E Aafia Oe i le A‘oa‘oga o le Toe Tū
E Aafia Oe i le Aʻoaʻoga o le Toe Tū
“O loo iā te aʻu le faamoemoe i le Atua, . . . o le a toe tutū mai ē ua amiotonu atoa ma ē ua amiolētonu.”—GALUEGA 24:15.
1. Na faapefea ona avea le toe tū ma mataupu o finauga a le ʻau Saniterini?
SA I Ierusalema le aposetolo o Paulo i le faaiʻuga o lana malaga faamisionare lona tolu i le 56 T.A. Ina ua puʻea faapagota o ia e tagata Roma, na ia tulaʻi ai i luma o le faamasinoga sili a Iutaia, o le ʻau Saniterini. (Galuega 22:29, 30) A o vaavaai atu Paulo i sui o le ʻaufaamasino, na ia iloa ai o isi o le ʻau Satukaio a o isi o le ʻau Faresaio. E iai se vala mataʻina e eseese ai nei vaega e lua. E teena e le ʻau Satukaio le toe tū, ae talia e le ʻau Faresaio. Na faailoa atu e Paulo lona talitonuga i le toe tū: “Sema e, le au uso e, o aʻu nei o le faresaio, o le atalii o le faresaio; o le faamoemoe i le toe tū mai o ē ua oti ua faamasinoina ai aʻu.” O lona fai atu faapea, na fefinauaʻi ai le fono!—Galuega 23:6-9.
2. Aiseā na mafai ai e Paulo ona faamatala atu lona talitonuga i le toe tū?
2 I tausaga muamua atu, a o malaga atu Paulo i le ala i Tamaseko, na ia vaaia ai se faaaliga lea na ia faalogo atu ai i le siʻufofoga o Iesu. Na fesili atu Paulo iā Iesu: “Le Alii e, se ā le mea ou te faia?” Na tali mai Iesu: “Tulaʻi ia oe, inā alu i Tamaseko, e taʻuina atu ai iā te oe o mea uma lava ua tofia iā te oe e te faia.” Ina ua taunuu i Tamaseko, na maua ai Paulo e se soo Kerisiano o Anania o lē na faapea atu: “Ua tofia oe e le Atua o tatou tamā, ia e iloa lona finagalo, ma e vaaia Lē Amiotonu, ma ia e faalogo atu i lona siʻufofoga.” (Galuega 22:6-16) E lētioa lava la na mafai ona faamatala e Paulo lona talitonuga o le toe tū.—1 Peteru 3:15.
Faalauiloa le Faamoemoe o le Toe Tū
3, 4. Na faapefea ona tali atu ma le loto tele Paulo e lagolagoina ai le toe tū, ma o le ā tatou te aʻoaʻoina mai i lana faaaʻoaʻoga?
3 Na tulaʻi Paulo i luma o le kovana o Filiki. O Titulo, o ia o se “tasi fai lauga,” na tuuina atu le moliaga a tagata Iutaia faasaga iā Paulo, ma tuuaʻia o ia o le taʻitaʻi o le lotu ua vavae ma le faatupu fouvalega. E aunoa ma se faatalatū na faalauiloa atu e Paulo: “Ou te taʻutino atu lenei mea iā te oe, ou te auauna i le Atua o matou tamā, e tusa ma le Ala ua taʻua e i latou o le lotu ua vavae.” O lea la, ina ua talanoa atu e uiga i le finauga autū, na ia faaauau atu: “O loo iā te aʻu le faamoemoe i le Atua, ua taofia foʻi e i latou nei, o le a toe tutū mai ē ua amiotonu atoa ma ē ua amiolētonu.”—Galuega 23:23, 24; 24:1-8, 14, 15.
4 Pe tusa ma le lua tausaga ua tuanaʻi, na valaaulia ai e Pokio Feso, o lē na suitulaga iā Filiki, le tupu o Herota Akeripa e la te aufaatasi i le suʻesuʻeina o Paulo. Na taʻua e Feso, e lē ioe le ʻautetee i le faalauiloaga a Paulo e faapea, “o le tasi tagata e igoa iā Iesu, ua oti . . . ua ola o ia.” I lana tali, na fesili atu ai Paulo: “Afai ua toe faatūina mai e le Atua ē ua oti, se ā le mea ua outou manatu ai e lē mafai ona talia o lea mea?” Ona ia toe faaopoopo atu lea: “O lea foʻi na maua ai e aʻu le fesoasoani mai le Atua, ou te tumau ai ua oo i lenei aso, o loo molimau i tagatānuu ma alii, ou te lē fai atu se tasi mea, na o ia mea ua taʻu mai e le ʻau perofeta ma Mose o le a taunuu; e tigā le Keriso, i le ma lea, ona o ia e muaʻi toe tū mai nai ē ua oti, na te folafola le malamalama i le nuu nei atoa ma nuu ese.” (Galuega 24:27; 25:13-22; 26:8, 22, 23) Na loto tele Paulo e tali atu e lagolagoina le toe tū! I le pei o Paulo, e mafai foʻi ona tatou faalauiloa atu ma le mautinoa, o le a iai le toe tū. Ae peitaʻi, o le ā le manatu tatou te faatalitalia? E ono pei lava o taofi ia sa faaalia iā Paulo.
