‘O Loʻu Fesoasoani e Mai iā Ieova Lea’

Ua Faamalosia Aiga i le Poto Mai le Atua

O LE “Pā i Perelini.” O le taʻu lenā a se ulugalii faaipoipo i Anitenitina i se pā na la fausia e vaeluaina ai lo la fale! Sa iai ni feeseeseaʻiga i lo la va na matuā lē mafai lava ona foʻia; ua matuā lē mafai ona feagai le tasi ma le isi.

E faanoanoa, ona e lē na o le ulugalii lenei e aafia i lea tulaga. Ua pagatia le tele o aiga i puapuaga, le lē faamaoni, ma le matuā feitagaʻi lava. O se mea e faanoanoa ai lenei tulaga, ona o le aiga o se sosaiete o tagata na faatulaga e le Atua lava ia. (Kenese 1:27, 28; 2:23, 24) O lenei meaalofa mai le Atua o se faatulagaga lelei mo le faaalia o le alofa loloto. (Ruta 1:9) E ala i le faataunuuina o o latou tiutefai faale-Atua, o le a mafai ai e tagata taʻitoʻatasi o le aiga ona āva iā Ieova ma avea ai o se puna o le fiafia o le tasi ia le isi. *

Ona o le Atua o ia na faatulagaina aiga, e tatou te manaʻomia ai manatu o le Atua e taʻitaʻia ai lo tatou malamalamaga i le auala e faafoeina ai se aiga. Ua saunia e lana Afioga le tele o fautuaga aogā ua faatulaga e fesoasoani i aiga ina ia taulau ai, aemaise lava pe a tulaʻi mai ni faigatā. E tusa ai ma le matafaioi a tane, ua faapea mai le Tusi Paia: “O loo faapea ona tatau ona alolofa o tane i a latou lava avā, faapei o latou lava tino.” Pe a faataunuuina e le tane lenei manaʻoga, o le a avea o se mea fiafia i lana avā le avatu o le ‘āva i lana tane.’—Efeso 5:25-29, 33.

Na tusi le aposetolo o Paulo e tusa ai ma le faiā a mātua ma a latou fanau e faapea: “O outou tamā foʻi, aua neʻi tou faaonoono atu i a outou fanau, a ia tausi atu i ai i aʻoaʻiga ma apoapoaʻiga a le Alii.” (Efeso 6:4) O le a maua ai se tulaga māfana i totonu o le aiga, lea e faigofie ai e fanau ona usiusitai i o latou mātua.—Efeso 6:1.

O manatu e pei ona taʻua, ua faataʻitaʻia ai le lelei o fautuaga a le Tusi Paia mo le olaga i le aiga. O le faatatauina o aʻoaʻoga a le Atua, ua maua ai e le toʻatele o tagata le olioli i olaga faaleaiga. O se faaaʻoaʻoga, o le ulugalii i Anitenitina lea na taʻua i le amataga. Ina ua la suʻesuʻeina le Tusi Paia faatasi ma Molimau a Ieova mo le tolu masina, na amata loa ona la faatatauina fautuaga atamai e faatatau i faaipoipoga. Na la taumafai malosi ina ia faaleleia a la fesootaʻiga, ma malamalama i manaʻoga o le tasi, ma ia fefaamagaloaʻi. (Faataoto 15:22; 1 Peteru 3:7; 4:8) Ua la iloa pulea lo la ita ma vaai i le Atua mo se fesoasoani pe a foliga mai ua tau lē mafai ona pulea le tulaga o mea. (Kolose 3:19) E leʻi umi, ae toe solofa i lalo le “Pā i Perelini!

E Faamalosia e le Atua se Aiga

O le mauaina o le poto ma faatatauina faatulagaga a le Atua, e faamalosia ai se aiga e tumau i lalo o tulaga faigatā. E tāua lenei mea, ona na valoia o le a matuā osofaʻia lava le faatulagaga o aiga i o tatou aso. Na valoia e Paulo le faaleagaina o tulaga tau amio faapea ma le sosaiete o tagata i o tatou aso. Na ia faapea mai “o ona aso e gata ai” o le a iloga i le lē faamaoni, leai se “lotoaiga,” ma le lē usiusitai i mātua, e oo lava iā i latou o “ē ua peiseaʻī ua amio Atua.”—2 Timoteo 3:1-5, LT.

