“Ua Faatauina Outou i le Tau”
“Ua Faatauina Outou i le Tau”
“Ua faatauina outou i le tau; o lenei, ia outou vivii atu i le Atua.”—1 KORINITO 6:20.
1, 2. (a) E tusa ai ma le Tulafono a Mose, na faapefea ona faia pologa Isaraelu? (e) O le ā le filifiliga sa tuu atu i le auauna o lē e alofa i lona matai?
UA TAʻUA i se lomifefiloi: “O le pologa, o se faiga sa taatele ma taliaina i le lalolagi i aso anamua. . . . Sa faalagolago le tamaoaiga o Aikupito, Eleni ma Roma i galuega a pologa. I le uluaʻi senituri, o le tasi mai le tolu tagata i Italia ma i isi atunuu, e tasi mai le lima tagata o se pologa.”—Holman Illustrated Bible Dictionary.
2 E ui lava na iai pologa i Isaraelu anamua, ae na latou maua le puipuiga e ala i le Tulafono na tuu atu iā Mose. O se faaaʻoaʻoga, na faatulaga e le Tulafono, e ao ona auauna se tagata Isaraelu o se pologa, e lē sili atu i le ono tausaga. O le fitu o tausaga, e “faasaʻoloto fua iā te ia.” Peitaʻi, o tuutuuga e faatatau i le faiga o pologa sa talafeagai ma alofa, lea na faia ai e le Tulafono na tuu atu iā Mose le sauniuniga lenei: “Pe afai foʻi e matuā fai ane le auauna, Ou te alofa lava i loʻu matai, ma laʻu avā, ma laʻu fanau, ou te lē alu ese lava aʻu; ona taʻitaʻiina ane lea o ia e lona matai i faamasino; e taʻitaʻiina foʻi e ia i le puipui, po o le pou o le faitotoʻa; ona tui lea o lona matai i lona taliga i le au, ona auauna pea lava lea o ia iā te ia.”—Esoto 21:2-6; Levitiko 25:42, 43; Teuteronome 15:12-18.
3. (a) O le ā le ituaiga nofo pologa na taliaina e Kerisiano i le uluaʻi senituri? (e) O le ā e uunaʻia ai i tatou e auauna i le Atua?
3 O le sauniuinga o le auaunaga po o le nofo pologa tauofo, ua faataʻimua mai ai le ituaiga o auauna e iai Kerisiano moni. O se faaaʻoaʻoga, na faailoa atu e Paulo, Iakopo, Peteru ma Iuta, o i latou o auauna a le Atua ma Keriso. (Tito 1:1; Iakopo 1:1; 2 Peteru 1:1; Iuta 1) Na faamanatu atu e Paulo i Kerisiano i Tesalonia e faapea ua latou ‘liliu mai i le Atua nai tupua, ina ia latou auauna i le Atua soifua ma le ua moni.’ (1 Tesalonia 1:9) O le ā na uunaʻia ai na Kerisiano ina ia lotomalilie e auauna i le Atua? O le ā na uunaʻia ai se pologa Isaraelu o lē na lafoaʻia lona saʻolotoga? Pe lē o le alofa ea i lona matai? E faavae le ola auauna o se Kerisiano, i lona alofa i le Atua. Pe a oo ina tatou iloa ma alolofa i le Atua moni o Lē e soifua pea, e uunaʻia ai i tatou e auauna iā te ia ma o tatou ‘loto atoa ma o tatou agaga atoa.’ (Teuteronome 10:12, 13) O lea la, o le ā e aofia ai i le avea ma auauna a le Atua ma Keriso? E faapefea ona aafia ai o tatou olaga i aso fai soo?
