Fesili Mai le ʻAufaitau

Pe na faagutugutulua ai le aposetolo o Paulo i lona faatuatuaga Kerisiano ina ua ia faapea atu i luma o le ʻau Saniterini: “O aʻu nei o le faresaio”?

Ina ia malamalama i le faamatalaga a Paulo lea e maua i le Galuega 23:6, e ao ona iloiloina le mataupu atoa.

Ina ua osofaʻia Paulo e tagata Iutaia i Ierusalema, ona talanoa atu lea o ia i le motu o tagata. Sa ia taʻua ai e faapea, na “aʻoaʻoina [o ia i Ierusalema] i le aʻoga a Kamalielu i le tonu o le tulafono a o tatou tamā.” E ui lava sa faalogo atu le motu o tagata i lana faamatalaga mo sina taimi, ae ina ua feita i latou, na ave ai e le alii e pule i ʻau Paulo i le nofoaga o le fitafita. A o leʻi sasaina o ia, na faapea atu Paulo: “E lē ua sa ea iā te outou ona sasa le tagata Roma ua lē faasalaina?”—Galuega 21:27–22:29.

I le aso na sosoo ai, na ave ai e le alii e pule i ʻau Paulo i le faamasinoga maualuga a Iutaia, le ʻau Saniterini. Sa pulatoʻa atu Paulo iā i latou, ma na ia iloa ai, o le ʻau Saniterini, o loo aofia ai le ʻau Satukaio ma le ʻau Faresaio. Ona ia faapea atu lea: “Sema e, le au uso e, o aʻu nei o le faresaio, o le atalii o le faresaio; o le faamoemoe i le toe tū mai o ē ua oti ua faamasinoina ai aʻu.” O le iʻuga, na tupu ai se fefinauaʻiga i le va o le ʻau Faresaio ma le ʻau Satukaio, “auā e faapea le ʻau satukaio, e leai se toe tū mai, e leai foʻi se agelu, po o se agaga; a ua taofi e le ʻau faresaio ia mea uma.” Na finau malosi atu ma le ita nisi o le ʻau Faresaio e faapea: “Matou te lē iloa se leaga i lenei tagata.”—Galuega 23:6-10.

Ona e lauiloa o ia o se Kerisiano maelega, sa lē mafai ai e Paulo ona faatalitonu le ʻau Satukaio o ia o se Faresaio. Talu ai, o le ʻau Faresaio na iai sa lē talia se tasi e lē talitonu i a latou aʻoaʻoga uma. O lea, atonu sa iai se isi uiga o le faamatalaga a Paulo i le avea o ia ma Faresaio, sa malamalama lelei le ʻau Faresaio ia sa i ai, e tusa ai ma lana faamatalaga.

I lona faapea atu, ua faamasinoina o ia ona o le faamoemoe i le toetutū o ē ua oti, o lona uiga, e na o le pau lenei o le itu, na pei ai o ia o le ʻau Faresaio. I se finauga i lenei mataupu, sa tutusa lelei ai le talitonuga o Paulo ma le ʻau Faresaio na i lo o le ʻau Satukaio, o ē sa lē talitonu i le toetū.

E leʻi feteenaʻi le mea lea sa talitonu i ai Paulo o se Kerisiano ma le talitonuga o le ʻau Faresaio i mataupu e pei o le toetū, agelu, ma nisi vala o le Tulafono. (Filipi 3:5) O lea, e tusa ai ma nei mataupu, sa mafai ai e Paulo ona faafesootaʻi o ia ma le ʻau Faresaio, ma na malamalama ai le ʻau Saniterini na i ai i ana upu. I lea, sa ia faaaogā ai lona talaaga i le feagai ai ma le faamasinoga maualuga faaituʻau a Iutaia.

Ae peitaʻi, o le faamaoniga aupito sili na iloa ai e leʻi faagutugutulua Paulo i lona faatuatua, o loo iloa mai i lona maua pea o le finagalo malie o Ieova. I le pō na sosoo ai na faamatala mai e Paulo le mataupu lea sa fefinauaʻi ai, na fetalai mai ai Iesu e faapea: “Paulo e, inā faalototele ia oe; auā e pei ona e molitino i mea iā te aʻu i Ierusalema, e tusa foʻi ona faapea ona e molimau i Roma.” Talu ai sa maua e Paulo le finagalo malie o le Atua, e tatau foʻi la ona tatou iloa, e leʻi faagutugutulua Paulo i lona faatuatua faa-Kerisiano.—Galuega 23:11.