Pe Mafai e Tagata Ona Faamuta le Mativa?

E FAITAU miliona tagata ua soifua aʻe e leʻi oo i se tulaga mativa. E leʻi oo lava i ai le moe fia ʻai po o le lē lava o mea e ʻafu ai i le pō. Ae peitaʻi, o le toʻatele o i latou na, e lagona le tigā alofa i tagata matitiva ma taumafai e fesoasoani atu iā i latou.

E ui i lea, o loo tumau pea ona avea le tulaga mativa ma āuga leaga i tagata ua mafatia i taua a le atunuu lava latou, o lologa, lāmala, ma isi lava faafitauli. O tulaga nei ua matuā aafia ai tagata Aferika o ē faalagolago i nai fua o le faatoʻaga e ola ai. Ua ō ese faamalosi nisi mai o latou aiga ma ō atu i taulaga tetele, po o le ola foʻi o ni tagata sulufaʻi i se isi atunuu. O isi tagata e nonofo i nuu maotua ua ō atu i taulaga ona ua faasesēina i latou i folafolaga faapea e maua ai se olaga lelei.

O le ola feomaʻi i taulaga e masani lava ona tupu aʻe ai le mativa. E matuā laʻitiiti lava sina avanoa pe a fai e iai, e totō ai ni laau mo meaʻai. E masani lava ona faigatā ona maua ni galuega. Ona o le lē iloa e tagata o le mea a fai, ua liliu atu ai le toʻatele e ola i ni olaga solitulafono. Ua tagi mai tagata o loo nonofo i le taulaga mo se fesoasoani, ae ua lē mafai e malo ona foʻia le faatupulaʻia o lenei faafitauli o le mativa. I le toe tepa i le lipoti a Malo Aufaatasi na faasalalauina iā Novema 2003, na taʻua ai e le nusipepa Independent a Lonetona e faapea: “Ua faasolo ina faatoʻateleina tagata fia aai i le lalolagi.” Na toe faaopoopo mai: “I le lalolagi atoa, ua iai se fuafaatatau e 842 miliona tagata ua lē lava meaʻai—ma ua faasolo ina faatupulaʻia lenā fuainumera, lea ua faaopoopo atu i ai le 5 miliona tagata fia aai i tausaga taʻitasi.”

E iai taimi e maua ai e le ofisa o le lālā a Molimau a Ieova i Aferika i Saute ni tusi mai tagata ua matuā matitiva lava. O se faataʻitaʻiga, na tusi mai se tamāloa mai Bloemfontein e faapea: “E leai saʻu galuega, ma ou te gaoi i le taulaga pe a maua se avanoa. Afai ou te lē gaoi, e matou te fia aai mo le tele o aso—ae lē faitaulia ai le mafatia i le mālūlū. Ua matuā leai lava se galuega. E toʻatele ua feoaʻi solo i auala e suʻe galuega faapea ma se mea e ʻai. Ua ou iloa nisi ua vane i luga lapisi mo le saʻilia o ni meaʻai. O nisi ua pule i ola. O le toʻatele o tagata e pei o aʻu, ua matuā lotomafatia ma lē tagolima. Ua foliga mai ua leai se faamoemoe mo le lumanaʻi. Pe lē o silafia mai ea lenei tulaga e le Atua o lē na foafoaina i tatou ma le manaʻoga ia aai ma maua lavalava e oofu ai?”

O loo iai ni tali mautinoa i popolega o lenei tamāloa. E pei ona faaalia i le mataupu o loo sosoo mai, e maua tali i le Afioga a le Atua le Tusi Paia.