Ia Iloa Ala o Ieova

“Ia e faailoa mai iā te aʻu lou ala, ina ia ou iloa oe.”—ESOTO 33:13.

1, 2. (a) Aiseā na gaoioi ai Mose ina ua ia vaaia se tagata Aikupito o sauā i se Isaraelu? (e) O ā mea sa tatau ona aʻoaʻoina e Mose ina ia agavaa e auauna mo Ieova?

NA TAUSIA aʻe Mose i le aiga o Farao ma na aʻoaʻoina o ia e tusa ma le poto o tagata maualuluga o Aikupito. Ae ui i lea, na iloa e Mose, e lē o ia o se Aikupito. Na soifua mai o ia i ni mātua Eperu. Ina ua 40 ona tausaga, na alu atu ai o ia e asiasi i ona uso, le fanauga a Isaraelu. Na matuā lē fiafia Mose ina ua ia vaaia se tagata Aikupito o sauā i se Isaraelu. Na ia fasiotia le Aikupito. Na filifili Mose e ʻau ma tagata o Ieova ma na ia manatu e faaolaina e le Atua ona uso e ala iā te ia. (Galuega 7:21-25; Eperu 11:24, 25) Ina ua oo ina iloa le mea na tupu, sa manatu ai le aigātupu iā Mose o sē e fouvale, ma sa sola o ia ina ia faasao lona ola. (Esoto 2:11-15) Ina ia agavaa Mose e auauna mo le Atua e ao iā te ia ona masani lelei i ala o Ieova. Pe sa aʻoaʻogofie Mose?—Salamo 25:9.

² Na aumau Mose i se isi nuu mo le 40 tausaga ma sa galue o se leoleo mamoe. Na i lo le ita ona e foliga mai e leʻi talisapaia o ia e ona uso Eperu, na ia gauaʻi atu i mea e finagalo i ai le Atua. E ui lava na mavae atu le tele o tausaga ae leʻi amanaʻiaina lava o ia, sa usiusitai pea a o faatonuina o ia e Ieova. Mulimuli ane, i le taʻitaʻiga a le agaga paia ae e lē o sona lava manatu na ia tusi ai: “Na matuā agamalu lava le tagata nei o Mose, e sili lava i tagata uma o i le lalolagi.” (Numera 12:3) E tele tofiga maoaʻe na tuu atu e Ieova iā Mose. Pe afai tatou te saʻili foʻi i le agamalu, o le a faamanuia i tatou e Ieova.—Sefanaia 2:3.

Na Maua e Mose se Tofiga

3, 4. (a) O le ā le tofiga na maua e Mose mai iā Ieova? (e) O le ā le fesoasoani na saunia mo Mose?

³ I se tasi aso i tafatafa o le mauga o Horepa i le penisula o Sinai, na talanoa atu ai se agelu e fai ma sui o Ieova iā Mose. Na faatonuina Mose: “Ua ou matuā vaai atu i le puapuaga o [l]oʻu nuu o loo i Aikupito, ua ou faalogo foʻi i lo latou alaga ona o ē pule faasauā iā i latou, ua ou iloa foʻi lo latou tigā. O lenei, ua ou alu ifo, ou te laveaʻi mai iā te i latou ai lima o Aikupito, ma ou aveina aʻe i latou ai lea nuu i le nuu lelei ma le lautele, o le nuu o tafe ai le suāsusu ma le meli.” (Esoto 3:2, 7, 8) E tusa ai ma lenei tulaga, na iai galuega a le Atua e ao ona faia e Mose peitaʻi, e ao ona faataunuuina i le auala a Ieova.

