E Ui Ina Mafatia, ae na Maua se Faamoemoe i se Fonotaga i le Nofoaga o Tagata Sulufaʻi

O KAKUMA, o le nofoaga o tagata sulufaʻi, e tū i le vaega i mātū o Kenya, e latalata i le tuaoi ma Sudan. O loo aumau ai le sili atu i le 86,000 tagata sulufaʻi. O le vaipanoa lea, e matuā mago lava, i le ao, e oo atu ai le vevela i le 120°F (50°C). E matuā taatele ai faiga sauā ma o loo mafatia ai le toʻatele. Ae peitaʻi, o loo iai lava se faamoemoe o isi.

I inā, e iai ni nai Molimau a Ieova o loo maelega i le folafolaina atu o le tala lelei o le Malo. E auai i latou i se faapotopotoga laʻitiiti i Lodwar, e 75 maila (120 kilomita) i le itu i saute. A o le isi faapotopotoga, e mamao, e tusa ma le 8 itula e tiʻetiʻe atu ai i se taavale.

Talu ai e lē mafai ona malaga ese atu ia tagata sulufaʻi, ua lē mafai ai e le toʻatele ona auai i fonotaga ma tauaofiaga a Molimau a Ieova. O lea na fuafuaina ai e faia se fonotaga o aso faapitoa i totonu o le nofoaga mo tagata sulufaʻi.

Malaga Agaʻi Atu i Mātū

Ina ia lagolagoina le fonotaga, na tauofo ai ni Molimau se toʻa 15 mai le aai o Eldoret, e tusa ma le 300 maila (480 kilomita) le mamao i le itu i saute o Kakuma, e faia se malaga fitā i le itulagi i mātū ua matuā mago i le lā, faatasi ma se tagata suʻesuʻe o le Tusi Paia o lē na ofo mai e faaaogā si ana tamaʻi pasi ma le avetaavale mo le faigāmalaga. O le faanaunauga o i latou, o le fia faalaeiau ma faamalosia o latou uso.

Na amata le faigāmalaga i se taeaopō mālūlū lava mai mauga i sisifo o Kenya. E ui atu le auala omoomo i luga i laufanua o faatoʻaga ma togāvao ona faaifo lea i lalo i le toafa matuā vevela. Sa aai lafu ʻoti ma kamela i le laufanua valevalenoa. E feoaʻi tagata o le nuu ma o latou ofu faaleaganuu, o le toʻatele e tauave ni pouvai, ma ʻaufana ma aū. Ina ua mavae le 11 itula o le faigāmalaga, ae taunuu loa Molimau i Lodwar, o se nuu vevela ma le pefua, e toetoe lava 20,000 tagata e nonofo ai. Sa talia ma le fiafia le ʻaumalaga e o latou uso talimālō, ma na ō atu le ʻaumalaga e fai sina mālōlōga ina ia sauniuni ai mo le tele o galuega i le faaiʻuga o le vaiaso.

I le taeao na sosoo ai, na ō atu ai le ʻauasiasi e maimoa i nisi o mataaga i le vaipanoa. Na latou vaaia ai le vaituloto o Turkana, e aupito sili ona telē i  vaituloto i Kenya. E siʻomia e le faitau fia o maila o le togāvao o le toafa, ma e nonofo ai le tele o kolokotaila aupito i tetelē i le lalolagi. O suāsami mai le vaituloto, ua fesoasoani e ola ai nai tagata o loo nonofo i le auvai. Sa fiafia le ʻauasiasi i le afiafi ina ua auai faatasi ma uso i le faapotopotoga i le Aʻoga o le Faiva Faatiokarate ma le Sauniga o le Auaunaga. E iai lo latou Maota matagofie o le Malo, na fausia i le 2003 e ala i le polokalame o faugāfale a Molimau mo atunuu e lē lava lo latou tamaoaiga.

