O le ā le Uiga o le Toe Tū mo Oe?

“O loo e faamafola lou aao, ma faamaoona le manaʻo o mea ola uma lava.”—SALAMO 145:16.

1-3. O le ā le faamoemoe na iai i isi mo le lumanaʻi? Ia faataʻitaʻi.

NA AUAI faatasi Christopher e iva tausaga ma lona uso matua ma tauaiga o lona tinā, i le galuega talaʻi e latalata i Manchester, i Egelani. Na faamatala mai e le mekasini o le Awake! le mea na tupu. “Na latou ō atu e tafafao i Blackpool, o se nofoaga e latalata i le sami. Na aofia i latou uma e toʻaono i le 12 o tagata na maliliu i se faalavelave i le auala, na faamatalaina e leoleo, o se mea ‘matuā mataʻutia.’”

² Na auai le aiga i le Suʻesuʻega Tautusi a le Faapotopotoga i le pō a o lumanaʻi le faalavelave, sa talanoaina ai le mataupu e uiga i le oti. Na faapea mai le tamā o Christopher: “O ia o se tamaitiiti poto. Na ia talanoa i lenā pō e uiga i le lalolagi fou ma lona faamoemoe i le lumanaʻi. A o faaauau le suʻesuʻega, na faapea mai Christopher: ‘O le aogā o le avea ma Molimau a Ieova, e ui lava e tigā le oti, ae tatou te mautinoa o le a toe fevaaiaʻi i se aso.’ E leai ma se tasi o i matou na auai i lenā pō, na iloa o le a lē mafaagaloina na upu.” *

³ Muamua atu i le tausaga e 1940, na iloa ai e Franz, o se Molimau Oseteria, o le a faasalaina o ia e ala i le vavae ese o lona ao, ona o le faamaoni iā Ieova. Na tusi atu Franz i lona tinā mai le nofoaga o faasalaga i Berlin: “Ua ou iloa, afai ou te auai i le taua, o lona uiga ua ou faia se agasala ua tatau i ai le oti. O se matuā lē faamaoni lenā iā te aʻu. E leai soʻu faamoemoe mo le toe tū. . . . Si oʻu tinā pelē ma nai oʻu uso ma tuafāfine, o le asō na taʻu mai ai, o le a faasalaina aʻu i le oti i le taeao a taeao, o lea ia aua tou te matataʻu. O lea ou te maua le malosi mai i le Atua, e pei lava ona sa iai i Kerisiano moni uma i aso anamua. . . . O le a tatou toe feiloaʻi i le toe tū, pe afai tou te tumau seʻia oo i le oti. . . . Tatou toe feiloaʻi.” *

4. O le ā se aafiaga iā te oe o nei mea na tutupu, ma o le ā o le a tatou tilofaʻia?

⁴ Sa matuā tāua le toe tū iā Christopher ma Franz ma sa moni iā i laʻua. E mautinoa e pāʻia o tatou loto i nei tala! Ina ia loloto lo tatou talisapaia o Ieova ma faamalosia lo tatou faamoemoe i le toe tū, seʻi o tatou tilofaʻia le māfuaaga o le iai o lea faamoemoe ma le auala e ao ona aafia ai le tagata lava ia.

O se Vaaiga o le Toe Tū i le Lalolagi

5, 6. O le ā ua faaalia i le vaaiga na faamauina e Ioane i le Faaaliga 20:12, 13?

⁵ I se vaaiga o mea tutupu i le pulega a Iesu Keriso i le afe tausaga, na vaaia ai e Ioane le toe tū i le lalolagi. Na ia faapea mai: “Na aʻu iloa foʻi o ē na oti, o tagatānuu atoa ma alii. . . . Ua avaʻe foʻi e le sami ē na oti sa i ai, ua avaʻe foʻi e le oti ma seoli ē na oti sa i ai.” (Faaaliga 20:12, 13) Po o le ā lava le tulaga o se tasi, pe “alii” po o le “tagatānuu”  ae o le a faasaʻolotoina i latou uma o i tuugamau. O le a toe faatūina foʻi i latou na maliliu i le sami. O lenei tulaga matagofie, o se vala o le finagalo o Ieova.

