Mātua, Ia Puipui lo Outou Tofi Tautele

“Ua fai le poto ma [puipuiga] . . . e ola ai ē ua i ai.”—FAILAUGA 7:12.

1. Aiseā e ao ai ona manatu mātua i a latou fanau o ni meaalofa?

PE A fanau mai se pepe, e iai uiga ma foliga e pei o ona mātua. Ua taʻua e le Tusi Paia le fanau, “o le tofi lea mai iā Ieova.” (Salamo 127:3) Talu ai o Ieova o Lē foaʻi ola, ua ia tuuina atu i mātua le fanau, o ni meaalofa mai iā te ia. (Salamo 36:9) Mātua, o le ā so outou manatu i le mauaina o lenā meaalofa tautele mai i le Atua?

2. O le ā le tali atu a Manoa ina ua ia iloa o le a maua sona atalii?

² E mautinoa, e ao ona taliaina lenā meaalofa ma le lotomaulalo ma le agaga talisapaia. I le sili atu ma le 3,000 tausaga ua mavae, na tali atu ai faapena se Isaraelu e suafa iā Manoa, ina ua taʻu atu e se agelu o le a fanau mai e lana avā se tama. Ina ua faalogo Manoa i le tala, na ia tatalo: “Ou te ʻaiʻoi le Alii e, o le tagata o le Atua na e auina mai, seʻi toe maliu mai o ia iā te i maʻua, ma faaali mai se mea ma te faia i le tama o le a fanau mai.” (Faamasino 13:8) Mātua, o le ā ua outou aʻoaʻoina mai le faaaʻoaʻoga a Manoa?

E Manaʻomia le Fesoasoani a Ieova i Aso Nei

3. Aiseā ua matuā manaʻomia ai le fesoasoani a le Atua i le tausia aʻe o fanau i aso nei?

³ E manaʻomia e mātua le fesoasoani a Ieova i le tausia aʻe o a latou fanau, aemaise lava i taimi nei. O le ā le māfuaaga? Talu ai ua lafo mai Satani ma ana agelu mai le lagi i le lalolagi. Ua lapataʻi mai le Tusi Paia: ‘Oi talofa iā te outou le fanua, auā ua alu ifo iā te outou le tiapolo ua lotoa tele, auā ua na iloa ua saasaa ona pō.’ (Faaaliga 12:7-9, 12) Ua faamatala mai e le Tusi Paia le ‘tiapolo ua pei o se  leona tagi, ua saʻili se tasi e ʻaina e ia.’ (1 Peteru 5:8) E osofaʻi e leona manu ua vaivai, aemaise lava o manu laiti. O lea la, e atamai ai i mātua Kerisiano ona vaai atu iā Ieova mo taʻiala ina ia puipuia ai a latou fanau. O le ā le tele o au taumafaiga e puipuia ai lau fanau?

4. (a) O le ā le gaoioiga a mātua pe afai e iloa o lo o fealualuaʻi se leona e latalata mai i le fale? (e) O le ā e manaʻomia e fanau mo le puipuiga?

⁴ Afai ua e silafia o loo fealualuaʻi se leona e latalata mai i lou fale, e mautinoa lava o lou popolega autū, o le puipuia lea o lau fanau. O Satani, o ia o se manufeʻai faapena. Ua ia saʻili e faaleagaina tagata o le Atua, ina ia lē toe mafai ai ona latou mauaina le finagalo malie o le Atua. (Iopu 2:1-7; 1 Ioane 5:19) E faigofie ona avea tamaiti ma taulaʻiga o ana osofaʻiga. Ina ia teena mailei a le Tiapolo, e ao i tamaiti ona iloa ma usiusitai iā Ieova. E tāua le poto i le Tusi Paia. Na fetalai Iesu: “O le ola faavavau foʻi lenei, ia latou iloa oe le Atua moni e toʻatasi, atoa ma lē ua e auina mai, o Iesu Keriso lea.” (Ioane 17:3) E lē gata i lea, e manaʻomia e fanau laiti le poto, o le tomai lea ia malamalama ma faatatau mea ua latou aʻoaʻoina. Talu ai o le ‘poto e ola ai ē ua i ai,’ e manaʻomia la e outou mātua, ona tāmau le upu moni i loto o a outou fanau. (Failauga 7:12) E faapefea ona e faia lenei mea?