“Faia Mea Uma Lava ia Viia ai le Atua”
4. E faapefea ona avea i tatou o ni pologa a le Atua ma Keriso?
4 Ua faamatalaina le pologa, o “se tasi e auauna i se tagata po o isi e tusa ai ma le tulafono, ma e tatau ona matuā usiusitai atu atoatoa.” Ua avea i tatou ma tagata o Ieova ina ua tuuina atu o tatou ola iā te ia ma papatisoina. Ua faamatala mai e Paulo: “E lē aiā foʻi outou iā te outou? Auā ua faatauina outou i le tau.” (1 Korinito 6:19, 20) O lenā tau, o le taulaga togiola lea a Iesu Keriso, lea ua faavae ai le taliaina e le Atua o i tatou o ni ana auauna, pe o ni Kerisiano faauuina po o ni a latou aumea e faamoemoe e ola i le lalolagi. (Efeso 1:7; 2:13; Faaaliga 5:9) O lea la, i le taimi o lo tatou papatisoga, ua “tagata lava o [Ieova] i tatou.” (Roma 14:8) Talu ai na faatauina i tatou i le toto o Iesu Keriso, ua avea ai i tatou o ni ana auauna ma ua iā i tatou le tiute tauave e tausi i ana poloaʻiga.—1 Peteru 1:18, 19.
5. I le avea o ni auauna a Ieova, o le ā le tiute tauave autū ua tatou maua, ma e faapefea ona faataunuu?
5 E ao i auauna ona usiusitai i o latou matai. O tatou o auauna e tauofo ma e uunaʻia ona o le alofa mo le Matai. Ua taʻua i le 1 Ioane 5:3: “Auā o lenei lava le alofa i le Atua, ia tatou tausi i ana poloaʻiga; e lē mamafa foʻi ana poloaʻiga.” O lea, o lo tatou usiusitai, o le faamaoniga lea o lo tatou alofa ma le gauaʻi. E faamaonia i mea uma tatou te faia. Na faapea mai Paulo: “Pe tou te aai, pe tou te inu, po o se tasi mea tou te faia, ia outou faia mea uma lava ia viia ai le Atua.” (1 Korinito 10:31) E oo lava foʻi i mea laiti, ia faaalia o i tatou o “auauna [a Ieova]” i aso uma.—Roma 12:11.
6. E faapefea i le auauna i le Atua ona aafia ai filifiliga tatou te faia? Ia aumai se faaaʻoaʻoga.
6 Pe a faia ni filifiliga, e ao ona tatou mafaufau i le finagalo o lo tatou Matai o i le lagi, o Ieova. (Malaki 1:6) O filifiliga faigatā, atonu e tofotofoina ai lo tatou usiusitai i le Atua. Pe lē ao ea ona tatou uaʻi atu i lana fautuaga na i lo le mulimuli i faanaunauga “faaʻoleʻole” ma le “leaga” o tatou loto? (Ieremia 17:9) O Melisa, o se Kerisiano nofofua e leʻi leva ona papatiso, na amata ona naunau alofa i ai se tama talavou. E foliga mai o ia o se tama lelei, ma na ia suʻesuʻeina le Tusi Paia ma Molimau a Ieova. Na talanoa se toeaina iā Melisa e uiga i le atamai o le mulimuli i le faatonuga a Ieova ina ia faaipoipo “tau lava i lē ua i le Alii.” (1 Korinito 7:39; 2 Korinito 6:14) Ua faapea mai Melisa, “e leʻi faigofie ona ou mulimuli i lenei fautuaga. Peitaʻi, talu ai ua uma ona ou tuuina atu aʻu i le Atua e faia lona finagalo, na ou usitai ai i lana faatonuga manino.” Pe a toe mafaufau i le mea na tupu na ia faapea mai, “ua ou fiafia ona ua ou mulimuli i le fautuaga. E leʻi umi ae lē toe suʻesuʻe le tama. Pe ana fai ou te faaauau pea lenā faiā, semanū e oo mai i le taimi nei, ua ou faaipoipo i se tasi e lē talitonu.”
7, 8. (a) Aiseā e lē tatau ai ona tatou soona manatu i le faafiafiaina o tagata? (e) Ia faataʻitaʻi le auala e foʻia ai le fefe i tagata.
