Po ua Lava le Poto mo i Tatou?

Na nofonofo se ulugalii misionare i se matafaga i Aferika i Sisifo, ma matamata i le feʻilafi o le susulu o le masina. Na faapea atu le tane: “O le ā le tele o le iloa e tagata e faatatau i le masina, ma o le ā le tele e mafai ona aʻoaʻoina ai?”

Na tali atu lana āva: “Seʻi manatu pe ana mafai ona ta matamata i le lalolagi e pei ona ta matamata i le masina. O le ā le tele o le poto ua maua e tagata e faatatau i le lalolagi, ma o le ā le tele e ao ona aʻoaʻoina i ai? Ia mafaufau foʻi, e lē gata o loo faataamilomilo le lalolagi i le lā, ae faapena foʻi isi paneta. Ailoga a toe foʻi atu le lalolagi i lenei vaega o le vateatea. O le mea moni, ua tatou iloa le va o le lalolagi ma isi paneta. Ua tele lo tatou iloa i mea faapenei, ae peitaʻi tatou te lē o malamalama i le tele o mea i le vateatea!”

O NA manatu, ua taʻua ai nisi o upu moni autū. E foliga mai, e tele ni mea e ao ona aʻoaʻoina. O le mea moni, tatou te aʻoaʻoina ni mea fou i aso taʻitasi. Ae peitaʻi, e tusa ai ma le tele o mea ua tatou aʻoaʻoina, e foliga mai e lē o mafai ona tatou aʻoaʻoina na mea uma i le vave tatou te mananaʻo ai.

E moni, e lē gata i le tomai e aʻoaʻoina ai se faamatalaga fou, ae mafai ona tumau pea le poto po o faamatalaga i tagata e ala mai i komepiuta ma faiga faatekinisi. E tele ni faamatalaga, o ata ma isi mea e mafai ona kopi i se disk o le komepiuta, ona ua matuā maoaʻe nei disks, ua faia aʻe ni upu fou ina ia faamatala ai. E tele mea e mafai ona kopi i se CD-ROM, e tusa ma le 680 megabytes pe sili atu foʻi. Ae sili atu ai le DVD na i lo le CD-ROM ma atonu o le a maua ai isi mea fou i le lumanaʻi.

O auala e mafai ona faasalalauina ai faamatalaga i aso nei ua lē oo i ai lo tatou malamalama. E matuā vave tele gaoioi a masini o loo lomia ai tusi, mekasini ma nusipepa. E vave foʻi ona maua ni faamatalaga fou e se tasi na te faaaogāina le Initineti. I nei auala ma le tele o isi, ua sili atu ai ona vave i le aʻoaʻoina e se tasi o se mea fou. Ina ia taulau manuia se tasi i aso nei, e manaʻomia le aʻoaʻoina o le tele o mea, ae lē aogā ona iloa  mea uma. O lea, e tatau ai ona tatou faia ni filifiliga ma le faautauta.

O le isi māfuaaga e ao ai ona tatou faautauta, ona o le tele o faamatalaga e lē aogā ma e lē lelei. Aua neʻi galo o le malamalamaaga e faasino atu i faamatalaga—pe lelei pe leaga po o le faalaeiauina ai pe leai foʻi. E lē gata i lea o nisi mea ua taʻua o ni e mea moni ae e lē saʻo atoatoa. O le tele o taimi, ua iloa ane e i latou e popoto i se mataupu le sesē o a latou faamatalaga. O se faaaʻoaʻoga, na manatu tagata Efeso anamua i le tusiupu o se tasi e poto i nei mea. Na ia faapea mai: “O ai lea tagata e lē iloa o loo auauna lenei aai o Efeso i le malumalu o le atua fafine silisili o Tiana, ma le tupua na paʻū ifo mai le lagi?” (Galuega 19:35, 36) E ui lava e foliga mai ua iloa e tagata uma lenei mea, ae e lē saʻo le tala e faapea, na paʻū ifo mai le lagi le tupua. Ua talafeagai la le lapataʻiga a le Tusi Paia i Kerisiano ina ia leoleo faasaga i “finauga i mea ua igoa pepelo ai o le iloa.”—1 Timoteo 6:20.

O se māfuaaga malosi e faautauta ai e faatatau i faamatalaga i aso nei, ona e puupuu le olaga. E lē mafesiligia e tele ni mataupu e te fia malamalama i ai, ae ua puupuu lo tatou olaga, ua e iloa ai e lē umi lou soifua e faia ai faapea.

Pe o le a suia ea lenei faafitauli? Pe mafai ona tatou maua le poto ina ia ola umi ai? Po ua iai lenā poto? Afai ua iai, pe o le a maua e tagata uma? Pe o le a iai ea se aso e moni ai faamatalaga uma? Na maua e le ulugalii e pei ona taʻua tali faamalieloto i na fesili, ma e mafai foʻi ona e mauaina. Faamolemole ia faitau le mataupu o loo sosoo mai, o le a taʻuina atu ai iā te oe le aogā o le aveina i fale o le poto e faavavau.