5. (a) E faapefea ona tuuina atu i isi le poto? (e) Ua faamatalaina faapefea e le Faataoto le tāua o le poto?

⁵ E mafai, ma e ao i mātua, ona faitau le Afioga a le Atua i a latou fanau. Peitaʻi, o le fesoasoani iā i latou ia alolofa ma usiusitai iā Ieova, e manaʻomia ai se mea e sili atu, o le malamalama lea i le mea e ao ona latou faia. Seʻi faataʻitaʻi: Atonu e faatonuina se tamaitiiti ina ia vaai i itu uma e lua a o leʻi sopoʻia le auala. Ae e iai nisi tamaiti e lē usiusitai. Aiseā? Atonu e leʻi faamatalaina lelei i le tamaitiiti, e ono lavea o ia i se taavale, pe faamatala foʻi i se auala e iloa lelei ai le tulaga lamatia ma aveesea ai le ‘valea’ e ono tupu ai se faalavelave. O le aʻoaʻoina o i latou i le poto e alu ai se taimi ma le onosai. Ae peitaʻi, e matuā tautele le poto! Ua taʻua i le Tusi Paia: “O ona ala o ala matagofie; ma ona magāala uma o i ai le manuia. O ia o le laau o le ola i ē tago atu iā te ia; amuia foʻi i latou o ē taofi atu iā te ia.”—Faataoto 3:13-18; 22:15.

Aʻoaʻoga e Maua ai le Poto

6. (a) Aiseā e masani ai ona lē gaoioi ma le poto le fanau? (e) O le ā le taua lea o loo fai?

⁶ E masani lava ona faia e fanau laiti mea sesē, ona e leʻi pāʻia o latou loto e ui lava o loo aʻoaʻoina i latou. O loo tau le Tiapolo ina ia manumalo i loto o le fanau laiti. O lana auala e manaʻo e aafia fanau laiti i taaʻiga a lana lalolagi. Ua ia taumafai foʻi e faaleagaina o latou faanaunauga agasala na tuufaasolo mai, ina ia faia mea leaga. (Kenese 8:21; Salamo 51:5) E ao i mātua ona iloa, o loo faia se taua ina ia pulea loto o a latou fanau.

7. Aiseā e lē lava ai le tau ina taʻu i le tamaitiiti o le mea saʻo ma le sesē?

⁷ E masani ona taʻu e mātua i se tamaitiiti le mea saʻo ma le mea sesē, i le manatu e faapea ua la aʻoaʻoina o ia i mataupu silisili patino tau amio. Atonu la te fai atu i le tamaitiiti e sesē le pepelo, gaoi, po o feusuaʻiga faaleituaiga a o leʻi faaipoipo. Peitaʻi, e manaʻomia e le tamaitiiti se uunaʻiga malosi e usiusitai ai, na i lo le faia ona na faatonu atu e ona mātua. O tulafono nei a Ieova. E ao la ona aʻoaʻoina le tamaitiiti, o le ala poto, o le usiusitai lea i poloaʻiga a le Atua.—Faataoto 6:16-19; Eperu 13:4.

8. O ā aʻoaʻoga e fesoasoani i le fanau e gaoioi ai ma le poto?

⁸ E mafai ona fesoasoani i se tamaitiiti e malamalama, o lenei vateatea lavelave, ituaiga eseese o mea ola, suiga o tau, na faia e sē e atamai. (Roma 1:20; Eperu 3:4) E lē gata i lea, e ao ona aʻoaʻoina le tamaitiiti, e alofa le Atua iā te ia. Ua faia e le Atua le sauniuniga e ala i le taulaga a Lona Alo, ina ia maua le ola e faavavau ma ia faafiafiaina le Atua i lona usitai  i le mea ua Ia fetalai mai ai. O le a oo ina filifili le tamaitiiti e auauna iā Ieova, e ui i taumafaiga a le Tiapolo e taofia o ia.—Faataoto 22:6; 27:11; Ioane 3:16.