⁴ Na faaauau atu le agelu a Ieova: “O lenei, inā sau ia, ou te auina atu oe iā Farao, ina ia e au mai loʻu nuu o le fanauga a Isaraelu mai Aikupito.” Na lē mautonu Mose. Na ia lagona e leai sona tomai e faataunuu ai lea tofiga, ma e moni e lē mafai ona ia faia i sona lava malosi. Ae peitaʻi, na faamautinoa atu e Ieova iā Mose: “Ou te iā te oe lava.” (Esoto 3:10-12) Na tuu atu e Ieova iā Mose le malosi e faia ai vavega e faamaonia ai ua auina moni atu o ia e le Atua. Na fuafua e ō Mose ma lona uso o Arona o lē o le a avea ma fofoga fetalai. E lē gata i lea, o le a faatonuina i laʻua e Ieova i le mea e taʻu atu ma le mea e fai. (Esoto 4:1-17) Pe sa faataunuuina ma le faamaoni e Mose lenā tofiga?

5. O ā uiga o Isaraelu na fai ma faalavelave iā Mose?

⁵ I le taimi muamua na talitonu toeaina o Isaraelu i le faamatalaga a Mose ma Arona. (Esoto 4:29-31) E leʻi umi lava ae tuuaʻia e  “matai o le fanauga a Isaraelu” Mose ma lona uso ona ua “inosia” i latou i luma o Farao ma ana auauna. (Esoto 5:19-21; 6:9) Ina ua tuua e Isaraelu Aikupito, na fefefe ona sa latou vaaia o tuliloa mai i latou e kariota a Aikupito. Na manatu Isaraelu ua leai so latou faamoemoe ona o loo i luma le Sami Ulaula a o tua atu o kariota o le taua ma na latou tuuaʻia Mose. O le ā sou lagona pe ana e iai i inā? E ui e leai ni vaa a tagata Isaraelu, ae i le taʻitaʻiga a Ieova na faamalosia ai tagata e Mose ina ia tapena a latou mea ma sauni e ō. Na vaeluaina e le Atua le Sami Ulaula ma matūtū ai le alititai ina ia mafai ona sopoʻia e Isaraelu.—Esoto 14:1-22.

Se Mataupu e Sili Atu Ona Tāua na i lo le Faasaoina

6. O le ā le mea na faamamafa e Ieova ina ua ia faatonuina Mose?

⁶ I le faatonuina o Mose, na faamamafa ai e Ieova le tāua o lona suafa. E tatau ona faatāuaina lea suafa ma ia faaaloalo i Lē ana lea suafa. Ina ua fesiligia Ieova e faatatau i lona suafa, na ia fetalai atu iā Mose: “E avea aʻu ma mea ou te loto i ai.” (NW) E lē gata i lea, e ao foʻi ona taʻu atu e Mose i le fanauga a Isaraelu: “Ua auina mai aʻu iā te outou e Ieova, le Atua o outou tamā, o le Atua o Aperaamo, o le Atua o Isaako, o le Atua foʻi o Iakopo.” Na faaopoopo atu Ieova: “O loʻu igoa lenā e faavavau, o laʻu faamanatuga lenā i lea tupulaga ma lea tupulaga.” (Esoto 3:13-15) O Ieova, o le suafa lea o loo iloa ai pea le Atua e ana auauna i le lalolagi uma.—Isaia 12:4, 5; 43:10-12.

7. O le ā na uunaʻia e le Atua Mose e fai e ui lava i le faasausili o Farao?

⁷ Na taʻu atu e Mose ma Arona la laʻua feʻau i le suafa o Ieova i luma o Farao. Peitaʻi, na faapea mai ma le faasausili Farao: “O ai ea Ieova ou te faalogo ai i lana upu, ma ou tuuina atu ai o Isaraelu e ō? Ou te leʻi iloa Ieova, ou te lē tuuina atu foʻi Isaraelu e ō.” (Esoto 5:1, 2) Na matuā lotomaaa ma piʻopiʻo Farao, ae na uunaʻia e Ieova Mose e feagai pea ma Farao ma faaoo atu le feʻau iā te ia. (Esoto 7:14-16, 20-23; 8:1, 2, 20) Na iloa atu e Mose ua ita Farao. Pe o le a iai se iʻuga lelei pe a toe fesagaʻia o ia? Na matuā naunau Isaraelu ia faasaʻolotoina i latou. Na maumauaʻi Farao e taofia i latou. Pe ana o oe o Mose, o le ā le gaoioiga e te ono faia?