7 Ona o i tatou o auauna a le Atua, e lē tatau ona avea i tatou ma pologa a tagata. (1 Korinito 7:23) E moni, e lē fiafia se tasi pe a tauemu nisi iā te ia, peitaʻi e ao ona tatou manatua, ua iai tapulaa e ese ai Kerisiano mai iā i latou i le lalolagi. Na fesili Paulo: “Ou te saʻili ea ina ia ou faafiafia i tagata?” O lana tali lenei: “Auā afai ana ou faafiafia pea i tagata, po ua lē fai aʻu ma auauna a Keriso.” (Kalatia 1:10) E lē tatau ona tatou lolo atu i omiga mai aumea ma avea ai ma ē faafiafia i tagata. O lea, o le ā tatou te faia pe a faaosoosoina e isi ia auai faatasi ma i latou i se mea sesē?
8 Seʻi o tatou talanoaina le faaaʻoaʻoga a Elena, o se talavou Kerisiano i Sepania. O le toʻatele o tamaiti o lana vasega, latou te tuuina atu o latou toto e tui i isi. E latou te iloa o Elena o se tasi o Molimau a Ieova, e na te lē tuuina atu lona toto i se tasi pe taliaina foʻi se tuigātoto. Ina ua maua le avanoa e faamatala atu ai lona talitonuga i le vasega, na loto malie Elena e avatu se taulimaga. Ua faamatala mai e Elena: “Na ou matuā popole lava i le faia o lenei mea. Peitaʻi, na ou sauniuni lelei ma o le iʻuga na faateʻia ai aʻu. Na faaaloalogia ai aʻu e le toʻatele o tamaiti, ma sa taʻu mai e le faiaʻoga, na ia matuā fiafia i le galuega sa ou faia. E sili atu ai i na mea uma, na faamalieina aʻu ona na ou molimau atu i le suafa o Ieova, ma mafai ona faamatala manino atu māfuaaga o loʻu talitonuga faale-Tusi Paia.” (Kenese 9:3, 4; Galuega 15:28, 29) Ioe, o le avea ma auauna a le Atua ma Keriso, e ese ai i tatou mai isi. Ae peitaʻi, e ono faaaloalo ai nisi iā i tatou, pe a tatou nofo sauni e faailoa atu lo tatou talitonuga.—1 Peteru 3:15.
9. O le ā ua tatou aʻoaʻoina mai i se agelu lea na faailoa atu iā Ioane?
9 O lo tatou manatuaina o i tatou o auauna a le Atua, e fesoasoani iā i tatou e lotomaulalo ai. I se tasi taimi, na matuā faagaeetia ai Ioane i le vaaiga ofoofogia o Ierusalema faalelagi, o lea na ia faapaʻū ai e ifo atu i vae o le agelu o lē na auauna o se fofoga fetalai a le Atua. Na fai atu le agelu iā te ia: “Ia oe, aua lava! Auā o aʻu o lou uso a auauna, ma lo le ʻau perofeta ou uso, o lo latou foʻi o ē tausi i upu o lenei tusi; ia e ifo i le Atua.” (Faaaliga 22:8, 9) E mautinoa o se faaaʻoaʻoga lelei lea na faataatia e le agelu mo auauna uma a le Atua! Atonu o nisi Kerisiano ua iai ni tulaga faapitoa o tiute tauave i le faapotopotoga. Ae ui i lea, na fetalai Iesu: “O sē fia sili iā te outou, ia fai o ia ma a outou auauna; o sē fia muamua foʻi iā te outou, ia fai o ia ma a outou tautua.” (Mataio 20:26, 27) I le avea o ni soo o Iesu, o i tatou uma lava o auauna.
“O Mea e Tatau Ona Matou Fai, o Mea ia ua Matou Faia”
10. Ia aumai ni faaaʻoaʻoga faale-Tusi Paia e faaalia ai e leʻi faigofie i nisi taimi i auauna a le Atua ona faia lona finagalo.