9. (a) O ā aʻoaʻoga e faasaoina ai? (e) O le ā ua faatonuina tamā e fai, ma o le ā e aofia ai i lenei mea?

⁹ O aʻoaʻoga e puipuia ai se tamaitiiti ma uunaʻia ai o ia e faia le mea saʻo, e manaʻomia ai le taimi, o le uaʻi atu ma ia fuafua lelei. E manaʻomia ai ona taliaina e mātua taʻiala mai le Atua. Ua taʻua i le Tusi Paia: “O outou tamā foʻi, . . . ia tausi atu i ai i [a outou fanau i] aʻoaʻiga ma apoapoaʻiga a le Alii.” (Efeso 6:4) O le ā le uiga o lenā mea? I le uluaʻi gagana Eleni, i lenei mau o “apoapoaʻiga” o lona uiga, o le “tuuina o le finagalo [o Ieova] i le mafaufau o se tasi.” O lea la, ua faalaeiauina ai tamā, ina ia tuuina le finagalo o Ieova i mafaufau o a latou fanau. E mautinoa o se puipuiga sili lea mo le fanau laiti! Pe afai e maua e fanau le finagalo o Ieova i mataupu uma, e mafai ona puipuia i latou mai le lolo atu i mea sesē.

O se Faanaunauga e Uunaʻia e le Alofa

10. O le ā le vala tāua e ao ona e iloa ina ia lelei le aʻoaʻoina o lau tamaitiiti?

¹⁰ Ina ia faataunuu lou faanaunauga e tausia lelei aʻe lau tamaitiiti, e manaʻomia ona uunaʻia au taumafaiga e le alofa. O se vala tāua le fetalanoaaʻi. Ia iloa le mea o loo tupu i lau tamaitiiti, ma o ā mea o manatunatu i ai. I se auala toʻafimālie, ia faalaeiau lau tamaitiiti e talanoa atu iā te oe. Atonu e faateʻia oe i mea e fai atu ai. Ia faaeteete aua e te soona mateletele. Na i lo lea, ia faalogologo lelei ma le naunau.

11. E faapefea ona tuuina e se matua le finagalo o le Atua i lana tamaitiiti?

¹¹ E moni, atonu ua tele taimi na e faitauina ai i lau tamaitiiti mai le Tusi Paia, e faatatau i le faasāina e le tulafono a le Atua o amioga lē mamā faaleituaiga. (1 Korinito 6:18; Efeso 5:5) Atonu e tāmau ai i a outou fanau laiti mea e fiafia pe lē fiafia ai le finagalo o Ieova. Ae peitaʻi, o le tuuina o le finagalo o Ieova i le mafaufau o se tamaitiiti, e manaʻomia ai nisi gaoioiga. E manaʻomia e le fanau le fesoasoani e manatunatu ai i le tāua o tulafono a Ieova. E manaʻomia ona faatalitonu i latou, e lelei ma e aogā ana tulafono. O le usitaia la, o se gaoioiga e talafeagai ma alofa. E ala i le faamatala atu i lau fanau mai le Tusi Paia, latou te talia ai le silafaga a le Atua, ma o lenā ua e tuuina lona finagalo i o latou mafaufau.

