Faaaogā Tatau le Mafaufau—Aiseā ua Lē Faaaogā Tatau Ai?

“O LE ā le mea ua tupu i le tama le la? Ua ia iloa lelei lava e lē tatau ona ia faia le mea le la,” o le faamatalaga lea a le toeaina sa tilotilo atu. A o lūlū lona ulu i le lē talitonu, ae ua savali ese le isi tagata ma tomumu, “A na faaaogā tatau lona mafaufau, e na te lē faia le mea na ia fai.” Pe na e faalogo i ni faaupuga faapena? O le ā la le mea e taʻu o le faaaogā “tatau o le mafaufau”?

O le faaupuga “mafaufau tatau” e faamatalaina i le “iloa lelei,” le “malamalama,” ma le “atamai po o le faautaga poto.” E uiga atu i le iai i le tagata o le tomai e fefuafuataʻi ai mea ma filifili ma le poto. O le faaaogā tatau o le mafaufau e manaʻomia ai le tomai e mafaufau ai. O le toʻatele o tagata e sili atu iā i latou le tuu atu i isi tagata e mafaufauina mea mo i latou. E latou te faataga le ʻau fai nusipepa, o ā latou uō, po o manatu o loo taatele i tagata e fai ai a latou filifiliga.

E foliga mai ua matuā lē faaaogā tatau lava le mafaufau i le lalolagi i aso nei e pei ona mātauina e se tasi o tagata e faapea: ‘O le mea moni lava, o le faaaogā tatau o le mafaufau, ua lē o se mea o toe taatele.’ E faapefea la ona faaaogā tatau o tatou mafaufau? O ā ona aogā?

E Faapefea Ona Maua?

E ui e tele le taimi e alu i le mafaufauina o mea mai i itu uma e aafia ai, ma taumafaiga faifai pea ina ia maua le mafaufau lelei ma le utaga poto, ae o le faaaogā tatau o le mafaufau o se mea e mafai ona fai. Seʻi manatu i ni vala se tolu e fesoasoani iā i tatou ina ia faaaogā tatau le mafaufau.

Suʻesuʻe le Tusi Paia, ma usitaia ana fautuaga. Ua tusia le Tusi Paia i se gagana e sili ona lelei ma faigofie ona malamalama ai, o se fesoasoani sili lea i le mauaina o le poto ma le faautauta. (Efeso 1:8) O se faataʻitaʻiga, na timaʻi mai le aposetolo o Paulo i uso Kerisiano e faapea: “O mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foʻi o se isi amio lelei, po o se tasi mea e viia, ia outou manatunatu i ia lava mea.” (Filipi 4:8) Afai e tatou te mulimuli pea i lenei fautuaga, o le a maua ai le faautaga poto ma amioga lelei.

Aʻoaʻo mai mea e tutupu. O le faafesootaʻi atu o le faaaogā tatau o le mafaufau i le poto masani i le olaga, ua faapea mai ai se fatusolo i Suisilani: “O le faaaogā tatau o le mafaufau . . . o loo iai le poto masani ma le vaai mamao [tofā mamao].” O le mea moni, “O lē ua faigofie, e talia e ia upu uma; a o lē ua mafaufau, ua faautauta o ia i lona ala.” (Faataoto 14:15) O le faaaogā tatau o le mafaufau, e maua i le mātauina o mea, le auala e toleniina ai, ma le iloa e uiga i mea. E tatou te iloa lelei ona fai ni mea a o faagasolo taimi. O le aʻoaʻoina  mai i a tatou mea sesē e fai, e manaʻomia ai le lotomaulalo ma le agamalu. O le loto vii, o le faamaualuga, ma uiga soona fai o tagata i nei aso e gata ai e lē o se faailoga o le faaaogā tatau o le mafaufau.—2 Timoteo 3:1-5.

