‘O Loʻu Fesoasoani e Mai iā Ieova Lea’

O Talavou e Vivii Atu iā Ieova, e Faaʻoaina i Latou

“OU TE manaʻo e maua mea aupito sili ona lelei i le olaga!” O le faamatalaga lea a se tasi tama talavou e uiga i ona faamoemoega. Peitaʻi, e faapefea ona maua e se talavou mea aupito sili ona lelei i le olaga? Ua taʻua i le Tusi Paia se tali manino: “Ia e manatua lē na faia oe i ona pō o lou tauleʻaleʻa.”—Failauga 12:1.

E lē na o tagata matutua e vivii ma auauna atu iā Ieova. Na auauna iā Ieova Samuelu le tama a Elekana ma Hana i le malumalu, a o laʻitiiti lava o ia. (1 Samuelu 1:19, 20, 24; 2:11) Na faaalia e se teine talavou Isaraelu lona faatuatua lē maluelue iā Ieova, ina ua ia fai atu i le taʻitaʻi ʻau Suria o Naamanu, e alu i le perofeta o Elisaia e faamālōlō ai lona lepela. (2 Tupu 5:2, 3) I le Salamo 148:7, 12, ua faatonuina ai tama ma teine ina ia vivii atu iā Ieova. * Ina ua 12 tausaga o Iesu, na matuā naunau o ia e auauna i lona Tamā. (Luka 2:41-49) Ona sa aʻoaʻoina i latou i le Tusi Paia, na alalaga atu ai ni tamaiti iā Iesu i le malumalu: “Osana i le alo o Tavita.”—Mataio 21:15, 16.

Vivii Atu iā Ieova i Aso Nei

I aso nei, ua mitamita le toʻatele o talavou Molimau a Ieova i o latou talitonuga, ma talanoa atu ma le lototetele i isi i aʻoga ma so o se mea. Seʻi manatu i ni faaaʻoaʻoga se lua.

I Peretania, na potopoto ai tamaiti o le vasega a Stephanie e 18 tausaga, ma talanoa e uiga i le faapaʻū tama ma isi mataupu tau amio. Na faailoa atu ma le maumauaʻi e le faiaʻoga, ua taatele le faapaʻū tama, ma e leai se māfuaaga e teena ai e teine talavou lenei faiga. Ina ua ioe uma iai le vasega i lenei mataupu, na manatu ai Stephanie e tatau ona ia faailoa atu lona talitonuga faale-Tusi Paia. Na maua le avanoa e faia ai ina ua fesili atu le faiaʻoga iā Stephanie i sona manatu. E ui sa popole o ia, ae na ia faailoa atu le manatu o le Tusi Paia. Na ia toe faaupu le Esoto 21:22-24 ma faamatala e faapea, e sesē le faamanuʻalia o se pepe e leʻi fanau mai, o lea la, o le faapaʻū tama e mautinoa e lē talafeagai ma le finagalo o le Atua.

O le faiaʻoga, o ia o se sui o se vaega faalotu, ae leʻi faitau lava i nei fuaiupu. O le molimau lototele a Stephanie na iʻu i le faia o ni talanoaga mananaia ma tamaiti o lana vasega i mataupu eseese. Ua taliaina nei e lē aunoa e se tasi o teine kopi o Le Olomatamata ma le Ala Mai!, ma e toʻalua nisi na auai i le tauaofiaga itumalo o Molimau a Ieova, e vaai i le papatisoina o Stephanie, e faailogaina ai le tuuina atu o lona ola i le Atua.

Na maua e Vareta e ono tausaga, i Suriname, Amerika i Saute, le avanoa e vivii ai i le Atua ina ua manaʻomia e lona faiaʻoga se faamāfanafanaga mai le Tusi Paia. Ina ua toe foʻi mai le faiaʻoga i le aʻoga i le mavae o aso e tolu e leʻi aʻoga ai, na ia fesili i tamaiti pe latou te iloa le māfuaaga na ia lē aʻoga ai. Na latou tali atu, “Sa e maʻi, a ea?” Na tali mai le  faiaʻoga: “E leai. Na ou matuā faanoanoa lava ona o le oti o loʻu uso. O lea la, e tatau ai ona outou fifilemu.”

A o fai le mālōlōga a le tinā o Vareta i lenā aoauli, na ia pisi ai i le saʻilia o mekasini tuai, ma faitau ulutala. Na ia tau ai i Le Olomatamata o Iulai 15, 2001 i le ulutala, “Pe e Iai se Olaga pe a Mavae le Oti?” Ona o le fiafia tele, na ia fafagu ai lona tinā ma faapea atu, “mama, mama, vaai foʻi! Ua ou maua le mekasini e faatatau i le oti e ave i loʻu faiaʻoga!” Na ave le mekasini i le faiaʻoga faatasi ai ma se tusi mai iā Vareta. Na ia tusi: “O le mekasini lenei e faapitoa lava mo oe. I le parataiso, o le a e toe vaai ai i lou uso auā e lē tala pepelo Ieova. Na ia folafola mai, o le a ia aumaia le parataiso i le lalolagi, ae lē i le lagi.” Na faaalia e le faiaʻoga lona matuā talisapaia o faamāfanafanaga ua saunia e nei mataupu e faavae mai i le Tusi Paia.

Ia Sauni mo le Lumanaʻi

O Ieova o le “Atua manuia” ma e finagalo o ia ina ia fiafia talavou. (1 Timoteo 1:11) Ua faapea mai lana Afioga: “Ia e olioli i lou talavou. Ia e fiafia i lou tamaitiiti.” (Failauga 11:9, Today’s English Version) O loo silafia e Ieova e lē na o mea o tutupu i le taimi nei, ae e malamalama foʻi i āuga o amioga lelei ma le leaga i le lumanaʻi. O le māfuaaga lea ua apoapoaʻi mai ai lana Afioga: “Ia e manatua lē na faia oe i ona pō o lou tauleʻaleʻa, a o leʻi oo mai aso leaga, a o leʻi oo mai foʻi tausaga e te faapea ai, E leai soʻu fiafia i ai.”—Failauga 12:1.

Ioe, o le finagalo o Ieova, ina ia mauaina e talavou aogā silisili i le olaga. E mafai e talavou ona maua se olaga faamalieina ma tauia e ala i le manatuaina ma vivii i le Atua. Pe a fesagaʻi ma luʻi, e mafai ona latou faapea mai ma le mautinoa: ‘O loʻu fesoasoani e mai iā Ieova lea.’—Salamo 121:2.

[Faamatalaga pito i lalo]

[Faamatalaga faaopoopo i le itulau 9]

“Ia vivii atu iā Ieova ai le lalolagi, . . . o tauleleʻa atoa ma teine.”—SALAMO 148:7, 12.

[Pusa i le itulau 8]

E LAGOLAGOINA E IEOVA TALAVOU

“O oe lava o loʻu faamoemoega, le Alii e Ieova, o loʻu faatuatuaga oe talu ina ou tama itiiti.”—Salamo 71:5.

“O [le Atua] e malie ai lou manaʻo i mea lelei; o lē faafouina lou tauleʻaleʻa faapei o le aeto.”—Salamo 103:5.