5, 6. (a) O ā taofi o tagata ona o le lagolagoina e Paulo o le toe tū? (e) O le ā e tāua a o tatou faaali atu lo tatou faamoemoe i le toe tū?
5 O le a tatou tilofaʻia le mea na tupu iā Paulo i lana malaga faamisionare lona lua (pe tusa o le 49-52 T.A.) ina ua asiasi atu i Atenai. Na latou fefulifulisaʻi ma tagata na talitonu i le tele o atua ma faalaeiau i latou, ina ia iloa le finagalo o le Atua i le aso e faamasinoina ai le lalolagi ma le tonu e le tagata ua tofia e Ia. O ia lea o Iesu. Na faamatala e Paulo, na saunia e Ieova se faamaoniga e ala i le toe faatūina o Iesu. O le ā le taofi o tagata? Tatou te faitau e faapea: “Ua faalogo e i latou i le toe tū mai o ē ua oti, ona tauemu mai ai lea o isi, a ua fai mai isi, ‘Matou te toe faalogo atu iā te oe i lenā upu.’”—Galuega 17:29-32.
6 Sa faapena manatu na feagai ma Peteru ma Ioane ina ua uma le Penetekoso i le 33 T.A. Na finau malosi le ʻau Satukaio. Ua faamatala mai e le Galuega 4:1-4 le mea na tupu: “O loo o tautala atu i laʻua i le nuu, ona tutū mai lea iā te i laʻua o ositaulaga, ma le taʻitaʻi o le ʻau o le malumalu, atoa ma satukaio, ua tigā i latou ona ua la aʻoaʻo atu i le nuu, ma talaʻi atu le toe tū mai [o] Iesu nai ē ua oti.” Ae peitaʻi, na tali fiafia atu nisi. “E toʻatele o ē na faalogologo i le upu ua faatuatua i latou; o le tau aofaʻi foʻi o tagata po ua limagaafe.” E foliga mai, e tatou te faatalitalia foʻi taofi eseese pe a talanoa atu e faatatau i le toe tū. E tusa ai ma lenā tulaga, e tāua ai le faamalosia o lo tatou faatuatua i lenei aʻoaʻoga o le toe tū.
O le Toe Tū ma le Faatuatua
7, 8. (a) E pei ona faaalia i le tusi i le faapotopotoga i Korinito i le uluaʻi senituri, e faapefea ona lē aogā le faatuatua? (e) Ua faapefea i se malamalamaga saʻo o le toe tū ona faaesea ai Kerisiano moni?
7 E leʻi faigofie iā i latou na avea ma Kerisiano i le uluaʻi senituri T.A. ona taliaina le toe tū. O nisi na faigatā ona taliaina, sa auaufaatasi ma le faapotopotoga i Korinito. Na tusi atu Paulo iā i latou: “Na ou tuuina atu iā te outou mea muamua, o mea foʻi ia na ou maua foʻi e aʻu; na maliu Keriso mo a tatou agasala, pei ona tusia.” Na taʻutino e Paulo lenei mea moni e ala i le taʻua o le toe tū o Iesu, na ‘iloa o ia e le ʻau uso e lima selau’ o le toʻatele o i latou o loo soifua pea. (1 Korinito 15:3-8) Na ia taʻua atili: “Afai foʻi ua talaʻiina Keriso ua ia toe tū mai nai ē ua oti, pe faapefea ona fai mai o isi o outou, e leai se toe tū mai o ē ua oti? A e afai e leai se toe tū mai o ē ua oti, po ua lē toe faatūina mai Keriso; afai foʻi ua lē toe faatūina mai Keriso, po ua faalēaogā la matou talaʻi, ua faalēaogā foʻi lo outou faatuatua.”—1 Korinito 15:12-14.
