E Matagofie le Faamoemoe o le Toe Tū

UA TAATELE le talitonuga i le toe tū. I le tusi paia a le lotu Isalama, ua aofia ai se mataupu atoa e uiga i le toe tū. Ua faapea mai lenei tusi: “Ou te taʻutino atu i le Aso o le Toe Tū . . . Pe e manatu le tagata e lē mafai ea ona Tatou toe faaola le tagata ua oti? . . . Na fesili mai le tagata: ‘O afea le Aso o le Toe Tū?’ Pe lē o Ia ea lea e iai le malosi e avatu ai le ola i ē ua maliliu?”—Surah 75:1-6, 40.

Ua taʻua e le New Encyclopædia Britannica, ua aʻoaʻoina e se tasi lotu Peresia, le “talitonuga o le aveesea o ē amioleaga, le toe tutū o tagata, le faamasinoga faaiʻu, ma le toe faafoʻisiaina o se lalolagi mamā mo ē amiotonu.”

Ua faamatalaina e le Encyclopaedia Judaica le toe tū, o se “talitonuga o le toe tutū o ē maliliu ma toe ola ai i luga o le lalolagi.” Ae peitaʻi, na faapea mai lenā tusi, e lē talafeagai le talitonuga faa-Iutaia e uiga i le agaga e lē mafai ona oti. Ua faapea mai: “E feteenaʻi talitonuga e lua, o le toe tū ma le lē mafai ona oti o le agaga.”

Ua aʻoaʻo e le lotu Hinitu, e toe fanau mai le tagata i se isi tino ma faaauau ai pea, e lē mafai ona oti. Pe afai e moni lenei manatu, e ao la ona iai se agaga o le tagata e ola pea pe a mavae le oti. Ua taʻua i le tusi paia a le lotu Hinitu o le Bhagavad Gita: “E lē mafai lava ona faaumatia lenei agaga.”

Peitaʻi, e ese le talitonuga o le lotu Puta, ua latou lē aʻoaʻoina le iai o se agaga e lē mafai ona oti. Ae ui i lea, o le toʻatele o tagata o le lotu Puta i Sasaʻe Mamao, e talitonu i le toe fanau o le tagata i se isi tino ma le lē mafai ona oti o le agaga. *

Le Lē Mautonu i le Aʻoaʻoga o le Toe Tū

O falelauasiga ia e faia e lotu ua faapea mai o Kerisiano, e masani ona faasino atu i le agaga e lē mafai ona oti ma le toe tū. O se faaaʻoaʻoga, na toe faaupu e faifeʻau o le lotu Egelani e faapea: “Talu ai o le finagalo o le Atua i lona alofa mutimutivale, ua ia aveesea ai le agaga o lo tatou uso pele, ma o lea ua tatou tuuina atu ai lona tino i le eleele; . . . ina ia faamautinoa lona faamoemoe i le Toe Tū i le ola e faavavau e ala i lo tatou Alii o Iesu Keriso.”—The Book of Common Prayer.

Atonu e tomānatu ai se tasi i lenei faaupuga, pe faamata o aʻoaʻo e le Tusi Paia le toe tū po o le aʻoaʻoga o le agaga e lē mafai ona oti. Ae peitaʻi, seʻi mātau le faamatalaga a le polofesa Porotesano Falani e suafa  iā Oscar Cullmann. Na ia tusia i lana tusi Po o Ola Pea le Agaga pe Toe Tutū Ē na Maliliu?: “E telē se eseesega o le talitonuga faa-Kerisiano o le toe tutū o ē ua maliliu ma le talitonuga Eleni i le lē mafai ona oti o le agaga. . . . E ui lava na faafesootaʻia e le lotu Kerisiano nei talitonuga e lua, ae i aso nei ua lē mafai ona faaeseesea e tagata Kerisiano. Ou te lē manaʻo e natia ai fua le mea o oʻu talitonu i ai e moni faapea isi. . . . O le aano moni o le Feagaiga Fou, e faaautū atu i le faatuatua i le toe tū. . . . O lona uiga, o lē ua maliu e toe faatūina e le Atua.”

E lētioa la, ua lē mautonu tagata e faatatau i le oti ma le toe tū. Ina ia aveesea lenā lē mautonu, e ao ona tatou iloilo le Tusi Paia, lea o loo faaalia ai e Lē na faia le tagata, o Ieova le Atua, le mea moni. Ua taʻua i le Tusi Paia le tele o toe tū. Seʻi o tatou tilofaʻia ni tala se fā ma iloilo po o le ā ua faaalia ai.

