Faaaliga Faapitoa i Maketonia
Faaaliga Faapitoa i Maketonia
“SAU ia i Maketonia, ma fesoasoani mai iā te i matou.” (Galuega 16:9) O upu nei a le tagata na vaaia e Paulo i le faaaliga, na faailoa atu ai iā te ia le manaʻomia ona faalauiloa o le tala lelei o le Malo o le Atua i se oganuu fou, o aai o loo i Eleni i aso nei.
I Maketonia i le taimi nei, e 1 le Molimau a Ieova i tagata e 1,840. O le toʻatele o tagata e leʻi faalogo muamua lava e uiga iā Ieova le Atua. Ioe, o loo iai se manaʻoga faanatinati mo tagata o lenei atunuu ina ia faalogo i le feʻau o le filemu.—Mataio 24:14.
Na tatala e Ieova le ala e fesoasoani e faataunuu ai lenā manaʻoga. I se tasi aso iā Novema 2003, na maua ai e le ofisa o Molimau a Ieova i Maketonia se telefoni e leʻi faatalitalia. O se telefoni mai se faalapotopotoga i le aai o Maketonia, o loo valaaulia ai Molimau a Ieova ina ia faia se faatulagaga e faaalia ai o latou talitonuga i se faaaliga e tolu aso e amata iā Novema 20. O se avanoa mataʻina lea e faaoo atu ai i le faitau afe o tagata e leʻi faalogo muamua lava i le tala lelei o le Malo!
Na tinoū Molimau e sauniuni ma faatulaga le faaaliga o lomiga eseese a Molimau a Ieova i le gagana Maketonia. Na faaalia ni lomiga ina ia mafai ai e tagata asiasi ona ave ni kopi latou te mananaʻo ai. O le faaaliga, na maua ai e tagata le avanoa e faafouina ai i le vai faaleagaga o le ola.—Faaaliga 22:17.
Na mananaʻo faapitoa lava tagata asiasi i lomiga o loo iai mataupu e aafia ai o latou olaga, e pei o le Fesili ua Fesili Mai ai Talavou—Tali e Aogā ma Le Ala e Maua ai le Fiafia i le Aiga. * E 98 i latou na avatu a latou tuatusi ma mananaʻo ina ia asiasi atu Molimau a Ieova iā i latou. E toʻatele na faia ni faamatalaga logolelei e uiga i le galuega a Molimau a Ieova ma le aogā o a latou lomiga.
Na ō atu se tamāloa i le faaaliga ma lona atalii. Na fesili atu le tamāloa pe iai ni lomiga mo tamaiti. Na faaali i ai e Molimau, Laʻu Tusi o Tala o Le Tusi Paia. * Na ia tilotilo i le tusi ma fesili atu ma le fiafia pe fia le tau. Ina ua ia iloa e lagolagoina le galuega tau aʻoaʻoga a Molimau a Ieova e ala i foaʻi tauofo, na atili ai ona fiafia. (Mataio 10:8) Na ia faaali le tusi i lona atalii ma faapea atu: “O se tusi manaia tele! O le a ou faitau atu iā te oe se tala i aso uma!”
Na alu atu foʻi se polofesa i mea tau filosofia i le faaaliga. E fiafia o ia i lotu aemaise lava i talitonuga o Molimau a Ieova. A o ia tilotilo i le tusi, Mankind’s Search for God, * na ia faapea mai: “E malamalamagofie nei mataupu! O le mea tonu lava lea na ou mafaufau e tatau ona faailoa atu ai.” Mulimuli ane, na ō mai ni tamaiti o lana aʻoga ma mananaʻo i ni a latou lava tusi e pei o le tusi na maua e le polofesa. Na latou mananaʻo e suʻesuʻe le tusi lava lea e tasi. Na latou manatu o le a ia faaaogā le tusi i ana lesona.
Na mafai e le faaaliga ona avatu i nisi le uluaʻi avanoa e iloa ai upu moni o le Tusi Paia. Na ō atu foʻi ni talavou logonoa e vaai pe iai ni mea e fiafia i ai. Na faia e se tasi o Molimau se talanoaga puupuu ma i latou, i se fesoasoani a se teine na ia faaliliuina i le gagana e faaaogā ai taga. Na ia faaaogāina talafaatusa mai le tusi, Le Tagata Silisili o Ē Uma na Soifua Mai, * e faamatala atu ai na faamālōlō e Iesu maʻi e aofia ai ma ē logonoa. Na latou fiafia e aʻoaʻo ua folafola mai e le Tusi Paia ua toeitiiti nei ona faia lea e Iesu o le mea lava lea i tagata i o tatou aso. Na taliaina ma le fiafia e nisi o i latou lomiga faale-Tusi Paia, ma na faatulaga ai loa Molimau e iloa le gagana e faaaogā ai taga e asiasi atu iā i latou.
E lē gata i Maketonia, ae ua maua foʻi lomiga i le gagana Alapania, Peretania ma le Take. Na fesili se tamāloa e lē iloa tautala i le gagana Maketonia mo ni lomiga i le faa-Peretania. Ina ua ia mauaina Le Olomatamata ma le Ala Mai! na ia faapea atu o ia e tautala i le gagana Take. Ina ua faailoa atu iā te ia lomiga i lana lava gagana, na matuā faateʻia lava! Na ia iloa o loo mananaʻo Molimau a Ieova e fesoasoani i tagata uma.
E mautinoa, o se molimau lelei na avatu i lenā mea, ma e matuā faalaeiauina le vaai atu i le toʻatele o tagata o loo naunau i le upu moni! Ioe, na tatala e Ieova le ala e faalauiloa atu ai le tala lelei o le Malo i Maketonia.
[Faamatalaga pito i lalo]
^ pala. 6 Lomia uma e Molimau a Ieova.
^ pala. 7 Lomia uma e Molimau a Ieova.
^ pala. 8 Lomia uma e Molimau a Ieova.
^ pala. 9 Lomia uma e Molimau a Ieova.
[Pusa/Ata i le itulau 9]
O SE MEA MATAʻINA!
Na iai se mea mataʻina na tupu iā Me 17, 2003, i le galuega e faalauiloa atu le tala lelei o le Malo o le Atua. Na faapaiaina se ofisa o Molimau a Ieova i Skopje. E lua tausaga na faia ai le galuega, ma ua faafā ona telē i le taimi nei le ofisa na i lo le taimi muamua.
E tolu fale ma ofisa e faia ai faaliliuga ma isi matagaluega, o potu e nonofo ai, o le umukuka ma le potu tā mea. Sa faia e Guy Pierce, o se sui o le Vaega Pule o Molimau a Ieova, le lauga o le faapaiaga. Na auai tagata asiasi mai atunuu eseese e 10 i le polokalame o le faapaiaga. Na fiafia tagata uma e vaai i nei fale fou mananaia.
[Faafanua i le itulau 8, 9]
(Tagaʻi i le lomiga mo le ata atoa)
PALAKERIA
MAKETONIA
Skopje
ALAPANIA
ELENI
[Ata i le itulau 8]
Skopje, Maketonia