Ia Loto Tetele a o Feagai ma Teteega

NA FAAMALOSIA e tagata ua matuā feita lava ia Kaio ma Aritako, o ni aumea e toʻalua a le aposetolo o Paulo e ulufale i le fale mataaga i Efeso. O inā na alalaga atu ai le motu o tagata ua matuā feita lava mo itula e lua: “Ua silisili Tiana o Efeso.” (Galuega 19:28, 29, 34) Pe na tumau aumea a Paulo i le feagai ai ma teteega? Ma o le ā na māfua ai lenei mea?

Na taulau manuia Paulo i le talaʻiga i le aai o Efeso mo le tusa ma le tolu tausaga. O le iʻuga, e toʻatele tagata Efeso na lē toe tapuaʻi i ni tupua. (Galuega 19:26; 20:31) O le tupua masani o Efeso o se tamaʻi faatusa siliva o Tiana, le atua o le fanautama, lea e te iloa atu le aai mai le malumalu o le atua lenei. O nei tamaʻi tupua o le malumalu o Tiana sa faaaogāina foʻi e tagata e fai ma tapui po o le teuteuina ai foʻi o latou maota. O le mea moni, e lē faatauina e Kerisiano nei faatusa.—1 Ioane 5:21.

Na talitonu Temetiu, o se tasi o le ʻau fai mea ario faapea, o le galuega a Paulo ua lamatia ai la latou pisinisi lea na maua ai a latou oloa e tele. O le taʻu atu i tagata o tala e lē moni atoatoa faapea ma tala soona fai, na faatalitonuina ai e Temetiu tagata tufuga e faapea, o le a lē toe tapuaʻi tagata o Asia Itiiti iā Tiana. O le taimi lava na amata ai ona alalaga tagata fai mea ario e viia Tiana, na tupu ai le vāvāō tele ma le fenuminumiaʻi o tagata.—Galuega 19:24-29.

E faitau afe tagata na potopoto i le fale mataaga, lea e mafai ona ofi ai tagata e 25,000. Na manaʻo Paulo e tautala atu i ia tagata lē pulea, ae na lapataʻia o ia e tagata aloaʻia na alolofa iā Paulo e aua le faia. Na oo ina mafai e le tusiupu i le aai ona faatoʻafilemuina le motu o tagata, ma sa mafai ai ona sosola ese Kaio ma Aritako e leʻi afāina.—Galuega 19:35-41.

I aso nei, e mafai foʻi ona fesagaʻi tagata o le Atua ma tagata tetee faatupu vevesi a o faaauau la latou faiva. E masani ona latou talaʻia le tala lelei i aai e taatele ai le ifo i tupua, amioga lē mamā faaleituaiga ma le solitulafono. E ui i lea, e latou te faataʻitaʻi ma le loto tele i le aposetolo o Paulo, lē na ‘leʻi natia le aʻoaʻo atu i luma o le nuu, atoa foʻi ma lea fale ma lea fale,’ i le aai o Efeso. (Galuega 20:20) Ma e faapena foʻi ona latou fiafia pe a latou vāai ‘ua matuā tupu tele ma ua manumalo le afioga a le Alii.’—Galuega 19:20.

[Ata i le itulau 30]

Faatafunaga o le fale mataaga i Efeso