⁶ E amata le pulega a Keriso i le afe tausaga i le saisaitia o Satani i le tō e lē gata. I le taimi o lenā pulega, o le a leai se tasi o i latou na toe faatūina po o se tasi na sao mai le puapuaga tele, o le a faasesē e Satani, auā o le a saisaitia o ia. (Faaaliga 20:1-3) Atonu o se taimi umi iā te oe le afe tausaga, ae o le mea moni, i le silafaga a Ieova “e tusa ma le aso e tasi.”—2 Peteru 3:8.

7. O le ā le faavae mo le faamasinoina i le taimi o le pulega a Keriso i le afe tausaga?

⁷ E tusa ai ma le faaaliga, o le pulega a Keriso i le afe tausaga, o le taimi lenā o le faamasinoga. Na tusi Ioane: “Na aʻu iloa foʻi o ē na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foʻi ma le tasi tusi, o le tusi lea o le ola; ona faamasinoina ai lea o ē na oti i mea ua tusia i tusi, e tusa ma a latou amio . . . e taʻitasi foʻi o i latou ma faamasinoina e tusa ma a latou amio.” (Faaaliga 20:12, 13) Mātau mai, o lenei faamasinoga, e lē faavaea i gaoioiga a le tagata na fai a o leʻi maliu. (Roma 6:7) Na i lo lea, e fesootaʻi atu i “tusi” ia o le a tatalaina. E faalagolago le tusia o le igoa o se tasi i le “tusi o le ola,” i ana gaoioiga na fai pe a māeʻa ona aʻoaʻoina mea o tusia i na tusi.

‘Toe Tū i le Ola’ po o le ‘Toe Tū i le Faasala’

8. O ā iʻuga e lua mo i latou e toe tutū mai?

⁸ Muamua i le faaaliga a Ioane, na faamatalaina ai Iesu ua iā te ia “ki o seoli ma le oti.” (Faaaliga 1:18) Ua auauna o ia o “le Alii o le ola,” a Ieova, ma ua tuuina atu iā te ia le mana e faamasino ai “o ē ola atoa ma ē ua oti.” (Galuega 3:15; 2 Timoteo 4:1) E faapefea ona ia faia lenei mea? E ala i le toe faatutūina mai o ē ua maliliu. Na fetalai Iesu i le motu o tagata na ia talaʻi atu i ai: “Aua tou te ofo i lenei mea, auā e oo mai le aso e faalogo ai i lona leo o i latou uma ua i tuugamau, ma latou ō mai ai.” Na ia toe faaopoopo mai: “O ē na amio lelei, e toe tutū i le ola; a o ē na amio leaga, e toe tutū i le faasala.” (Ioane 5:28-30) O lea la, o le ā le faamoemoe o tane ma fafine faamaoni i aso anamua?

9. (a) O ā mea o le a aʻoaʻoina e le toʻatele o le a toe tutū mai? (e) O le ā le galuega tele tau aʻoaʻoga o le a faia?

⁹ Pe a toe tutū nei auauna faamaoni anamua, o le a latou iloa ai o le faamoemoe na latou faatuatua i ai o se mea moni. O le a fiafia i latou e iloa lē na avea ma fanau a le fafine a le Atua, lea na taʻua i le uluaʻi valoaga o le Tusi Paia, i le Kenese 3:15! Maʻeu lo latou olioli e faalogo, na faamaoni le Mesia o Iesu e oo i le oti, o lea na ia tuuina atu ai lona soifua e fai ma taulaga togiola! (Mataio 20:28) O le a olioli ē faafeiloaʻia ē toe tutū mai e fesoasoani iā i latou e talisapaia lenei sauniuniga o le togiola, o se faailoaga o le alofa tunoa o Ieova. Pe a iloa e ē e toe tutū mai mea ua faia e le Malo o le Atua e faataunuu ai le fuafuaga a Ieova mo le lalolagi, e lē taumatea o le a vivii o latou loto iā Ieova. O le a tele se avanoa latou te faaalia ai le faamaoni i lo latou Tamā alofa o i le lagi ma lona Alo. O i latou uma o ē o le a ola ai, o le a faia se sao i le galuega tele tau aʻoaʻoga mo le faitau piliona o ē ua toe faatutūina mai i tuugamau. O i latou foʻi na e manaʻomia ona taliaina le sauniuniga o le togiola a le Atua.