8 Ioe, o le toe tū o se aʻoaʻoga faavae, o le a lē aogā le faatuatua faa-Kerisiano pe afai e lē taliaina le toe tū. O le mea moni, o le malamalamaga saʻo e faatatau i le toe tū, ua faaesea ai Kerisiano moni mai Kerisiano pepelo. (Kenese 3:4; Esekielu 18:4) O lea la, ua faaaofia e Paulo le aʻoaʻoga o le toe tū i “aʻoaʻoga muamua” o le faa-Kerisiano. Tatou te faanaunau e “faaoo atu i le faaatoatoaga.” Ua timaʻi mai Paulo: “Tatou te faia foʻi lenā mea, pe a finagalo i ai le Atua.”—Eperu 6:1-3.
Le Faamoemoe o le Toe Tū
9, 10. O le ā le uiga o le toe tū i le Tusi Paia?
9 Ina ia atili faamalosia lo tatou faatuatua i le toe tū, seʻi o tatou autaluina fesili nei: O le ā o uiga i ai le Tusi Paia pe a faasino atu i le toe tū? E faapefea ona faamamafa le alofa o Ieova e le aʻoaʻoga o le toe tū? O tali i nei fesili, o le a tatou tosina vavalalata atu ai i le Atua ma fesoasoani e aʻoaʻo isi.—2 Timoteo 2:2; Iakopo 4:8.
10 O le ā le uiga o le toe tū? E tusa ai ma le Tusi Paia, o le faamoemoe o le toe tū, o le faamautinoaga lea e mafai ona toe ola mai se tasi ua maliu. Ua taʻua atili i le Tusi Paia e toe tū le tagata a lē i le lalolagi, o le lagi, e tusa ai o lona faamoemoe. E faagaeetia i tatou i le alofa o Ieova, o lona atamai ma lona mana ua faaalia i lenei faamoemoe matagofie o le toe tū.
11. O le ā le toe tū e maua e auauna faauuina a le Atua?
11 O le toe tū o Iesu ma ona uso faauuina, ua saunia ai mo i latou se tino agaga e talafeagai mo le auaunaga i le lagi. (1 Korinito 15:35-38, 42-53) O le a latou auauna faatasi o ni tupu i le Malo faa-Mesia, lea o le a aumaia le parataiso i le lalolagi. O le taʻitaʻiga a le Ositaulaga Sili o Iesu, o le a avea ai i latou ma tupu ma ositaulaga. O le a latou faasafua atu aogā o le taulaga togiola a Keriso i tagata i le lalolagi fou amiotonu. (Eperu 7:25, 26; 9:24; 1 Peteru 2:9; Faaaliga 22:1, 2) Ae o loo soifua pea nisi o i latou na i le lalolagi, ma o loo faanaunau e tausisia le finagalo malie o le Atua. Pe a maliliu, o le a latou maua ai le “mea e tatau ai” e ala i le toe tū i le ola e lē mafai ona toe oti i le lagi. (2 Korinito 5:1-3, 6-8, 10; 1 Korinito 15:51, 52; Faaaliga 14:13) Na tusi Paulo: “Auā afai ua faatasia i tatou i le faatusa i lona maliu, e faapea foʻi i tatou i lona toe tū mai.” (Roma 6:5) Ae e faapefea i latou o le a toe tutū i le lalolagi? E faapefea i le faamoemoe o le toe tū ona tosina vavalalata ai i latou i le Atua? E tele mea tatou te aʻoaʻoina mai le faaaʻoaʻoga a Aperaamo.
O le Toe Tū ma le Faauōga ma Ieova
12, 13. Aiseā na malosi ai le faatuatua o Aperaamo i le toe tū?
12 Sa mataʻina le faatuatua o Aperaamo ma, sa taʻua o ia o le “uō a le Atua.” (Iakopo 2:23) E faatolu taimi o faasino e Paulo i le faatuatua o Aperaamo i lana lisi o tane ma fafine faatuatua i le Eperu mataupu e 11. (Eperu 11:8, 9, 17) O le faatolu ona ia taʻua o le faatuatua o Aperaamo, na ia faasino atu ai i lona usiusitai e ofo atu lona atalii o Isaako e fai ai le taulaga. Na talitonu Aperaamo na faamaonia mai e Ieova le folafolaga i se fanau e ala mai iā Isaako. E tusa lava pe oti Isaako e fai ai le taulaga, ae sa manatu Aperaamo “e mafaia e le Atua ona toe faatū mai tagata nai ē ua oti.”