12. E faapefea ona fesoasoani se matua i lana tamaitiiti e iloa le vaaiga talafeagai e uiga i feusuaʻiga faaleituaiga?

¹² Pe a e talanoa e uiga i feusuaʻiga, e te ono fesili atu: “Pe e te manatu o le usiusitai i le tulafono a Ieova e aua le faia feusuaʻiga faaleituaiga a o leʻi faaipoipo, o le a faaitiitia ai le fiafia o se tasi?” Ia faalaeiau lau tamaitiiti e faamatala mai lona manatu. Pe a uma ona lua autaluina le sauniuniga matagofie a le Atua mo le fausia aʻe o se pepe, ona e fesili atu  lea, “Pe e te manatu ua faia e lo tatou Atua alofa ni tulafono e faaitiitia ai lo tatou fiafia i le olaga? Pe e te manatu o ana tulafono ua maua ai le fiafia ma puipuia ai i tatou?” (Salamo 119:1, 2; Isaia 48:17) Ia iloa le manatu o lau tamaitiiti i lenei mataupu. E mafai ona e faauaʻi atu i faaaʻoaʻoga o iʻuga o amioga lē mamā faaleituaiga, e tigā ai le loto ma oo ai i faafitauli. (2 Samuelu 13:1-33) E ala i lou fefulifulisaʻi ma lau tamaitiiti, ua ia malamalama ma talia ai le finagalo o le Atua, ua tele la mea ua e faia i le tuuina o le finagalo o le Atua i le mafaufau o lau tamaitiiti. Ae e iai se isi mea e mafai ona e faia.

13. O le malamalama i le ā e faatatau iā Ieova, e uunaʻia ai se tamaitiiti e usiusitai iā te Ia?

¹³ E lē na o le aʻoaʻo o lau tamaitiiti i āuga o le lē usiusitai iā Ieova, ae e atamai foʻi le faamatala e aafia ai foʻi faalogona o Ieova i le auala tatou te ola ai. Ia faasino i lau tamaitiiti mai le Tusi Paia, e mafai ona tatou faatigā le finagalo o Ieova, pe a tatou lē faia lona finagalo. (Salamo 78:41) E te ono fesili atu, “Aiseā e te lē manaʻo ai e faatigā le finagalo o Ieova?” ona faamatala atu lea: “Ua faapea mai le fili o le Atua o Satani, o loo tatou auauna iā Ieova ona o le manatu faapito ae lē ona tatou te alolofa iā te ia.” Ia faamatala i ai le auala na faafiafia ai e Iopu le finagalo o le Atua i lona faamaoni, ma saunia se tali i le tuuaʻiga pepelo a Satani. (Iopu 1:9-11; 27:5) E manaʻomia ona malamalama lau tamaitiiti e ala i lana amio, a lē faafiafia e faanoanoa ai le finagalo o Ieova. (Faataoto 27:11) E mafai ona e aʻoaʻo atu nei lesona tāua i lau fanau e ala i le tusi, Ia Faalogo i le Faiaʻoga Sili. *

Iʻuga Lelei e Mafai Ona Maua

14, 15. (a) O ā lesona i le tusi Faiaʻoga ua faagaeetia ai tamaiti? (e) O ā iʻuga lelei ua e maua mai lenei tusi? (Tagaʻi foʻi i le pusa i le itulau 18-19.)

¹⁴ Na faitau e se tamaitiiti e fitu tausaga le tusi o le Faiaʻoga faatasi ma le tamā o lona tamā i Croatia, ma na tusi mai le toeaina e uiga i le faamatalaga a le tamaitiiti: “Na fai mai loʻu tinā ia ou faia se mea, ae peitaʻi ou te leʻi manaʻo e fai. Ae na ou manatua le mataupu, ‘E Puipuia Oe pe a E Usitai,’ o lea na ou toe alu ai loa ma taʻu atu, o le a ou usitai iā te ia.” Na faapea mai se ulugalii i Florida, i Amerika e faatatau i le mataupu, “Le Māfuaaga e Lē Tatau ai Ona Tatou Pepelo”: “Ua aumaia ai fesili e valaaulia ai tamaiti e faaalia o latou lagona ma taʻu mea sesē ia semanū latou te lē faaalia.”

