Le Auala e Faitauina ai o Tatou Aso

“IA FAAPEA ona e aʻoaʻo mai iā i matou e faitauina o matou aso, ina ia maua ai le poto i o matou loto.” (Salamo 90:12) O le tatalo lenā ma le loto maulalo a le tusitala o le Tusi Paia o Mose. O le ā le mea patino na ia ole atu ai? Pe tatau ea ona tatou faia se talosaga faaaloalo faapena?

I le fuaiupu e 10, na auē ai Mose i le saasaa o le olaga o le tagata. I se isi taimi na ia tusia ai se faaupuga a Iopu lea na faapea mai: “O le tagata ua fanau mai i le fafine, ua saasaa ona aso, mona ua tumu i le atuatuvale.” (Iopu 14:1) E manino mai sa silafia lelei e Mose le puupuu tele o le soifuaga o le tagata lē lelei atoatoa. O le ala lea, na ia vaai ai i aso taʻitasi o le olaga o se meaalofa tāua tele. I le taulaʻi atu o lenei talosaga i le Atua, na faailoa atu ai e Mose lona faanaunauga ina ia soifua ma le atamai i ona aso o totoe, i se auala e faafiafiaina ai Lē na Faia o ia. Pe lē tatau foʻi la iā i tatou ona faaalu o tatou aso i se auala aogā? O lo tatou faanaunauga lenā e ao ona iai pe a tatou mananaʻo e maua le finagalo malie o le Atua i le taimi nei.

E iai se isi vala na uunaʻia ai Mose ma Iopu, ma o se vala e ao foʻi ona uunaʻia ai i tatou. O nei tane e toʻalua sa la vaai atu i se taui i le lumanaʻi, o le ola i le lalolagi i tulaga e sili atu ona lelei. (Iopu 14:14, 15; Eperu 11:26) Pe a tatou maua lenā faamanuiaga i le lumanaʻi, o le a lē toe faapuupuuina galuega lelei a se tasi ona o le oti. O le fuafuaga a Lē na Foafoaina Mea, ia ola e faavavau ē faamaoni i se lalolagi parataiso. (Isaia 65:21-24; Faaaliga 21:3, 4) E mafai ona e mauaina lenā faamoemoe pe a ‘faitauina o tatou aso, ina ia maua ai le poto i o tatou loto.’