusa i luma o tagata uma lava. Afai e mafaia iā te outou, ia outou nofo lelei ma tagata uma lava.”

Ae faapefea oe? Pe afai e faifaiupu atu se tasi iā te oe, pe e te fia taui ma sui i le faia o se taugāupu ma lenā tagata? Pe e te ʻalofia upu faatigā ma taumafai pea e tausia le filemu? Pe a e faaita i se tasi, pe e te ʻaloese mai lenā tagata ma le faamoemoe e lē o toe umi se taimi ona uma foʻi lea o si na mea? Po o le mea e te tausolomua ona faatoese? E tusa lava pe e te talosaga atu mo se faamagaloga pe e te faamagalo atu i se isi, ae o le foʻiaina o le feeseeseaʻiga, o le a saosaolaumea i lou lava fiafiaga. E fesoasoani fautuaga a le Tusi Paia iā i tatou i le foʻiaina o femisaʻiga ua loa ona faia, e pei ona faaalia i le mataupu lea e mulimuli mai.