¹⁵ O le tusi o le Faiaʻoga, ua iai ata e sili atu i le 230, ma ua iai ni faamatalaga mo nei ata. Na  mātauina e se tasi tinā loto faafetai: “E masani ona taulaʻi le vaai a laʻu tama i se ata ma lē manaʻo ai e susuʻe i le isi itulau. E lē gata o ata e faatosina ae ua aʻoaʻoina ai foʻi ni lesona, po o le uunaʻia ai foʻi o tamaiti e faia ni fesili. I le ata lea e matamata ai se tamaitiiti i se potu pogisa, na fesili mai laʻu tama i se leo e faaalia ai o loo ia iloa e sesē le mea o loo fai, ‘Tinā, o le ā le mea o loo fai e le tamaitiiti lea?’” O le faamatalaga i le ata e faapea: “O ai o mafai ona silafia mai a tatou mea uma o fai?”

Aʻoaʻoga Aogā i Aso Nei

16. O le ā e tāua ona aʻoaʻoina ai fanau i aso nei, ma aiseā?

¹⁶ E ao ona malamalama tamaiti i le auala talafeagai ma le lē talafeagai e faaaogā ai o latou totogasā. E lē faigofie le talanoa i lenei mataupu. Na taʻua e se tusitala o se nusipepa, na ia ola aʻe i le vaitaimi sa manatu ai e lē faaaloalo le taʻua o upu e faasino atu i totogasā. Na ia tusi e faatatau i le aʻoaʻoina o lana fanau: “E lē tatau ona ou toe matamuli.” O le mea moni, pe a matamumuli mātua, latou te lē talanoaina ai mataupu tau i faiga faaleituaiga, ma e lē puipuia ai se tamaitiiti. Ua taumafai nisi tagata leaga e faaleagaina faaleituaiga se tamaitiiti, o lē e leʻi aʻoaʻoina i na mea. Ua taulaʻi atu le tusi Ia Faalogo i le Faiaʻoga Sili, i se auala talafeagai e lē māsiasi ai. O le aʻoaʻo o tamaiti e faatatau i faiga faaleituaiga, e lē faapea o le a faaleagaina ai le tulaga mamā o le fanau, ae e puipuia ai i latou.

17. Ua fesoasoani faapefea le tusi Faiaʻoga i mātua e aʻoaʻoina ai a latou fanau e uiga i feusuaʻiga faaleituaiga?

¹⁷ I le mataupu e 10, lea o loo talanoaina ai agelu amioleaga o ē na ō mai i le lalolagi ma fai ni fanau, ia fesili i le tamaitiiti: “E te iloa lea mea e taʻu o feusuaʻiga?” Ua aumaia i le tusi se tali faigofie ma talafeagai. Mulimuli ane, ua faamatalaina e le mataupu e 32, le auala e mafai ona puipuia ai le fanau mai ē faileagaina faaleituaiga tamaiti. Ua lipotia mai i le tele o tusi le tāua o na aʻoaʻoga. Na tusi se tasi tinā: “Ina ua alu laʻu tama tama i le vaiaso ua teʻa e vaai le fomaʻi, na fesili ai le fomaʻi pe sa ma talanoaina faatasi ma ia le faaaogāina tatau o totogasā. Na faagaeetia le  fomaʻi i le iloaina ua uma ona ma faia faapea e ala i le tusi fou.”

