Pe a Maliu Faafuaseʻi se Tasi

SA TAALO Owen, o se tama e lua ma le ʻafa tausaga i le fale tāʻele. Sa ia aʻe i luga o se kapoti e tuu ai vai, lea sa manatu ona mātua e lē mafai ona ia au i ai. Na ia maua ai se fagu na tosina i ai lana vaai. Na ia tatala ma inu le vai sa i totonu, ma na tupu ai loa se faalavelave faafuaseʻi.

Ae o le vai sa ia inumia o se mea oona, ma na maliu ai Owen. Na matuā faanoanoa ona mātua. Na saʻili lona tamā o Percy mo ni faamāfanafanaga mai i lana lotu. Na ia fesili, “Aiseā ua tupu ai lenei mea?” Na tali le faifeʻau, “Ua finagalo le Atua i se isi tamaʻi agelu i le lagi.” Ona o le lofitūina i le faanoanoa, na manatu ai lenei matua faavauvau e lē saʻo lenei mea. Pe sa finagalo moni lava le Atua ia tupu lenā mea? Na filifili Percy e lē toe alu i lana lotu ona o le lē fiafia.

Na tomānatu pea Percy, ‘Po o mafatia pea loʻu atalii? Pe o le a ou toe vaai ea iā te ia?’

E te ono tomānatu foʻi i le mea e tupu pe a maliu se tasi, ma pe o le a toe aufaatasi ma ē pele ua maliliu i le lumanaʻi. Ua iai tali manino ma faamāfanafana loto i le Tusi Paia i nei fesili, mo i latou uma lava na fesagaʻi ma mala faafuaseʻi faapea. E lē gata i lea, ua faaalia ai le matagofie o le faamoemoe o le toe tū, lea na folafola mai e le Atua.

Faamolemole ia faitau i le mataupu o sosoo mai ina ia e malamalama ai i lenei faamoemoe matagofie.