Filifili ma le poto aumea. O le faaaogā o le atamai ma le mafaufau, a lē o le fesoasoani iā i tatou, ia po o le ʻalofia ai foʻi o i tatou e a tatou aumea. Ua faapea mai le Faataoto 13:20: “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.” E tatou te lē mananaʻo e talia mafaufauga po o manatu o tagata e lē usiusitai i le Atua ma lē amanaʻia lana Afioga. E faaupu le manatu i le Faataoto 17:12 e faapea: “Ia fetaiaʻi ma le tagata se urosa ua avea lana toloaʻi; a e aua le fetaiaʻi ma le vale i lona valea.”

O le ā le Aogā o le Faaaogā Tatau o le Mafaufau?

E aogā tele pe a iloa faaaogā tatau le mafaufau. E maua ai le fiafia i le olaga ma faasaoina ai le taimi. O le faaaogā tatau o le mafaufau e faaitiitia ai lagona lē fiafia lea e oo mai ona o le faia o se mea ma le lē magafagafa. O i latou e leai se fuafua tatau, e latou te faafaigatā le olaga mo i latou lava. Ua faapea mai le Tusi Paia: “O le galuega a ē valelea ua lailoa ai i latou.” (Failauga 10:15) O na tagata e soona galulue mamafa ma oo ai ina vaivai; ae e leai se mea lelei o latou faataunuuina.

E anoanoaʻi le tele o fautuaga lelei a le Tusi Paia e faatatau i le tumamā, fesootaʻiga, galulue mamafa, faafetaiaʻia o le tulaga mativa ma isi lava vala o le olaga. Ua ioeina e le faitau miliona o tagata le eseesega o le taulau ma le lē taulau i o latou olaga e faalagolago i le tele na latou faatatauina ai mataupu silisili o le Tusi Paia, lea e fesoasoani iā i latou e faaalia ai le atamai.

O le faaaogā tatau o le mafaufau e tele ai mea e mafai ona fai, na i lo le mulimulitaʻia o ni faatonuga po o tulafono ua faatulaga mai. E fesoasoani iā i tatou ia faataunuuina a tatou matafaioi. Ae peitaʻi, o le faaaogā tatau o le mafaufau e lē suia ai le poto lea e tatau ona ave i fale. Ua faapea mai le Faataoto 1:5: “E faalogo mai le tagata poto, e tupu ai pea lona poto.” E ao foʻi ona tatou iloa ona iloiloina lelei faamatalaga e tatou te maua, ma faia ni faaiʻuga lelei e faavae ai. E fesoasoani lea iā i tatou e ‘savavali ai ma le poto’—Faataoto 28:26.

O le loto maulalo e fesootaʻi vavalalata ma le faaaogā tatau o le mafaufau. E ui lava e tatou te mananaʻo e fai le tele o tiute tauave, ae e tatou te taumafai e faaaogā le faautaga poto ma tausia le mea e gata mai ai lo tatou malosi. E moni o loo taʻu mai e le aposetolo o Paulo iā i tatou ia ‘alualu lo tatou faamalosi i le galuega a le Alii.’ (1 Korinito 15:58) Ae peitaʻi, e ao ona faapaleni lenei fautuaga ma mataupu silisili o loo i le Failauga 9:4: “E sili ona lelei o le ulī ua ola i le leona ua mate.” O le tausia lelei o lo tatou soifua mālōlōina a o tatou auauna iā Ieova e mafai ai ona umi lo tatou soifua ma faaauau ai pea ona auauna iā te ia. O le faaaogā tatau o le mafaufau e fesoasoani iā i tatou e paleni lelei ai, ma faia mea e talafeagai e aunoa ma le mou atu o lo tatou fiafia. Ioe, e tele aogā e maua pe a faaaogā tatau le mafaufau.

[Ata i le itulau 14]

O loo maua i le Tusi Paia le tele o fautuaga lelei

[Ata i le itulau 15]

O le faaaogā tatau o le mafaufau e maua i le mātauina o mea, le auala e toleniina ai, ma le iai o le poto masani