10 E lē faigofie i nisi taimi le faia o le finagalo o le Atua i tagata lē lelei atoatoa. Ina ua fetalai atu Ieova e alu e aumai le fanauga a Isaraelu o loo nofo pologa i Aikupito, sa faatalatū Mose e usitai. (Esoto 3:10, 11; 4:1, 10) Ina ua maua e Iona se tofiga e faalauiloa atu le feʻau faafaamasinoga i tagata o Nineva, “ua tulaʻi Iona e sola i Tasesa ai luma o Ieova.” (Iona 1:2, 3) Sa lotovaivai Paruka, le failautusi a le perofeta o Ieremia. (Ieremia 45:2, 3) O le ā e ao ona fai pe a lē talafeagai o tatou faanaunauga po o mea tatou te fiafia i ai ma le faia o le finagalo o le Atua? Ua saunia i se talafaatusa a Iesu le tali.
11, 12. (a) Ia faamatala puupuu le talafaatusa a Iesu o loo faamauina i le Luka 17:7-10. (e) O le ā le lesona ua tatou aʻoaʻoina mai le talafaatusa a Iesu?
11 Na taʻua e Iesu se auauna na tausia le lafu a lona matai i le fanua i le aso atoa. Ina ua taunuu le auauna i le fale, ua vaivai mai i galuega mamafa sa faia i le 12 itula, ae e leʻi valaaulia o ia e lona matai e la te aai faatasi. Na i lo lea, na faapea atu le matai: “Inā sauni mai ia saʻu sua, ma ia fusi ou ofu, i le laulau mai o mea, seʻi ʻai ae aʻu ma inu; a mavae lea, i le ʻai ai oe ma inu.” Na faatoʻā fai e le auauna le mea na ia manaʻo i ai ina ua uma ona auauna atu i lona matai. Na faaiʻu mai e Iesu lana talafaatusa i le fetalai: “E faapea foʻi outou, pe a uma ona fai o mea uma na poloaʻiina atu iā te outou, tou te fai ane, O auauna lē aogā i matou nei; auā o mea e tatau ona matou fai, o mea ia ua matou faia.”—Luka 17:7-10.
12 E leʻi aumaia e Iesu lenei talafaatusa e faaalia ai e faapea, e lē talisapaia e Ieova mea o tatou faia i lana auaunaga. Ua faaali manino mai i le Tusi Paia: “E lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.” (Eperu 6:10) Na i lo lea, o le lesona tatou te aʻoaʻoina mai le faataoto a Iesu, e lē mafai ona faamalieina e le auauna ia lava pe uaʻi atu i ona lava manaʻoga. Pe afai tatou te tuuina atu i tatou lava i le Atua ma filifili e avea o ni ana auauna, ua tatou lotomalilie e faamuamua lona finagalo na i lo i tatou lava. E tatau ona tatou faamuamua le faia o le finagalo o le Atua na i lo mea tatou te mananaʻo ai.
13, 14. (a) O ā tulaga e ono manaʻomia ona teena ai o tatou lava faanaunauga? (e) Aiseā e ao ai ona faamuamua le finagalo o le Atua?
13 Atonu e manaʻomia sa tatou taumafaiga malosi ina ia suʻesuʻe ai e lē aunoa le Afioga a le Atua, ma lomiga mai le “auauna faamaoni ma le mafaufau.” (Mataio 24:45) O le tulaga lenā aemaise lava pe afai e faigatā iā i tatou ona faitau ma pe afai o loo faamatalaina i se lomiga mea ‘loloto a le Atua.’ (1 Korinito 2:10) O lea la, aiseā e lē fai ai se faasologa mo a tatou lava suʻesuʻega? E ao ona tatou tinoū e nofo i lalo ma ia tele se taimi e suʻesuʻe ai se mataupu o le suʻesuʻega. A aunoa ma le faia faapena, e faapefea la ona tatou maua se faanaunauga mo “mea aano, mā e matutua”?—Eperu 5:14.