Le Aso Faapitoa o Fonotaga

Na filifilia le Aso Sa mo le aso faapitoa o fonotaga. Sa faatagaina le faapotopotoga i Lodwar, ma uso na asiasi atu ina ia ō atu i le nofoaga o tagata sulufaʻi i le valu i le taeao. O lea, sa naunau ai lava Molimau ina ia vave amata. O le auala, e taamilo atu i laufanua valevalenoa agaʻi i le tuaoi ma Sudan. Sa faamalumalu ifo mauga faatuāiʻa i luga o le auala. Na faatoʻā lautele atu lava la latou vaai ina ua taunuu i Kakuma. Sa timuga ma o le auala pefu lea e ui atu i le nofoaga o tagata sulufaʻi, sa lofia nisi vaega i le vai. O le tele o fale, sa faia i piliki palapala, a o luga sa ato i ʻapa po o tapoleni. E nonofo lava tagata Aitiope, Somalia, ma tagata Sudan, ma isi i o latou lava fanua. Sa faafeiloaʻia ma le fiafia le ʻaumalaga e tagata sulufaʻi.

O le fonotaga, sa faia i le fale mo toleniga. O ata o loo tusitusi i pa, sa faamatala mai ai le mataʻutia o le olaga o tagata sulufaʻi, ae o uiga  na faaalia e tagata i totonu o le fale i lenā aso, na aumaia ai se faamoemoe. O lauga uma lava, sa faia i le faa-Peretania ma le gagana Swahili. O nisi sa lelei la latou tautala i gagana uma e lua, sa faia a latou lauga i gagana uma e lua. O se uso sulufaʻi mai Sudan, na faia le lauga amata, “Ia Suʻesuʻe o Tatou Loto.” O isi lauga, sa faia e toeaina mai isi faapotopotoga.

O se mea faapitoa o fonotaga uma, o le papatisoga. I le faaiʻuga o le lauga o le papatisoga, sa mataʻitu ai e tagata le sui papatiso e toʻatasi a o ia tū aʻe i luga. O Gilbert, na sosola ma lona tamā mai lo la nuu i le taimi na fefasiotiaʻi ai tagata o le atunuu i le 1994. Na la taumafai e maua se lafitaga i Burundi, ae na la iloa e lē saogalemu ai i inā. Ona sola lea o Gilbert i Zaire, sosoo atu ai ma Tanzania; i nisi taimi sa lafi ai o ia i le togāvao; ma na oo atu ai i Kenya. Na tutulu le toʻatele a o faasilasila mai e le failauga ia Gilbert e avea ma uso i le faapotopotoga. A o tū i luma o le toʻa 95, na ia tali atu ma le manino, “Ndiyo!” po o le “Ioe” i le gagana Swahili, i fesili e lua na fai atu e le failauga iā te ia. O ia lava ma isi uso na eliina i o latou lima le lua laʻitiiti lea na fai ma vai taʻele, ma afei i le tapoleni lea na ato ai lona fale. Sa ia faaalia lona naunau ina ia papatisoina, i lona alu atu i lenā lava taeao ma laʻu mai vai e faatumu ai le vai taʻele mo lona papatisoga!

O se tasi o vala tāua o le fonotaga i le aoauli, o le faamatalaina mai lea o mea na tutupu e uiga i le tulaga o Molimau sulufaʻi. Na faamatala e se tasi uso lona faalatalata atu i se tamāloa sa mālōlō i lalo o se laau.

Sa ia fai atu, “Seʻi fai mai sau tala, e saogalemu pea i taimi uma le nofonofo i lalo o se laau?”

Na tali mai le tamāloa, “I, oi e leai, e lē lelei i le pō.”

Na faitau i ai e le uso le Mika 4:3, 4: “A e taʻitasi ma nofo i lalo o lona vine, ma lalo o lona mati; e leai foʻi sē na te faamataʻu mai.” Sa ia faamatala atu e faapea, “I le lalolagi fou a le Atua, o le a saogalemu i taimi uma lava.” Na talia e le tamāloa se tusi faale-Tusi Paia.

O se tasi o tuafafine na malaga atu i Kakuma, sa faanoanoa ona o le maliliu o ni tagata se toʻatolu o lona aiga. I le faia o sana tala e uiga i uso i ina, na ia faapea mai ai: “E ese le faigatā o lenei nofoaga; peitaʻi, o loo malosi pea lo latou faatuatua. O loo latou nonofo i se nofoaga e lē maua ai se fiafia, ae o loo auauna pea ma le fiafia iā Ieova. O loo latou maua le filemu mai le Atua. Sa faalaeiauina aʻu ina ia tausi le filemu ma auauna iā Ieova. E leai se mea ou te popole ai!”