8. O le ā le aogā o le auala na feutagaʻi ai Ieova ma Farao, ma e ao faapefea ona aafia ai i tatou i na mea tutupu?

⁸ Na toe taʻu atu foʻi e Mose se isi feʻau: “O loo faapea ona fetalai mai o Ieova le Atua o sa Eperū, Ia e tuu mai loʻu nuu e ō, ina ia latou auauna mai iā te aʻu.” Na toe fetalai atu foʻi le Atua: “O le a aʻu faaloaloa nei loʻu lima, ou te taia oe ma lou nuu i le faamaʻi, ina ia fano ai oe i le nuu. E moni lava, o le mea lava lea ua ou faatūina ai oe, ina ia ou faaali ai loʻu mana iā te oe, ma ia taʻua loʻu igoa i le lalolagi uma lava.” (Esoto 9:13-16) O le faasalaina o Farao lotomaaa, ua finagalo ai Ieova e faaalia lona mana i se auala e lapataʻia ai i latou uma o ē tetee iā te ia. E aofia ai ma Satani le Tiapolo, o lē na taʻua e Iesu Keriso o le “alii o lenei lalolagi.” (Ioane  14:30; Roma 9:17-24) E pei ona valoia, ua faalauiloa le suafa o Ieova i le lalolagi atoa. O lona faapalepale na faasaoina ai Isaraelu ma tagata ese e toʻatele, o ē na aufaatasi atu iā Isaraelu i le tapuaʻiga i le Atua. (Esoto 9:20, 21; 12:37, 38) Talu mai lea taimi, ua maua aogā mai le faalauiloaina o le suafa o Ieova e le faitau miliona o tagata o ē ua faia le tapuaʻiga moni.

Feagai ai ma se Nuu Faigatā

9. Na faaalia faapefea le lē ava o tagata o le nuu o Mose iā Ieova?

⁹ Na iloa e tagata Isaraelu le suafa o le Atua. Na talanoa atu Mose i lenā suafa iā i latou, ae latou te leʻi ava i taimi uma i Lē e ana lea suafa. Ina ua faatoʻa uma lava ona laveaʻiina faavavega e Ieova Isaraelu mai Aikupito, o le ā na tupu ina ua latou lē maua se vai e feinu ai? Na latou muimui faasaga iā Mose. Ona sosoo lea ma le faitio i meaʻai. Na lapataʻia i latou e Mose, o lo latou muimui e lē faasaga iā te ia ma Arona ae o Ieova. (Esoto 15:22-24; 16:2-12) I le mauga o Sinai, na avatu e Ieova iā Isaraelu le Tulafono ma faia foʻi ni faaaliga ofoofogia o lona mana. Peitaʻi, e leʻi usiusitai le nuu, ma sa latou faia se povi auro e tapuaʻi i ai ma faapea mai o loo latou faia “le tausamiga iā Ieova.”—Esoto 32:1-9.

10. Aiseā e tāua ai i ovasia Kerisiano i aso nei le talosaga a Mose lea o loo i le Esoto 33:13?

¹⁰ E ao faapefea ona feutagaʻi Mose ma tagata na taʻua e Ieova o ē faaua maaa? Na ole Mose iā Ieova: “Afai ua alofagia aʻu e oe, ia e faailoa mai iā te aʻu lou ala, ina ia ou iloa oe, ina ia alofagia aʻu e oe.” (Esoto 33:13) A o tausia Molimau a Ieova i aso nei e ovasia Kerisiano, ua latou leoleo i ni tagata e sili atu ona loto maulalo na i lo le nuu o Isaraelu. Ae ui i lea e tatalo atu foʻi ovasia e faapea: “Ieova e, ia e faailoa mai iā te aʻu ou ala; ia e aʻoaʻo mai iā te aʻu i ou magāala.” (Salamo 25:4) O le iloa o ala o Ieova, e mafai ai e ovasia ona feutagaʻi ma tulaga eseese i se auala e talafeagai ma le Afioga a le Atua ma e ōgatusa ma ona uiga.

