Ua Taaʻina e Iesu le Lalolagi Atoa

NA TUSIA e se tasi na faaliliuina le Tusi Paia e igoa iā Edgar Goodspeed e faapea: “O aʻoaʻoga uma a Iesu o loo taʻua mai i Evagelia, sa mafai ona ia fetalaia mai i le na o le lua itula. Ae, e ui ina itiiti, na faagaeetia ai isi, ma matuā uunaʻia ai tagata, o lea ua mafai ai ona faapea atu, e leai lava se isi na matuā taaʻina ai tagata i le lalolagi.”

Ina ua faaiʻuina e Iesu Keriso lana faiva i le lalolagi i le tausaga e 33 T.A., na oo atu le faitau aofaʻi o ona soo o tane ma fafine, pe tusa ma le 120. (Galuega 1:15) I aso nei, e sili atu i le lua piliona tagata ua faapea mai o i latou o Kerisiano. E faitau selau miliona foʻi isi ua fai mai e latou te talia Iesu, o le perofeta. Na matuā malolosi aafiaga o ana aʻoaʻoga i tagata.

E oo lava i taʻitaʻi e lē o ni Kerisiano, na latou faailoa mai aafiaga o aʻoaʻoga a Iesu i le lalolagi aoao. O se faaaʻoaʻoga, na tusia e se rapi Iutaia o Hyman Enelow e faapea: “Ua sili atu ona lauiloa Iesu, ma ua sili atu ona suʻesuʻe tagata e uiga iā te ia, ma ua sili atu foʻi ona ia taaʻina le talafaasolopito o lotu. . . . O ai ea e mafai ona iloa le tele o taaʻiga na faia e Iesu i olaga o tagata? I le faagasologa o le talafaasolopito, e lē mafaatusalia le alofa na ia faagaeetia i isi, o faamāfanafanaga na ia tuuina mai, o galuega lelei na faia e isi ona o ia, faapea ma le faamoemoe ma le fiafia na ia faaosofia. E ui lava e toʻatele tagata lelei ma malolosi na soifua mai, ae e leai se tasi o i latou na tutusa ana taaʻiga, ma taaʻiga a Iesu  i le lalolagi aoao. Ua sili ona fiafia le lalolagi iā te ia.” Na faapea mai foʻi le taʻitaʻi Hindu o Mohandas K. Gandhi: “Ou te lē iloa se tasi na sili atu ona tele mea lelei na ia faia i tagata na i lo o Iesu. E leai se mea sesē i le Faa-Kerisiano.” Ae peitaʻi, na ia faaopoopo mai: “O outou lava Kerisiano le faalavelave. E tou te lē o ola e tusa ma a outou lava aʻoaʻoga.”

Ua loa ona iai se talaaga o le lē ola o tagata o atunuu Kerisiano, e tusa ma aʻoaʻoga a Iesu. Ua faapea mai le tusitala o le talafaasolopito o le Faa-Kerisiano, o Cecil John Cadoux, o “le faasolosolo mālie ma le faatuputeleina o le faia e Lotu o nisi o amioga lē tatau,” ua tataʻi atu ai “manatu o taʻitaʻi Kerisiano i tuā lava i le . . . 140 T.A.” Ua ia mātauina e faapea: “O lenei faaitiitia o le faia o amioga tatau e pei ona iai i le amataga o le Faa-Kerisiano, o le a iʻu ai ina faia o amioga e pei o le lalolagi.”

Na matuā faateteleina le paʻū o nei amioga i lona fā o senituri ina ua taliaina e le Emeperoa Roma o Konesetatino le Faa-Kerisiano. Na tusia e Cadoux e faapea: “Na iloa lelei lenā mea e le ʻautusitala ma ua faanoanoa foʻi ona o le matuā faagutugutulua o le Lotu, e ala i lona faifaimea faatasi ma Konesetatino.” Talu mai lenā taimi, na faia ai pea e i latou ua faapea mai o Kerisiano le tele o amioga matagā ua faalumaina ai le suafa o Keriso.

Ua lāgā ai la ni fesili e faapea: O ā tonu lava mea na aʻoaʻo e Iesu? Ua faapefea ona aafia ai i tatou i ana aʻoaʻoga?

[Ata i le itulau 3]

“Ou te lē iloa se tasi na sili atu ona tele mea lelei na ia faia i tagata na i lo o Iesu.”—Mohandas K. Gandhi

[Ata i le itulau 3]

“E leai lava se isi na matuā taaʻina ai tagata i le lalolagi.”—Edgar Goodspeed

[Faamatalaga i Ata]

Culver Pictures