18. Ua faamatalaina faapefea e le tusi o le Faiaʻoga le faaaloalo i le tagāvai a le atunuu?

¹⁸ O loo talanoaina i se isi mataupu le tala o le Tusi Paia i talavou Eperu e toʻatolu, o Sataraka, Mesako, ma Apeteniko, o ē na mumusu e ifo i le tupua na faaataina ai le malo o Papelonia. (Tanielu 3:1-30) Atonu e lē iloa e nisi le fesootaʻiga o le tapuaʻi i se tupua ma le fāʻalo i le fuʻa, ae o loo faaalia mai e le tusi Faiaʻoga. Ae peitaʻi, mātau le faamatalaga a se tusitala e suafa iā Edward Gaffney, ina ua faatalanoa o ia e le mekasini U.S. Catholic. Ina ua taʻu atu e lona afafine iā te ia, na ia aʻoaʻoina se “tatalo fou i le aʻoga” i lona uluaʻi aso, na ia fai i ai e toe fai mai le tatalo. Na faapea mai Gaffney: “Na ia tuu lona lima i lona fatafata, ma amata loa ona fai le tatalo ma le fiafia, ‘Ou te tautō atu ou te faamaoni i le fuʻa . . . ’” Na faaauau mai Gaffney: “Na ou manatua ai le saʻo o Molimau a Ieova. E iai se vala o tapuaʻiga faaleatunuu o loo faaauiluma i a matou aʻoga i le taimi lava e amata ai ona aʻoga se tasi.”

E Tauia Au Taumafaiga

19. O ā taui ona o le aʻoaʻoina o fanau?

¹⁹ E tauia moni lava au taumafaiga i le aʻoaʻoina o lau fanau. Na tutulu se tinā i Kansas, i Amerika ina ua ia mauaina se tusi mai lana  tama. Na ia tusi mai: “Ou te manatu ua manuia loʻu olaga, auā sa oulua tausia aʻu ina ia lelei oʻu faalogona. Ua tatau ona faamālō atu iā te oulua ma tamā.” (Faataoto 31:28) O le tusi, Ia Faalogo i le Faiaʻoga Sili, ua fesoasoani i le tele o mātua e aʻoaʻo a latou fanau ma puipuia ai lenei tofi tautele.

20. O le ā e ao ona manatua e mātua, ma o le ā le aafiaga iā i latou?

²⁰ E manaʻomia e a tatou fanau le taimi, le uaʻi atu ma a tatou taumafaiga. E vave tele lo latou tutupu aʻe. Ia faatasitasi ma fesoasoani iā i latou i avanoa uma. O le a lē taitai ona e faanoanoa ai i le faia faapena. O le a oo ina latou alolofa iā te oe. Ia aua neʻi galo, o lau fanau o le meaalofa mai le Atua iā te oe. O i latou o se tofi tautele! (Salamo 127:3-5) O lea, o le auala e te tausia lelei ai i latou, ua e tali atu ai i le Atua auā o lou tiute tauave lenā.

[Faamatalaga pito i lalo]

[Ata i le itulau 18]

O le a Faapefea Ona E Tali?

• Aiseā e manaʻomia ai e mātua ona puipuia a latou fanau aemaise lava i aso nei?

• O ā aʻoaʻoga e maua ai le poto?

• O ā ni mataupu tāua e ao ona talanoaina ma lau fanau i aso nei?

• Ua faapefea ona fesoasoani le tusi o le Faiaʻoga i mātua e aʻoaʻo ai a latou fanau?

[Fesili mo le Suʻesuʻega]

[Pusa/Ata i le itulau 18, 19]

Se Tusi mo Tagata Uma

Na saunia le tusi, Ia Faalogo i le Faiaʻoga Sili, ina ia fesoasoani i mātua po o isi foʻi tagata matutua e faitau ma talanoa ma tamaiti e uiga i aʻoaʻoga a Iesu Keriso. Ae peitaʻi, ua matuā lotofaafetai tagata matutua na faitau i le tusi ona o mea na latou aʻoaʻoina mai ai.

Na faapea mai se tamāloa i Texas, i Amerika: O le tusi,“Ia Faalogo i le Faiaʻoga Sili, e faagaeetia ai ona e faigofie, e uunaʻia ai i tatou po le ā lava le matua; e pei o aʻu ua 76 oʻu tausaga. Faafetai tele lava, mai se tasi sa auauna iā Ieova mai lava a o laʻitiiti.”