Le Mea o Faafinagaloina e Ieova i Ona Tagata

11. O ā taʻiala na saunia e Ieova mo Mose, ma aiseā e ao ai ona tatou naunau i ai?

¹¹ O mea na finagalo ai Ieova i ona tagata, na ia fetalai atu ai iā Mose i le mauga o Sinai. Mulimuli ane na tuuina atu iā Mose papa maa e lua o loo tusia ai Tulafono e Sefulu. A o alu ifo Mose mai le mauga, na ia iloa ai tagata Isaraelu o loo tapuaʻi i se povi auro ma na ia togia i lalo ma le ita papa maa ma nutililii ai. Na toe tusia e Ieova Tulafono e Sefulu, i papa maa na tāina e Mose. (Esoto 32:19; 34:1) E leʻi suia lava nei Tulafono talu mai le uluaʻi taimi na avatu ai. Sa tatau iā Mose ona gaoioi e ōgatusa ma na tulafono. Na faamanino atu e le Atua iā Mose ona uiga, ma na iloa ai e Mose le auala e ao ona ia amioaʻi ai o se sui o Ieova. E lē o toe iai Kerisiano i lalo o le Tulafono a Mose, peitaʻi o mea na fetalai atu ai Ieova iā Mose, e aofia ai le tele o mataupu silisili po o upu moni faavae e lē suia ma e faaauau ona faatatau i tagata uma e tapuaʻi iā Ieova. (Roma 6:14; 13:8-10) Seʻi o tatou talanoaina nisi o na mea.

12. Sa ao faapefea i le tapuaʻi tau lava o Ieova ona aafia ai Isaraelu?

¹² Tapuaʻi tau lava o Ieova. Na iai le nuu o Isaraelu i le taimi ina ua faalauiloa atu e Ieova, e na te manaʻomia le tapuaʻi atu tau lava o ia. (Esoto 20:2-5) E anoanoaʻi faamaoniga na vaaia e Isaraelu e iloa ai o Ieova o le Atua moni. (Teuteronome 4:33-35) E tusa lava po o ā mea na faia e isi nuu, na faamanino mai e Ieova e lē faatagaina le ifo i tupua po o faiga faaagaga i ona tagata. O la latou tapuaʻiga iā te ia, e lē na o se mea e tau ina fai. E ao iā i latou uma ona alolofa iā Ieova  ma le loto atoa, agaga atoa, ma o latou malosi atoa. (Teuteronome 6:5, 6) E aofia ai a latou faamatalaga, amio ma vala uma o o latou olaga. (Levitiko 20:27; 24:15, 16; 26:1) Na faamanino mai foʻi e Iesu Keriso, e manaʻomia e Ieova le tapuaʻi atu tau lava o ia.—Mareko 12:28-30; Luka 4:8.

13. Aiseā sa ao ai ona matuā usiusitai Isaraelu i le Atua, ma o le ā e ao ona uunaʻia ai i tatou e usiusitai iā te ia? (Failauga 12:13)

¹³ Ia matuā usiusitai i tulafono a Ieova. Sa ao ona faamanatu atu iā Isaraelu, ina ua latou ulu atu i le feagaiga ma Ieova, na latou tautō e matuā usiusitai iā te ia. Na latou olioli i le faia o le tele o filifiliga a le tagata lava ia peitaʻi, e ao ona matuā usiusitai i tulafono ia na avatu e Ieova iā i latou. O le faia faapea, o le faamaoniga lea o le alofa i le Atua ma o le a maua ai e i latou ma a latou fanau aogā, talu ai o tulafono a Ieova e mo lo latou lelei.—Esoto 19:5-8; Teuteronome 5:27-33; 11:22, 23.