14 Ae faapefea pe a tatou foʻi i le fale sa faigaluega i le aso atoa? E tatou te ono faamalosia i tatou e auai i sauniga faa-Kerisiano. Pe atonu tatou te lē fiafia e talaʻi atu i tagata ese. Na iloa e Paulo e iai taimi tatou te faailoa atu ai le tala lelei ma le lē “loto” i ai. (1 Korinito 9:17) Ae peitaʻi, tatou te faia nei mea ona ua fetalai mai Ieova, lo tatou Matai o i le lagi, o se mea e ao ona fai auā tatou te alolofa iā te ia. Ae pe lē moni ea e faamalieina ma faafouina i tatou pe afai sa faia ni taumafaiga e suʻesuʻe, auai i sauniga, ma le talaʻiga?—Salamo 1:1, 2; 122:1; 145:10-13.
Aua Neʻi Toe “Tepa i Tua”
15. Na faataatia faapefea e Iesu se faaaʻoaʻoga o le gauaʻi i le Atua?
15 Na gauaʻi Iesu Keriso i lona Tamā o i le lagi i se auala silisili. Na fetalai atu Iesu i ona soo: “Ou te leʻi alu ifo mai le lagi e fai loʻu lava loto, a o le finagalo o lē ua auina mai aʻu.” (Ioane 6:38) A o mafatia o ia i le faatoʻaga o Ketesemane, na ia tatalo atu: “Loʻu Tamā e, afai e mafai, ia ave ese lenei ipu iā te aʻu; a e aua le faia loʻu loto, a o lou finagalo.”—Mataio 26:39.
16, 17. (a) O le ā le vaaiga e ao ona iā i tatou i mea ua tatou lafoaʻia? (e) Ia faaali le saʻo o le faamatalaga a Paulo i le faatusaina o le lumanaʻi faalelalolagi i “otaota.”
16 O le finagalo o Iesu Keriso, ia tatou faamaoni i la tatou filifiliga e avea o ni auauna a le Atua. Na ia fetalai: “O lē tago lona lima i le suōtosina, ma tepa i tua, e lē tatau ia i le malo o le Atua.” (Luka 9:62) O le toe tomānatu i mea na lafoaʻia, e lē o se mea saʻo lea a o tatou auauna i le Atua. Na i lo lea, e ao ona tatou faapelepele i mea ua tatou maua ona o le filifili e avea ma auauna a le Atua. Na tusi Paulo i tagata Filipi: “O loʻu manatu ua lē aogā mea uma lava ona o le silisili ese o le poto i la Keriso Iesu loʻu Alii; ona o ia ua ou faalēaogāina mea uma, ma ou manatu o otaota lava ia mea, ina ia ou maua Keriso.”—Filipi 3:8.
17 Seʻi mafaufau i mea uma na manatu i ai Paulo o otaota ma lafoaʻia ona o taui faaleagaga i le avea o se auauna a le Atua. Na ia lafoaʻia e lē gata o le tamaoaiga o le lalolagi, ae o le avanoa o le avea ma taʻitaʻi o Iutaia i le lumanaʻi. Ana fai e faaauau pea ona aʻoaʻo e Paulo le faa-Iutaia, e ono siitia lona tulaga e tutusa ma Simeona, le atalii o lona faiaʻoga o Kamalielu. (Galuega 22:3; Kalatia 1:14) Sa avea Simeona ma taʻitaʻi o le ʻau Faresaio ma sa iai sona tulaga aloaʻia, e ui sa lē fiafia i le fouvale o tagata Iutaia faasaga iā Roma i le 66-70 T.A. Na maliu o ia i na fetauaʻiga a lē o le fasiotia e tagata maelega vālea o Iutaia po o le ʻautau a Roma.