 O le taumafai e faafiafia le finagalo o le Atua, e fesoasoani e faafetaiaʻia ai na āuga leaga i le aiga. E toʻatele aiga ua iloa, o se vaifofō faaleagaga e manaʻomia e faafetaiaʻia ai le tele o luʻi latou te fesagaʻi. Pe afai e faanaunau tagata o le aiga e tausia se faiā lelei ma le Atua, e tatau ona latou faatatauina mataupu silisili o le Tusi Paia ma iloa e faapea, “afai e lē atiina aʻe e Ieova le fale, e galulue fua i latou o ē atiina aʻe.” (Salamo 127:1) O le taulau e aupito sili ona lelei i le siitia o le fiafia i le aiga, e sau mai le faamuamua o le Atua i le olaga faaleaiga.—Efeso 3:14, 15.

Sa iloa e se tamāloa i Hawaii e igoa iā Dennis le saʻo o lenā mea. E ui lava na faapea mai o ia o se Kerisiano, ae sa avea upu masoā ma misa o se vaega o lona olaga. Ina ua uma lana auaunaga faavaegāʻau, na oo ina sili atu ona sauā ma loto ita. Na taʻua e faapea: “E masani lava ona ou aafia i feteenaʻiga, ou te lē popole lava po o le ā e tupu iā te aʻu, ma sa ou lē fefe i le oti. Sa faaauau pea ona ou faia faamatalaga tutui ma le misa. Sa faalaeiau aʻu e laʻu avā o se tasi o Molimau a Ieova e suʻesuʻe le Tusi Paia.”

Na teena e Dennis taumafaiga a lana avā. Ae peitaʻi, o le amio lelei faa-Kerisiano a lana avā na tau feoloolo ifo ai ona uiga leaga na iai. Na oo lava ina ō Dennis i se sauniga faa-Kerisiano ma lana avā ma le fanau. Ina ua uma lenā, ona amata lea o sana suʻesuʻega faale-Tusi Paia, ma faia se agaʻigaʻi i luma i ana taumafaiga. Na ia tuua le ulaula o se amioga sa ia faia mo le 28 tausaga, ma taofia le faatasitasi ma uō na faia mea uma ia na ia taumafai e foʻia. E faafetaia Ieova, o le tala lea a Dennis: “Ua faaleleia loʻu olaga faaleaiga. Ua matou ō uma o se aiga i sauniga ma le talaʻiga. Ua lē o toe fefefe laʻu fanau e toʻalua iā te aʻu ona ua ou iloa pulea loʻu ita, ma tuu le faaaogā o upu masoā. Ua matou talanoa ma fiafia i le faia o talanoaga faale-Tusi Paia. Pe ana ou lē suʻesuʻeina le Tusi Paia, po o penei ou te lē o i inei i le asō; ona e ese loʻu itaitagofie.”

E mafai ona maua e aiga le fiafia pe a latou galulue mamafa i le faia o le finagalo o Ieova. O mea na tutupu ua iloa ai faapea, e tusa lava pe e na o le toʻatasi le tagata o le aiga e faatatauina mataupu silisili o le Tusi Paia, ae e sili atu ona lelei na i lo le leai lava o se tasi e faia faapea. O le atiina aʻe o se aiga Kerisiano e lē o se mea faigofie, e manaʻomia ai le tomai ma le taimi. Ae o tagata o na aiga ua latou maua le faamautinoaga faapea o le a tauia e Ieova a latou taumafaiga i le atiina aʻe o aiga. E mafai ona latou faaleo atu upu a le faisalamo e faapea: ‘O loʻu fesoasoani e mai iā Ieova lea.’—Salamo 121:2.

[Faamatalaga pito i lalo]

[Faamatalaga faaopoopo i le itulau 9]

O le Atua “ua faaigoaina ai le aiga uma o i le lagi atoa ma le lalolagi.”—EFESO 3:15

[Pusa i le itulau 8]

E MATUĀ TĀUA IĀ IEOVA LE FUAFUAGA O LE AIGA

“Ua faamanuia foʻi e le Atua iā te i laʻua, ma ua fetalai atu le Atua iā te i laʻua, Ia fanafanau ia, ma ia uluola, ma ia tumu ai le lalolagi.”—Kenese 1:28.

“Amuia i latou uma o ē matataʻu iā Ieova . . . E avea lau avā pei o le vine fua tele mai i totonu o lou fale.”—Salamo 128:1, 3.