10, 11. (a) O ā avanoa o le a maua e tagata uma i le lalolagi i le afe tausaga? (e) E faapefea ona aafia ai i tatou?

¹⁰ Pe a toe faatūina Aperaamo, o le a lotomalie o ia e soifua i lalo o le pulega a lenā “aai” na ia tulimataʻia. (Eperu 11:10) O le a  matuā fiafia Iopu o le tagata faamaoni e iloa, o le auala na ia soifua ai na faamalosia ai isi auauna a Ieova, o ē na fesagaʻi ma tofotofoga o lo latou faamaoni! O le a matuā naunau foʻi Tanielu e fia iloa le faataunuuina o valoaga na faagaeeina ai o ia e tusia!

¹¹ O le mea moni, o i latou uma e soifua i le lalolagi fou amiotonu, pe toe tutū po o le faasaoina i le puapuaga tele, o le a tele ni mea e aʻoaʻoina e uiga i le fuafuaga a Ieova mo le lalolagi ma i latou e aināina. O le faamoemoe o le ola ma vivii iā Ieova e faavavau, e mautinoa o le a avea ai le polokalame tau aʻoaʻoga i le afe tausaga o se fiafiaga moni. Ae peitaʻi, o le itu tāua, o mea tatou te faia e i tatou lava taʻitoʻatasi, a o aʻoaʻoina mea o tusia i ia tusi tāʻai. Pe o le a tatou faatatauina ea mea ua tatou aʻoaʻoina? Pe o le a tatou manatunatu loloto ma faatatau faamatalaga tāua ia o le a faamalosia ai tatou e tetee i osofaʻiga mulimuli a Satani e faaliliuese ai mai le upu moni?

12. O le ā o le a fesoasoani i tagata uma ia faia se sao i le galuega tau aʻoaʻoga ma le faaliliuina o le lalolagi e avea ma parataiso?

¹² Ia aua neʻi galo faamanuiaga matagofie o le a maua mai le faatatauina o aogā o le taulaga togiola a Keriso. O i latou o le a toe faatutūina, o le a lē toe mamaʻi po o le a toe atoatoa le malosi o le tino. (Isaia 33:24) O le soifua mālōlōina lelei atoatoa, o le a mafai ai e tagata o aināina le lalolagi fou, ona fai se sao i le galuega tau aʻoaʻoga mo le faitau piliona o i latou na toe tutū mai i le ala o le ola. O le a fai foʻi so latou sao i le galuega telē e leʻi faia muamua lava i le lalolagi, o le faaliliuina lea o le lalolagi i se parataiso ina ia viia ai Ieova.

13, 14. O le ā le fuafuaga o le toe tatala mai o Satani i le tofotofoga mulimuli, ma o ā iʻuga mo i tatou taʻitoʻatasi?

¹³ Pe a faasaʻoloto Satani mai le tō e lē gata mo le tofotofoga mulimuli, o le a taumafai o ia e toe faasesē tagata. E tusa ai ma le Faaaliga 20:7-9, o ‘nuu ua ia faasesē’ po o tagata, ua paʻuū i aafiaga leaga a Satani, o le a faamasinoina i le faaumatiaga: “Ona alu ifo lea o le afi mai le Atua i le lagi, ua susunu ai iā te i latou.” O lenei faasalaga, o lona uiga, o le toe tū i le faasala mo i latou o ē toe tū i le afe tausaga. I sona faaeseesega, o tagata faamaoni e toe faatutūina, o le a maua le meaalofa o le ola e faavavau. E moni, o lo latou toe tū o le “toe tutū i le ola.”—Ioane 5:29.

¹⁴ E faapefea i le faamoemoe o le toe tū ona faamāfanafana ai i tatou i le taimi nei? E sili atu ona tāua, o le ā e ao ona tatou faia ina ia faamautinoa ai o le a tatou maua aogā i le lumanaʻi?