18. Ia aumai se faaaʻoaʻoga e faaalia ai le auala e tauia ai ona o le faamuamua o gaoioiga faaleagaga.
18 E toʻatele Molimau a Ieova ua mulimuli i le faaaʻoaʻoga a Paulo. Ua faapea mai Jean: “I ni nai tausaga ua mavae talu ona uma aʻu aʻoga, na maua ai saʻu galuega o se failautusi i se loia sa lauiloa i Lonetona. Na ou fiafia i laʻu galuega ma sa tele tupe na maua mai ai, peitaʻi na ou iloa e ao ona ou faia mea e sili atu e auauna ai iā Ieova. Mulimuli ane, na ou faamavae ma amata ona paeonia. Ou te matuā faafetai ona na ou faia lenā laasaga pe toetoe 20 tausaga ua mavae! O laʻu auaunaga faataimi atoa, ua faatamaoaigaina ai loʻu olaga e sili atu na i lo se isi lava galuega faafailautusi. E leai se isi mea e sili ai ona faamalieina na i lo le vaai atu i le auala o suia ai e le Afioga a Ieova se olaga o se tagata. O le faia o se sao i lenā suiga o se mea matagofie. E lē mafai ona faatusalia mea ua tatou maua mai iā Ieova i mea o loo tatou avatu iā te ia.”
19. O le ā e ao ona avea ma a tatou faaiʻuga, ma aiseā?
19 E ono suia o tatou tulaga mai lea taimi i lea taimi. Ae peitaʻi, e tumau pea le avea o i tatou o ni tagata tuuina i le Atua. E avea pea i tatou ma auauna a Ieova, ma ua ia faatagaina i tatou e filifili le auala sili tatou te faaaogā ai o tatou taimi, malosi, atamai, ma isi mea. O lea la, o filifiliga tatou te faia e tusa ai ma ia tulaga, e atagia ai lo tatou alolofa i le Atua. E faaalia ai foʻi o loo tatou lotomalilie e tuua mea na tatou fiafia i ai. (Mataio 6:33) Po o le ā lava o tatou tulaga, e ao ona tatou maumauaʻi e avatu iā Ieova mea silisili. Na tusi Paulo: “Afai ua i ai le loto fiafia, e talileleia lea, e tusa ma mea ua iā te ia, a e lē tusa ma mea e lē o iā te ia.”—2 Korinito 8:12.
“Ua iā te Outou ni a Outou Fua”
20, 21. (a) O ā fua ua fuaina mai e auauna a le Atua? (e) Ua faapefea ona tauia e Ieova i latou o ē avatu iā te ia mea e silisili?
20 E lē mamafa le avea ma auauna a le Atua. Na i lo lenā, ua saunia ai se mapusaga mai ituaiga leaga o nofo pologa lea e aveesea ai lo tatou fiafia. Na tusi Paulo: “Ua tuusaunoa outou nai le agasala, ma ua fai ma auauna a le Atua, ua iā te outou ni a outou fua e oo ai i le faapaiaina; o lona iʻuga foʻi o le ola faavavau.” (Roma 6:22) O lo tatou auauna i le Atua, ua tatou fua mai ai ni fua e oo ai i le faapaiaina, lea ua tatou mauaina ai aogā o le amio mamā ma lē ponā. E lē gata i lenā, e taʻitaʻiina ai i tatou i le ola e faavavau i le lumanaʻi.
21 E agaalofa Ieova i ana auauna. Pe a tatou faia le mea silisili i lana auaunaga, na te toina mai mo i tatou “pupuni o le lagi” ma sasaa mai le ‘manuia mo tatou, ina seʻia silisili ona tele.’ (Malaki 3:10) O se fiafiaga le avea o ni auauna a Ieova e faavavau!
Pe E te Manatua?
• Aiseā ua avea ai i tatou o ni pologa a le Atua?
• E faapefea ona tatou faaalia lo tatou gauaʻi i le finagalo o le Atua?
• Aiseā e ao ai ona tatou faamuamua le finagalo o le Atua na i lo o i tatou lava?
• Aiseā e lē tatau ai ona tatou toe “tepa i tua”?
[Fesili mo le Suʻesuʻega]
[Ata i le itulau 16, 17]
O le sauniuniga o le auaunaga tauofo i Isaraelu, ua aumaia ai se faataʻimuaga o le avea o ni auauna o Kerisiano
[Ata i le itulau 17]
Pe a tatou papatiso, ua avea i tatou ma pologa a le Atua
[Ata i le itulau 17]
E faamuamua e Kerisiano le faia o le finagalo o le Atua
[Ata i le itulau 18]
Sa faatalatū Mose e talia lona tofiga