13 Ina ua silafia e Ieova le malosi o le faatuatua o Aperaamo, na ia saunia ai se manu e fai ai le taulaga. Peitaʻi, o le mea na tupu iā Isaako, ua saunia ai se faaaʻoaʻoga o le toe tū, e pei ona faamatala e Paulo: “O lea foʻi na ia [Aperaamo] toe maua mai ai o ia [Isaako], ua fai lea ma faatusa.” (Eperu 11:19) E lē gata i lea, na faatuatua malosi Aperaamo i le toe tū. O le māfuaaga, talu ai na toe faaola e Ieova le malosi fanautama o Aperaamo ina ua matutua i laʻua ma Sara, ma maua sa laʻua tama o Isaako. —Kenese 18:10-14; 21:1-3; Roma 4:19-21.
14. (a) E tusa ai ma le Eperu 11:9, 10, o le ā na faatalitali i ai Aperaamo? (e) Ina ia maua faamanuiaga o le Malo i le lalolagi fou, o le ā e tupu iā Aperaamo? (i) E faapefea ona tatou maua faamanuiaga o le Malo?
14 Na faamatala e Paulo Aperaamo o sē aumau i le nuu ma o sē nofo i fale ʻie ma “faatalitali atu i se aai ua faavaeina, o lona mataʻisau ma le tufuga o le Atua lea.” (Eperu 11:9, 10) E lē o se aai moni e pei o Ierusalema, lea sa tū ai le malumalu o le Atua. Ae na i lo lea, o se aai faafaatusa. O le Malo lea o le Atua i le lagi e faia aʻe iā Iesu Keriso ma i latou e pule faatasi ma ia e 144,000. Ua taʻua foʻi le 144,000 i lo latou mamalu faalelagi o le “aai paia, o Ierusalema fou,” o le “faatoanofotane” a Keriso. (Faaaliga 21:2) I le 1914, na tofia ai e Ieova Iesu o le Tupu faa-Mesia i le Malo i le lagi, ma faatonu o ia e pule i totonu o ē ita iā te ia. (Salamo 110:1, 2; Faaaliga 11:15) Ina ia maua faamanuiaga o le pulega o le Malo, o le a toe tū ai Aperaamo le “uō a le Atua.” O lea la, ina ia tatou maua faamanuiaga o le Malo, e ao ona tatou ola i le lalolagi fou a le Atua o ni sui o le motu o tagata e toʻatele, o ē na faasao atu iā Amaketo, po o nisi o i latou na toe tutū mai nai le oti. (Faaaliga 7:9, 14) O le ā la le faavae mo le toe tū?
E Faavae le Toe Tū i le Alofa o le Atua
15, 16. (a) Ua faapefea ona faataatia e le uluaʻi valoaga o le Tusi Paia le faavae mo lo tatou faamoemoe o le toe tū? (e) E faapefea i le talitonu i le toe tū ona tosina vavalalata atu ai i tatou iā Ieova?
15 Ua talafeagai mo Ieova ona taʻuamiotonuina i tatou ma avea o ni ana uō, ona o la tatou faiā vavalalata ma ia, o lo tatou faatuatua malosi e pei o Aperaamo, ma le usiusitai i ana tulafono. Ona o lea, ua tatou maua ai aogā mai mea o le a faataunuuina e le Malo. O le uluaʻi valoaga i le Tusi Paia, o le Kenese 3:15, ua saunia ai le faavae mo le toe tū ma le faauōga ma le Atua. O loo valoia ai e lē gata i le tuʻimomomo o le ulu o Satani, a o le tuʻimomomoina foʻi o le mulivae o le Fanau a le fafine. O le maliu o Iesu i le laau, o le tuʻimomomoina lea faafaatusa o le mulivae. O lona toe tū i le aso tolu, na toe lelei ai lona manuʻa faafaatusa ma ua mafai ai ona ia faia se gaoioiga faasaga i “lē ua i ai le malo e oti ai, o le tiapolo lea.”—Eperu 2:14.
16 Ua faamanatu mai e Paulo, “ua faaalitinoina mai e le Atua lona lava alofa iā te i tatou, ina ua maliu Keriso ma sui o i tatou, a o tatou agasala pea.” (Roma 5:8) O le talisapaia o lenei alofa tatou te tosina vavalalata moni atu ai iā Iesu ma lo tatou Tamā alofa o i le lagi.—2 Korinito 5:14, 15.
17. (a) O le ā le faamoemoe na faaalia e Iopu? (e) O le ā ua faaalia e le Iopu 14:15 e uiga iā Ieova, ma o le ā sou lagona e faatatau i ai?