Lesona Tatou te Aʻoaʻoina i le Taimi Nei

15. E faapefea i le talitonu i le toe tū ona fesoasoani iā te oe i le taimi nei?

¹⁵ Atonu ua maliu se tasi e pele iā te oe, ma e te ono feagai ma se suiga tele ona o lenā mea. Ua avatu e le toe tū iā te oe le toʻafilemu ma le malosi e lē o maua e isi ona latou te lē o iloa le upu moni. Na apoapoaʻi atu Paulo i tagata Tesalonia: “Matou te loto ina ia outou iloa, le ʻau uso e, e uiga i ē o momoe [o ē ua feoti], ina neʻi outou faanoanoa, pei o isi e leai so latou faamoemoe.” (1 Tesalonia 4:13) Po o e faaata i lou mafaufau lou iai i le lalolagi fou e molimauina le toe tū? O lea la, ia saʻili le faamāfanafanaga i le taimi nei, e ala i le manatunatu loloto i le faamoemoe o le toe faafeiloaʻia o ē pele iā te oe.

16. O ā ou faalogona e ono iai pe a oo i le toe tū?

¹⁶ E te ono mafatia i āuga o se gasegase tugā, ona o le fouvale a Atamu. Aua neʻi avea na mafatiaga e galo ai iā te oe le faamoemoe fiafia o le toe tū, ma le toe soifua i  le toe faafouina o le soifua mālōlōina lelei ma le malosi i le lalolagi fou. Pe a e toe soifua mai, o le a e vaaia ai laufofoga fiafia o ē e naunau e tofusia faatasi ma oe i le fiafia ona o lou toe tū mai. E mautinoa o le a e loto faafetai i le Atua ona o lona alofa.

17, 18. O ā lesona tāua e lua e ao ona tatou manatua?

¹⁷ I le taimi nei, seʻi o tatou iloiloina ni lesona se lua e ao ona tatou manatua. Muamua, o le tāua o le auauna ma le loto atoa iā Ieova i le taimi nei. O le faaaʻoaʻo i lo tatou Matai, o Iesu Keriso, ua faaalia i lo tatou tuua o mea e tatou te fiafia i ai, lo tatou alolofa mo Ieova ma tuaoi. Pe afai e aveesea e teteega po o sauāga o tatou ola po o le saʻolotoga, ia maumauaʻi e tumau pea i le faamaoni e tusa lava po o a faigatā tatou te fesagaʻi. Pe afai e faamataʻuina i tatou e ē tetee i le oti, ua avea le toe tū e faamāfanafana ma faamalosia i tatou e tumau ai i le faamaoni iā Ieova ma lona Malo. Ioe, o lo tatou maelega mo le talaʻiga o le Malo ma le faia o soo, o le a aumaia ai iā i tatou le faamoemoe o faamanuiaga e faavavau ua teuina e Ieova mo ē amiotonu.

¹⁸ O le lesona lona lua, e fesootaʻi atu i le auala tatou te fesagaʻi ai ma tofotofoga ona o le lē lelei atoatoa. O lo tatou iloa o le toe tū, ma le talisapaia o le alofa o Ieova, e faamalosia ai i tatou e tumau ma le mausalī i le faatuatua. Na lapataʻi mai Ioane: “Aua tou te mananaʻo i le lalolagi, po o mea o i ai i le lalolagi. Pe afai e manaʻo se tasi i le lalolagi, e lē o iā te ia le alofa i le Tamā. Auā o mea uma lava o i le lalolagi, o le tuʻinanau o le tino, ma le tuʻinanau o mata, ma le faalialia o lenei olaga, e lē mai le Tamā ia, a e mai le lalolagi. E mavae atu foʻi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:15-17) O le a tatou lē tosina atu i le manaʻo tele i meafaitino a le lalolagi, pe a faatusatusa atu “i le ola moni.” (1 Timoteo 6:17-19) O le a tatou maumauaʻi e tetee atu pe afai e tofotofoina i tatou e faia amioga lē  mamā. Pe afai tatou te feoti a o lumanaʻi Amaketo, o ni amioga sa faaauau ona tatou faia e lē fiafia i ai le finagalo o Ieova, o le a tuua ai i tatou i se tulaga e pei o i latou e leai se faamoemoe mo le toe tū.

