Pe E te Manatua?

Pe na e fiafia e faitau ia mataupu eseese fou o Le Olomatamata? Lelei, ae seʻi vaai pe mafai ona e taliina ia fesili nei:

• Aiseā na filifilia ai le aso 25 o Tesema e faamanatu ai le aso na fanau ai Iesu?

E lē o faailoa maia i le Afioga a le Atua se aso na fanau ai Iesu. Ua faapea mai le Enciclopedia Hispánica: “O le aso 25 o Tesema lea e faamanatu ai le Kirisimasi, e lē o faavaeina i le faitauga saʻo o aso, ae na faia ina ia avea ai tausamiga o ni tausamiga faa-Kerisiano i le lā, lea na faia e tagata Roma i le tau mālūlū.” Sa faamanatuina e tagata Roma anamua le oso aʻe o le lā i le tau mālūlū e ala i le faia o faigaʻai, o poula, ma le feaveaʻiina o meaalofa.—12/15, itulau 4-5.

• Po o le uiga o le faamatalaga i le Galuega 7:59 e faapea, na tatalo atu Setefano iā Iesu?

E leai. Ua faaalia i le Tusi Paia e faapea, e na o Ieova le Atua lava e tatau ona tuusaʻo atu i ai tatalo. Ae i le vaaia o Iesu i le faaaliga, e lē taumatea na lagona ai e Setefano e valaau saʻo atu iā te ia i le faapea atu: “Le Alii e Iesu, ia e talia mai loʻu nei agaga.” Na iloa e Setefano, ua tuuina atu iā Iesu le pule e toe faatutū ai ē ua maliliu. (Ioane 5:27-29) O lea na talosaga atu pe na ʻaiʻoi atu ai Setefano iā Iesu ina ia leoleo lona ola seʻia oo i le toetū.—1/1, itulau 31.

• E faapefea ona tatou iloa e leʻi tuupōina e le Atua le olaga o se tagata?

Na tuuina atu e le Atua i le tagata le saʻolotoga e faia ai ana filifiliga, lea e lē o aofia ai se iʻuga tuupōina. O se lē alofa ma lē tonu o Ieova pe ana muaʻi tuupōina o tatou olaga ma toe faamasinoina i tatou i mea tatou te faia. (Teuteronome 32:4; 1 Ioane 4:8)—1/15, itulau 4-5.

• Aiseā e lē talafeagai ai le faapea atu, e lē mafai ona tutupu vavega?

I le iloaina e na o sina vaega o mea ofoofogia na faia e le Atua lea latou te malamalama i ai, ua ioe ai saienitisi e lē mafai ona toe tupu se mea. Ae na pau le mea ua latou iloa, atonu o le a tupu lenā mea.—2/15, itulau 5-6

• Aiseā na fai atu ai le Faamasino o Samasoni i ona mātua e manaʻo i se fafine mai Filisitia e fai ma ana avā? (Faamasino 14:2)

Sa faasā i le Tulafono a le Atua ona faaipoipo atu i se tagata e tapuaʻi i atua sesē. (Esoto 34:11-16) Ae, sa “lelei lava” le fafine Filisitia i le manatu o Samasoni. Sa saʻili e Samasoni “se mea e faalani ai se misa ma Filisitia,” ma sa fetaui lelei le fafine lea mo lea fuafuaga. Na lagolagoina e le Atua Samasoni e ala i Lona agaga paia. (Faamasino 13:25; 14:3, 4, 6)—3/15, itulau 26.

• Pe e tatau i se Kerisiano ona avatu se tupe po o se meaalofa i se tagata faigaluega mo lana auaunaga?

O se mea sesē le faatogafalea o se tagata faigaluega o le malo, i le avatu lea iā te ia o se mea tāua ina ia faia ai e le tagata se mea e lē tonu po o se solitulafono, pe ina ia faamuamua ai o ia. Ae e lē o se faatogafalea le avatu o se tupe po o se meaalofa i se tagata faigaluega ona o le faia o lona tiute, pe ia mauaina ai foʻi se auaunaga faaletulafono pe ina ia ʻalofia ai foʻi faiga leaga.—4/1, itulau 29.