17 Sa tulimataʻi foʻi e Iopu o ia o se tamāloa faatuatua le toe tū. Sa ia mafatia i mea na fai e Satani iā te ia. E lē pei o ana aumea faamāfanafana pepelo, latou te leʻi taʻua lava le toe tū, na faamāfanafanaina Iopu i lenei faamoemoe ma fesili atu: “Afai e oti le tagata, e toe ola mai ea o ia?” I lana tali, na faalauiloa atu ai e Iopu: “Ou te faatalitali atu i aso uma o le taua ua tofia ai aʻu, seʻia oo ina suia o aʻu.” I le talanoa atu i lona Atua, o Ieova, na ia faailoa atu: “Ia e valaau mai, ona ou tali atu ai lea iā te oe.” E tusa ai ma faalogona o Lē na faia i tatou, na mātauina e Iopu: “Ia e finagalo alofa i le galuega a ou aao.” (Iopu 14:14, 15) Ioe, o loo faatalitalia ma le naunautaʻi e Ieova le toe tutū uma o tagata faamaoni. Pe a tatou manatunatu loloto i le alofa ma le agalelei o Ieova iā i tatou e ui i le lē lelei atoatoa, e mautinoa e mafai ona tatou tosina vavalalata atu ai iā te ia!—Roma 5:21; Iakopo 4:8.
18, 19. (a) O le ā le faamoemoe o Tanielu o le a toe tū ai? (e) O le ā o le a tatou autaluina i le mataupu o sosoo mai?
18 Na faamatalaina e le agelu a le Atua Tanielu o ia, “o le tagata ua alofateleina,” e umi se taimi sa soifua ma auauna faamaoni ai i le Atua. (Tanielu 10:11, 19) E leʻi maluelue lona faamaoni iā Ieova mai lava i lona faaaunuua i le 617 T.L.M., seʻia oo i lona maliu ina ua mavae lona mauaina o se faaaliga i le 536 T.L.M., i le lona tolu o tausaga o Kuresa le tupu o Peresia. (Tanielu 1:1; 10:1) I se taimi o le tausaga lona tolu o le nofoaiga a Kuresa, na maua ai e Tanielu se faaaliga o faasologa o malo malolosi o le lalolagi o le a aofia i le puapuaga tele. (Tanielu 11:1–12:13) Talu ai e leʻi malamalama atoatoa i le faaaliga, na fesili atu ai Tanielu i le agelu o lē na aumaia le feʻau: “Le alii e, pe se ā le iʻuga o ia mea?” Na faauaʻi atu e le agelu i “ona pō o le iʻuga” o le taimi lenā o ē “popoto e lagona lava i latou.” Ae o le ā le faamoemoe o Tanielu i le lumanaʻi? Na faailoa atu e le agelu: “A o oe ia e alu atu seʻia oo i le iʻuga; auā e te mālōlō, e te tū mai foʻi i lou tofi pe a oo i le iʻuga o aso.” (Tanielu 12:8-10, 13) O le a toe tū mai Tanielu i le “toe tutū mai o ē amiotonu,” i le pulega a Keriso i le afe tausaga.—Luka 14:14.
19 Ua tatou iai i siʻui o le iʻuga, ma ua i faitotoʻa le pulega a Keriso i le afe tausaga na i lo le taimi na faatoʻā tatou faalogo ai. O lea la, e ao ona fesili ifo iā i tatou lava, ‘Po o le a ou iai i le lalolagi fou ma auaufaatasi ma Aperaamo, Iopu, Tanielu ma isi tane ma fafine faatuatua? E mafai pe afai tatou te vavalalata atu iā Ieova ma usiusitai i ana tulafono. I la tatou mataupu o sosoo mai, o le a autaluina ai nisi faamatalaga atili e uiga i le toe tū ina ia iloa po o ai o le a toe faatūina.
Pe E te Manatua?
• O ā manatu na fesagaʻi ma Paulo ina ua ia faailoa atu lona faamoemoe i le toe tū?
• Aiseā ua faaesea ai e le faamoemoe o le toe tū Kerisiano moni mai Kerisiano pepelo?
• E faapefea ona tatou iloa na faatuatua Aperaamo, Iopu ma Tanielu i le toe tū?
[Fesili mo le Suʻesuʻega]
[Ata i le itulau 9]
Sa tū Paulo i luma o le kovana o Filiki, ma faailoa atu ma le mautinoa le faamoemoe o le toe tū
[Ata i le itulau 10]
Aiseā na faatuatua ai Aperaamo i le toe tū?
[Ata i le itulau 12]
Na maua e Iopu le faamāfanafanaga i le toe tū
[Ata i le itulau 12]
O le a toe tū Tanielu i le toe tutū o ē amiotonu