‘Na Maua Mai e Fafine o Latou Tagata Oti Ina ua Toe Tutū Mai’

I lana tusi i tagata Iutaia na avea ma Kerisiano, na faapea mai ai Paulo, na maua e fafine faatuatua ‘o latou tagata oti ina ua toe tutū mai.’ (Eperu 11:35) O se tasi o na fafine sa nofo i Sarefata, o se aai Foinie e latalata i Saitonu i le talafatai o le Metitirani. O ia o se fafine ua oti lana tane, sa ia talileleia le perofeta a le Atua o Elia ma fafaga iā te ia e ui i le tetele o le oge. Ae talofa e, sa maʻi si ana tama ma oti ai. Na ave loa e Elia o ia i le potu i luga i le mea o nofo ai ma ole atu iā Ieova e toe faatū mai le tama. Na faia se vavega ona toe “ola ai lea o ia.” Na toe avatu e Elia le tama i lona tinā ma faapea atu: “Faauta mai, ua ola lau tama.” O le ā le lagona o le fafine? Na ia faapea atu ma le fiafia: “O lenei, ua ou iloa i lenei mea o le tagata o le Atua oe; o le afioga foʻi a Ieova ua oo mai i lou fofoga e moni lea.”—1 Tupu 17:22-24.

Sa nonofo se ulugalii e toetoe 60 maila (100 kilomita) i saute o Sarefata, o ē na tausia lelei le perofeta o Elisaia, o lē na suitulaga iā Elia. Sa lauiloa le avā i le aai o Sunema. Na la malilie ma lana tane e nofo Elisaia i se potu i luga o lo laʻua fale. Na matuā faafiafiaina le ulugalii, ina ua fanaua e le fafine se la tama tama. A o tuputupu aʻe le tama, e masani ona ia faatasi atu i lona tamā i le fanua i le taimi o le seleselega. Na tupu se faalavelave faafuaseʻi i se tasi o aso. Na tagi le tama i le tigā o lona ulu. Na avatu faavavevave o ia e le auauna i le fale. Ua sii o ia e lona tinā i ona vae ae paga lea ua oti o ia. Na manatu le tinā faavauvau e alu atu iā Elisaia mo se fesoasoani. Na la malaga atu ma se auauna i le itu i mātū i sisifo o le mauga o Karamelu, o i inā o loo nofo ai Elisaia.

Na auina muamua atu e le perofeta lana auauna o Kiasi, ma e oo atu ua oti le tama. Na mulimuli atu Elisaia ma le fafine, ae peitaʻi, o le ā na tupu ina ua la taunuu atu i Sunema? Ua faamatala mai e le 2 Tupu 4:32-37: “Ua ulufale atu Elisaia i le fale, faauta foʻi, o le tama ua oti, ua faataoto i luga o  lona moega. Ua ulu atu o ia, ua pupuni foʻi le faitotoʻa, ua i totonu i laʻua, ona tatalo atu ai lea o ia iā Ieova. Ona alu aʻe lea o ia, ua faō i luga o le tama; ua faatatau lona gutu i lona gutu, ma ona mata i ona mata, ma ona lima i ona lima; ua taoto o ia i ona luga; ona māfanafana lea o le tino o le tama. Ona foʻi atu lea o ia, ua taʻifoʻifaatasi ona savali i le loto fale; ona alu aʻe ai lea, ua taoto o ia i ona luga; ona mafatua faafitu ai lea o le tama, ua pupula aʻe foʻi mata o le tama. Ona valaau lea o ia iā Kiasi, ua faapea atu, Valaau ia i lenā tamaʻitaʻi Sunema. Ona valaau atu lea o ia i ai. Ua sau foʻi o ia iā te ia, ona fai atu ai lea o ia, Sii aʻe ia o lau tama. Ona ulu mai lea o ia, ua faapaʻū i ona vae, ua ifo toʻele; ona sii mai lea o lana tama, ua alu.”

E pei o le fafine i Sarefata, na faapena foʻi ona iloa e le fafine Sunema o le mea na tupu o le mana o le Atua. Na olioli nei fafine ina ua toe faatūina e le Atua ē pele iā i laʻua.

Toe Tū i Taimi o le Talaʻiga a Iesu

Pe tusa ma le 900 tausaga mulimuli ane, na toe iai foʻi se isi toe tū e lē mamao ma le itu i mātū o Sunema i le nuu o Naina. A o malaga atu Iesu ma ona soo mai i Kapanaumi, ma ina ua latalata atu i le faitotoʻa o le aai o Naina, na latou fetaiaʻi ai ma se solo o se falelauasiga o se maliu. Na silafia ai e Iesu se fafine ua maliu lana tane ae ua faatoʻa oti foʻi lana tama. Na fetalai atu Iesu iā te ia e aua le tagi. Na faamatalaina e Luka, o ia o se fomaʻi le mea na sosoo ai: “Ua maliu ane o ia, ua paʻi atu i le fata; ona tutū mai ai lea o le ʻau fata, ona fetalai atu lea o ia, ‘Le tauleʻaleʻa e, ou te fai atu iā te oe, Inā tulaʻi ia.’ Ona nofo ai lea i luga o lē na oti, ua tautala; ona ia tuuina atu lea o ia i lona tinā.” (Luka 7:14, 15) Na vivii i le Atua ē na vaai i lenei vavega. Na faalogo tagata i Iutaia ma itumalo latalata ane i lenei toe tū. O le mea e mataʻina ai, na faalogo i ai soo o Ioane le papatiso ma latou faamatala atu le vavega iā te ia. O lea la, na ia auina atu ai ona soo e toʻalua e saʻili iā Iesu ma fesili atu po o Ia o le Mesia. Na fetalai atu Iesu iā i laʻua: “Inā ō atu ia oulua, ma faailoa atu iā Ioane o mea ua oulua vaai i ai, ma faalogo i ai; ua pupula tauaso, ua savavali pipili, ua faamamāina lepela, ua logo tutuli, ua faatutūina ē na oti, ua folafolaina le tala lelei i ē matitiva.”—Luka 7:22.