Ua faapea mai se tagata faitau i Lonetona, i Egelani: “O ata matagofie, e mautinoa e faafiafia ai loto o mātua ma fanau. O fesili ma le auala o loo faatulaga ai, e ese le matagofie, ma lelei foʻi le taulimaina ai mataupu maʻaleʻale e pei o lea i le mataupu e 32, ‘Le Auala na Puipuia ai Iesu.’” Na ia faaiʻu mai: “E ui lava sa fuafuaina lenei tusi mo tamaiti Molimau a Ieova, ae ou te manatu, o le a fiafia faiaʻoga ma isi e maua foʻi se kopi. O lea ou te aloalo atu mo se taimi e faaaogā ai.”

Na taʻua e se fafine mai Massachusetts, i Amerika, e uiga i le tele o “ata mananaia ua fuafuaina lelei.” Na ia tusi mai e faapea: “O le mea lea ua ou mātauina, e ui lava o le tusi na fuafuaina mo tamaiti, ae o mataupu o loo talanoaina ai, e fesoasoani foʻi iā i tatou tagata matutua e mafaufau ai i a tatou faiā ma Ieova.”

Na faapea mai ma le maofa se fafine i Maine, i Amerika: “Oka! E ese le manaia o le tusi! E lē mo na o le ʻautalavou, ae e mo i tatou uma lava o fanau a le Atua. Ua matuā pāʻia ai loʻu loto, ma ua faagaeeina ai oʻu faalogona, ua faaleleia ai, ma ua maua ai se filemu. Ua ou matuā vavalalata atu ai iā Ieova loʻu Tamā. Ua ia aveesea uma lava oʻu tigā na iai, ma ua matuā manino mai ai lona finagalo.” Na ia faaiʻu mai e faapea: “Ou te faapea atu i tagata uma lava, ‘Faamolemole faitau le tusi.’”

Na taʻua e se fafine mai i Kyoto, i Iapani e faapea, a o ia faitauina le tusi i le fanau a lana fanau, na latou lāgā mai ni fesili e faapea: “‘O le ā le mea o fai e le tama lea? Aiseā ua otegia ai le teine lea? O le ā le mea lea e fai e le tinā lea? Ae ā le leona lea?’ E aʻoaʻo e le tusi mea ia tatou te fiafia i ai, o lea, e ese loʻu fiafia i ai, e sili atu i lo o se isi lava tusi e mafai ona maua i faletusi.”

Ua faapea mai se tamā mai i Calgary, i Kanata, i le taimi lava na ia maua ai le tusi, na ia faitauina loa i lona afafine e ono tausaga ma lona atalii e iva tausaga. Ua ia faapea mai: “Sa matuā fiafia tamaiti. Sa uaʻi totoʻa mai laʻu fanau ma tali fesili mai o la loto. Sa la lagona o loo faia ai so la sao i le suʻesuʻega, ma mafai ona faamatala mai ai o la lagona. Ua matuā fiafia lava i laʻua, ma na fai mai loʻu afafine, e manaʻo e suʻesuʻe le tusi i pō uma lava.”

Ina ua uma se suʻesuʻega e tasi, na faapea mai le tamā: “Sa umi se taimi o ma talatalanoa ma loʻu atalii e uiga iā Ieova ma lona finagalo. Sa tele lava ni ana fesili mai le tusi. Na maligi oʻu loimata ina ua ia faatofā mai iā te aʻu ma faapea mai, ‘Tamā, e mafai ona ta toe faia lenei talanoaga? E tele aʻu fesili, ma ou te fia iloa mea uma lava e uiga iā Ieova.’”

[Ata i le itulau 15]

Mātua, o le ā ua outou aʻoaʻoina mai le faaaʻoaʻoga a Manoa?

[Ata i le itulau 16]

Tamaiti, o le ā ua outou aʻoaʻoina mai le faaaʻoaʻoga a talavou Eperu e toʻatolu?

[Ata i le itulau 17]

O ata ma faamatalaga i le tusi o le “Faiaʻoga” e fesoasoani i le aʻoaʻo atu

O le ā le pepelo na taʻu atu e Anania iā Peteru?

O ai o mafai ona silafia mai a tatou mea uma o fai?