14. Na faapefea ona faamamafa e le Atua iā Isaraelu le tāua o le faamuamua o mea faaleagaga?

¹⁴ Ia faamuamua mea faaleagaga. Sa lē tatau i le nuu o Isaraelu ona faamuamua manaʻoga faaletino ma lē amanaʻia ai manaʻoga faaleagaga. Sa lē tatau ona alu lo latou taimi atoa i le saʻilia o meafaitino. Sa faatulaga ese e Ieova taimi i vaiaso taʻitasi ua ia filifilia e paia, e faia ai gaoioiga o le tapuaʻiga i le Atua moni. (Esoto 35:1-3; Numera 15:32-36) I tausaga taʻitasi, e faatulaga ese ai se taimi e faapitoa mo faapotopotoga paia. (Levitiko 23:4-44) Na saunia ai avanoa e talanoaina ai gaoioiga mamana a Ieova, faamanatu ai ona ala ma faaalia ai le loto faafetai iā te ia mo lona agalelei. A o tapuaʻi atu le nuu i le Atua, e faatupuina ai lo latou matataʻu ma alolofa iā te ia ma fesoasoani iā i latou e savavali i ona ala. (Teuteronome 10:12, 13) Ua maua e auauna a Ieova i aso nei aogā mai upu moni faavae o loo maua i na faatonuga.—Eperu 10:24, 25.

Talisapaia Uiga o Ieova

15. (a) Aiseā na aogā ai iā Mose le talisapaia o uiga o Ieova? (e) O ā fesili e ono fesoasoani iā i tatou e manatunatu loloto ai i uiga taʻitasi o Ieova?

¹⁵ Na fesoasoani le talisapaia o uiga o Ieova iā Mose e feutagaʻi ai ma tagata. Ua taʻua i le Esoto 34:5-7 na afio ane Ieova i luma o Mose ma faalauiloa atu: “O Ieova, o Ieova, o le Atua alofa mutimutivale ma le alofa fua, e telegese lona toʻasā, a e tele le alofa ma le faamaoni; o lē tausi le alofa e oo atu i afe o tupulaga; o lē faamagalo foʻi i le amiolētonu ma le solitulafono ma le agasala, a e lē faasaoina lava e ia o ē agasala; a e taui atu e ia le agasala a mātua i a latou fanau ma le fanau a latou fanau, e oo i le tolu ma le fā o tupulaga.” Ia manatunatu loloto i na upu. Fesili ifo iā te oe: ‘O le ā le uiga o na uiga taʻitasi? Na faapefea ona  faaalia e Ieova nei uiga? E mafai faapefea e ovasia Kerisiano ona faaalia nei uiga? E faapefea ona aafia ai mea tatou te faia i nei uiga taʻitasi?’ O le a tatou talanoaina ni faaaʻoaʻoga.

16. Aiseā e tāua ai ona tatou talisapaia le alofa mutimutivale o le Atua?

¹⁶ O Ieova, o le “Atua alofa mutimutivale ma le alofa fua.” I nisi taimi e faaitiitia ai le faasalaga ona o le alofa mutimutivale o Ieova. Ua uunaʻia ai le Atua e aumaia se mapusaga i tagata. O le faamaoniga o lenei mea, na saunia e le Atua mea faaletino ma le faaleagaga mo Isaraelu i la latou malaga a o leʻi oo atu i le Nuu Folafolaina. (Teuteronome 1:30-33; 8:4) Na alofa mutimutivale Ieova i ona tagata ma faamagalo a latou mea sesē. E matuā tāua tele la i ana auauna i aso nei, ona alofa o le tasi i le isi!—Mataio 9:13; 18:21-35.

17. E faapefea i lo tatou iloa o le alofa fua o Ieova ona faaauiluma ai le tapuaʻiga moni?

¹⁷ E vaavaalua le alofa mutimutivale o Ieova ma lona alofa fua. O le a faapefea ona e faamatalaina le uiga o le ‘alofa fua’? Ia faatusatusa i mau o loo faapea mai o Ieova e alofa fua. Ua faaalia i le Tusi Paia, o le alofa fua o Ieova e aofia ai lona manatu mamafa i ona tagata ua lē tagolima. (Esoto 22:26, 27) I so o se atunuu lava, e ono oo i ē e lē o ni tagata moni o le nuu ma isi foʻi, ni tulaga faigatā. Ina ua aʻoaʻoina ona tagata e aua le faailoga tagata ma ia agalelei atu, na faamanatu atu e Ieova sa avea foʻi i latou ma tagata ese i Aikupito. (Teuteronome 24:17-22) Ae faapefea i tatou o tagata o le Atua i aso nei? E fesoasoani le alofa ma le agalelei e autasia ai i tatou ma tosina mai ai isi i le tapuaʻiga iā Ieova.—Galuega 10:34, 35; Faaaliga 7:9, 10.