O le vavega lauiloa o le toe tū na faia e Iesu, ina ua ia toe faatūina lana uō o Lasalo.  Ua fai sina tuai ona taunuu Iesu ae ua maliu Lasalo i lona aiga. E fā aso talu ona maliu Lasalo ae faatoʻā taunuu Iesu i Petania. Ina ua faatonu e Iesu e aveese le maa i le gutu o le tuugamau, na vave ona faapea atu Mareta: “Le Alii e, ua oo ina manogi, auā o lona pō fā lenei.” (Ioane 11:39) Peitaʻi, e leʻi avea le faasolo ina pala o le tino o Lasalo, ma mea e lē mafai ai ona ia toe tū. Na fetalai atu Iesu ona “alu ai lea i fafo o lē na oti, ua fusifusia ona vae ma ona lima i ie na tanumaʻi, ua fusi foʻi ona mata i le solosolo.” O gaoioiga mulimuli ane a fili o Iesu, na faamaonia ai e moni o Lasalo lea ua toe faatūina.—Ioane 11:43, 44; 12:1, 9-11, LT.

O le ā ua tatou malamalama ai mai nei toe tū e fā? Ina ua toe tutū nei tagata, na toe soifua mai i o latou foliga na iai muamua. Na iloa i latou e tagata e oo lava i o latou tauaiga vavalalata. E leai ma se tasi o i latou nei na toe faatūina, na talanoa i se mea na tupu i le taimi puupuu lea na maliliu ai. E leʻi taʻua foʻi e se tasi le alu atu i se isi lalolagi. E foliga mai na toe tutū mai i latou i le soifua mālōlōina lelei. Na taʻua e Iesu, e pei lava sa momoe i latou ma ua toe feala mai. (Ioane 11:11) Ae peitaʻi, ina ua mavae se taimi na toe maliliu i latou.

O se Faamoemoe Matagofie le Toe Faatasia ma Ē Pele

E pei ona taʻua i le mataupu muamua atu, ina ua mavae sina taimi talu le oti o Owen, na asiasi ai lona tamā i lo latou tuaoi. Na ia vaaia ai i luga o le laulau se pepa o loo faasilasila ai se lauga lautele ua faatulagaina e Molimau a Ieova. O lona matua, “O Fea o Iai Ē ua Maliliu?” ma sa ia naunau i ai. O le mea tonu lava lea o loo ia taumānatu i ai. Na ia auai i le lauga ma maua faamāfanafanaga moni mai le Tusi Paia. Na ia iloa ai e lē o puapuagatia ē o maliliu. Na i lo le faapuapuagatia i se afi po o le ave foʻi e le Atua e fai ma agelu i le lagi, o i latou o ē maliliu e aofia ai ma Owen, o loo faatalitali i le tuugamau seʻia oo i le taimi e toe tutū mai ai.—Failauga 9:5, 10; Esekielu 18:4.

Pe na tupu se faalavelave faafuaseʻi faapena i lou aiga? Po ua e tomānatu e pei o le tamā o Owen, po o fea o iai ē pele ua maliliu, ma pe mafai ona toe vaai iā i latou? Afai o le tulaga lenā, matou te valaaulia oe ina ia iloilo le mea ua aʻoaʻo e le Tusi Paia e faatatau i le toe tū. Atonu e te taumānatu: ‘O afea le toe tū? O ai o le a toe tutū?’ Faamolemole, ia faitau mataupu o loo mulimuli mai mo se talanoaga o nei fesili ma isi.

[Faamatalaga pito i lalo]

[Ata i le itulau 5]

Na ole Elia iā Ieova ina ia toe faaola le tama

[Ata i le itulau 5]

Na tofia e Ieova Elisaia e toe faatū le tama a le fafine Sunema

[Ata i le itulau 6]

Na toe faatū e Iesu le tama a le fafine Naina ua oti lana tane

[Ata i le itulau 7]

O le a toe autasia aiga ma ē pele iā i latou i le toe tū