19. O le ā le faaeaga sili e lē tatau ona galo iā i tatou?

¹⁹ E sili atu i lenā, e lē tatau ona tatou faagaloina le faaeaga sili o le faafiafiaina o le finagalo o Ieova i le taimi nei e oo i le faavavau. (Faataoto 27:11) O lo tatou faamaoni e oo i le oti po o le iʻuga o lenei lalolagi amioleaga, e taʻu atu ai iā Ieova po o lē fea itu o le finauga i le pule silisili ese o loo tatou tutū ai. O se fiafiaga le ola i le Parataiso i le lalolagi, a lē faasaoina i le puapuaga tele po o le mauaina o le toe tū matagofie!

Faamalieina o Tatou Moomooga

20, 21. O le ā o le a fesoasoani e tumau ai pea i le faamaoni e tusa lava pe lē o taliina uma a tatou fesili e faatatau i le toe tū? Ia faamatala.

²⁰ E lē o taliina uma ai i la tatou talanoaga fesili e uiga i le toe tū. O le a faapefea ona faatulaga e Ieova mea mo i latou ua maliliu ae ua faaipoipo? (Luka 20:34, 35) Pe o le a tupu le toe tū i le nofoaga na maliliu ai tagata? Po o le a toe tutū mai i latou e latalata i le mea o nonofo ai o latou aiga? O loo iai le tele o isi fesili e faatatau i le faatulagaga o le toe tū. Ae peitaʻi, e ao ona tatou manatua upu a Ieremia: “O loo agalelei Ieova i ē faatalitali iā te ia, o le tagata e saʻili iā te ia. E lelei ona faamoemoe ma le faalologo i le olataga mai iā Ieova.” (Auega 3:25, 26) O le a taliina a tatou fesili uma i le taimi atofaina a Ieova. Aiseā tatou te mautinoa ai?

²¹ Ia mafaufau i upu a le faisalamo ina ua ia pese iā Ieova: “O loo e faamafola lou aao, ma faamaoona le manaʻo o mea ola uma lava.” (Salamo 145:16) E suia o tatou moomooga pe a faasolo ina tatou matutua. O mea sa tatou moomoo i ai a o tatou laiti, e lē o mea na ua tatou faanaunau i ai i le taimi nei. E aafia la tatou vaaiga i le olaga e ala i mea e oo iā i tatou aemaise ai o tatou faamoemoega. Peitaʻi, po o ā lava o tatou moomooga i le lalolagi fou, o le a faamalieina uma lava e Ieova.

22. Aiseā e ao ai ona viia Ieova?

²² O le mea sili ona tāua mo i tatou uma, ia faamaoni. “E suʻesuʻeina i auauna tausi mea ina ia iloa ai le tagata ua faamaoni.” (1 Korinito 4:2) O i tatou o auauna tausi mea o le tala lelei o le Malo o le Atua. O lo tatou faanaunauga o le faalauiloaina o lenei tala lelei i ē uma tatou te feiloaʻi atu i ai, ma fesoasoani ia tatou tumau i le ala o le ola. Ia manatua, o le “tausaga ma le mea e tupu ai” iā i tatou uma. (Failauga 9:11) Ina ia faaitiitia popolega e māfua ona o le lē mautonu, ia tausisia pea lou faatuatua i le faamoemoe matagofie o le toe tū. Pe afai e foliga mai e te oti a o lumanaʻi le pulega a Keriso i le afe tausaga, e mafai ona faamāfanafanaina oe i le mautinoa o le a oo mai le mapusaga. I le taimi a Ieova, o le a mafai ai ona e toe fai atu upu a Iopu e faasino atu i Lē na faia i tatou: “Ia e valaau mai, ona ou tali atu ai lea iā te oe.” E ao ona viia Ieova, o Lē na finagalo e toe faatutūina i latou uma o loo ia manatua!—Iopu 14:15.

[Faamatalaga pito i lalo]

Pe E te Manatua?

• O le ā le faavae o le faamasinoina o tagata i le afe tausaga?

• Aiseā o le a ‘toe tutū ai i le ola’ isi a o isi e “toe tutū i le faasala”?

• E faapefea ona faamāfanafanaina i tatou e le toe tū i le taimi nei?

• E faapefea i upu a le Salamo 145:16 ona fesoasoani iā i tatou i fesili e leʻi taliina e uiga i le toe tū?

[Fesili mo le Suʻesuʻega]

[Ata i le itulau 21]

E faapefea i le talitonu i le toe tū ona fesoasoani iā i tatou i le taimi nei?