18. O ā mea ua tatou iloa mai tuutuuga a Ieova iā Isaraelu e faatatau i amioga a isi nuu?

¹⁸ O le alofa mo tagata o isi nuu, sa lē tatau ona faalēaogā ai le alofa o Isaraelu mo Ieova ma le naunau i ana tapulaa tau amio. O lea la, na faatonuina ai Isaraelu e aua le mulimuli i ala o isi nuu na siomia ai i latou pe faia a latou tū faaletapuaʻiga ma amioga lē mamā. (Esoto 34:11-16; Teuteronome 7:1-4) E faatatau foʻi lenā mea iā i tatou i aso nei. E ao ona paia i tatou, auā e paia lo tatou Atua o Ieova.—1 Peteru 1:15, 16.

19. E faapefea ona puipuia ona tagata ona o le malamalama i le silafaga a Ieova i le faia o le mea sesē?

¹⁹ Ina ia mautinoa ua malamalama Mose i ala o Ieova, na ia faamanino atu e ui lava e  lē fiafia lona finagalo i le agasala, ae e telegese lona toʻasā. Na tuu le avanoa i tagata e aʻoaʻoina ai ana tulafono ma ola e ōgatusa ai. E faamagalo e Ieova agasala pe a salamō, peitaʻi e lē faasaoina i latou ua faia agasala matuiā ma ua tatau i ai le faasalaga. Na ia lapataʻia Mose, e mafai ona manuia pe malaia tupulaga i le lumanaʻi ona o gaoioiga a Isaraelu. O le talisapaia o ala o Ieova, o le a lē tuuaʻia ai o ia e ona tagata mo mea e tutupu ona o lo latou lava faatamala po o le faia o se faaiʻuga e faapea, e faifailemū o ia.

20. O le ā e fesoasoani iā i tatou e feutagaʻi lelei ai ma uso talitonu ma i latou e tatou te feiloaʻi i le talaʻiga? (Salamo 86:11)

²⁰ Pe afai o e faanaunau e faaloloto lou iloa o Ieova ma ona ala, ia faaauau ona faia suʻesuʻega ma manatunatu loloto pe a e faitauina le Tusi Paia. Ia suʻesuʻe vala eseese o uiga matagofie o Ieova. Ia iloilo faatasi ma le tatalo le auala e te ono faaaʻoaʻo ai i le Atua ma faaōgatusa lou olaga ma lana fuafuaga. O le a fesoasoani iā te oe e ʻalofia faigatā, feutagaʻi lelei ma uso talitonu ma fesoasoani i isi ia iloa ma alolofa i lo tatou Atua ofoofogia.

O le ā ua E Aʻoaʻoina?

• Aiseā na tāua ai iā Mose le agamalu, ma aiseā e tāua ai foʻi iā i tatou?

• O ā aogā na maua ona o le feutagaʻi soo ma Farao ma taʻu i ai o afioga a Ieova?

• O ā nisi o mataupu silisili po o upu moni faavae na aʻoaʻoina ai Mose ma e faatatau foʻi iā i tatou?

• E faapefea ona faalolotoina lo tatou malamalama i uiga o Ieova?

[Fesili mo le Suʻesuʻega]

[Ata i le itulau 21]

Na faaoo atu ma le faamaoni e Mose afioga a Ieova iā Farao

[Ata i le itulau 23]

Na faailoa atu e Ieova ana tulafono iā Mose

[Ata i le itulau 24]

Ia manatunatu loloto i uiga o Ieova