Sa vave lava ona oo mai le iʻuga o le aso o le fonotaga. I le lauga faaiʻu, na faailoa mai ai e le failauga e faapea, o loo iai i le fonotaga ia sui usufono mai atunuu e valu. Na mātauina e se tasi Molimau sulufaʻi e faapea, ua faamaonia i le fonotaga lenei le autasi ma le alofa o loo iai i Molimau a Ieova i se lalolagi fevaevaeaʻi. O i latou o se ʻauuso Kerisiano moni.—Ioane 13:35.

 [Pusa/Ata i le itulau 25]

O TAMA SUDAN, UA LEAI NI AIGA

Talu mai lava le amataga o le taua i Sudan i le 1983, na ō ese ai le 5 miliona o tagata mai o latou aiga. Mai na tagata, e 26,000 tamaiti na valavala ma o latou aiga. O le faitau afe o i latou na sosola atu i nofoaga o tagata sulufaʻi i Aitiope, ma e tusa ma le tolu tausaga o nonofo ai i inā. Ina ua tatau ona toe ō ese, na latou savavali atu ai mo se tausaga e toe foʻi atu i Sudan, i Kenya i mātū, ma sa faaleagaina i latou e fitafita, tagata faomea, faamaʻi, ma manu feʻai. Sa na o le ʻafa ai o tamaiti na faasaoina i nei malaga fitā, ia na faia aʻe ai le toʻatele o tagata sulufaʻi i Kakuma. Na faaigoaina e tagata e tufatufaina atu fesoasoani nei tamaiti, o tama Sudan, ua leai ni aiga.

Ua avea nei Kakuma ma nofoaga o tagata sulufaʻi mai atunuu eseese, e pei o Sudan, Somalia, Aitiope, ma isi atunuu. Ina ua latou taunuu atu, na tuuina atu ai i se tagata sulufaʻi ni mea e fai ai lona fale, ma se tapoleni e ato ai. E faalua i le masina ona maua e tagata sulufaʻi taʻitasi le tusa ma le 13 pauna (6 kilokalama) o falaoamata, 2 pauna (1 kilo) o fatu pī, se gaʻo ma se masima. O le toʻatele o tagata sulufaʻi e faatau atu nisi o a latou meaʻai ina ia maua mai ai isi mea e manaʻomia.

Ua toe faatasia nisi o nei tamaiti ma o latou aiga, po ua faamautū foʻi i nisi atunuu. Ae e tusa ai ma le lipoti a le Ofisa e Vaaia Nofoaga mo Tagata Sulufaʻi e faapea, “e sili atu i le faitau afe isi o loo nonofo ai pea i tulaga palapala, ma faatumulia i lago i Kakuma, o i inā o loo latou saʻili ai ma le tigā mo ni meaʻai, ma tauivi malosi ina ia maua ni aʻoaʻoga lelei.”

[Ata i le itulau 25]

Faaaloaloga a le Faalapotopotoga Faavaomalo o Tagata Sulufaʻi

[Ata i le itulau 23]

(Tagaʻi i le lomiga mo le ata atoa)

KENYA

Kakuma

vaituloto Turkana

Lodwar

Eldoret

Nairobi

[Ata i le itulau 23]

Le tulaga faigatā o loo soifua ai i le nofoaga o tagata sulufaʻi

[Ata i le itulau 23]

E tau faasoasoa le vai i Kakuma

[Ata i le itulau 23]

O ni Molimau mai Kenya, o loo faia se malaga fitā i le itu i mātū ina ia faamalosiau i o latou uso

[Ata i le itulau 24]

O se misionare o loo faaliliuina se lauga a se paeonia faapito i le atunuu

[Ata i le itulau 24]

Vai taʻele na faia ai le papatisoga

[Faamatalaga i Ata i le itulau 23]

O le faasoasoaina o le vai, ma le Nofoaga o Tagata Sulufaʻi i Kakuma: I faaaloaloga a le Faalapotopotoga Faavaomalo a Tagata Sulufaʻi